ISOMO 6

Yoleka Ekigendererwa ky’Ekyahandiikirwe

Yohana 10:33-36

EKY’OSEMERIIRE KUKORA: Otasoma kwonka ekyahandiikirwe kandi okagumizaamu ha nsonga endi. Konyera abarukukuhuliiriza kwetegereza omulingo ekyahandiikirwe eky’osomere kirukwataagana n’ensonga ey’orukubazaaho.

OMULINGO OGW’OKUKIKORAMU:

Komamu ebigambo ebikuru. Hanyuma y’okusoma ekyahandiikirwe, yoleka kurungi ebigambo byonyini ebirukwihayo ensonga yaawe. Kinu nosobora kukikora kuraba omu kwongera kusoma ebigambo ebikuru rundi kukaguza ekikaguzo ekirakonyera abarukukuhuliiriza kurora ebigambo ebikuru.

Obworakozesa ebigambo ebitali omu kyahandiikirwe kukisoborra, kigumye ngu abarakukuhuliiriza nibaija kurora omulingo ebigambo ebiri omu Baibuli birukukwatagana n’ensonga yaawe enkuru.
Gumya ensonga. Obworaaba oyanjwirege kurungi ensonga habwaki nogenda kusoma ekyahandiikirwe, yoleka kurungi ebigambo ebirukwihayo ensonga yaawe.

Obworaaba nosoborra ekyahandiikirwe, Baibuli giikaze esukwirwe. Kinu nikiija kukonyera abarukukuhuliiriza kurora omulingo ebigambo byawe birukukwatagana n’orukarra orw’osomere.
Soborra omu mulingo ogwanguhire. Obworaaba nosoborra ensonga enkuru, weriinde kubazaaho ebintu ebitarukwetagisa. Sigikirra ha bintu abarukukuhuliiriza basangirwe bamanyire ha mutwe ogw’orukubazaaho kucwamu nsonga zingaha ez’orukwetaaga ezirakukonyera kusoborra kurungi kandi omu mulingo ogurukwetegerezebwa.