ISOMO 16
Yesu Akakora Ki Obwakaba Ali omu Nsi?
Abantu batekerezaaho Yesu nk’enkerembe, nabbi ow’amaani, rundi omusaija ow’aliyo n’afa. Baitu nitusobora kumanya bingi ebirukumukwataho kakuba twetegereza obwomeezi bwe obw’omu nsi. Omu isomo linu nitwija kubazaaho ebimu ha bintu ebikuru muno Yesu ebiyakozere hamu n’omulingo birukukukwataho.
1. Omulimo gwa Yesu omukuru gukaba nugwo guha?
Omulimo gwa Yesu omukuru gukaba “okutebeza ebigambo ebirungi ebyobukama bwa Ruhanga.” (Soma Luka 4:43.) Akatebeza amakuru amarungi ngu Ruhanga naija kuteekaho obukama, rundi gavumenti, ey’erukwija kumaraho ebizibu by’abantu byona.a Yesu akatamu amaani maingi kutebeza obutumwa bunu oburukugarramu amaani kumara emyaka esatu n’ekicweka.—Matayo 9:35.
2. Habwaki Yesu Yakozere Ebyamahano
Baibuli egamba ngu Ruhanga akakozesa Yesu kukora ‘ebyamahano eby’amaani n’obwokurorraho.’ (Engeso Ezabakwenda 2:22) Ruhanga akaha Yesu amaani agaamukonyire kuculeeza ihunga lingi, kuliisa enkumi n’enkumi z’abantu, hamu n’okuhumbuura abafu. (Matayo 8:23-27; 14:15-21; Marako 6:56; Luka 7:11-17) Ebyamahano Yesu ebiyakozere bikakyoleka kurungi ngu Ruhanga nuwe akaba amutumire. Kandi nibyoleka ngu Yahwe aine amaani g’okumaraho ebizibu byaitu byona.
3. Kiki ekiturukwegera ha mulingo Yesu yatwaizeemu obwomeezi bwe?
Yesu akorobera Yahwe omu nyikara zoona. (Soma Yohana 8:29.) N’obukiraaba ngu Yesu akahiiganizibwa, akakora byona Ise ebiyamusabire kukora, kuhikira kimu ha kufa kwe. Akakyolekera kimu ngu nikisoboka abantu kuheereza Yahwe, n’obubarukuba bali omu nyikara ezigumire muno. Nahabweki akatusigira, “ekyokurorraho, nukwo [tukuratire] omu bigere bye.”—1 Petero 2:21.
YEGA EBIRUKUKIRAHO
Manya omulingo Yesu y’atebiize amakuru amarungi kandi yakora ebyamahano.
4. Yesu akagambiraho abandi amakuru amarungi
Yesu akarubata enkumi n’enkumi eza mairo obu naraba omu ngundo ezirumu ecuucu, natebeza amakuru amarungi hali abantu baingi muno. Musome Luka 8:1, hanyuma mubazeeho ebikaguzo binu:
Yesu yatebezaaga abo bonka abayesorolezaaga hali uwe kumuhuliiriza?
Yesu akatekamu ata amaani kuhikaho abantu?
Ruhanga akaranga ngu Masiya akaba naija kugambira abantu amakuru amarungi. Musome Isaya 61:1, 2, hanyuma mubazeeho ebikaguzo binu:
Yesu akahikiiriza ata obunabbi bunu?
Notekereza ngu na kasumi kanu abantu nibetaaga kuhurra amakuru amarungi?
5. Yesu akegesa amasomo ag’omugaso
Oihireho kutebeza amakuru amarungi, Yesu akegesa amasomo ag’omugaso. Wetegereze gamu haligo omu Kwegesa kwe Okwa ha Rusozi okurukumanywa muno. Musome Matayo 6:14, 34 na 7:12, hanyuma mubazeeho ebikaguzo binu:
Magezi ki agarukutugasira Yesu agayabalizeeho omu nkarra zinu?
Notekereza amagezi ganu nigasobora kukonyera abantu n’omu kasumi kanu?
6. Yesu akakora ebyamahano
Yahwe akaha Yesu amaani ag’okukora ebyamahano bingi. Kurora ekyokurorraho kimu, musome Marako 5:25-34 rundi mutekeho VIDIYO. Hanyuma mubazeho ebikaguzo ebirukuhonderaho.
Omu vidiyo, kiki omukazi omurwaire eky’akaba nagumiza kimu?
Kiki eky’okizireyo kugonza omu kyamahano kinu?
Musome Yohana 5:36, hanyuma mubazeeho ekikaguzo kinu:
Ebyamahano Yesu ebiyakozere ‘bikamanyisa’ ki, rundi bikooleka ki hali uwe?
Obaire Okimanyire?
Ebintu ebirukukira obwingi ebitumanyire hali Yesu nibisangwa omu bitabu bbina ebya Baibuli ebirukumanywa nk’Enjiri—Matayo, Marako, Luka, na Yohana. Haroho ekintu buli muhandiiki w’Enjiri ekihayandiikire ekirukukwata hali Yesu kandi abandi ekibatarabalizeeho. Nahabweki obutusoma ebitabu byona bbina tutunga ekisisani nk’oku obwomeezi bwa Yesu bukaba buli.
MATAYO
nuwe yabandize kuhandiika Enjiri. Akabazaaho muno enyegesa za Yesu, kukira muno Yesu ebiyayegeseze ha Bukama bwa Ruhanga.
MARAKO
akahandiika Enjiri erukukirayo obugufu. Etugambira ebintu bingi ebirukusemeza kandi omu bugufu.
LUKA
atugambira omulingo Yesu yasabaga muno n’omulingo yatwazaamuga abakazi.
YOHANA
atugambira bingi Yesu ebiyabalize obwakaba ali n’abanywani be hamu n’abandi. Binu nibitukonyera kumanya akaba ali muntu wa mulingo ki.
ABANTU ABAMU BAGAMBA: “Yesu akaba ali musaija murungi kwonka, baitu akaba atali Masiya.”
Iwe notekereza ki?
OYEGERE KI
Yesu akatebeza ha Bukama bwa Ruhanga, akakora ebyamahano, kandi akorobera Yahwe omu nyikara zoona.
Kweijukyamu
Yesu obwakaba ali omu nsi, omulimo gwe omukuru gukaba nugwo guha?
Ebyamahano Yesu ebiyakozere bikagumya ki?
Yesu akegesa masomo ki agarukutukonyera?
SERULIIRIZA
Kintu ki Yesu ekiyakizireyo kubazaaho?
“Obukama bwa Ruhanga—Ekiburukumanyisa Hali Yesu” (Watchtower, eya Okitobba 1, 2014)
Manya habwaki nitukigumya ngu ebyamahano Yesu ebiyakozere bikabaho kwo.
“Kiki Eky’Osobora Kwegera ha Byamahano Yesu Yakozere?” (Watchtower, eya Julaayi 15, 2004)
Soma omanye omulingo omusaija omu yahindwire obwomeezi bwe hanyuma y’okumanya ngu Yesu yafaahoga abandi.
“Nkaba Ninyefaaho Nyenka” (Watchtower, eya Okitobba 1, 2014)
Rora orukarra rw’ebintu ebikuru Yesu ebiyakozere, n’omulingo birukuhonderangana.
a Amasomo 31-33 nigaija kubazaaho Obukama bwa Ruhanga omu bwijwire.