Kiki Eki Oraakora Kwoleka ngu Noosiima habw’Ekicunguro?

1-2. Ekicunguro kya Yesu kisemeriire kutuhambiriza kukora ki, kandi habwaki? (2 Abakolinso 5:​14, 15) (Rora n’ekisisani.)

KAKUBA oba okwatiire omu bitafaali by’ekyombeko ekigwire, kandi omuntu akakukoonyera akakwihamu, noosobora kwehurra ota hali omuntu ogu? Noobu kiraaba ngu ajunire baingi, noija kumusiima kandi okole kyona ekirukusoboka kwoleka ngu tolyebwa eki akukoliire.

² Nkooku kyayolekerwe omu kicweka ekyahoire, titusobora kwejuna hali ebintu ebyaleserwe ekibi eki twagwetiirwe. Baitu ekicunguro kya Yesu nikisobora kutujuna kuraba (1) omu kuganyirwa ebibi, (2) okutuha okunihira okw’okuba abahikiriire omu kasumi ak’omumaiso (3) nookwongera kuteeranizibwa hamu na Ruhanga. Habw’ensonga egi, twine okunihira okw’okwomeera ebiro n’ebiro omu nsi ya Yahwe empyaka. Mali ekicunguro nikyoleka okugonza Yesu oku ainiire abantu—kandi akaba aine okugonza oku kuruga kara noobu akaba atakaizire omu nsi. (Nfu. 8:​30, 31) Omukwenda Paulo akahandiika naagamba ati: “Okugonza kwa Kristo nikutuhambiriza.” (Soma 2 Abakolinso 5:​14, 15.) Kinu nikimanyisa ngu okugonza kwa Yesu kusemeriire kutuleetera kugira eki twakoraho kwoleka ngu nitusiima habw’okugonza oku yatwolekere kandi ngu nitwijuka ekintu eki yatukoliire.

3. Habwaki omulingo buli omu arukwoleka okusiima habw’ekicunguro nigusobora kwahukana?

³ Noosobora kwoleka ota ngu noosiima habw’ekicunguro? Eky’okugarukamu kyawe hali ekikaguzo eki nikisobora kwahukana hali eky’omuntu ondi. Kumanya ensonga habwaki, teekerezaaho ekyokurorraho kinu: Teeramu akasisani, abantu basatu nibagonza kugenda omu kiikaro kimu, baitu buli omu naaruga omu rubuga orurukwahukana. Emihanda ei baraarabamu niija kuba neeyahukana. Omulingo nugwo gumu, omuhanda ogu oraakozesa kuhika ha kigendererwa kyawe eky’okwoleka okusiima habw’ekicunguro nigwija kusigikirra ha nkoragana ei oine na Yahwe kasumi kanu. Nahabweki ekicweka kinu nikiija kubazaaho abantu ab’emiringo esatu: (1) abeegi ba Baibuli, (2) Abakristaayo ababatiziibwe, hamu (3) n’abo abahoirwemu amaani.

ABEEGI BA BAIBULI

4. Yahwe arora ata abeegi ba Baibuli?

⁴ Obu oraaba nooyega Baibuli, teekerezaaho kinu: Habwokuba nooyega Baibuli, nikyoleka ngu oli omu h’abantu Yahwe abaarukucunda kusobora kuba n’enkoragana enungi na uwe. (Yoh. 6:44; Ebik. 13:48) ‘Yahwe ayekebiija emitima.’ Kinu nikimanyisa ngu naarora amaani ag’otamu kumwegaho, kandi asemererwa obu arora ngu nookora empindahinduka noosigikirra ha ndengo ze. (Nfu. 17:3; 27:11) Ekicunguro kikusobozesa kutunga enkoragana enungi na Yahwe. (Bar. 5:​10, 11) Eki kintu kikuru muno eki otasemeriire kwebwa.

5. Omwegi wa Baibuli naasobora ata kuta omu nkora obuhabuzi oburukusangwa omu Abafiripi 3:16?

⁵ Obu oraaba nooyega Baibuli, noosobora ota kwoleka ngu noosiima habw’ekicunguro? Gumu ha miringo osobora kukikoramu nukwo kuhondera obuhabuzi bwa Paulo hali Abafiripi, oburukugamba buti: “Hoona nambere tuhikire omu kukurakurana, leka tugumizeemu kurubata kurungi omu muhanda gunu gwonyini.” (Baf. 3:16) Empindura endi eya Baibuli ehindura orukarra runu eti: “Tusemeriire kwikara nitugendera omu muhanda ogu turumu.” Kusigikirra ha buhabuzi obu, tosemeriire kwikiriza ekintu kyona kukulemesa kugumizaamu noogendera omu muhanda ogw’obwomeezi.—Mat. 7:14; Luk. 9:62.

6. Kiki abeegi ba Baibuli eki basobora kukora kakuba kiba nikibagumira kukora empindahinduka? (Ekyebiragiro 30:​11-14) (Rora n’ekisisani.)

⁶ Kiki eki osobora kukora kakuba kikugumira kwikiriza enyegesa ya Baibuli ei waakaruga kwega? Kora okuseruliiriza ha nyegesa egi kandi osabe Yahwe akukoonyere kugyetegereza kurungi. (Zab. 86:11) Baitu nabwo kakuba kikugumira kugyetegereza, banza ogireke—baitu otaleka kwega Baibuli. Kandi kiki eki osobora kukora kakuba kikugumira kuleka kukora ekintu ekirukubiihiza Yahwe? Ijuka ngu Yahwe tasobora kusaba abantu abatahikiriire kukora ebintu ebi batarukusobora. Kinu nikimanyisa ngu noosobora kworobera endengo ze. (Soma Ekyebiragiro 30:​11-14.) Kandi Yahwe naaraganiza kukukoonyera. (Is. 41:​10, 13; 1 Kol. 10:13) Nahabweki otahwamu amaani. Omu kiikaro ky’okuta omutima ha bizibu ebi orukurabamu, gute ha bintu byona Yahwe ebi akukoliire otwaliiremu n’enteekaniza y’ekicunguro. Obu oraayeyongera kugonza Yahwe noija kukyerorra ngu “ebiragiro bye tibirukulemeera.”—1 Yoh. 5:3.a

7. Kiki abato abarukukuzibwa abazaire abali omu mananu eki basemeriire kuteekerezaaho?

⁷ Yahwe ayehurra ata hali inywe abato abarukukuzibwa abazaire abali omu mananu? Na inywe muli beegi ba Baibuli. Amananu gali, niinywe abeegi ba Baibuli abarukukirayo obukuru hali abazaire baanyu. Baibuli egamba ngu: “Mwirre haihi na Ruhanga, kandi na uwe naija kubairra haihi.” (Yak. 4:8; 1 Byom. 28:9) Kakuba obanza kugira eki wakoraho kwirra haihi na Yahwe, na uwe naija kukwirra haihi. Yahwe tarukukufaaho ngu habwokuba okuliire omu ka y’Abakaiso ba Yahwe. Naakufaaho habwokuba naagonza otunge enkoragana enungi na uwe. Kiki Yahwe eki akozere kurora watunga enkoragana enungi na uwe? Akuhaire ekicunguro—kandi otalyebwa ekisembo kinu eky’omuhendo. (Bar. 5:​1, 2) Otakabaireho ha Kiijukyo eky’omwaka gunu, habwaki oteecumiitirizaaho ekicunguro eki kirukumanyisa hali iwe? Leka ekiteekerezo eki kikwekambise kweteeraho ekigendererwa eky’eby’omwoyo kwoleka ngu noosiima habw’ekicunguro, Yahwe eki yahaireyo kuraba omu Mwana we.b

ABAKRISTAAYO ABABATIZIIBWE

8. Abakristaayo ababatiziibwe boolekere bata ngu nibaikiririza omu kicunguro?

⁸ Obu oraaba oli Mukristaayo ow’abatiziibwe, omazire ira kwoleka okwikiriza kwawe omu kicunguro omu miringo nyingi. Ekyokurorraho, okakora empindahinduka omu bwomeezi bwawe kusobora kwirra haihi na Yahwe n’okuhondera endengo ze. Okoorobera ekiragiro kya Yesu eky’okufoora abantu abeegeswa kuraba omu kubagambiraho ha kwikiriza kwawe. Okeehayo hali Yahwe kandi wabatizibwa. Waakahikirweho okuhakanizibwa habw’okucwamu kuheereza Yahwe? (2 Tim. 3:12) Okugumiisiriza kwawe kali kokurorraho akarukwoleka ngu noogonza Yahwe kandi ngu noosiima habw’ekicunguro eki yahaireyo kuraba omu Mwana we.—Baheb. 12:​2, 3.

9. Kabi ka mulingo ki Abakristaayo ababatiziibwe aka basemeriire kwegendereza?

⁹ Nk’Abakristaayo ababatiziibwe, haroho akabi aka tusemeriire kwegendereza. Hanyuma y’okurabaho obwire, nitusobora kutandika kwebwa obukuru bw’ekicunguro. Eki nikisobora kubaho kita? Teekerezaaho Abakristaayo ab’omu kyasa eky’okubanza ab’omu Efeeso. Yesu ow’akaba ahumbuukire akabasiima habw’okugumiisiriza kwabo. Baitu akabagambira ati: “Kinu nikyo ndukukujunaana, olekere okugonza oku okaba oine ha kubanza.” (Kus. 2:​3, 4) Nkooku ebigambo bya Yesu birukwoleka, okuramya kw’Omukristaayo nikusobora kugenderra mporampora kukafooka kw’okuhikiiriza buhikiiriza omukoro kwonka. Omuntu nk’ogu naasobora kuba naasaba, naagenda omu nsorrokano, naayejumbira omu buheereza, baitu naabikora kuhikiiriza omukoro kwonka. Ebintu ebi naaba atakyabikora habw’okugonza. Kiki eki osobora kukora kakuba oyehurra ngu okugonza oku oiniire Yahwe tikukyali kw’amaani nkooku kukaba kuli ha kubanza?

10. Noosobora ota kuta omu nkora ebigambo Paulo yagambiire Timoseo? (1 Timoseo 4:​13, 15)

¹⁰ Omukwenda Paulo akagambira Timoseo ‘kwikara naayecumiitirizaaho’ kandi ‘naataho muno omutima’ ha mirimo ye ey’Ekikristaayo. (Soma 1 Timoseo 4:​13, 15.) Kusigikirra ha buhabuzi obu, na iwe noosobora kuteekerezaaho omulingo osobora kwikara nooyekamba omu buheereza bwawe hali Yahwe. (Bar. 12:11; Rora study note on “Be aglow with the spirit.”) Ekyokurorraho, noosobora kutunga obwire obw’okuteekaniza ensorrokano. Kinu nikiija kukukoonyera kutaho omutima obu orukuba oli omu nsorrokano. Rundi noosobora kugenda omu kiikaro ekiculiire obu orukuba nooyesomesa Baibuli, kandi kinu nikiija kukukoonyera kuteekerezaaho ebi orukusoma n’okugasirwa omu kwesomesa kwawe. Nkooku kyetaagisa kwikara nitwongera enku omu murro kwikara nigwaka, omulingo nugwo gumu osemeriire kwikara noota omu nkora ebintu binu nukwo bikukoonyere kwongera kwoleka okusiima habw’ebintu byona Yahwe ebi akuhaire otwaliiremu n’ekicunguro. Ekindi, omu wiiki nke Ekiijukyo kitakabaireho, noosobora kuteekerezaaho ebintu ebirungi ebi orukwegondezaamu omu bwomeezi habw’okuba omu h’Abakaiso ba Yahwe. Hataroho kugurukyagurukya, kinu nikiija kukukoonyera kweyongera kusiima habw’ekicunguro, Yahwe eki asigikirraho kurora watunga enkoragana enungi hamu na uwe.

11-12. Kakuba oba otaine obwekambi habw’akacu kake, nikimanyisa ngu tokyaine omwoyo gwa Ruhanga? Soborra. (Rora n’ekisisani.)

¹¹ Obu oraaba nooyehurra ngu tokyaine bwekambi omu buheereza bwawe hali Yahwe, otahwamu amaani rundi okateekereza ngu tokyaine omwoyo gwa Ruhanga. Ijuka ekintu omukwenda Paulo yahandiikiire Abakolinso, ekirukukwata ha buheereza bwe, akabagambira ngu: “Noobu nkikora mpambiriziibwe, nimba nkyaine obukeeto obwankwasiibwe.” (1 Kol. 9:17) Kiki eki akaba naamanyisa?

¹² Paulo na uwe obwire obumu yayehurraga ataine kihika eky’okutebeza. Baitu akaba acweriiremu kimu kwikara naatebeza noobu yabaga ataine kihika. Na iwe noosobora kukora ekintu nikyo kimu. Cweramu kimu kukora ekintu ekihikire noobu orukuba noohurra ngu toine kihika eky’okukikora. Nahabweki, saba Yahwe akuhe “okugonza n’amaani ag’okukora.” (Baf. 2:13) Ikara nooyejumbira omu bintu eby’omwoyo. Kigumye ngu hanyuma y’obwire, ebikorwa byawe nibiija kukwataho enyehurra zaawe kandi kinu nikiija kukukoonyera kweyongera kugonza Yahwe n’okuba mwekambi omu buheereza bwawe.

13. Nitusobora tuta kwikara nitwekebera kurora obu turaaba tuli “omu kwikiriza”?

¹³ Hanyuma y’akasumi, kirungi kwikara nitwekebiija enyikara yaitu kusigikirra ha buragirizi oburukusangwa omu 2 Abakolinso 13:​5, aharukugamba ngu: “Mwikale nimwekebera kurora obu muraaba muli omu kwikiriza; mwikale nimwerengesa nukwo mumanye kiki kyonyini eki muli.” Nitusobora kwikara nitwekaguza ebikaguzo nka binu: ‘Ninyebembeza Obukama omu bwomeezi bwange?’ (Mat. 6:33) ‘Eby’okwesemeza byange nibyoleka ngu ninnoba ebintu ebibi?’ (Zab. 97:10) ‘Ndeetaho obusinge hamu n’obumu hagati y’ab’oruganda hamu na banyaanya itwe?’ (Bef. 4:​2, 3) Kikuru muno kuteekerezaaho ebintu binu kukira muno omu kasumi ak’Ekiijukyo habwokuba nikiija kutukoonyera kweyongera kusiima Yahwe na Yesu, habw’ekintu eki baatukoliire, nookwoleka ngu titurukwomeera habwaitu itwenka baitu nitwomeera habwa Kristo.c

ABAHOIRWEMU AMAANI

14. Kiki ekisobora kuleetera Abakristaayo abamu kuhwamu amaani?

¹⁴ Abakristaayo abamu bahoirwemu amaani hanyuma y’okumara emyezi nke nibaheereza Yahwe kandi abandi na hanyuma y’okumara emyaka nyingi bali beesigwa. Habwaki? Abamu bahoirwemu amaani habw’okwetuntura okw’obwomeezi. (Luk. 21:34) Abandi bakatabaijuka habw’ebigambo rundi ebikorwa eby’ow’oruganda rundi munyaanya itwe. (Yak. 3:2) Kandi abandi bakeejumbira omu bibi eby’amaani kandi nibaswara kusaba obukoonyezi. Obu oraaba ohoirwemu amaani, kiki ekisobora kukukoonyera noobu kiraaba ngu haroho ensonga eyakuleetiire kuhwamu amaani? Ekicunguro hamu n’okugonza Yahwe na Yesu oku bakwiniire nibikwekambisa kukora ki?

15. Yahwe ayoleka ata ngu naafaaho Abakristaayo abahoirwemu amaani? (Ezekyeri 34:​11, 12, 16)

¹⁵ Teekerezaaho omulingo Yahwe ayehurra hali abo abahoirwemu amaani. Tababiihirirwa kandi tabeebwa. Oihireho akora kyona ekirukusoboka kubaserra. Abaliisa, kandi abakoonyera kwongera kugaruka hali uwe. (Soma Ezekyeri 34:​11, 12, 16.) Yahwe naasobora kuba aliyo naakukorra ekintu nikyo kimu. Habwaki nitugamba tuti? Habwokuba oliyo noosoma ekicweka kinu, nikyoleka ngu nookyagonza kumusemeza. Ha kubanza, Yahwe akakuroramu ekintu ekirungi kandi yakucunda kwija omu mananu kandi naakyakuroramu ebintu ebirungi kandi naagonza oyongere obe omu ka ye.

16. Kiki ekisobora kukoonyera abo abahoirwemu amaani kwongera kutunga enkoragana enungi na Yahwe? (Rora n’ekisisani.)

¹⁶ Burocuwa erukwetwa Return to Jehovah erumu ebigambo binu ebirukugarramu amaani: “Kigumize kimu ngu Yahwe naija kukukoonyera omu buli kimu kyona eki orukukora kusobora kugaruka nambere ali. Naija kukukoonyera kurwanisa okwetuntura, kumaraho enyehurra ezi watungire habw’omuntu kukusaaliza, nookutunga obusinge omu biteekerezo oburuga omu kuba n’omuntu ow’omunda omurungi. Noosobora kugonza kwongera kuheereza Yahwe oli hamu n’Abakristaayo bagenzi baawe.” Ekindi, ijuka ngu n’abagurusi baine ekihika eky’okukukoonyera. Nibasobora kuba “nkekiikaro ekyokweserekamu hali omuyaga, hokwebingiramu [enjura ey’ekiyaga].” (Is. 32:2) Kwoleka ngu noosiima habw’ekicunguro, weekaguze, ‘Kiki eki nsobora kukora, kwongera kutunga enkoragana enungi na Yahwe?’ (Is. 1:18; 1 Pet. 2:25) Ekyokurorraho, noosobora kugenda omu nsorrokano ha Kyombeko ky’Obukama? Noosobora kubaza n’omu h’abagurusi kandi okamumanyisa nkooku orukugonza obukoonyezi kwongera kugaruka hali Yahwe? Omugurusi naasobora kukora enteekaniza nukwo habeho omuntu ow’arakwegesa Baibuli habw’akasumi. Kigumye ngu Yahwe naija kukuha emigisa habw’amaani ag’oratamu kwoleka ngu noosiima habw’ekicunguro ky’Omwana we.

KIKI EKI ORAAKORA?

17-18. Nitusobora tuta kukozesa kurungi obwire bwaitu Ekiijukyo ky’omwaka gunu kitakahikire?

¹⁷ Yesu akagamba ngu ekicunguro kikaheebwayo “nukwo ogu weena arukumwikiririzaamu atahwerekerezebwa baitu atunge obwomeezi obutahwaho.” (Yoh. 3:16) Yahwe akozesa ekicunguro kutujuna kuruga omu kibi n’okufa. Mali tusemeriire kwikara nitusiima habw’ekicunguro. (Bar. 3:​23, 24; 2 Kol. 6:1) Obu haraaba nihaburayo ebiro bike ekiijukyo kihike, tusemeriire kutunga obwire twecumitirizeeho okugonza Yahwe na Yesu oku baatwolekere kandi okugonza kunu nikwija kutwekambisa kugira eki twakoraho kwoleka ngu nitusiima.

¹⁸ Ekicunguro nikiija kukuleetera kukora ki? Eky’okugarukamu kyawe nikisobora kwahukana hali eky’omuntu ondi. Baitu kigumize kimu ngu Yahwe naija kuha emigisa amaani ag’oraatamu kweteerenizaaho obukaikuru n’obukaikuru bw’Abakristaayo abandi “abarukwomeera, [hatali] habwabo bonka baitu habw’ogu ayabafeeriire.”—2 Kol. 5:15.