CHARU CHAZURA NA MASUZGO

4 | Vikilirani Chigomezgo Chinu

CHIFUKWA WULI NTCHAKUZIRWA?

Kwenjerwa chifukwa cha masuzgo agho ghazura mu charu, kungapangiska ŵanthu kusuzgika maghanoghano panji kulwara. Ŵanthu ŵanandi awo ŵakukumana na masuzgo, ŵakutaya mtima ndipo ŵakuwona kuti vinthu vingaŵaso makora yayi. Kasi ŵakuchita wuli?

Ŵanji ŵakuleka nanga nkhughanaghanira vyamunthazi.
Ŵanji ŵakwamba kumwa moŵa na munkhwala wakutimbanizga wongo na chilato chakuti ŵaluweko masuzgo.
Ŵanthu ŵanyake ŵachoko waka ŵakughanaghana kuti ntchiwemi kufwa waka kuluska kuŵa wamoyo. Iwo wakujifumba kuti: “Chifukwa chakuŵira wamoyo ntchivichi?”

Ivyo Mukwenera Kumanya

Masuzgo ghanyake agho mungakumana nagho ngakanyengo kachoko waka ndipo ghangamara nyengo yiliyose.
Nanga suzgo linu lingaŵa kuti likumara yayi, kweni pali vinthu vinyake ivyo mungachita ivyo vingamovwirani kuti muzizipizge.
Baibolo likutiphalira umo masuzgo ghose ghazamumalira.

Ivyo Mukwenera Kumanya

Baibolo likuti: “Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake. Zuŵa lililose lili na masuzgo ghake.”—Mateyu 6:34.

Mulimbanenge na suzgo la zuŵa ilo mbwenu. Lekani kwenjerwa chomene na ivyo vichitikenge munthazi m’paka kutondeka kuchita makora vinthu vyakukhumbikwa vya zuŵa ilo.

Kufipa mtima chifukwa cha masuzgo ghakunthazi agho mukughanaghana waka kuti panji ghangazakachitika, kungamupangiskani waka kuti musuzgike maghanoghano na kwamba kukayika kuti vinthu vizamuŵa makora munthazi.

UMO MUNGACHITIRA—Fundo Zakovwira

GHANAGHANIRANI PA VINTHU VIWEMI

Baibolo likuti: “Mazuŵa ghose gha munthu wakusuzgika ngaheni, kweni munthu wa mtima wakusangwa wakuŵa na chiphikiro nyengo zose.” (Zintharika 15:15) Para tikughanaghanira chomene pa suzgo ilo tili nalo, tingatondeka kuwona nthowa zakovwira izo zilipo pa umo tingatondera suzgo ilo. Kweni kughanaghana mwakwenelera kungamovwirani kughanaghanira nthowa za umo mungachitira na suzgo ilo.

Chepeskaniko nyengo iyo mukumalira pakuwonelera nkhani pa TV.
Mise yiliyose ghanaghaniranipo vinthu viwemi viŵiri panji vitatu ivyo mungawonga kwa Chiuta.
Lembani vinthu ivyo mukukhumba kuchita zuŵa ilo. Mwambe na kulemba vikuruvikuru na kumalira vichokovichoko, mwakuti paumaliro wa zuŵa muwone ivyo mwafiska.

PEMPHANI WOVWIRI

Baibolo likuti: “Uyo wakujipatura . . . Wakukana vinjeru vyose.” (Zintharika 18:1) Pamwekha mungafuma yayi mu chikhuluru chitali, kweni na wovwiri wa ŵanyinu mungakwaniska kufuma.

Pemphani wovwiri ku ŵanthu ŵa mu banja linu panji ŵabwezi ŵinu.
Kweniso penjerezgani nthowa izo namwe mungaŵawovwilira. Para mukuchitira ŵanji vinthu vinyake vimovwiraninge kuwona mwakwenelera masuzgo ghinu.
Usange mwataya chigomezgo ndipo mukuwona kuti palije chifukwa cha kulutilira kuŵa wamoyo, lutani ku chipatala kukapempha wovwiri. Nyengo zinyake mungajipulika nthena chifukwa chakuti muli na suzgo linyake, nga nkhusuzgika maghanoghano. Ŵanthu ŵanandi ŵakovwirika para ŵapempha wovwiri wa chipatala.a

a Magazini ya Wukani! yikuphalira munthu yayi za wovwiri wa chipatala uwo wakwenera kupokera.

Baibolo Likupeleka Chigomezgo Chanadi

Wamasalimo munyake mu nyengo yakale wakayowoya kwa Chiuta mu lurombo kuti: “Mazgu ghinu ni nyali ku malundi ghane, na ungweru mu nthowa yane.” (Salimo 119:105) Wonani umo Mazgu gha Chiuta, Baibolo, ghaliri nga ni nyali na ungweru:

Usiku para kuli mdima, nyali yikutovwira kuwona apo tingayenda. Mwakuyana waka, Baibolo lili na ulongozgi wavinjeru uwo ungatovwira para tikukhumba kupanga chakusankha pa nkhani zakusuzga.

Ungweru ungalika nthowa iyo tikwenda mwakuti tingawona chinthu icho chili patali. Mwakuyana waka, Baibolo likutovwira kumanya vinthu ivyo vichitikenge munthazi.

Baibolo ni buku lakupatulika ilo likutiphalira umo ŵanthu ŵakaŵirako kweniso vinthu viwemi ivyo vichitikenge munthazi. Ilo likulongosora:

Umo Masuzgo Ghakambira

Baibolo likuti: “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.”—Ŵaroma 5:12.

Chifukwa Icho Maboma gha Ŵanthu Ghatondekera Kumazga Masuzgo Ghithu

Baibolo likuyowoya kuti: “Munthu uyo wakwenda wangalongozga yayi mendero ghake.” (Yeremiya 10:23) Para tikuwona ivyo vikuchitika pa charu chapasi, vikulongora kuti fundo ya mu lemba ili njaunenesko nadi.

Ivyo Chiuta Wachitenge Kuti Wamazge Masuzgo

Baibolo likuti: “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivumbuzi 21:4.