Hay hoo sug ti jare

1. Wer mayse ga jar téebeere da wo ga à mo hoo sug ti saara là? (Jag Jõõ wo 22:1)

Á CO jag ɓo de maaga à hoo sug ti ɓo mo yawlà? Sen bay faare. Wosela ɓuy da ga hoo sug ti se. Maaga à yaŋ hoo sug ti naa no, sen co jag naa. Diŋ wersen ga Bible wãã ga: “Joŋge de cõõre jag jar de daŋ solay wo de boo biŋni” mono!—Jaŋ Jag Jõõ wo 22:1.

2-3. Wer mayse ga á bay gus maa hoo sug ti jar wa là, day naa mo hay hoo sug diŋ ti wose wo là?

² Day maa po á bay gus maaga naa mo hoo sug ti jar lan wo wa. Wer maylà? Werga á go gus maaga naa ko ɓlagge maa see jar lan wo no. De daŋ sen pa, naa ti tamsir maaga jar bay hoo sug ti kããra wa. Amaa, naa de hay joŋ sara. Wer mayse là? Werga Jeofa da ga naa mo “hor we sug ti jar ɓuy.”—1 Pi. 2:17.

³ Ɓil hadge sen la naa ko yaŋ ga hooge sug ti jar da wããge ga hãylà. Naa ko yaŋ pa ga naa joŋ joŋge maa hoo sug ti (1) jar maa ɓi feele naa wo là, (2) hẽẽre naa Kretiyẽ wo là, lan (3) jar maaga bay wo Sedeewa Jeofa wa là. Naa ko yaŋ debaŋ diŋ ɗeŋ maaga naa mo hoo sug ti jare, koh nen ngeel maa de gayri wo mono.

HOOGE SUG TI JAR DA WÃÃGE GA HÃYLÀ?

4. Hooge sug ti jar da wããge ga hãylà?

⁴ Hooge sug wãã diŋ ti ɗeŋ maaga naa ko jar lan wo, lan joŋ ra mono. Maaga naa ko we ga joŋre jobo de woore, noga á joŋ mopo maa de woore, noga pa á diŋ jee kluu naa ti ngeel po no, naa hoo sug ti ɓe. Á mbe de el maaga naa joŋ doo sen nono, werga naa de sãy hoo sug ti jar ti.—Mat. 15:8.

5. Mayse kay naa maaga naa mo hoo sug ti jar lan wo là?

⁵ Jeofa da ga naa mo hoo sug ti jar ɓuy. Ba doo maaga á wãã ga naa mo hay hoo sug ti “jar kluuri sir” wo mono. (Rom. 13:​1, 7) Amaa jar maa po wãã wo ga: “Ndi hoo sug diŋ ti jar maaga joŋ wo fẽẽre maa ti ngeel ɓe mono.” Ɗiggi sen mbe ti ngeel ɓe yawlà? Baywa. Naa jar maa goŋ Jeofan, naa de koge ga naa hoo sug ti jar bay diŋ wer fẽẽre maaga á joŋ wo mo wa. Naa hoo sug ti jar werga naa da Jeofa, lan naa de sãy maaga naa mo co jag ɓe ti.—Jos. 4:14; 1 Pi. 3:15.

6. Naa mbe maa hoo sug ti jar maaga bay wo nen maaga naa hoo sug ti ɓaara wa yawlà? Naa wer ɓe. (Ko foto maa nen no.)

⁶ Jar maa po wii wo jag see ɓaara ga: ‘Ndi mbi maa hoo sug ti jar maaga bay wo nen maaga ndi hoo sug ti ɓaara wa mo yawlà?’ Ãã. Naa ko ba saɓlaŋ po wo ɗa. Waŋ Sawul mbiɗ foo weel ɓe Jonataŋ go nen jar poɗage. (1 Sam. 20:​30-34) Amaa Jonataŋ ya’ wer hoo sug ti pan ɓe, lan dur wo jar hee ɓaara wo de kããra de pan ɓe, hãã wur húulí ɓe. (Laa. 20:12; 2 Sam. 1:23) Eli Jee Kluu maa siɗ jag caa kiida Ana de baywoore, ga á go de taage de yíi. (1 Sam. 1:​12-14) Amaa mbe de sen ɓuy, Ana wãã wããre ne Eli de hooge sugi, koh de maaga jar Israyel wo ɓuy hay wo go de koge ga Eli hay bay diŋ jee siɗ jag maa ti ngeel ɓe wa, lan bay pããbe maa ti ngeel ɓe wa lay mono. (1 Sam. 1:​15-18; 2:​22-24) Jar Aten ɗar wo Pole, lan wãã wo ne hẽn ga á diŋ “Je da faare”. (Joŋre 17:18) Mbe de sen ɓuy, Pol wãã wããre ne hara de hooge sugi. (Joŋre 17:22) Saɓlaŋ sen ngaɓ wo ga naa yaŋ da Jeofa cwãy, lan naa yaŋ de sãy maaga naa mo hay de cõõre jag ɓe no, naa hoo sug ti jare, koh á mo hay ba gus wa. Naa ko patala diŋ maaga naa hoo sug diŋ ti wose wo là, day wer maylà mono.

HOO SUG TI JAR MAA ƁI FEELE ƁO WO

7. Wer mayse ga á bay gus see naa maa hoo sug ti jar maa ɓi feele naa wo wa là?

⁷ Wer mayse ga á bay gus wa là? Naa da iggi see jar maa ɓi feele naa wo debaŋ. Wersen, naa go de ko joŋre ɓaara maa de wooren wo de ngeel hugli ɓaara wo no. Jar maa po wo de cegè; wersen á bay gus maaga naa soɗ ra wa. Jar maa po wo de re see, wersen saara law debaŋ. Jar maa po joŋ wo fẽẽre, noga wãɗ wo fẽẽre maaga cè jar lan wo. Nen maaga á hay joŋ wo maaga ɓi feelen mo hay ti desãy mono, jar maa po bay wo hoo sug ti jar lan wo wa. Wersen, feelen joŋ de laa jag gà. Doo maaga cegè joŋ ga hõõgesee mo joŋ joŋre de woore wa no lay mono, ti desãy joŋ ɓi feele gà, de maaga jar maa ɓil ɓen bay wo we hoo sug ti kããra wa no. Day doo maaga cegèn mbe de kããge maa pẽẽge go no lay mono, jar maa ɓi feele mbaara de kããge maa had hoo sug ti kããra lay.

8. Wer mayse ga naa mo hoo sug ti jar maa ɓi feele naa wo là? (1 Timote 5:​4, 8)

⁸ Wer mayse ga naa mo hoo sug ti jar là? (Jaŋ 1 Timote 5:​4, 8.) Ɓil leder ɓe maa taŋgu maaga á ɓo’ ne Timote mono, Pol ŋgaɓ ga wer mayse ga á de el maaga naa mo hoo sug ti kããra ɓi feele là. Á wãã ne hẽn ga naa mo hay joŋ sen bay diŋ werga á diŋ joŋre maa nen do naa koɗ wa, amaa werga á diŋ “joŋre jag Baa” ɓaara. Wããre sen da wããge ga naa joŋ sen werga naa da Jeofa, lan werga á diŋ ɗeŋ maaga naa goŋ ne mono. Laa ɓi feele wo diŋ Jeofa. (Efe. 3:​14, 15) Wersen, de maaga naa yaŋ hoo sug ti jar maa liŋ ni naa wo no, sen da wããge ga naa de hoo sug diŋ ti Jeofa Jee laa ɓi feele wo no. Á de el debaŋ maaga naa mo hoo sug ti jar maa ɓi feele naa wo!

9. De ɗeŋ maa hõn ga wãy wo de war ngaɓ wo go ga saara hoo sug ti kããra là? (Ko foton wo lay.)

⁹ Naa hoo sug ti jar na hooge là? Je twar ngaɓ go ga se hoo sug ti wãy se de ngaɓge go ga se da ne de maaga á yaŋ wo ɓoge, lan de maaga á yaŋ wo yoo ngaɓa no. (Jõõ. 31:28; 1 Pi. 3:7) Á ma’ ne gà, mbiɗ sõõre ɓe nen jar gà, lan joŋ mopo maaga ngaɓ ne hẽn ga kayge ɓe baywa gà. Ariyel,a maaga wo ɓi sir Argentine wãã ga: “Wer maaga wãy ɓi de cegè mono, day maapo á wãã fẽẽre maaga cè wo me. De maaga á le’ joŋ sen we no, ndi fer ɗiggi ga wãã ne bay diŋ se wa. De maaga jag wùr bay we laage wa no, ndi raw ɗiggi ti 1 Korente wo 13:5; sen kay me maaga ndi mo wãã wããre ne hẽn de waŋ wa, amaa de hooge sugi.” (Jõõ. 19:11) Wãy hoo sug ti war ɓe de wããge ti ɓe de el, de maaga á yaŋ yoo jar no. (Efe. 5:33) Á mbuɗ foo ɓe gà, á ɗar ne gà, feg ti ɓe gà lay. Á mo hay kaŋ ti ɓe ga joŋre maa de maŋ sen caa ɓil wãy wo de war wo go. (Jõõ. 14:1) Mãygeman naa po maaga wo Italie, ga war ɓe go tum de caa jiili do lawge wãã ga: “Day maa po ndi ɗig ga war ɓi raw lawge ti fẽẽre po wo debaŋ. Taŋgu mokay, nen ferge wããre ɓi de mbeere nen ɓi wo mono, ndi hay bay ngaɓge ne hẽn ga ndi hoo sug ti ɓe wa. Amaa, maaga ndi hay iggi see barge maaga wãã wo wããre de hooge sug mono, sen kay me maaga ndi mo le’ wãã wããre ne war ɓi de hooge sug lay.”

10. De ɗeŋ maa hõn ga weere ngaɓ wo go ga saara hoo sug ti pããre ɓaara wo là?

¹⁰ Weere wo, hoo wee sug ti jag liŋgi maaga pããre ɓay hã wo ne nday mono. (Efe. 6:​1-3) Wãɗ wee wããre ne hara de hooge sugi. (Laa. 21:17) De maaga pããre ɓay gar wo we go no, hoo wee sug ti ɓaara de soɗ rage. Dur wee go ɓuy maa ko nen ti ɓaara. Naa wãã wee ti Mari, maaga pan ɓe bay diŋ Sedeewa Jeofa wa mo ɗa. Pan ɓe hay de cegè, day se kol gaali see Mari maa soɗge ɓe, werga pan ɓe hay wãã wããre ne hẽn de baywoore debaŋ. Mari wãã ga: “Ndi tos Jeofa maaga á mo kay me maa ngaɓge go ne pan ɓi ga ndi hoo sug ti ɓe. Ndi raw wããge ɓil ɓi so ga, hayga Jeofa wãã ga ndi mo hoo sug ti pããre ɓi wo no, sen da wããge ga á hã ẽgre yaŋ me maa joŋge ɓe. Mẽ’ mẽ’ mokay, ndi wo koge ga bay diŋ ga pan ɓi coo joŋre ɓe, maaga ndi hoo sug ti ɓe kway wa.” De maaga naa yaŋ hoo sug ti jar maa ɓi feele naa wo, koh de hugli ɓaaran wo ɓuy laybla mono, naa de ngaɓge go ga naa hoo sug ti Jeofa, Jee laa feele wo no.

HOO SUG TI HẼẼREBE MAA TI TAYGE WO

11. Wer mayse ga maapo á joŋ de gaali see naa maa hoo sug ti hẽẽre naa wo là?

¹¹ Wer mayse ga á bay gus wa là? Naa jar maa goŋ Jeofa, naa joŋ joŋre de jag liŋgi maa ɓil Bible wo no. Amaa day maa po, jar maa po joŋ wo coo naa, caa wo kiida naa de baywoore, noga pa, joŋ wo fẽẽre maaga co wo jag naa gà. Hayga hẽn naa po joŋ fẽn maaga co jag naa gà we nen maaga naa “’waɗ war ne kããra ti” no, maapo sen joŋ de gaali see naa maa hoo sug ti ɓe. (Kol. 3:13) Mayse kay naa maa ya’ wer hoo sug ti ɓe là?

12. Wer mayse ga á de el maaga naa mo hoo sug ti hẽẽre naa wo là? (2 Piyer 2:​9-12)

¹² Wer mayse ga naa mo hoo sug ti jar là? (Jaŋ 2 Piyer 2:​9-12; TMN.) Ɓil leder ɓe maa de ɓog maaga á yern mono, Piyer wãã ga Kretiyẽ maa po maa ti siyekle maa taŋgun hay bay wo wãã wããre ne “jar ma de woore” wo de hooge sug wa. Jar se maa de wooren hay wo diŋ jar maa pel tayge wo. Day jar peele Baa maa de deelen ɗig wo na ɗiggi de maaga á hay wo ko fẽẽre sen wo hresge là? Wer maaga á “hoo wo sug ti Jeofa” mono, á wãã wo wããre maa debaywoore ti jar maaga hay bay wo hoo sug ti jar maa pel taygen wo wa gà. Ko ba sen mokay ɗa! Jar peele Baa maa bay ɗagn laa wo wãã fẽẽre maa de baywoore ti jar se maa far ti see ɓaara ciŋn wo gà. Nen maaga á mo hay joŋ wo doo sen no mono, saara men re sen ne Jeofa ti coo do maaga á mo caa kiida ɓaara, lan mo ruu ra. (Rom. 14:​10-12; Tab ne de Jud 9.) Naa da’ hadge see saɓlaŋ jar peele Baa wo debaŋ. Hayga naa yaŋ hoo sug ti jar hee naan wo no, naa bay maa hoo sug ti hẽẽre naa wo de daŋ sen wa yawlà? Naa de hay dur go ɓuy maa hoo sug ti ɓaara. (Rom. 12:10) Hayga naa yaŋ joŋge doo sen nono, sen kaŋ nen ga naa de hoo sug ti Jeofa.

13-14. Naa joŋ joŋge maa hoo sug ti jar maa ti tayge wo là? Hã saɓlaŋ po wo ɗa. (Ko foton wo lay.)

¹³ Naa hoo sug ti jar na hooge là? Jar maa pel tayge wo, nday le’ had jar lan wo we no, joŋ wee ne tum de dage. (Flm. 8, 9) Hayga nday yaŋ de sãy baa yaŋ ne jobo ti no, joŋ wee ne de dage, lan de maaga ɓil ɓay yaŋ bay de sõõge wa no. Mãyregemaarebe wo, nday mbay de kããge maa joŋge ga jar mo hay hoo sug ti kããra ti tayge. Nday joŋ sen na joŋge là? Wãɗ wee de baywoore ti jar wa, lan car wee gete’ ti jar wa lay. (Tid 2:​3-5) Naa ngaɓ go ga naa hoo sug ti jar maa pel tayge wo de yãã jag ɓaara, de joŋ suse’ ne hara de maaga á joŋ wo taygeti wo, see wo de taygeti maa sii wããre Baa wo, lan de maaga á kay wo hẽẽrebe maaga wo go de “celge joŋ wer ɓlagge wo mono.”—Gal. 6:1; 1 Tim. 5:17.

¹⁴ Á hay de gaali see mãygeman naa po maaga ɗúu ɓe ga Rosiyo maa yãã yaŋ jee maa pel tayge po. Á wãã ga: “Ɓil ɓi hay sõõ werga ndi hay ɗig ga á wãã wããre me de ɗeŋ maa de woore gà. De maaga ndi fer liŋ mokay, ndi le’ wãɗge ti ɓe de baywoore. Koh de maaga ndi hay bay mbi go ngaɓge ɓe nen joŋre ɓi wa laybla’ mono, ndi hay ɗiggi ɓil ɓi ga á bay de sãy ɓi ti wa.” Mayse kay Rosiyo là? Á wãã ga: “Ti jaŋge Wããre Baa ɓi mono, ndi le’ ne 1 Tesalonig wo 5:​12, 13 ti. Ndi wo koge ga ndi hay bay hoo sug ti hẽnbe sen wa, ɗiggi ɓi le’ ruu mege. Ndi tos Jeofa, lan ndi kiɗ wer ne fẽẽre maaga kay wo me ɓil kefder naa wo, maaga ndi mo coo ɗiggi ɓi. Ndi wo koge ga ren hay bay diŋ see hẽnbe sen wa, amaa ndi hay bay fer ti see ɓi gesiŋ wa. Ndi wo koge pa ga, hayga ndi yaŋ bay fer ti see ɓi gesiŋ wa no, á joŋ gayri see ɓi maa hoo sug ti jar lan wo. Patala ndi dur debaŋ maa hoo sug ti jare, day ndi ko ga ɓil Jeofa go feh ti durgi ɓin wo no.”

HOO SUG TI JAR MAAGA BAY WO SEDEEWA JEOFA WA MONO

15. Wer mayse ga maapo á joŋ gaali see naa maa hoo sug ti jar maaga bay wo diŋ Sedeewa Jeofa wa là?

¹⁵ Wer mayse ga á bay gus wa là? Day maa po naa yiŋ de jar maaga bay wo hoo sug ti Kefder Baa wa ti siigi wããre. (Efe. 4:18) Jar maa po co’ wo sug naa gà. Maapo ga kããre naa maa ti ngeel joŋre wo noga maa ti lakol joŋ wo naa de woore gà. Maapo joŋre siigi wããre naan co jag jee kluu naa maa ti ngeel joŋre noga jee had naa po ti lakol gà. Maapo naa men hoo sug go ti jar sen wo, noga pa naa men joŋ rage go de woore.

16. Wer mayse ga á de el maaga naa mo hoo sug ti jar maaga bay wo goŋ Baa wa ɗa là? (1 Piyer 2:12; 3:15-16a)

¹⁶ Wer mayse ga naa mo hoo sug ti jar là? Naa mo hay kaŋ ti naa ga Jeofa kaŋ ɗiggi ti ɗeŋ maaga naa joŋ jar maaga bay wo goŋge ɓe wa ɗa mono. Apotre Piyer ɓo’ sug Kretiyẽ wo ga maapo joŋre ɓaara maa de wooren kaŋ wer jar maaga á mo “togoɗ wo Baa.” Diŋ wersen ga á wãã ne hara ga á mo hay wo naa wer hãge ɓil ɓaara go ne jar “desãy de horge sug” mono. (Jaŋ 1 Piyer 2:12; 3:15-16a.) Koh Kretiyẽ mo hay ba wo pel jee caa kiida noga de jee leege ɓaara po laybla no, á mo hay wo naa wer hãge ɓil ɓaaran de hooge sug doo ga saara pel Baa nono. Jeofa co’ sug naa, laa wããre maaga naa wãã lan ti ɗeŋ maaga naa wãã ne mono. Sen diŋ jorge wer mayse de woore, maaga naa mo joŋ jar maaga bay wo goŋ Baa wa ɗa de hooge sug mokay ne!

17. Naa joŋ joŋge maa hoo sug ti jar maaga bay wo goŋ Jeofa wa ɗa là?

¹⁷ Naa hoo sug ti jar na hooge là? De maaga naa yaŋ sii wããre Baa no, naa mo ko jar doo ga naa de daŋ rage noga ga á ko wo mopo ti Wããre Baa gà wa. Naa mo hay ko ra doo ga á wo de el nen Baa, lan ga á wo de daŋ naa nono. (Aje 2:7; Flp. 2:3) Hayga jar ɗar naa we wer hãge ɓil naa no, naa mo hay fer ne hara ti ɓe de baywoore lay wa. (1 Pi. 2:23) Hayga jag ɓo raw we ne jobo no, wii fuggi ɓil go deparday tu. Ndo joŋ joŋge maa hoo sug ti jar ti ngeel joŋre là? Hay da joŋre debaŋ, joŋre ɓo mo hay de woore see kããre ɓo maa ti ngeel joŋre wo, lan see jee kluu ɓo no. (Tid 2:​9, 10) De maaga ndo yaŋ de deele, day yaŋ joŋ joŋre debaŋ no, maapo ndo co ge jag jar tum gà; day ndo joŋ ge de cõõre jag Baa.—Kol. 3:​22, 23.

18. Wer mayse ga á de el maaga naa mo hay hoo sug ti jar là?

¹⁸ Naa hoo sug ti jar wer fẽẽre ngaɓa! Naa ko ga naa yaŋ hoo sug ti jar maa liŋ ni naa wo no, naa de hoo sug diŋ ti Jeofa jee laa tiŋ ne jar ti no. Ni pa mono, de maaga naa yaŋ hoo sug ti hẽẽre naa maa ti tayge wo no, naa de hoo sug diŋ ti Jeofa Pan naa maa ciŋ no. Day de maaga naa yaŋ hoo sug ti jar maaga bay wo goŋ Jeofa wa ɗa no, naa de joŋge ga á mo hay go see ɓaara gus maa goŋ Jeofa wur po. Koh jar maa po mo hoo ba wo sug ti naa wa laybla no, á de el maaga naa mo hay tum hoo sug ti ɓaara. Wer mayse là? Werga Jeofa kaŋ bosa’ ne naa ti. Day á wãã pa ga: “Ndi hoo sug nà ti je maga hoo sug ti ɓi mono.”—1 Sam. 2:30.