UMO MUNGACHITIRA PARA MUKUSUZGIKA MAGHANOGHANO

Kasi Kusuzgika Maghanoghano Ni Vichi?

Kusuzgika maghanoghano ni umo thupi likuchitira para munthu wakwenjerwa chifukwa cha suzgo. Wongo ukutumizga tunthu tunyake twakuchemeka hormones mu vigaŵa vyose vya thupi. Ivi vikupangiska kuti mtima wambe kuchimbira, ndopa zingasintha umo zikwendera, maphapu ghangatukumuka panji kukhwinyata kweniso minofu yamuthupi yingakhwinyata. Pambere imwe mundamanye, thupi likuŵa kuti lanozgekera kale chakuchita. Para suzgo lajumpha, thupi likuweleraso mu malo mwake.

KWENJERWA KUWEMI KWENISO KUHENI

Mwakawiro munthu wakwenjerwa para wasangana na suzgo, ndipo ivi vikupangiska kuti thupi linozgekere kulimbana na suzgo. Kuti munthu wenjerwe, vyose vikwambira ku wongo. Kwenjerwa kuwemi kukovwira kuti munthu wachitepo kanthu mwaluŵiro. Nakuti kwenjerwa kunyake kungamovwirani kuti mufiske vilato vinu panji kuchita makora pa mayeso, pa maintavyu, panji maseŵero.

Ndipouli, kwenjerwa mwakujumphizga nkhuheni chifukwa kungamupwetekani. Para munthu wakwenjerwa nyengo yitali wangamba kulwara, kusuzgika maghanoghano kweniso mutu ungachimbira. Mungambaso kusintha umo mukuchitira vinthu na ŵanthu. Kanandi ŵanthu awo ŵakwenjerwa chomene, ŵakwamba kumwa chomene moŵa panji munkhwala wakutimbanizga wongo. Ŵangambaso kulwara nthenda yakusuzgika maghanoghano, kuŵavya nkhongono, kweniso ŵangamba kughanaghana vya kujikoma.

Nangauli ŵanthu ŵakusuzgika maghanoghano mwakuyana yayi, kweni kwenjerwa mwakujumphizga kukwambiska matenda ghanandi. Ndipo pafupifupi chigaŵa chilichose cha thupi chikukhwaskika.

UMO KWENJERWA KUNGANANGIRA UMOYO WINU

Misempha Yakunyamura Uthenga.

Para munthu wakwenjerwa, misempha iyi yikupangiska kuti thupi lifumiske tunthu tunyake twakuchemeka hormones. Ivi vikupangiska kuti mtima wambe kuchimbira, ndopa zambe kuchimbira, kweniso kuti shuga yiŵe yinandi mu ndopa. Thupi likuchita ivi kuti lilimbane na suzgo ilo lilipo. Kweni para munthu wakwenjerwa mwakujumphizga vingapangiska kuti:

wakwiyenge luŵiro, kusuzgika maghanoghano, kutondeka kugona kweniso kulwara mutu

Viwangwa na Minofu.

Para munthu wakwenjerwa, minofu yikukhwinyata panji kuti kukungana kuti yimuvikilire. Kweni para munthu wakwenjerwa mwakujumphizga vingapangiska kuti:

thupi linyenyerenge panji kuŵinya, minofu yingakungana, kweniso mutu ungamba kuŵinya

Maphapu.

Munthu wangamba kuthuta luŵiroluŵiro kuti watore mphepo yinandi. Kweni para munthu wakwenjerwa mwakujumphizga vingapangiska kuti:

wambe kuchita befu pakuthuta ndipo ivi vingapangiska kuti walware matenda ghanyake

Mtima.

Mtima ukwamba kutimba mwaluŵiro kweniso na nkhongono kuti utumizge ndopa mu thupi lose. Misipa yinyake yingakhwinyata panji kusanuzgika na chilato chakuti ndopa zilute ku chigaŵa icho zikukhumbikwira chomene. Para munthu wakwenjerwa mwakujumphizga vingapangiska kuti:

walware BP, nthenda ya mtima panji sitiroku

Viŵaro vinyake.

Viŵaro vinyake vya thupi navyo, vikufumiska tunthu tunyake twakuchemeka hormones uto tukovwira thupi kuti limarane na suzgo. Para munthu wakwenjerwa, chiŵindi chikupangiska kuti shuga yiŵe yinandi mu thupi na chilato chakuti thupi liŵe na nkhongono. Para munthu wakwenjerwa mwakujumphizga vingapangiska kuti:

walware nthenda ya shuga, chivikiliro cha mu thupi chikuchepa, ndipo wangalwara matenda ghakupambanapambana, wangatutuŵa chomene kweniso kwamba kukwiya luŵiro

Matumbo.

Chakurya chikutondeka kugayika makora. Para munthu wakwenjerwa mwakujumphizga vingapangiska kuti:

wachitenge museru, wabokorenge, kufumira panji kusuzgika kujovwira ku chimbuzi

Viŵaro Vyakubisika.

Para munthu wakwenjerwa vingapangiska kuti waŵavye khumbo la kugonana. Kweniso kwenjerwa chomene kungapangiska munthu kuti:

waŵavye nkhongono zakugonana, kweniso kutimbanizga ndondomeko ya mwanakazi yakuŵa ku mwezi