Ndo joŋ joŋge, hayga à yaŋ joŋ ndo, noga jar de gur là?

1-2. Jar debaŋ ɗig wo ɗiggi de maaga à joŋ jar de gur mo là, day maa po naa wii jag see naa ga hãylà?

À JOŊ jar wara de gur debaŋ. À joŋ ra de gur werga á wo de co co, wer wer ɓaara, wer sug sug ɓaara, noga wer re maa tigriŋ wo. Jar debaŋ joŋ wo bon do jar ẽgre wo, lan do jar kluuri sir maaga ɗig wo debaŋ diŋ ti suŋgu mono. Joŋre se maa de baywooren wo mo deŋ laa wo naa noga jar maaga naa de ko rage nen bone.

² Jar wara debaŋ wo de sõõ ɓil wer maaga à joŋ ra de gur noga à joŋ jar maa tigriŋ wo de gur mono. Wosela ɓuy da ga joŋ se de ele, lan ga se mo hay joŋ naw sen ti desãy. Jar maa po dur wo maaga saara mo ‘wũy re maaga saara ko ti tamsir la, noga ti sir ɓaara mono. Á giŋ wo ngomna wo de jag liŋgi maaga à hã ra mono, noga saara fod jobo maaga wãã ga se ‘wũy ren yaŋ wo mono. Amaa, naa Kretiyẽ naa de koge ga naa “bay […] diŋ jar jar ma ti tamsir la wa”, day naa de kaŋ ɗiggi ga caa ge wer joŋge degurn go diŋ Twaywaŋ maani Baan boŋ tu. (Jaŋ 17:16) Amaa de ngar ngeel maa po jiili naa sõõ de maaga naa ko ga à joŋ jobo degur mono. Maapo naa wii jag see naa ga: ‘Ndi joŋ joŋge de maaga sen a we là? Ndi joŋ diŋ mayse maa soɗ joŋge de gurn patala là?’ Maa yiŋ jag ti wiigi jag sen wo mono, naa ko maaga Jeofa wo de Yeso ɗig wo ti joŋge jar de gurn mo ɗa.

JEOFA WO DE YESO CAA WO HEE DE JOŊGE JAR DE GURI

3. Wer mayse ga á ti ngeel ɓe maaga ɓil naa sõõ de maaga naa ko joŋge de gur mo là? (Esay 5:7)

³ Bible ngaɓ ne naa ga wer mayse ga naa bay de sãy maaga joŋ naa, noga joŋ jar lan wo de gur ti wa là. Á ngaɓ ne naa ga Baa joŋ naa de maŋ see ɓe, day ga á “da keɗedn wo de deele no.” (Siŋ. 33:5; Tĩĩ. 1:26) Jeofa bay joŋ jar de gur wa, day á bay dage ga naa mo joŋ kããra de gur wa lay! (Dog. 32:3, 4; Mis. 6:8; Sak. 7:9) Naa maŋ ba saɓlaŋ po ɗa: Ti kal maani Esayn mono, Jeofa hay laa “war ti joŋge nen jar”, maaga jar Israyel hay wo joŋ bon hẽẽre ɓaara wo mono. (Jaŋ Esay 5:7.) Wersen, Jeofa maŋ ɗiggi maa joŋ liŋ jar maaga bay wo hoo sug ti jag liŋgi ɓen wa, lan hay wo joŋ kããra de gur mono.—Esa. 5:5, 13.

4. Yeso hay ɗiggi na ɗiggi de maaga à joŋ jobo we de gur là? (Ko foton lay.)

⁴ Yeso da diŋ de deele, lan caa hee de joŋge jar de gur doo Jeofa no lay. Ti wur po Yeso yiŋ de blo po maaga do ɓe hay go de laɓge. Yeso ko decoo ɓe, day pẽẽn go. Amaa, fẽn maaga á joŋn co jag jar kluuri maa pel tiŋ-Baa wo gà. Saara raw ga Yeso hoo sug ti jag liŋgi maa ti Saba gà. Á hay ɗig ba wo ti blo maaga à pẽẽ ne go mo gà ɓuy yaw. Yeso ɗig na ɗiggi là? Á raw “rage nen ɓil ɓe debaŋ wer ɗiggi ɓaara ma de ɓlagge no.”—Mark 3:1-6.

5. De maaga naa yaŋ ko joŋge de gur no, wer mayse ga naa mo hay ig de sõõ ɓil wa là?

⁵ Werga ɓil Jeofa wo de Yeso sõõ wo de maaga á ko wo joŋge de gur lay so mono, á ti ngeel ɓe maaga ɓil naa sõõ de maaga naa ko joŋge de gur mo lay. (Efe. 4:26) Amaa, naa mo hay kaŋ ti naa ga koh ɓil—naa mo sõõ ba laybla no—naa kãã maa caa wer joŋge de gurn go gà. Naa ig we de sõõ ɓil debaŋ no, maapo naa le’ cegè. (Siŋ. 37:1, 8; Jag 1:20) Day naa joŋ joŋge de maaga naa yaŋ ko joŋge de gurn là? Naa mbe maa had fẽẽre see saɓlaŋ Yeso.

YESO HAY ƊIGGI NA ƊIGGI DE MAAGA Á HAY KO MAAGA À JOŊ JAR DE GUR MO LÀ?

6. De ɗeŋ maa hõn ga à hay joŋ jar de gur de maaga Yeso hay gesiŋ la mo là? (Ko foton lay.)

⁶ De maaga Yeso hay gesiŋ la mono, á hay ko jar joŋ kããra de gur debaŋ. Á hay ko jar kluuri maa pel tiŋ-Baa wo joŋ jar de guri. (Mat. 23:2-4) Á hay ko jar Rom wo joŋ bon jar debaŋ pa. Jar Jwif wo debaŋ hay da wo ga saara mo hay nen do jar Rom wo wa so. Jar maa po hay wo go carge taɗ taɗ maa joŋ durgi de jar Rom wo. Yeso sa’ see ɓe see tayge jag sen wo maa coo ngeeln gà. De maaga á ko ga jar de kiɗgi maaga saara baa se waŋ mono, á naa see ɓe go.—Jaŋ 6:15.

7-8. Wer mayse ga Yeso hay kiɗ ga se caa wer re maa ti tamsir lan wo go de maaga á hay gesiŋ la mo gà là? (Jaŋ 18:36)

⁷ De maaga Yeso hay gesiŋ la mono, á hee see ɓe nen politig po maa ‘wũy re maaga á hay ko rage mo gà. Wer may là? Werga á hay de koge ga jar téebeere kãã wo maa wãã re see ɓaara gà. (Siŋ. 146:3; Jer. 10:23) Á kãã wo maa caa wer fẽn maaga a de bon ne jar ti go gà. Wãã re tamsir se maa debalan diŋ Manhúulí. Á de debaycõõre, day jar debaŋ joŋ wo doo se no lay. (Jaŋ 8:44; Efe. 2:2) Koh jar maaga joŋ wo fẽẽre maa de el kãã wo maa ‘wũy re maa ti tamsirn wo gà; werga á joŋ wo tum bay diŋ fẽẽre maa de deele wa.—Ekl. 7:20.

⁸ Yeso hay de koge ga caa ge wer fẽn maaga a de bon ne jar ti go diŋ Twaywaŋ maani Baan boŋ tu. Diŋ wersen ga á hay hã wur maa do ɓen wo de ẽgre ɓe go ɓuy maa “siɗ Wããre ma de Cõõre ma ti twaywaŋ mani Baan ne jare” mono. (Lug 8:1) Á hã bawge go ne “jar maga wo de dage debaŋ ga saara mo see doo ga Baa de wiigi nono” ga Baa caa ge wer joŋge jar de gurn yaŋ go. (Mat. 5:6 lan note d’étude ɓil TMN; Lug 18:7, 8) Ngomna po kãã maa caa wer fẽẽre se deŋn wo go gà. Kãã maa caa wer ɓe go say diŋ Twaywaŋ maani Baa no, day Twaywaŋ sen “bay diŋ ti tamsir sen la wa.”—Jaŋ Jaŋ 18:36.

MAŊ SAƁLAŊ YESO DE MAAGA NDO YAŊ KO JOŊGE DE GURN NO

9. Wer mayse ga ndo hã ɓil ga taw ge bon wo go diŋ Twaywaŋ maani Baan boŋ tu là?

⁹ Naa diŋ ti “wur naw maa blam wo” no. Diŋ wersen so ga naa ko joŋge jar de gur debaŋ de daŋ maaga Yeso hay gesiŋ la mono. Amaa doo ti wur maani Yeson le no lay mono, jar maaga ɓo’ wo bon ne naa ti wo diŋ Manhúulí de jar debaycõõren wo. (2 Tim. 3:1-5, 13; Naa. 12:12) Doo Yeso no lay, naa de koge ga caa ge wer joŋge jar de gurn go diŋ Twaywaŋ maani Baan boŋ tu. Werga naa sii wããre go ti Twaywaŋ maani Baan so mono, naa day hee see naa nen politig, noga kaŋ ɗiggi ga ngomna maa ti tamsirn la taw wo joŋge de gurn yaŋ go gà. Naa ko saɓlaŋ mãygeman naa po maaga à ɗen ga Stasi mo ɗa.a De maaga á hay bay de da’ cwãyn wa ɗa mono, á hay yoo jar maaga hay wo wããge ga saara caa wer joŋge de gurn go mono. Amaa, á hay de faare ti fẽn maaga á hay joŋge ɓe mono. Á wãã ga: “Day maa po ndi hay ɗiggi ga maapo ndi bay durgi diŋ maa da’ yiŋgi jag ti fẽn maa de eln wa. Day patala ndi go de bawge jag jiili ɓi ga Twaywan maani Baan taw ge bon wo go ɓuy tu. Ndi de koge ga Jeofa caa ge wer bon wo go ɓuy, amaa maa ɓi ndi bay de kããge maa caa wer ɓaara go wa.”—Siŋ. 72:1, 4.

10. Doo maaga Matiye 5:43-48 wãã ne mono, wer mayse ga naa tay de jar maaga kiɗ wo ga saara coo tamsir gà là? (Ko foton lay.)

¹⁰ Day maa po, jar debaŋ laa wo yoo jar maaga wo de giŋ ngomna wo mono. Maapo jiili ɓaara sõõ, saara hoo sug ti jag liŋgi wo gà, day saara joŋ bon jar lan wo. Yeso bay de had naa maa joŋge de maŋ sen wa. (Efe. 4:31) Hẽnbe po maaga à ɗen ga Jefre wãã ga: “Ndi de koge ga de maaga jar hoo we ciŋ no, á go gus maaga jiili ɓaara sõõ; á ɓlag wo fẽẽre maa de kii ti ɓaara wo go ɓuy, á joŋ wo freŋ, lan saara joŋ kããra debaywoore pa.” Amaa Yeso had naa ga naa mo da jar ɓuy, koh jar maaga ɗiggi naa bay de tayge de ɓaara wa mono; hayba jar maaga joŋ wo bon naa mono. (Jaŋ Matiye 5:43-48.) Naa Kretiyẽ naa dur go ɓuy maa maŋ saɓlaŋ Yeso.

11. Wer mayse ga maapo á joŋ gayri see naa maa maŋ saɓlaŋ Yeso là?

¹¹ Koh de maaga naa mbe de koge ga caa ge wer joŋge de gurn go diŋ Twaywaŋ maani Baan laybla’ mono, maapo á joŋ de gayri see naa maa maŋ saɓlaŋ Yeso, de maaga à yaŋ joŋ coo no. Naa ko fẽn maaga hay da’ mãygeman naa Janiya mo ɗa. À hay joŋ bon ɓe wer maaga hõõgesee ɓe hay sara mono. Janiya wãã ga: “Jiili ɓi sõõ debaŋ, day ndi hay ɗig ga à mo joŋ bon jar sen wo no. Ndi maŋ ɗiggi ga ndi kal yoo jar maaga hay wo durgi maaga à mo ko hõõgesee naa wo diŋ sen boŋ ɓuy mono. Ndi hay ɗig ga ndi yaŋ joŋge doo sen ne no, ndi ko see ɓi yaŋ ɗawa.” Amaa mẽ’ mẽ’ blam mokay, Janiya laa ga se mo hay coo ɗiggi ɓe. Á wãã pa ga: “Ndi wo koge ga ndi kaŋ ɗiggi diŋ ti jar téebeere wo, lan ti fẽẽre maaga á wãã wo ra, ti maaga ndi de hay kaŋ ɗiggi diŋ ti Jeofa mono. Day ndi raw maŋ ɗiggi ga ndi mo naa see ɓi go yoo tayge jag jar sen wo mo deŋ ɓuy no.” Koh ɓil naa mo hay ba de sõõge wer maaga à joŋ naa, noga à joŋ jar tigriŋ wo de gur laybla no, naa mo hay joŋ hayya ne see naa. Naa mo hay ɗaw see naa jag sõõge ɓil no, lan naa mo hay tay see naa de jar maa ti tamsir wo wa.—Jaŋ 15:19.

12. Wer mayse ga naa mo hay joŋ hayya ne see naa ti fẽẽre maaga naa ko ra, naa co’ sug ɓaara lan jaŋ ra là?

¹² Naa joŋ joŋge maa ɗaw see naa jag sõõge ɓil là? Naa joŋ sen de joŋ hayya ne see naa ti fẽẽre maaga naa ko ra, laa ra noga jaŋ ra mono. Maapo à ngaɓ mbaa maa ɓil Interned wo maaga á mo cè jare, lan maaga jar mo hoo ciŋ see ngomna wo. Day maa po ‘journaux’ wãã wo diŋ ɗiggi ɓaara, bay diŋ fẽn maaga hres cwãy wa. Amaa, koh mbaa sen mo hay ba diŋ cwãy laybla no, naa kãã maa ‘wũy re sen bay diŋ de jaŋge ɓe tum tum wa. Hayga naa yaŋ tum co’ sug mbaa sen wo no, se caa jiili naa go, sõõ ɓil naa, lan hã lawge ne naa lay. (Jõõ. 24:10) Maapo ga naa men ɓo’ Twaywaŋ maani Baan go pel fẽẽren ɓuy nen naw naa, lan ti naa yõõ go ga caa ge wer re maa ti tamsir wo go ɓuy diŋ Twaywaŋ sen boŋ tu.

13. Naa yaŋ jaŋ Bible tum, lan yaŋ ɗiggi ti ɓe no, se kay naa na kayge de maaga à yaŋ joŋ coo naa là?

¹³ De maaga naa yaŋ jaŋ Bible tum, lan yaŋ ɗiggi ti ɓe no, se kay naa maaga naa mo lag ngiŋ de maaga à yaŋ joŋ coo naa no. Mãygeman naa po maaga à ɗen ga Aliya hay ko see ɓe go de hãyge debaŋ de maaga á hay ko maaga à joŋ bon jar ɓi sir ɓaara mono. Ɓil ɓe hay de sõõge debaŋ de maaga á hay ko maaga à bay joŋ bon jar maaga joŋ wo coo jar lan wo wa mono. Á wãã ga: “Ndi wo koge ga hayga ndi yaŋ hã ɓil ga Jeofa taw ge re sen mo deŋ yaŋ wo go no, ndi de hay coo ɗiggi ɓi.’ De ngar ngeel sen ndi kal jaŋ Job 34:22-29. Verse sen fer wo ɓo’ sug ɓi ga fẽn po bay de yoŋre nen Jeofa wa. De ko caa kiida jar ti ngeel ɓe diŋ se boŋ tu, day de kããge maa ‘wũy re maa see wosela ɓuy diŋ se boŋ tu pa.” Day naa de hay joŋ mayse patala de maaga naa de gorge ga Twaywaŋ maani Baan mo ‘wũy ren wo ɓuy mo là?

NAA JOŊ MAYSE PATALA LÀ?

14. Fẽn maa boŋ ga naa mbe de kããge maa joŋge ɓe patala diŋ mayse là? (Kolos wo 3:10, 11)

¹⁴ Naa kãã maa coo joŋre maaga jar lan joŋ wo mo gà, amaa, naa mbe de kããge maa coo joŋre naa ane. Doo maaga naa hay ko le go ciŋ la no mono, naa maŋ saɓlaŋ Yeso de naa nen dage go see jar lan wo. Wersen naa mo dur maa joŋ wosela ɓuy de ele; hayba jar maaga joŋ wo coo naa mono. (Mat. 7:12; Rom. 12:17) Á co jag Jeofa de maaga naa joŋ wosela ɓuy de ele, lan ti ngeel ɓe lay mono.—Jaŋ Kolos wo 3:10, 11.

15. De ɗeŋ maa hõn ga naa kay jar de fẽn maaga Bible had mo là?

¹⁵ Ɗeŋ maaga daŋgo ga naa kay jar diŋ de sii wããre Baa ne hara. Wer mayse ga naa wãã doo sen no là? Werga “koge mani [Jeofan]” de kããge maa kol jobo maaga hay gir gir noga hay da waŋ go desãy, lan de dage ɓili. (Esa. 11:6, 7, 9) Go taŋgu maaga á da’ cwãyn mono, blo po maaga à ɗen ga Jemal hay yoo tayge jag jar po maaga hay wo wããge ga saara coo ngomna maa ti sir ɓaara no, werga á bay joŋ jar ti ngeel ɓe wa. Á wãã ga: “ndo kãã maa coo jar de durgi gà. À hay coo me bay diŋ de durgi wa, amaa coo me diŋ Wããre Baa.” Cwãy maa ɓil Bible kay wo Jemal maa naa see ɓe go yoo jar sen wo. Wersen hayga naa yaŋ had cwãy maa ɓil Bible ne jar no, naa kãã yaŋ maa kay rage maaga á mo joŋ wo fẽn maa de cõõre jag jare.

16. Wer mayse ga ndo wãã ne jar ti fẽn maaga Twaywaŋ maani Baan joŋ ge ne yaŋ là?

¹⁶ Doo Yeso no lay, naa wãã ne jar ga Twaywaŋ maani Baan taw ge re maa see jar téebeeren yaŋ wo go maa tum. Wããre sen coɓ jar maaga à de joŋ coo ɓaara mono. (Jer. 29:11) Stasi maaga naa hay wãã le ti ɓe taŋgu la wãã ga: “Patala ndi hay eŋ de maaga à joŋ coo ɓi we, noga à yaŋ joŋ coo jar maa tigriŋ wo no; werga ndi de koge ga taw ge bon wo go diŋ Twaywaŋ maani Baan boŋ tu. Jeofa joŋ joŋre de wããre maa ɓil Bible maa coɓ jare.” Maaga naa mo hay coɓ nen jar de wããre Baa ti ɓaŋ joŋge jar de gurn mono, naa de hay bag jag see naa go de woore see siigi wããre no. Hayga ndo da’ wer we go de woore ne fẽn maaga Bible wãã ti bon wo no, ndo joŋ yaŋ go de bawge jag jiili ti ɓaara. Doo sen nokay, ndo joŋ yaŋ de kããge maa wããge ne jar ga wer mayse ga naa joŋ bon la, lan ga ig la mẽ’ Jeofa taw ge bon wo yaŋ go ɓuy; hayba ti lakol, noga ti ngeel joŋre wo.b

17. Jeofa kay naa patala na kayge là?

¹⁷ Naa de koge ga de maaga yaŋ wãã re naa diŋ Manhúulí, “waŋ jar ma ti tamsir lan” no, naa joŋ tum joŋ bone. Amaa, naa mbe de kããge maaga naa kaŋ ɗiggi ti Jeofa maa gor wur maa de woore, werga á de wããge ne naa ga se kay naa yaŋ patala, lan se taw ge Manhúulí wo de jar de baycõõren yaŋ wo go. (Jaŋ 12:31) Ko ba ɗa, Baa ngaɓ ne naa ɓil Bible ga, wer mayse ga bon ti tamsir debaŋ la. Day se ngaɓ pa ga se ko nen ti jar maaga á de joŋ coo ɓaara mo pa. (Siŋ. 34:18-20) Yeso had naa de fẽn maaga naa mo joŋ de maaga à joŋ naa we de gur no. Day se had naa pa ga ig la mẽ’ Twaywaŋ maani Baan caa ge wer bon yaŋ wo go ɓuy, day naa joŋ ge bon gà so. (2 Pi. 3:13) Da ga naa mo dur go ɓuy maa sii wããre maa de cõõre maa ti Twaywaŋ maani Baan go ne jare, de kaŋ ɗiggi ti wur maaga tamsir joŋ go de baage de “fen ma ti ngel ɓe no, de cagge re ti faage ɓe” lay mono.—Esa. 9:7.