ISOMO 04

Ruhanga Nuwe Oha?

Omulingo Kirukusisana ha Rupapura

Kuruga abantu babaho omu nsi, baikaire nibaramya baruhanga baingi. Baitu Baibuli n’ebazaaho Ruhanga omu, anyakuli “mukuru okukira [baruhanga] bona.” (2 Ekyebyomubusinge 2:5) Ruhanga ogu nuwe oha? Kiki ekimufoora mukuru muno kukira baruhanga abandi boona abaramibwa abantu? Omu isomo linu, manya omulingo Ruhanga onu arukukweyanjurra.

1. Ibara lya Ruhanga nuwe oha, kandi nitusobora tuta kukigumya ngu n’agonza tulimanye?

Ruhanga akozesa Baibuli kutweyanjurra. Nagamba ati: “Ninyowe Yahwe; niryo ibara lyange.” (Soma Isaya 42:5, 8.) “Yahwe” mpindura y’ibara ly’Oruheburaniya abakugu baingi eribakwikiriza ngu nirimanyisa “Aletera Ebintu Kubaho.” Yahwe n’agonza tumanye ibara lye. (Okuruga 3:15) Eki nitusobora kukigumya tuta? Omu Baibuli akateekamu ibara lye emirundi erukuhingura omu 7,000!a Yahwe niryo ibara lya “Ruhanga omu owamananu” omu iguru hamu n’omu nsi.—Yohana 17:3.

2. Biki Baibuli eby’etugambira hali Yahwe?

Baibuli negamba ngu omu baruhanga boona abantu baramya, Yahwe nuwe Ruhanga wenka ow’amananu. Habwaki? Haroho ensonga nyingi. Yahwe nuwe aine obusobozi oburukukirrayo kimu, kandi nuwe wenka ‘ali haiguru muno, nalema ensi zoona.’ (Soma Zabuli 83:18.) Nuwe “Owobusobozi bwona,” ekirukumanyisa ngu, aine amaani ag’okukora kyona ekyarukugonza kukora. Nuwe ‘yahangire byona’—obuhangwa bwona, hamu n’obwomeezi obuli omu nsi. (Okusuku’rwa 4:8, 11) Kwahukanaho n’abandi, Yahwe nuwe wenka aikaireho kuruga kara na kara, kandi alikaraho ebiro n’ebiro.—Zabuli 90:2.

YEGA EBIRUKUKIRAHO

Manya embaganiza enyakuli hagati y’ebitiinisa bya Ruhanga hamu n’ibara lye ery’embaganiza. Hanyuma, yega omulingo hamu n’ensonga habwaki akumanyisize ibara lye.

Omusaija aroleriire iguru omu bwire bw’ekiro. Ibara Yahwe litairwe omu mwanya.

3. Ruhanga aine ebitiinisa bingi, baitu aine ibara limu

Kurora embaganiza hagati y’ekitiinisa ky’omuntu hamu n’ibara lye, mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Aine Ebitiinisa Bingi, Baitu Ibara Limu (0:41)

Mbaganiza ki enyakuli hagati y’ekitiinisa nka “Mukama” hamu n’ibara?

Baibuli n’egamba ngu abantu baramya baruhanga baingi hamu n’abakama. Musome Zabuli 136:1-3, hanyuma mubazeeho ekikaguzo kinu:

Noha “Ruhanga wabaruhanga” kandi “Mukama owabakama”?

4. Yahwe n’agonza tumanye ibara lye kandi tulikozese

Kiki ekirukwoleka ngu Yahwe n’agonza omanye ibara lye? Mutekeho VIDIYO, hanyuma mubazeeho ebikaguzo binu.

VIDIYO: Ruhanga Aine Ibara?—Akacweka ka vidiyo (3:11)

Ekisisani kuruga omu vidiyo ‘Ruhanga Aine Ibara?—Akacweka ka vidiyo.’ Omusaija nayekebiija ibara lya Ruhanga Yahwe, eriri omu Zabuli 83:18 omu Baibuli eya ‘King James Version’ eya 1611.

Notekereza Yahwe n’agonza ibara lye limanywe? Habwaki?

Yahwe n’agonza abantu bakozese ibara lye. Musome Abarumi 10:13, hanyuma mubazeeho ebikaguzo binu:

Habwaki kikuru kukozesa ibara lya Ruhanga Yahwe?
Oyehurra ota omuntu obw’aijuka ibara lyawe, kandi akalikozesa?
Notekereza Yahwe ayehurra ata obw’okozesa ibara lye?

5. Yahwe n’agonza omwirre haihi

Omukazi kuruga Cambodia arukwetwa Soten akagamba ngu kwega ibara lya Ruhanga kikamukonyera kwehurra omu mulingo ogurukukirrayo kimu oburungi. Mutekeho VIDIYO, hanyuma mubazeeho ekikaguzo ekirukuhonderaho.

VIDIYO: Omulingo Naserwiremu Ruhanga ow’Amananu (8:18)

Ebisisani: Ebisisani kuruga omu vidiyo, ‘Omulingo Naserwiremu Ruhanga ow’Amananu.’ 1. Soten aikaliire hansi y’omuti omu kibira, aroleriire iguru, kandi n’asaba hali Ruhanga ow’amananu. 2. Herold ayegesa Soten ngu ibara lya Ruhanga nuwe Yahwe.

Kusigikirra ha vidiyo, kwega ibara lya Ruhanga kikakwataho kita Soten?

Otakafookere munywani w’omuntu, okira kubanza kumanya ibara lye. Musome Yakobo 4:8a, hanyuma mubazeeho ebikaguzo binu:

Yahwe n’akuraaliza kukora ki?
Kumanya ibara lya Ruhanga hamu n’okulikozesa nikisobora kita kukukonyera kweyongera kwehurra oli haihi na uwe?

ABANTU ABAMU BAGAMBA: “Ruhanga ali omu, nahabweki tikiri kikuru omulingo tumwetamu.”

Noikiriza ngu Yahwe niryo ibara lya Ruhanga?
N’osobora ota kusoborra omuntu ngu Ruhanga n’agonza tukozese ibara lye?

OYEGERE KI?

Yahwe niryo ibara lya Ruhanga omu wenka ow’amananu. N’agonza tumanye ibara eri kandi tulikozese nukwo tusobole kumwirra haihi.

Kweijukyamu

Yahwe nayahukana ata na baruhanga boona abantu baramya?
Habwaki tusemeriire kukozesa ibara lya Ruhanga?
Kiki ekirukwoleka ngu Yahwe n’agonza omwirre haihi?

Ekiro tumaliriize isomo linu:

Lengaho Kinu

Obworaaba n’obazaaho Ruhanga, kozesa ibara lye Yahwe.

Ekindi:

Your other goal

SERULIIRIZA

Wekebiije ensonga itaano ezirukugumya ngu Ruhanga aroho.

“Ruhanga Aroho?” (Ekicweka kinu kiri ha mukura)

Wetegereze ensonga habwaki ky’amagezi kwikiriza ngu Ruhanga ataahaho kuruga kara na kara.

“Noha Yahangire Ruhanga?” (Watchtower, eya Agusto 1, 2014)

Yega ensonga habwaki tusemeriire kukozesa ibara lya Ruhanga, n’obukiraaba ngu titumanyire omulingo lyayaturwamuga kara.

“Yahwe Nuwe Oha?” (Ekicweka kinu kiri ha mukura)

Omulingo twetamu Ruhanga kikuru? Rora ensonga habwaki nitusobora kugamba ngu Ruhanga aine ibara limu lyonka.

“Ruhanga Aine Amabara Aingaha?” (Ekicweka kinu kiri ha mukura)

a Kumanya ebirukukiraho h’amakuru g’ibara lya Ruhanga hamu n’ensonga habwaki empindura ezimu eza Baibuli zalihiremu, rora Appendix A4 omu New World Translation of the Holy Scriptures.