Ekihikire n’Ekitahikire: Obuhabuzi Oburukukora

Tekerezaaho enyikara ez’emiringo ena omu bwomeezi nambere obukaikuru n’obukaikuru bw’abantu beegere ngu obuhabuzi bwa Baibuli nibukora kandi nibwesigwa.

1. Obuswere

Abaswerangaine nibegondeza omu kumara hamu obwire.

Abantu baine enteekereza ezirukwahukana obukirukuhika ha buswere n’ebirukwetaagisa kusobora kutunga obuswere oburumu okusemererwa.

BAIBULI EKY’EGAMBA: “Baitu nomulinywe omuntu wena agonzege mukaziwe nkauwe wenka; kandi nomukazi atinege iba.”—Abefeso 5:33.

EKIKIRUKUMANYISA: Ruhanga nuwe yatandikisize enteekaniza ey’obuswere, nahabweki namanya abaswerangaine ekibasobora kukora kuba n’okusemererwa. (Marako 10:6-9) Abaswerangaine batunga okusemererwa buli omu obwateeka omutima ha kyasemeriire kukora kugumya obuswere, baitu hatali ha kyasemeriire kutunga. Nyineeka ow’agonza mukazi we akyoleka kuraba omu mulingo amutwazaamu n’omulingo amufaaho. Kandi nyinabwenge ow’ateekamu iba ekitiinisa, akyoleka kuraba omu mulingo abaza nauwe n’omulingo amutwazaamu.

OBUHABUZI BWA BAIBULI NIBUKORA: Quang na Thi, kuruga omu ihanga lya Vietnam, baayehurraga ngu tibasobora kutunga obuswere oburumu okusemererwa. Emirundi erukukira obwingi, Quang tiyayolekaga embabazi. Nagamba ati: “Tinafaahoga omulingo Thi yayehurraga kandi emirundi nyingi namuswazaaga.” Thi akaba acwiremu ngu bagaitururwe. Nagamba ati: “Nkehurra ntakyasobora kwesiga rundi kuteekamu ibanyowe ekitiinisa.”

Hanyuma, Quang na Thi bakeega Baibuli eky’eyegesa hamu n’omulingo basobora kukorra ha buhabuzi obuli omu Abefeso 5:33 omu buswere bwabo. Quang nagamba ati, “Orukarra runu rukankonyera kurora habwaki nsemeriire kwoleka embabazi, n’okuleetera Thi kwehurra nagonzebwa kandi nafiibwaho omu byetaago eby’omubiri n’omu nyehurra. Obunkikora, angonza muno kandi anteekamu ekitiinisa.” Kandi Thi uwe nagamba ati, “Obunyeyongera kuteeka omu nkora obuhabuzi obuli omu Abefeso 5:33 kandi nkateekamu ibanyowe ekitiinisa, nukwo ayeyongera kundetera kwehurra ningonzebwa, nyine obulinzi, kandi nyine obusinge.”

Kumanya ebirukukiraho ebirukukwata ha buswere, soma Awake! Na. 2 2018, enyakwine omutwe “Ensita 12 ez’Amaka Agarumu Okusemererwa” ha jw.org.

Omukazi nakonyera abaswerangaine kutunga ekibarukuserra omu duuka. Abatwaza omu mulingo ogw’embabazi n’obukiraaba ngu nibazooka kubi kandi baine tatu nyingi ha mibiri yabo.

2. Omulingo gw’Okutwazaamu Abandi

Abantu bakira kutwaza kubi abandi habw’erangi yabo, ihanga lyabo, omulingo barukuzookamu, ediini yabo, rundi enteekereza y’omuntu obukirukuhika ha kuterana.

BAIBULI EKY’EGAMBA: “Mutemu ekitinisa abantu bona.”—1 Petero 2:17.

EKIKIRUKUMANYISA: Baibuli teyegesa ngu tusemeriire kunoba abantu ab’erangi ezindi, rundi ab’ihanga erindi, rundi abakuhya. Oihireho, etwekambisa kuteekamu ekitiinisa abantu boona, kababe b’erangi ki, ihanga ki, rundi banaku rundi baguuda. (Engeso Ezabakwenda 10:34) N’obukiraaba ngu titurukwikiranganiza n’ebintu abantu abandi baikiririzaamu rundi omulingo betwaza, nabwo tusemeriire kubatwaza omu mulingo ogw’embabazi kandi ogw’ekitiinisa.—Matayo 7:12.

OBUHABUZI BWA BAIBULI NIBUKORA: Daniel akeegesebwa kurora abantu abarukuruga omu kizinga kya Asia nk’abarukwija kuhikyaho ihanga lye akabi. Akatandika kunoba buli omu wena kuruga omu kizinga kya Asia kandi emirundi erukukira obwingi yabajumaga omurwijwire. Daniel nagamba ati, “Nkateekereza ngu nkaba ninsagika ihanga lyange. Ntakiteekerezeeho nakake ngu entekereza yange n’omulingo nayetwazaamuga, byali bigwire.”

Hanyuma, Daniel akeega Baibuli ekyeyegesa. Daniel nagamba ati, “Nkaba nyine kuhindurra kimu enteekereza yange. Nkaba nyine kurora abantu omulingo Yahwe abaroramu—ekirukumanyisa ngu itwena tuli bantu bamu katube nituruga nkaha.” Daniel abazaaho omulingo arukwehurra hati obwatangatangana abantu. Nagamba ati: “Tinkira kuteekerezaaho nambere barukuruga. Hati ningonza abantu boona kandi nyine abanywani nfenanfe kuruga omu nsi yoona.”

Kumanya ebirukukiraho, soma Awake! Na. 3 2020, enyakwine omutwe “Haroho Ekisobora Kumaraho Okusoroorangana?” ha jw.org.

Omusaija ali omu motoka y’ebyokulya naheereza kasitoma.

3. Sente

Abantu baingi balengaho kuserra obuguuda kusobora kuba n’okusemererwa hamu n’akasumi ak’omumaiso akarungi.

BAIBULI EKY’EGAMBA: “Baitu amagezi rukomero, nkefeza okuziri orukomero: baitu okumanya nikyo kirukukirra, amagezi okulinda obwomezi bwogu [anyinago].”—Omugambizi 7:12.

EKIKIRUKUMANYISA: Nitwetaaga sente, baitu tizisobora kutuha okusemererwa kwonyini n’akasumi ak’omumaiso akarungi. (Enfumo 18:11; 23:4, 5) Oihireho, okusemererwa kwonyini n’akasumi ak’omumaiso akarungi, bisigikirra ha kuteeka omu nkora amagezi ga Ruhanga agarukusangwa omu Baibuli.—1 Timoseo 6:17-19.

OBUHABUZI BWA BAIBULI NIBUKORA: Cardo, omusaija arukuruga omu ihanga lya Indonesia, akateeka omutima ha kutunga itungo. Nagamba ati, “Nkaba nyine ebintu byona abantu abarukukira obwingi ebibegomba. Nkaba ninsobora kugenda engendo, kugura ebintu ebya sente nyingi, motoka, n’amaju.” Baitu sente ez’akaba aine, zitaikaleho. Cardo nagamba ati, “Omuntu akambiiha yanyiba sente zange zoona ha murundi gumu, ezinkaba mmazire emyaka egi yoona ninkorra. Nkaba nkozeseze obwomeezi bwange bwona kutunga itungo, baitu ha kumalirra nkahwamu amaani habwokuba ntasigaze ekintu kyona kandi nkehurra nk’ow’ataine mugaso.”

Cardo akatandika kuteeka omu nkora obuhabuzi bwa Baibuli oburukukwata ha sente. Hati takyateeka omutima ha kuserra itungo baitu acwiremu kuba n’obwomeezi obwanguhire. Nagamba ati, “Hati nimpurra nyine obuguuda bwonyini habwokuba nyine enkoragana enungi na Ruhanga. Ninsobora kubyama kurungi kandi nyine okusemererwa kwonyini.”

Kumanya ebirukukiraho ha mulingo Baibuli ebazaaho sente, soma ekicweka “Obwegese Rundi Sente Nyingi Nibisobora Kukukonyera Kuba n’Obwomeezi Oburungi?” omu Omunaara gw’Omulinzi Na. 3 2021, ha jw.org.

4. Kuterana

Abantu baine entekereza ezirukwahuka obukirukuhika ha kuterana okurukwikirizibwa.

BAIBULI EKY’EGAMBA: “Mulekere kimu obusihani, omuntu wena omulinywe amanye okulema omubirigwe wenka omu kwezebwa nekitinisa, hatali omumukoijo gw’okwegomba, nka Bamahanga abatamanyire Ruhanga.”—1 Abasesalonika 4:3-5.

EKIKIRUKUMANYISA: Baibuli etugambira nambere tusemeriire kugarukira obukirukuhika ha kwoleka enyehurra ez’okuterana. Ekigambo “obusihani” nikitwarramu, kuterana n’omuntu ow’otali nauwe omu buswere, obwamalaya, kuterana hagati y’abantu babiri abatali omu buswere, obukuhya, hamu n’okuterana n’ebisoro. (1 Abakolinso 6:9, 10) Okuterana kiri kisembo kuruga hali Ruhanga ekyahaire omusaija n’omukazi abaswerangaine.—Enfumo 5:18, 19.

OBUHABUZI BWA BAIBULI NIBUKORA: Omukazi kuruga Australia arukwetwa Kylie nagamba ati: “Nk’omuntu atakataahire obuswere, nkaba ninteekereza ngu kakuba nteerana, nakwehuliire ningonzebwa kandi nyine obulinzi. Baitu eki tinukwo kyabaire. Nkehurra nyeralikiriire kandi ntarukugonzebwa.”

Hanyuma, Kylie akeega kandi yateeka omu nkora Baibuli ekyeyegesa ha kuterana. Nagamba ati, “Hati ninkirora ngu endengo za Ruhanga ziroho kutulinda kutahikwaho obusaasi. Hati ninyehurra nyine obulinzi kandi ningonzebwa habw’okukora ebintu omu mulingo Yahwe arukugonza. Kuteeka omu nkora obuhabuzi bwa Baibuli kinkonyiire kutahikwaho ebizibu bingi!”

Kumanya ebirukukiraho, soma ekicweka ekiine omutwe, “Baibuli Egamba Ki ha Musaija n’Omukazi Abaikara Hamu Batali omu Buswere?” ha jw.org.

Omuhangi waitu atukonyera kumanya ekihikire n’ekitahikire. Nobukiraaba ngu kworobera ekyarukutugambira obwire obumu tikyanguha, baitu kirugamu ebirungi. Nitukigumya ngu nikiija kutuleetera okusemererwa okw’ebiro n’ebiro.

Omusaija ow’ayolekerwe omu bicweka ebihoire narubatira omu kahanda akafunzire kandi akesimbire akaroho orujegere. Orutindo n’omutwe gw’orusozi nibirengerwa.