Yegera ha Bwekambi bwa Yesu omu Kutebeza

1. Mulingo ki ogumu ogwahukaniza abaheereza ba Ruhanga hali ensi?

KIMU ha bintu ebyahukaniza abaheereza ba Yahwe hali abantu abeeyeta Abakristaayo, nubwo obwekambia bwabo omu buheereza. (Tit. 2:14) Obwire obumu nikisobora kukugumira kwehurra oine obutagasi obukirukuhika ha kutebeza. Obundi nosobora kwehurra nk’omugurusi omu ow’ekitebe ow’arukukora n’amaani ayagambire ati, “Obwire obumu nyehurra ntaine ekihika eky’okutebeza.”

2. Obwire obumu, kiki ekisobora kutulemesa kwikazaaho obwekambi bwaitu omu buheereza?

² Nitusobora kuba nitwegondeza muno omu miringo endi ey’obuheereza kukira nk’oku turukwegondeza omu mulimo gw’okutebeza. Habwaki? Habwokuba obu twejumbira omu miringo endi ey’obuheereza nk’okwejumbira omu kwombeka ebyombeko by’ekitebe, kukonyera abahikirweho ebigwererezi, hamu n’okugarramu ab’oruganda na banyaanya itwe amaani, tukira kurora ebirungi ebirukurugamu ahonaaho. Twegondeza omu businge hamu n’okugonza ebiri hagati y’ab’oruganda na banyaanya itwe obu tuba nitukorra hamu na bo kandi tumanyire ngu ebi tubakorra nibisiimwa. Ha rubaju orundi, nitusobora kuba tumazire emyaka nyingi nitutebeza omu kiikaro nikyo kimu, baitu niharugamu abantu bake muno abarukuhuliiriza. Rundi nitusobora kutangatangana abantu abatarukugonza kuhurra obutumwa bwaitu. Ekindi, tukimanyire ngu nk’oku empero eriyo nirra haihi, abantu nibaija kweyongera kutuhakaniza. (Mat. 10:22) Kiki ekisobora kutukonyera kwikazaaho rundi kwongera ha bwekambi bwaitu omu mulimo ogw’okutebeza?

3. Enkarra eziri omu Luka 13:​6-9 nizooleka zita obwekambi bwa Yesu?

³ Nitusobora kwegera ha kyokurorraho kya Yesu obukirukuhika ha mulingo tusobora kuba abekambi omu mulimo gw’okutebeza. Omu buheereza bwe, ataleke kwekamba. Kandi, hanyuma y’obwire kurabaho, akongera ha buheereza bwe. (Soma Luka 13:​6-9.) Kusisanaho n’omusaija ow’akaba naarolerra omusiri gw’emizabbibbu ayamazire emyaka esatu naarolerra omuti gw’omutiini ogwalemere kwana ebijuma, na Yesu akamara emyaka esatu naatebeza Abayudaaya, baitu baingi hali bo batamuhuliirize. Baitu, nk’oku ow’arukurolerra omuti gw’emizabbibbu ataralekere kuba n’okunihira omu muti gw’omutiini, Yesu na uwe ataleke kutebeza abantu rundi kukeehya ha buheereza bwe. Oihireho, akongeramu amaani kusobora kuhika ha mitima yabo.

4. Bintu ki ebimu ebi tusobora kwegera ha kyokurorraho kya Yesu?

⁴ Omu kicweka kinu, nitwija kubazaaho omulingo Yesu yayolekere obwekambi, kukira muno omu myezi mukaaga ey’okumalirra ey’obuheereza bwe. (Rora “After these things” study note on Luke 10:1.) Kwega ebi yayegeseze n’okwegera ha bintu yakozere, nikiija kutukonyera kuba bekambi kasumi kanu. Leka tubazeeho ebintu bbina ebi tusobora kwegera hali Yesu: (1) Akateeka omutima ha kukora Yahwe ebi agonza, (2) akateeka omutima ha bunabbi bwa Baibuli, (3) akeesiga Yahwe kumusagika, kandi (4) akaikara aine okunihira ngu abantu abamu nibaija kumuhuliiriza.

AKATEEKA OMUTIMA HA KUKORA EBINTU YAHWE AGONZA

5. Yesu akooleka ata ngu akaba ataire omutima ha kukora Ruhanga ebi agonza?

⁵ Yesu akatebeza n’obwekambi “amakuru amarungi ag’Obukama” habwokuba akaba akimanyire ngu nugwo omulimo Ruhanga akaba naagonza akole. (Luk. 4:43) Yesu akebembeza obuheereza omu bwomeezi bwe. N’obu akaba ali haihi kumaliiriza obuheereza bwe, yagendaga “omu mbuga zoona, n’omu byaro byona,” naayegesa abandi. (Luk. 13:22) Ekindi, akatendeka abegeswa abandi kukorra hamu na uwe nk’abatebezi.—Luk. 10:1.

6. Omulimo ogw’okutebeza gukwatagana guta n’obujunanizibwa obundi obu tusobora kutunga? (Rora n’ekisisani.)

⁶ N’akasumi kanu, okutebeza amakuru amarungi guli mulimo omukuru Yahwe na Yesu ogu barukugonza tukole. (Mat. 24:14; 28:​19, 20) Haroho akakwate k’amaani hagati y’omulimo gw’okutebeza hamu n’obujunanizibwa obundi obw’ekitebe. Ekyokurorraho, twombeka ebyombeko by’ekitebe rundi tuheereza ha Beseeri kusobora kusagika omulimo gw’okutebeza. Tukonyera abahikirweho ebigwererezi, hatali habw’okusagika ab’oruganda na banyaanya itwe kyonka, baitu n’okubakonyera kwongera kwejumbira omu nteekaniza yabo ey’eby’omwoyo ey’erukutwarramu n’okutebeza. Obu tumanyirra obukuru bw’omulimo gw’okutebeza kandi tukaijuka ngu nugwo omulimo omukuru Yahwe agu arukugonza tukole, nikiija kutwekambisa kwikara nitwejumbira omu mulimo gw’okutebeza. János, ow’arukuheereza nk’omugurusi omu Hungary, naagamba ati: “Nyikara ninyijuka ngu busaho bujunanizibwa bwona omu kitebe obusobora kugaruka omu kiikaro ky’omulimo ogw’okutebeza; nubwo bujunaanizibwa bwaitu oburukukirrayo kimu obukuru.”

7. Habwaki Yahwe naagonza twikale nitutebeza? (1 Timoseo 2:​3, 4)

⁷ Nitusobora kugumya obwekambi bwaitu omu buheereza kuraba omu kurora abantu omu mulingo Yahwe abaroramu. Naagonza abantu baingi bahurre amakuru amarungi kandi bagoorobere. (Soma 1 Timoseo 2:​3, 4.) Egi niyo ensonga habwaki atutendeka kuba abatebezi abarungi obu turukuba nitugambiraho abantu obutumwa oburukujuna obwomeezi. Ekyokurorraho, burocuwa Gonza Abantu—Obafoole Abageswa erumu amagezi agasobora kutukonyera kutandika kubaza n’abantu n’ekigendererwa eky’okubafoora abegeswa. Abantu n’obu baakwanga kutuhuliiriza kasumi kanu, nibasobora kutunga omugisa ogw’okukikora omuhito omwingi gutakahoire. Ebintu ebitubagambira kasumi kanu, nibisobora kuba nibyo birukwija kubaleetera kugira eki baakoraho omu kasumi ak’omumaiso. Baitu eki nikisobora kubaho kakuba twikara nitutebeza.

AKATEEKA OMUTIMA HA BUNABBI BWA BAIBULI

8. Kumanya obunabbi bwa Baibuli kikakwataho kita omulingo Yesu yakozesezeemu obwire bwe?

⁸ Yesu aketegereza omulingo obunabbi bwa Baibuli bwakuhikiriziibwe. Akaba akimanyire ngu obuheereza bwe nibwija kumara emyaka esatu n’ekicweka yonka. (Dan. 9:​26, 27) Ekindi, akaba amanyire obunabbi oburukukwata ha nidi obu yaakufiire n’omulingo yaakufiiremu. (Luk. 18:​31-34) Habwokuba Yesu akaba amanyire obunabbi obwarangirwe, akakozesa obwire bwe omu mulingo ogurukukirayo oburungi. Ekyarugiremu, akatebeza n’obwekambi kusobora kumaliiriza omulimo ogu akaba ahairwe.

9. Kwetegereza obunabbi bwa Baibuli nikitwekambisa kita kutebeza n’obwekambi?

⁹ Kwetegereza obunabbi bwa Baibuli nikisobora kutuleetera kutebeza n’obwekambi. Tukimanyire ngu omu kasumi akatali ka hara, obusinge bunu nibwija kuhwaho. Tukimanyire ngu ebintu ebirukubaho kasumi kanu hamu n’engeso eziri omu bantu, nibyoleka ekintu Baibuli eki yarangire ekyakwolekere ngu tuli omu biro ebya ha mpero. Nitwetegereza nk’oku okurwanisangana okuli hagati y’obulemi kirimaani obwa Bungereza na Amerika hamu na Russia n’amahanga agarukugisagika nikuhikiiriza obunabbi oburukukwata ha mukama w’obukizi bw’emoso n’omukama w’obukizi bw’obulyo “omu kasumi akaha mpero.” (Dan. 11:40) Ekindi, nitukyetegereza ngu obulemi kirimaani obwa Bungereza n’Amerika nibukikiirwa ebigere by’ekisisani ekirukubazibwaho omu Danieri 2:​43-45. Nitukigumiza kimu ngu, nk’oku obunabbi burukwoleka, omu kasumi akatali ka hara, Obukama bwa Ruhanga nibwija kuhwerekereza gavumenti z’abantu. Obunabbi bunu bwona nibwolekera kimu nambere tuli kandi nibutwekambisa kukozesa obwire bwaitu omu mulingo ogurukukirayo oburungi kutebeza amakuru amarungi.

10. Miringo ki endi obunabbi bwa Baibuli butwekambisa kwongera ha bwekambi bwaitu?

¹⁰ Ekindi, obunabbi bwa Baibuli butuha obutumwa obu tutebeza n’ekihika. Munyaanya itwe ow’arukwetwa Carrie ow’arukwikara omu Dominican Republic naagamba ati “Emirago ya Yahwe ey’omu kasumi ak’omumaiso ey’erukuhuumuza enyekambisa kugambiraho abandi amananu. Ayongera agamba ati: “Obu ndora abantu ebi barukurabamu kasumi kanu, nkyetegereza ngu emirago egi teri yange nyenka baitu na bo n’ebagasira.” Obunabbi bwa Baibuli butwekambisa kutaleka kutebeza habwokuba tukimanyire ngu Yahwe naasagika omulimo gwaitu ogw’okutebeza. Munyaanya itwe Leila, ow’arukwikara omu Hungary, naagamba ati: “Enkarra eziri omu Isaya 11:​6-9 zinyekambisa kutebeza amakuru amarungi na hali abo abazooka nk’abatarukwija kugaikiriza. Nkimanyire ngu habw’obukonyezi bwa Yahwe omuntu weena naasobora kuhinduka.” Kandi ow’oruganda ow’arukwetwa Christopher, kuruga omu Zambia, naagamba ati: “Nk’oku Ekyahandiikirwe ekiri omu Marako 13:10 kyarangire, amakuru amarungi galiyo nigatebezebwa omu nsi yoona kandi nimpurra nyine omugisa gw’amaani kukonyera omu kuhikiiriza obunabbi bunu.” Bunabbi ki obwa Baibuli obukwekambisa kwikara n’otebeza?

AKEESIGA YAHWE KUMUSAGIKA

11. Habwaki Yesu akaba naayetaaga kwesiga Yahwe kumukonyera kusobora kugumizaamu naatebeza n’obwekambi? (Luka 12:​49, 53)

¹¹ Yesu akesiga Yahwe kumukonyera kwikara naatebeza n’obwekambi. N’obu kiraaba ngu Yesu yatebezaaga omu mulingo gw’amagezi, akaba akimanyire ngu amakuru amarungi ag’Obukama gaakulesereho okwebaganizaamu kandi galeeteho n’okuhakanizibwa okw’amaani. (Soma Luka 12:​49, 53.) Abebembezi b’amadiini batagonze ebintu Yesu yatebezaaga, nahabweki emirundi nyingi bakalengaho kumwita. (Yoh. 8:59; 10:​31, 39) Baitu Yesu akagumizaamu naatebeza habwokuba akaba akimanyire ngu Yahwe akaba naamusagika. Akagamba ati: “Tindi nyenka baitu ndi hamu na Isenyowe ayantumire. . . . Atandekeho habwokuba nyikara ninkora ebintu ebirukumusemeza.”—Yoh. 8:​16, 29.

12. Yesu akateekaniza ata abegeswa be kugumizaamu nibatebeza n’obu baakuhikwaho okuhakanizibwa?

¹² Yesu akaijukya abegeswa be ngu bakaba nibasobora kwesiga Yahwe kubasagika. Emirundi nyingi akabaijukya ngu Yahwe akaba naija kwikara naabakonyera n’obu bakuhikwaho okuhiiganizibwa. (Mat. 10:​18-20; Luk. 12:​11, 12) Baitu nabwo, akabatererra kuba bantu abarukwegendereza. (Mat. 10:16; Luk. 10:3) Akabaragira kutahambiriza obutumwa bwabo hali abantu abatarukugonza kuhuliiriza. (Luk. 10:​10, 11) Kandi akabagambira kwiruka kakuba bahiiganizibwa. (Mat. 10:23) N’obu kiraaba ngu Yesu aka ali mwekambi kandi yayesigaga Yahwe, yayetantaraga enyikara ez’akabi obu yabaga naasobora.—Yoh. 11:​53, 54.

13. Habwaki nosobora kukigumya ngu Yahwe naija kukukonyera?

¹³ Kasumi kanu, nitwetaaga obukonyezi bwa Yahwe kusobora kwikara nitutebeza n’obwekambi n’obu turukuba nituhiiganizibwa. (Kus. 12:17) Habwaki nosobora kukigumya ngu Yahwe naija kukusagika? Tekeerezaaho esaara ya Yesu ey’erukusangwa omu Yohana esuura 17. Yesu akasaba Yahwe kulinda abakwenda be, kandi Yahwe akagarukamu esaara ye. Ekitabu kya Ebikorwa by’Abakwenda kyoleka omulingo Yahwe yakonyiiremu abakwenda kutebeza n’obwekambi n’obu kiraaba ngu bakaba nibahiiganizibwa. Ekindi, omu saara ye, Yesu akasaba Yahwe kulinda abo abakwikiririize omu butumwa bw’abakwenda kandi bakafooka abegeswa be omu kasumi ak’omumaiso otwaliremu na iwe. Yahwe takalekere kugarukamu esaara Yesu ei yasabire; naija kukukonyera nk’oku yakonyiire abakwenda.—Yoh. 17:​11, 15, 20.

14. Nitukimanya tuta ngu nitwija kusobora kwikara nitutebeza n’obwekambi? (Rora n’ekisisani.)

¹⁴ Nk’oku empero eriyo nirra haihi, nikisobora kweyongera kuguma kutebeza amakuru amarungi n’obwekambi, baitu nabwo nitwija kutunga obusagiki obu turukwetaaga. (Luk. 21:​12-15) Kusisanaho na Yesu hamu n’abegeswa be, tuleke abantu becweremu kutuhuliiriza rundi nangwa kandi twetantale kuteera na bo empaka. N’omu biikaro nambere omulimo gwaitu gutangirwe, ab’oruganda basoboire kwikara nibarangirra amakuru amarungi habwokuba nibesiga Yahwe hatali amaani gaabo. Nk’oku Yahwe yahaire amaani abaheereza be ab’omu kyasa eky’okubanza, n’omu kasumi kanu Yahwe naatuha amaani nukwo ‘tuhikirize kurungi okutebeza kwaitu’ nk’oku arukugonza. (2 Tim. 4:17) Nosobora kukigumya ngu obu orayesiga Yahwe, noija kusobora kwikara notebeza n’obwekambi.

AKAIKARA AINE ENTEEKEREZA ENUNGI

15. Kiki ekirukwoleka ngu Yesu akaba aine entekereza enungi ha buheereza?

¹⁵ Yesu akaikara aine enteekereza enungi ha mulimo ogw’okutebeza. Eki kikamukonyera kwikara aine obutagasi omu buheereza bwe. Ekyokurorraho, ha kumalirra kw’omwaka gwa 30 Y.A.K., Yesu, akakirora ngu abantu baingi bakaba beteekaniize kuhuliiriza amakuru amarungi kandi akabalengesaniza n’omusiri oguhikire kugeswa. (Yoh. 4:35) Hanyuma y’omwaka nka gumu, akagambira abegeswa be ati: “Eby’okugesa bingi.” (Mat. 9:​37, 38) Kandi hanyuma akongera yabatererra ati: “Eby’okugesa bingi . . . Musabe Mukama w’okugesa asindike abakozi omu mulimo gw’okugesa.” (Luk. 10:2) Yesu ataleke kunihira ngu abantu nibasobora kuhuliiriza amakuru amarungi, kandi yasemererwaga obu bakikoraga.—Luk. 10:21.

16. Ebyokurorraho bya Yesu nibyoleka bita ngu akaba aine enteekereza enungi ha buheereza? (Luka 13:​18-21) (Rora n’ekisisani.)

¹⁶ Yesu akeegesa abegeswa be kwikara baine enteekereza enungi ha butumwa bwabo, ekyakubakonyiire kwikara baine obwekambi. Ekyokurorraho, teekerezaaho ebyokurorraho bye bibiri. (Soma Luka 13:​18-21.) Yesu akakozesa akajuma aka karadaali kwegesa ngu obutumwa bw’Obukama bwakweyongiire omu mulingo ogurukuhuniriza kandi ngu busaho ekyakubulemeseze kugumizaamu nibweyongera. Kandi akakozesa ekitumbisa kwoleka nk’oku obutumwa bw’Obukama bwakujanjaire muno kandi buleeteho empindahinduka ezikaba zitarukwija kurorwa ahonaaho. Emirundi nyingi Yesu akakonyera abegeswa be kukirora ngu obutumwa obu bakaba nibatebeza bwakurugiremu obusinguzi.

17. Nsonga ki ezi twine ezisemeriire kutuleetera kwikara twine enteekereza enungi ha buheereza?

¹⁷ Obu tuteekerezaaho ebintu ebirukuhikiirizibwa omu nsi yoona kasumi kanu, kitwekambisa kwikara nitutebeza n’obwekambi. Buli mwaka, obukaikuru n’obukaikuru bw’abantu abarukugonza kumanya amananu baija ha Kiijukyo kandi batandika kwega na itwe Baibuli. Abantu baingi babatizibwa kandi batweteeranizaaho omu mulimo gw’okutebeza. Titumanyire omulingo baingi barukwija kwetwaza obu turabatebeza amakuru amarungi, baitu nitukimanya ngu Yahwe aliyo naasoroza ekitebe ekingi abaraakiraho omuhito omwingi ogurukwija. (Kus. 7:​9, 14) Mukama w’okugesa nakyagumizaamu kurora abantu abasobora kworobera amakuru amarungi, nahabweki twine ensonga enungi ey’erukutuleetera kwikara nitutebeza.

18. Kiki eki turukugonza abandi barole?

¹⁸ Abegeswa ba Yesu baikaire nibamanyirwa ha bwekambi bwabo obw’okutebeza. Abantu obu baarozere abakwenda nibatebeza n’obumanzi hamu n’obutagasi, ‘bakakyetegereza ngu baikaraga na Yesu.’ (Ebik. 4:13) Obu turaaba tuli omu buheereza, leka abantu bakirole ngu nitwegera ha kyokurorraho kya Yesu eky’obwekambi.