Ruhanga Asobora Kubakonyera Kuba n’Amaka Amarungi

Yahwea nuwe yatandikireho amaka. Baibuli etugambira ngu akahanga omukazi ‘yamuleta hali omusaija.’ Adamu akasemererwa muno yagamba ati: “Onu niryo igufa erirugire omu magufa gange kandi niyo nyama erugire omu nyama yange.” (Okubanza 2:22, 23) Yahwe n’akyagonza amaka gabemu okusemererwa.

Obu muba nimukyatandika amaka mutekereza ngu ebintu byoona nibija kugenda kurungi. Baitu amananu gali ngu n’omu maka gaabo abarukugonzangana kwe mali, habamu emitalibaine. (1 Abakolinso 7:28) Akatabu kanu karumu emisingi ya Baibuli esobora kubakonyera kuba n’amaka amarungi kakuba mugikorraho.—Zabuli 19:8-11.

1 HIKIRIZA OBUJUNANIZIBWA BWAWE

BAIBULI EGAMBA: Omusaija nuwe omutwe gw’amaka.—Abefeso 5:23.

Omusaija, Yahwe n’agonza mukazi waawe omurolerre kurungi. (1 Petero 3:7) Akamukuha nk’omukoonyezi nahabwekyo n’agonza omutemu ekitiinisa kandi omwoleke okugonza. (Okubanza 2:18) Osemerire kwoleka ngu n’ogonza mukazi waawe n’oyebembeza ebyetago bye.—Abefeso 5:25-29.

Omukazi, Yahwe n’agonza oheereze omusaija waawe ekitiinisa kandi omukonyere kuhikiriza obujunanizibwa bwe. (1 Abakolinso 11:3; Abefeso 5:33) Ba n’enkoragana enungi n’omusaija waawe kandi omusagike obwaraaba aine eky’acwiremu. (Abakolosai 3:18) Obw’orakora oti, noija kusemeza Yahwe n’omusaija waawe.—1 Petero 3:1-6.

EKY’OKUKORA:

• Buli omu halinywe akaguze mutahi we ekyaine kukora kuba nyineka rundi nyinabwenge omurungi. Muhulirize kurungi buli omu amanye eky’asemerire kukora kusobora kusemeza mutahi we

• Mugumisirizengana. Nikiija kutwara obwire buli omu kwega mutahi we n’okumusemeza

2 FAAYO HA NYEHU’RA YA MUTAHI WE

BAIBULI EGAMBA: Kikusemerire kumanya mutahi waawe ebyagonza kandi obimukorre. (Abafiripi 2:3, 4) Osemerire kutwaza mutahi waawe kurungi noijuka ngu Yahwe n’agonza abaheereza be babe b’embabazi. (2 Timoseo 2:24) “Haroho ekirukwanguhiriza okugamba nkokutema okwa busitama: Baitu orulimi orwabamagezi bwomezi.” Nahabwekyo, kozese ebigambo ebitarukwija kusaliza mutahi waawe. (Enfumo 12:18) Obw’orasaba Yahwe naija kukuheereza omwoyo gwe ogurakukonyera kwoleka engonzi n’embabazi.—Abagalatia 5:22, 23; Abakolosai 4:6.

EKY’OKUKORA:

• Musabe Yahwe mutakabalizeho ensonga enkuru asobole kubakonyera kuhulirizangana kurungi

• Kirungi kuteekereza ha ebimurukugenda kubazaho n’omulingo murabiretamu

3 MUKO’RE HAMU

BAIBULI EGAMBA: Obu mutandika obuswere mufooka “mubiri gumu.” (Matayo 19:5) Nobukiraaba kiri kiti, muba mukyali bantu babiri abaine enteekereza ez’enyahukana. Nahabwekyo kirungi muno kwega kwikiraniza. (Abafiripi 2:2) Obumu nibwetaagisa mwine ekimurukugenda kucwamu. Baibuli egamba: “Ekigambo kyona ekyomali’ra kigumibwa habwokuhanura.” (Enfumo 20:18) Obu muraaba mwine ekintu kyoona ekimurukugonza kucwamu, muhondere emisingi ya Baibuli.—Enfumo 8:32, 33.

EKY’OKUKORA:

• Obu muba mwine ekimurukubazaaho, kirungi mutahi waawe amanye enyehura yaawe yonyini

• Otakacwiremu ekintu kyoona, wekaguzeho mutahi waawe