Omulingo Tusobora Kusingura Okwegomba Okubi

1. Kiki ekihika hali abantu boona?

WAKATUNGAGA okwegomba okw’amaani okw’okukora ekintu Yahwe eki anoba? Obu kiraaba kyakuhikireho, otahwamu amaani okateekereza ngu niiwe wenka ow’ahikirweho ekintu kinu. Baibuli egamba ngu: “Busaho ekyohyo kyona ekibaiziire, ekitahikaho abantu boona.” (1 Kol. 10:13) Kinu nikimanyisa ngu okwegomba okubi kwona oku oliyo noorwanisa, haliyo n’abandi abarukukurabamu. Kigumye ngu toli wenka, Yahwe aroho kukukoonyera.

2. Byohyo bya mulingo ki Abakristaayo abamu hamu n’abeegi ba Baibuli ebi basobora kuba nibarwanisa? (Rora n’ebisisani.)

² Ekindi, Baibuli egamba eti: “Baitu buli muntu alengwa obu atwalirizibwa kandi akasoonwasoonwa okwegomba kwe.” (Yak. 1:14) Orukarra runu nirutukoonyera kwetegereza ngu abantu abarukwahukana bahikwaho ebyohyo ebirukwahukana. Ekyokurorraho, Abakristaayo abamu nibasobora kwoheebwa kwejumbira omu busiihani n’omuntu ou batarukusisana na uwe obuhangwa rundi ou barukusisana na uwe obuhangwa. Abo abaalekere kurora ebisisani by’orwanju nibasobora kutunga okwegomba okw’amaani okw’okwongera kubirora. Nikyo kimu n’abo abaalekere kukozesa ebitokooza bwongo n’okukozesa kubi amaarwa. Binu biri bimu ha bintu Abakristaayo abamu n’abeegi ba Baibuli barwanisa. Haroho obwire obumu obu twehurra nk’omukwenda Paulo ayahandiikire ati: “Obu ngonza kukora ekihikire, ekibi kiba na nyowe.”—Bar. 7:21.

3. Omuntu naasobora kukwatwaho ata kakuba aba amazire akaire kaingi naarwanisa okwegomba okubi?

³ Obu oraaba oikaire noorwanisa okwegomba nukwo kumu kumara akasumi, noosobora kwehurra nk’ow’ataine maani ag’okurwanisa ekyohyo. Ekindi, noosobora kwehurra ohoirwemu okunihira kandi okateekereza ngu Yahwe naija kukucwera omusango habw’okuba n’okwegomba okubi. Kigumye ngu busaho n’emu ha nteekereza ezi ey’ehikire! Habwaki? Ekicweka kinu nikiija kutukoonyera kwetegereza ensonga obu nikigarukamu ebikaguzo binu bibiri: (1) Nooha ow’arukugonza oyehurre nk’ow’ataine maani kandi ohoirwemu okunihira? (2) Nitusobora tuta kurwanisa okwegomba okubi?

OMULINGO SITAANI ARUKUGONZA TWEHURRE

4. (a) Habwaki Sitaani naagonza twehurre ngu tutwine maani ag’okurwanisa okwegomba okubi? (b) Habwaki nitukigumya ngu nitusobora kurwanisa okwegomba okubi?

⁴ Sitaani naagonza twehurre nk’abataine maani ag’okurwanisa ekyohyo. Yesu akooleka kurungi ensonga enu obu yayegeseze abeegeswa be kusaba nibagamba bati: “Otatutwara omu kwohebwa, baitu otujune hali omubi.” (Mat. 6:13) Sitaani naagamba ngu abantu tibasobora kworobera Yahwe kakuba batunga okwegomba okubi. (Yob 2:4, 5) Habwaki ateekereza omu mulingo ogu. Kiteekerezeeho, Sitaani nuwe yabandize kutwaliirizibwa okwegomba kwe kandi yalemwa kwikara ali mwesigwa hali Yahwe. Naasobora kuba naateekereza ngu tuli nka uwe ngu nitwija kulekaho Yahwe kakuba twohebwa. Akahika na ha rulengo orw’okuteekereza ngu n’Omwana wa Ruhanga ow’ahikiriire naasobora kwohebwa! (Mat. 4:8, 9) Baitu kiteekerezeeho: Mali gali mananu ngu titwine maani og’okurwanisa okwegomba okubi? Nangwa! Nitwikiraniza n’omukwenda Paulo ayahandiikire ati: “Habwokuba omu bintu byona nyine amaani kuraba omuli ogu ow’ampa amaani.”—Baf. 4:13.

5. Nitukimanya tuta ngu Yahwe naakigumya ngu nitusobora kusingura okwegomba okubi?

⁵ Kwahukanira kimu hali Sitaani, Yahwe naakigumiza kimu ngu nitusobora kurwanisa okwegomba okubi. Eki nitukimanya tuta? Akaranga naagamba ngu ekitebe eky’abantu baingi abeesigwa nibaija kukiraho omuhito omwingi. Eki nikimanyisa ki? Yahwe ow’atabiiha ebisuba naagamba ngu ekitebe eky’abantu baingi hatali abake nibaija kutaaha omu nsi empyaka baine enkoragana enungi na uwe hanyuma ‘y’okwogya eby’okujwara byabo, baabyeza omu sagama ey’Omwana gw’Entaama.’ (Kus. 7:9, 13, 14) Kinu nkyeyooleka kurungi ngu Yahwe akimanyire ngu twine amaani og’okurwanisa okwegomba okubi.

6-7. Habwaki Sitaani naagonza twehurre nk’abataine okunihira obu turukuba niturwanisa ekyohyo?

⁶ Sitaani tarukugonza tugarukire ha kwehurra nk’abataine maani kyonka, baitu naagonza twehurre nk’abataine okunihira kandi tuteekereze ngu Yahwe naija kutucwera omusango habwokuba n’okwegomba okubi. Habwaki Sitaani naagonza tuteekereze tuti. Sitaani nuwe ataine okunihira habwokuba Yahwe akamara ira kumucwera omusango ogw’okutatunga obwomeezi obutahwaho. (Kub. 3:15; Kus. 20:10) Hataroho kugurukyagurukya, Sitaani naagonza na itwe twehurre nk’abataine okunihira habwokuba akimanyire ngu twine omugisa ogw’okutunga obwomeezi obutahwaho uwe ogu yafeeriirwe. Baitu itwe twine okunihira. Na Baibuli etugumya ngu Yahwe naagonza kutukoonyera hatali kutucwera omusango, obu neegamba eti: “Tarukugonza omuntu weena ahwerekerre, baitu naagonza boona beegarukemu.”—2 Pet. 3:9.

⁷ Mali kakuba tutandika kwehurra ngu titwine amaani ag’okurwanisa okwegomba okubi rundi ngu titwine okunihira, nituba twatandika kuteekereza omulingo Sitaani arukugonza tuteekerezeemu. Kumanya kinu nikiija kutukoonyera kwangirra enteekereza ye.—1 Pet. 5:8, 9.

OMULINGO EKIBI KISOBORA KUTULEETERA KWEHURRA

8. Oihireho ebintu ebibi ebi tukora, ekigambo “ekibi” nikisobora n’okumanyisa ki? (Rora na “Amakuru g’Ebigambo Ebimu.”) (Zabuli 51:5)

⁸ Oihireho Sitaani, haroho ekintu ekindi ekisobora kutuleetera kwehurra nk’abataine amaani ag’okurwanisa okwegomba okubi rundi nk’abataine okunihira. Kintu ki eki? Nukwo okutahikirra rundi ekibi eki twaijukwire hali abazaire baitu ab’okubanza.a—Yob 14:4; soma Zabbuli 51:5.

9-10. (a) Adamu na Hawa bakeehurra bata obu baafookere abasiisi? (Rora n’ekisisani.) (b) Kwijukura ekibi kituleetera kwehurra tuta kasumi kanu?

⁹ Teekerezaaho omulingo Adamu na Hawa bayehuriire hanyuma y’okufooka abasiisi. Hanyuma y’okujeemera Yahwe, bakeesereka kandi baasweka emibiri yabo. Ekitabu, Insight on the Scriptures kibazaaho ensonga enu nikigamba kiti: “Ekibi kikabaleetera kwehurra nibecwera omusango, beetuntwire, bataine obulinzi kandi baswaire.” Kikasisana oti rundi Adamu na Hawa bakaba basibiirwe omu nju enyakwine ebisiika bbina. Ekintu kyonka eki bakaba nibasobora kukora, nukwo kuruga omu kisiika ekimu bakagenda omu kindi, baitu bakaba batasobora kuturuka omu nju egi. Bakaba batasobora kuruga omu butahikirra bwabo.

¹⁰ Kyamananu ngu enyikara yaitu terukusisana n’eya Adamu na Hawa. Kinu kiri kiti habwokuba ekicunguro tikirukubagasira, baitu itwe kitukoonyera kwihwaho ebibi byaitu n’okuba n’omuntu ow’omunda omurungi. (1 Kol. 6:11) Baitu nabwo, tukaijukura ekibi n’obutahikirra. Kandi egi niyo ensonga habwaki twecwera omusango, twetuntura, twehurra tutaine obulinzi kandi tuswara. Baibuli egamba ngu ekibi kikwataho muno abantu. Kandi kinu nukwo kiri “na hali abo [abatasiisa] omu mulingo Adamu yasiisire” (Bar. 5:14) Noobu kiraaba ngu ekintu eki nikizooka nk’ekirukumaramu amaani, tikisemeriire kutuleetera kwehurra nk’abataine maani rundi okunihira. Nitusobora kwangira kimu enyehurra ezi embi. Omu mulingo ki?

11. Tusemeriire kwetwaza tuta kakuba twehurra ngu titwine amaani og’okurwanisa okwegomba okubi, kandi habwaki? (Abarooma 6:12)

¹¹ Kakuba twehurra nk’abataine maani tukasisana oti rundi titusobora kusingura okwegomba okubi, eki nitusobora kukirora nk’obutahikirra bwaitu obuliyo “nibutubaliza” baitu titusemeriire kubuhuliiriza. Habwaki? Habwokuba Baibuli eyegesa ngu titusemeriire kwikiriza ekibi kugumizaamu “nikirema nk’omukama” omu mibiri yaitu. (Soma Abarooma 6:12.) Kinu nikimanyisa ngu nitusobora kucwamu kutakorra ha kwegomba kwaitu okubi. (Bag. 5:16) Yahwe naakigumiza kimu ngu nitusobora kwangirra okwegomba okubi habwokuba kakuba eki kyali kitarukusoboka tiyakutugambiire kukikora. (Bir. 30:11-14; Bar. 6:6; 1 Bas. 4:3) Mali, nitukigumya ngu twine amaani ag’okurwanisa okwegomba okubi.

12. Tusemeriire kwetwaza tuta kakuba twehurra nk’abataine okunihira, kandi habwaki?

¹² Omu mulingo nugwo gumu, obu twehurra nk’abataine okunihira tukasisana oti rundi Yahwe naija kutucwera omusango habwokuba n’okwegomba okubi, nitusobora kukirora nk’obutahikirra bwaitu obuliyo ‘nibutubaliza’ baitu titusemeriire kubuhuliiriza. Habwaki? Habwokuba Baibuli eyegesa ngu Yahwe naakyetegereza ngu tituhikiriire. (Zab. 103:13, 14) “Amanyire byona” ebirukutukwataho otwaliiremu n’omulingo buli omu hali itwe akwatwaho obutahikirra. (1 Yoh. 3:19, 20) Nitwija kuba n’enkoragana enungi na Yahwe kakuba tutaikiriza kutwaliirizibwa okwegomba okubi. Habwaki eki nitukigumya?

13-14. Kuba n’enyehurra embi nikimanyisa ngu tulemerwe? Soborra.

¹³ Baibuli eyooleka embaganiza ey’eri hagati y’okukora ekintu ekibi (kinu nitusobora kukirema) hamu n’okwegomba okw’okukora ekibi (kinu kiija bwija). Eky’okurorraho, bamu h’Abakristaayo ab’omu kyasa eky’okubanza omu Kolinso baayejumbiraga omu bikorwa eby’obukuuhya. Paulo akahandiika ati: “Abamu omuli inywe nukwo mukaba muli muti.” Kinu kikamanyisa ngu batongere kutunga okwegomba okw’okwongera kwejumbira omu bikorwa eby’obukuuhya? Tikiri ky’amagezi kuba n’enteekereza nk’egi habwokuba kigumire muno kuleka kuba n’enyehurra nk’ezi. Baitu Abakristaayo abaayoolekere okwetanga kandi baayetantara kuhondera okwegomba kwabo bakasiimwa omu maiso ga Yahwe. Akabarora nk’abaayogiibwe. (1 Kol. 6:9-11) Na iwe nugwo omulingo arukukuroramu.

¹⁴ Koobe noohikwaho okwegomba kwa mulingo ki, noosobora kukurwanisa kandi okakusingura. Noobu kiraaba ngu noosobora kutakumarraho kimu, noosobora kwoleka okwetanga kandi okeetantara ‘kuhondera okwegomba okw’omubiri gwawe, n’okukora omubiri gwawe n’ebiteekerezo byawe ebi byegomba.’ (Bef. 2:3) Kinu noosobora kukikora ota kandi okasingura okwegomba okubi?

OMULINGO OSOBORA KUSINGURA

15. Kusobora kusingura okwegomba okubi, habwaki tusemeriire kumanyirra obuceke bwaitu?

¹⁵ Kusobora kusingura okwegomba okubi nikiija kukwetaagisa kumanyirra obuceke bwawe. Wegendereze kwebiihabiiha “n’enteekereza etahikire.” (Yak. 1:22) Otebiiha ngu ekizibu kyawe tikiri ky’amaani obu noogamba oti: ‘Abandi banywa muno kunkira,’ rundi okajunaana abandi obu noogamba oti: ‘Tinakurozere ebisisani eby’orwanju kakuba mukazi wange aikaire nanfaaho muno omu nyehurra.’ Kakuba otandika kuteekereza omu mulingo ogu nikiija kukwanguhira kugwa omu kwohebwa. Nahabweki otalengaho kwekwasa obuceke obu oine kukora ekibi. Noojunaanizibwa habw’ebintu ebi orukukora.—Bag. 6:7.

16. Noosobora ota kugumya encwamu yaawe ey’okukora ekihikire?

¹⁶ Oihireho kumanyirra obuceke bwawe, nikiija n’okukwetaagisa kukora kyona ekirukusoboka kubusingura. (1 Kol. 9:26, 27; 1 Bas. 4:4; 1 Pet. 1:15, 16) Teekerezaaho ebintu ebikira kukuleetera kwohebwa. Ekyokurorraho, kikugumira kwangirra ekyohyo obu oba ojwahire rundi omu bwire obw’ekiro muno? Teekerezaaho ekyohyo ekisobora kukuhikaho kandi oyerengeseemu eki osobora kukora kakuba kibaho. Kirungi kukora ekintu kinu ekyohyo kitakakuhikireho.—Nfu. 22:3.

17. Kiki eki turukwegera ha kyokurorraho kya Yusufu? (Okubanza 39:7-9) (Rora n’ebisisani.)

¹⁷ Teekerezaaho Yusufu eki yakozere mukazi wa Potifa obu yalengereho kumusoonasoona. Akangiraho ahonaaho. (Soma Okubanza 39:7-9.) Kinu nikitwegesa ki? Yusufu akaba amanyire kara eky’okukora na mukazi wa Potifa atakalengereho kumusoonasoona. Omu mulingo nugwo gumu, naiwe nosobora kugumya encwamu yaawe ey’okukora ekihikire otakoohiibwe. Kandi obu oraayohebwa, nikiija kukwanguhira kugumira ha ncwamu yaawe ei wakozere kara.

“MWIKALE NIMWERENGESA”

18. Noosobora ota kusingura okwegomba okubi? (2 Abakolinso 13:5)

¹⁸ Kusobora kusingura okwegomba okubi, nikiija kukwetaagisa ‘kwikara nooyerengesa.’ Kandi eki nikimanyisa kwikara nooyekebera kumanya nkooku oyemeriire. (Soma 2 Abakolinso 13:5.) Ikara nooyekebiija enteekereza yaawe hamu n’ebikorwa byawe kandi okolemu empindahinduka nambere kirukwetaagisa. Ekyokurorraho, noobu orarwanisa ekyohyo okakisingura, noosobora kwekaguza: ‘Kintwaliire bwire ki kukyangirra?’ Kakuba okyetegereza ngu kikutwaliire obwire bwingi, oteejunaana. Oihireho teekerezaaho eki osobora kukora kwongeramu amaani omurundi ogundi. Weekaguze: ‘Ninsobora kukeehya ha bwire obu mmara ntakangiriire ebiteekerezo ebibi? Eby’okwesemeza ebi nyejumbiramu bindeetera kugumirwa kwangirra ekyohyo? Obu ntunga ekyohyo eky’okurora ebisisani ebitasemiire, ndeka kurorayo ahonaaho? Nimmanya ensonga habwaki endengo za Yahwe nizo zirukukirayo oburungi, noobu kirukuba nikinyetaagisa kwoleka okwetanga?’—Zab. 101:3.

19. Encwamu ezirukuzooka nk’entaito baitu ezitali z’amagezi nizisobora zita kutuleetera kugumirwa kwangirra okwegomba okubi?

¹⁹ Ekindi, tosemeriire kukora ekibi obu nooyekwasa ensonga ezitarumu. Baibuli neegamba eti : “Omutima gwobugobya okukira ebintu byona, gurwaire endwara etarukutambwa.” (Yer. 17:9) Kandi Yesu akagamba ngu omu mutima nuho haruga “ebiteekerezo ebibi.” (Mat. 15:19) Ekyokurorraho, omuntu ow’alekere kurora ebisisani eby’orwanju, hanyuma y’obwire naasobora kutandika kuteekereza ngu tikiri ky’akabi kurora ebisisani ebirukumuleetera kugonza kuteerana ngu habwokuba tibirukwoleka abantu abali busa. Rundi naasobora kuteekereza ngu, ‘Tikiri ky’akabi kuteeramu akasisani naayejumbira omu bikorwa ebibi ekikuru kakuba aba atabikozere.’ Obu ateekereza ati, omutima gwe omugobya guba nigumuleetera ‘kuteekaniza kara kukora eby’okwegomba okw’omubiri.’ (Bar. 13:14) Eki noosobora kukyetantara ota? Ikara oli bulindaara kandi oyetentale kukora encwamu ezirukuzooka nk’entaito baitu ezitali z’amagezi, eziraakuleetera kukora ebibi eby’amaani.b Ekindi, yangirra ebiteekerezo byona, rundi “ebiteekerezo ebibi,” ebiraakuleetera kukora ebibi obu noyekwasa ensonga ezitarumu.

20. Kunihira ki oku twine, kandi bukoonyezi ki obu twine kasumi kanu?

²⁰ Twegere ngu Yahwe atuha amaani ag’okwangirra ekyohyo. Ekindi, habw’embabazi ze, twine okunihira okw’okwomeera ebiro n’ebiro omu nsi empyaka. Mali kanikihuumuza kukimanya ngu nitwija kuheereza Yahwe kitarukutwetaagisa kurwanisa okwegomba okubi! Baitu akasumi ako katakahikire, nitukigumya ngu twine amaani agarukwetaagisa kurwanisa okwegomba okubi kandi twine n’okunihira. Kandi habwokuba Yahwe naaha omugisa amaani tutamu, nitwija kusingura!