Baibuli Egamba Ki ha Musaija n’Omukazi Abaikara Hamu Batali omu Buswere?

Eky’okugarukamu Kuruga omu Baibuli

Baibuli egamba ngu Ruhanga nagonza abantu ‘balekere kimu obusiihani.’ (1 Abasesalonika 4:3) Ekigambo “obusiihani” obukikozesebwa omu Baibuli, kiba nikitwarramu kuterana aheeru y’obuswere, ebikorwa eby’obukuuhya, n’okuterana hagati y’omusaija n’omukazi abatali omu buswere.

• Habwaki Ruhanga nagonza omusaija n’omukazi batunge obuswere obuhikire?

• Ruhanga arora ata omusaija n’omukazi ababanza kwikara hamu kurora obubaraaba basemeriirengana?

• Abali omu buswere nibasobora bata kugumya obuswere bwabo?

Habwaki Ruhanga nagonza omusaija n’omukazi batunge obuswere obuhikire?

• Entekaniza y’obuswere eruga hali Ruhanga. Akabutandikaho obuyateranize hamu omusaija n’omukazi ab’okubanza. (Okubanza 2:22-24) Ekaba etali ntekaniza ya Ruhanga omusaija n’omukazi kwikara hamu batali omu buswere.

• Ruhanga n’amanya ekirukukirayo oburungi hali abantu. Akaba nagonza obuswere hagati y’omusaija n’omukazi bube bw’orutekerro nukwo bubagasire kandi boona babe n’obulinzi. Tekerezaaho ekyokurorraho kinu. Nk’okw’ogura ekintu kandi okatunga oburagirizi kuruga ha muntu ayakikozere nibukwoleka omulingo osobora kukikozesa kurungi, oburagirizi bwa Ruhanga butugambira omulingo tusobora kwombeka enkoragana enungi n’ab’omu maka gaitu. Endengo za Ruhanga zikonyera abo abazihondera.—Isaya 48:17, 18.

  

• Kuterana aheeru y’obuswere kirugamu ebizibu eby’amaani. Eky’okurorraho, kirugamu enda ezitetekaniriizibwe, endwaire ezijaanjazibwa kuraba omu kuterana, n’okurwara ebitekerezo.a

• Ruhanga akaha abasaija n’abakazi obusobozi bw’okuzaara kurabira omu kuterana. Ruhanga arora obwomeezi n’obusobozi bw’okuzaara nk’eby’omuhendo. Nagonza naitwe tubirole nk’eby’omuhendo obu nituteekamu ekitiinisa entekaniza y’obuswere. Abaheburaniya 13:4.

Ruhanga arora ata omusaija n’omukazi ababanza kwikara hamu kurora obubaraaba basemeriirengana?

Omusaija n’omukazi kubanza kwikara hamu batakatahire obuswere tinikyo kiretera obuswere kuba bw’obusinguzi. Oihireho, enkoragana ey’eyongera kuguma kakuba abagirumu baba bacweriremu kimu kwikara hamu, kandi bakakorra hamu kumaraho ebizibu.b Obuswere bugumya encwamu ey’okwikara hamu.—Matayo 19:6.

Abali omu buswere nibasobora bata kugumya obuswere bwabo?

Busaho buswere obuhikiriire. Baitu, abaswerangaine nibasobora kuba n’obuswere oburungi kakuba bateeka omu nkora emisingi ya Baibuli. Emu ha misingi niyo enu:

• Webembeze ebyetaago eby’owoli nauwe omu buswere kukira ebyawe.—1 Abakolinso 7:3-5; Abafiripi 2:3, 4.

• Kurakuraniza okugonza kandi otekemu ekitiinisa owoli nauwe omu buswere.—Abefeso 5:25, 33.

• Werinde omulingo obazaamu.—Enfumo 12:18.

• Ganyira bwangu kandi obe n’okugumiisiriza.—Abakolosai 3:13, 14.