Janyuwale

Yesu ‘wakawona’ mama uyo wakaliranga ndipo pamanyuma ‘wakamuchitira chitima.’ (Luka 7: 13) Padera pa kumuchitira chitima mama uyu, Yesu wakamulongoraso lusungu. Wakayowoya nayo, ndipo tikukayika yayi kuti wakayowoya nayo mwaubwezi, wakati: “Leka kulira.” Kufuma apo wakachitapo kanthu kuti wamovwire. Wakamuwuska mwana na ‘kumupeleka kwa anyina.’ (Luka 7:​14, 15) Kasi tingasambirako vichi ku munthondwe uwo Yesu wakachita wakuwuska mwana wa chokoro? Tikusambirako kuti tikwenera kulongora lusungu ku awo ŵali na chitima. Kweni nga ni Yesu nase tingaŵalongora lusungu awo ŵali na chitima pakuŵa maso nyengo zose. Tingaŵalongora lusungu pakuyowoya mazgu panji kuchita ivyo tingafiska kuti tiŵawovwire na kuŵapembuzga. (Zinth. 17:17; 2 Kor. 1:​3, 4; 1 Pet. 3:8) Mazgu ghapusu panji tunthu tuchokotuchoko uto tingaŵachitira tungaŵakhozga na kuŵapembuzga chomene. w23.04 5-6 ¶13-15

Nangauli Yesu wakamanya kuti mubwezi wake wafwa, kweni wakakhalira dankha kwenekuku mazuŵa ghaŵiri panji kujumpha ndipo wakizanga ku Betaniya. Ntheura panyengo iyo Yesu wakafikanga, pakaŵa kuti pajumpha mazuŵa ghanayi kufumira apo Lazaro wakafwira. Yesu wakachita chinthu chinyake icho ŵabwezi ŵake ŵakapindura nacho kweniso icho chikapeleka uchindami kwa Chiuta. (Yoh. 11:​6, 11, 17) Tikusambirapo fundo yinyake yakukhwaskana na ubwezi pa nkhani iyi. Ghanaghanirani fundo iyi: Apo Mariya na Marita ŵakatumizga uthenga kwa Yesu, ŵakayowoyapo yayi kuti Yesu wize ku Betaniya. Iwo ŵakayowoya waka kuti mubwezi wake wapamtima ni mulwari. (Yoh. 11:3) Apo Lazaro wakafwa, Yesu wakatenge wamuwuskenge uku wali kutali. Kweni ndimo wakachitira yayi, iyo wakasankha kuluta ku Betaniya kuti wakaŵe pamoza na ŵabwezi ŵake Mariya na Marita. Kasi namwe muli na mubwezi uyo wangamovwirani kwambura kumupempha dankha? Para muli nayo mukumanya kuti mungamugomezga kuti wamovwiraninge mu nyengo za masuzgo. (Zinth. 17:17) Nga ni Yesu, nase mphanyi taŵa mubwezi wanthena ku ŵanji. w23.04 10 ¶10-11

Panyengo iyo tili mu suzgo, nyengo zinyake tingawona nga kuti charu chiphya cha Yehova chizenge yayi. Kweni kasi ichi chikung’anamura kuti tili na chipulikano chichoko? Viŵi yayi. Ghanaghanirani chiyelezgero ichi. Mu nyengo yakuzizima chomene, nyengo zinyake tingawona nga kuti chihanya chizenge yayi. Kweni chihanya chikuŵangako nipera. Mwakuyana waka, panyengo iyo tagongowa chomene, tingawona nga kuti charu chiphya chizenge yayi. Kweni para chipulikano chithu ntchakukhora, tikayikirenge yayi kuti malayizgo gha Chiuta ghafiskikenge nadi. (Sal. 94:​3, 14, 15; Heb. 6:​17-19) Para tili na chipulikano chanthena, tilutilirenge kudangizga kusopa Yehova mu umoyo withu. Tikukhumbikwiraso chipulikano chakukhora kuti tichiteko mulimo wakupharazga. Ŵanthu ŵanandi ŵakuwona kuti “makani ghawemi” ghakuti kukwiza charu chiphya cha Chiuta ni maloto waka. (Mat. 24:14; Ezek. 33:32) Tingazomerezganga yayi kuti nase tambe kukayikira ivyo Yehova wakutisambizga nga umo iwo ŵakuchitira. Kweni kuti tigege kukayikira, tikwenera kulutilira kukhozga chipulikano chithu. w23.04 27 ¶6-7; 28 ¶14

Kasi muli kujifumbapo usange Yehova wakuzgora malurombo ghinu? Usange ni nthena muli mwekha yayi. Ŵabali na ŵadumbu ŵanandi ŵali kujifumbapo nthena, chomenechomene para ŵasangana na suzgo likuru. Usange tikusuzgika, nase chingatiŵira chinonono kumanya umo Yehova wakuzgolera malurombo ghithu. Chifukwa wuli tikwenera kuŵa na chigomezgo chose kuti Yehova wakuzgora malurombo gha ŵasopi ŵake? Malemba ghakutisimikizgira kuti Yehova wakutitemwa chomene kweniso kuti ndise ŵakuzirwa kwa iyo. (Hag. 2:7; 1 Yoh. 4:10) Lekani wakutipempha kuti timulombenge usange tikukhumba wovwiri wake. (1 Pet. 5:​6, 7) Iyo wakukhumba kuti watovwire kuti tilutilire kuŵa paubwezi wakukhora na iyo na kuzizipizga masuzgo agho tikusangana nagho. Mu Baibolo, kanandi tikuŵazga kuti Yehova wakazgoranga malurombo gha ŵasopi ŵake. Kasi walipo nthena uyo mukughanaghana kuti Yehova wakamuzgora malurombo ghake? w23.05 8 ¶1-4

Mariya nayo pa iyo yekha wakaŵa paubwezi wakukhora na Yehova. Chipulikano chake chikathembanga waka pa ivyo Yosefe wakachitanga yayi. Wakaghamanyanga makora Malemba. Kweniso wakayezgayezganga kusanga nyengo ya kughanaghanirapo. (Luka 2:​19, 51) Chifukwa chakuti Mariya wakaŵa wakukhwima mwauzimu tikukayika yayi kuti wakaŵa muwoli muwemi chomene. Mazuŵa ghano napo, ŵawoli ŵanandi ŵakuyezgayezga kuchita nga ni Mariya. Mwachiyelezgero, mudumbu munyake zina lake Emiko wakayowoya kuti: “Apo nkhaŵa kuti nindatengwe, nkhaŵa na ndondomeko yakukhazikika yakuchitira vinthu vyauzimu. Kweni nati natengwa, pakuti mfumu wane ndiyo wakalombanga na kulongozga pa vinthu vyauzimu, nkhawona kuti chipulikano chane chikamba kuthemba waka pa ivyo mfumu wane wakachitanga. Ntheura nkhawona kuti nane nkhwenera kunyamura nekha katundu wane pa nkhani ya kukhozga ubwezi wane na Yehova. Nkhamba kupatura nyengo ya kuyowoyeskerana na Chiuta wane mu lurombo, kuŵerenga Baibolo, na kughanaghanirapo pa fundo zake.” (Gal. 6:5) Ŵawoli, apo mukulutilira kukhozga ubwezi winu na Yehova, afumu ŵinu ŵaŵenge na vifukwa vinandi vyakumulumbirani kweniso kumutemwerani.—Zinth. 31:30. w23.05 22 ¶6

Kopa Yehova tikuchita kubabika nako yayi; kweni tikuchita kusambira. Nthowa yimoza iyo tingachitira nthena nkhusanda chilengiwa. Para tamanya umo vinthu ivyo Chiuta wali kulenga vikulongolera vinjeru vyake, nkhongono zake, na chitemwa chake pa ise, timuchindikenge na kumutemwa chomene. (Rom. 1:20) Nthowa yinyake iyo yingatovwira kumopa Chiuta ndiyo kulomba nyengo zose. Para tikulomba chomene kwa Yehova, Yehova wakuŵaso wanadi kwa ise. Nyengo yiliyose iyo talomba Yehova kuti watipe nkhongono zakuzizipizgira chiyezgo, tikukumbuskika za nkhongono zake zakuzizwiska. Para tikumuwonga chifukwa cha chawanangwa cha Mwana wake, vikutikumbuska chitemwa icho Yehova wali nacho kwa ise. Ndipo para tamuŵeyelera Yehova kuti watovwire pa suzgo ilo tili nalo, vikutikumbuska kuti iyo ngwavinjeru chomene. Malurombo ghanthena agha ghakutovwira kuti timuchindikenge chomene Yehova. Ghakutovwiraso kuti tiŵikepo mtima chomene kuleka kuchita chilichose icho chingananga ubwezi withu na iyo. w23.06 15 ¶6-7

Pakuŵa Mupi Mukuru wa Dango, kwamba kale Yehova wakupeleka malango ghakupulikikwa makora ku ŵanthu ŵake. Mwachiyelezgero, wupu wakulongozga mu nyengo yakale ukayowoya vigaŵa vitatu ivyo Ŵakhristu ŵakeneranga kulutilira kuŵa ŵakukhora: (1) kukana kusopa vikozgo, kweni kusopa Yehova pera, (2) kupulikira dango la Yehova lakuti ndopa ni zakupatulika, kweniso (3) kupulikira dango la mu Baibolo la kugega uzaghali. (Mil. 15:​28, 29) Kasi Ŵakhristu mazuŵa ghano ŵangachita wuli kuti ŵalutilire kupulikira Yehova pa vigaŵa vitatu ivi? Tikugega kusopa vikozgo, kweni tikusopa Yehova pera. Yehova wakalangura Ŵaisrayeli kuti ŵasopenge iyo pera. (Doto. 5:​6-10) Ndipo apo Yesu wakayezgeka na Dyabulosi, wakayowoya mwambura kubisa kuti tikwenera kusopa Yehova pera. (Mat. 4:​8-10) Lekani tikusopa vikozgo yayi. Kweniso tikusopa yayi ŵanthu ŵakumanyikwa nga ŵalongozgi ŵavisopa, ŵandyali, nesi ŵanthu ŵakutchuka pa maseŵero na vyakusanguluska, na kuŵatora nga mbachiuta. Tikusopa Yehova pera uyo ‘wakalenga vinthu vyose.—Chivu. 4:11. w23.07 14-15 ¶3-4

Charu cha Satana ichi chazura na nkharo zaukazuzi zakugonana kweniso vithuzithuzi vyamuziro. (Efe. 4:19) Ntheura ntchakuzirwa kopa Yehova na kukana kuchita kwananga. Pa Zintharika chaputara 9, tikuŵazga kuti vinjeru na uzereza vikwimira ŵanakazi ŵaŵiri. Wose ŵakuchemera ŵanthu ‘ŵazeleza’ ku nyumba kwawo. Waliyose wakuŵa nga wakuchema ŵanthu aŵa kuti, ‘zaninge kunyumba kwane muryeko vyakurya.’ (Zinth. 9:​1, 6) Kweni ivyo vikachitikira awo ŵakaluta kwa mwanakazi uyo wakwimira vinjeru na awo ŵakaluta kwa mwanakazi wakwimira uzeleza, vikaŵa vyakupambana chomene. Ghanaghanirani vya ntchemo yakufuma ku “mwanakazi uyo ntchindere.” (Zinth. 9:​13-18) Wakuchema ŵazeleza kwambura na soni cha kuti, ‘zaninge kuno’ kuli chiphikiro. Kasi awo ŵalutako vinthu vikuŵamalira wuli? Baibolo likuti: “Ŵakufwa ŵali kwenekura.” Tikuchenjezgeka za “mwanakazi wakupuluka” na “mwanakazi muleŵi.” Tikuphalirika kuti: “Nyumba yake yikukhilira ku nyifwa.” (Zinth. 2:​11-19) Lemba la Zintharika 5:​3-10, likuchenjezga za “mwanakazi wakupuluka” munyakeso uyo “malundi ghake ghakukhilira ku nyifwa.” w23.06 21-22 ¶6-7

Ŵalara ŵakwenera kuŵa chiyelezgero chiwemi pa nkhani ya kuŵa ŵamahara. (1 Tim. 3:​2, 3) Mwachiyelezgero, mulara wakwenera yayi kukhazga kuti maghanoghano ghake nyengo zose ghazomerezgekenge chifukwa chakuti waka iyo ni mulara chomene kuluska ŵalara ŵanyake wose. Iyo wakwenera kumanya kuti mzimu wa Yehova ungachitiska mulara waliyose pa wupu kuyowoya fundo iyo yingawovwira kusankha makora pa nkhani yinyake. Ndipo para ŵalara ŵanandi ŵakolerana fundo yinyake, iyo yikususkana yayi na ulongozgi wa mu Baibolo, mulara wa mahara wakukolerana na wupu wose nanga wangaŵa kuti wasachizganga fundo yinyake. Ŵakhristu ŵakusanga vyandulo vinandi para ŵakuŵa ŵamahara. Tikuŵa paubwezi uwemi na ŵabali na ŵadumbu ŵithu ndipo mu mpingo mukuŵa mtende. Tikukondwa pakuŵa pakati pa ŵanthu ŵa Yehova awo ŵali na mitheto kweniso wunthu wakupambanapambana. Ndipo ntchakukondweska chomene kumanya kuti nangauli tili ŵakupambana, kweni tikusopa Yehova mwakukolerana. Kuluska vyose, tikuŵa ŵakukondwa kumanya kuti tikuyezga Chiuta withu Yehova uyo ngwamahara. w23.07 25 ¶16-17

Daniyeli wakasambiranga mauchimi na chilato chiwemi, ndipo chilato chake chikaŵa chakuti wamanye unenesko. Kweniso Daniyeli wakaŵa wakujiyuyura, ndipo wakamanyanga kuti Yehova wamovwirenge kupulikiska mauchimi para wali paubwezi na iyo kweniso kumupulikira. (Dan. 2:​27, 28) Wakalongora kuti ngwakujiyuyura pakugomezga Yehova kuti ndiyo wamovwire. (Dan. 2:18) Daniyeli wakasambirangaso mwakupwelelera chomene. Wakafufuzanga mu Malemba agho ghakaŵapo panyengo iyo. (Yer. 25:​11, 12; Dan. 9:2) Kasi mungamuyezga wuli Daniyeli? Sandani chifukwa icho mukusambilira mauchimi. Kasi mukusambira chifukwa chakuti mukukhumba nadi kumanya unenesko? Usange ni nthena, Yehova wamovwiraninge. (Yoh. 4:​23, 24; 14:​16, 17) Ŵanyake ŵangasambira chifukwa chakuti ŵakukhumba waka kusanga ukaboni wakuti Baibolo ndakufuma kwa Chiuta yayi. Ŵakuwona kuti usange ŵangasanga ukaboni wakuti Baibolo ndakufuma kwa Chiuta yayi, mbwenu ŵajisankhirenge waka ŵekha icho ntchiwemi na chiheni. Ntheura tikwenera kusambira pa chifukwa chakwenelera. w23.08 9 ¶7-8

Para tikujiyaniska na ŵanji tingamba kukhumba vinthu ivyo tingafiska yayi ndipo tingajiphyora waka. (Gal. 6:4) Ndipo tingamba kuŵachitira bina panji kuphalizgana nawo. (Gal. 5:26) Apo tikuyezgayezga kuti nase tifiske vinthu ivyo ŵanyithu ŵafiska, tingachichizgika kulimbana na vinthu ivyo ni vya msinkhu withu yayi panji ivyo mukhaliro ukutizomerezga yayi kuchita. Nakuti usange “mtima ukulwara usange icho wakhazganga chindize,” kuli wuli usange tikukhazga chinthu icho tingafiska yayi! (Zinth. 13:12) Kuchita nthena kungatimalira waka nkhongono zithu na kutichedweska apo tikuchimbira pa chiphalizgano cha kuluta ku umoyo. Lekani kulimbana na vinandi padera pa ivyo Yehova wakukhumba kuti mufiske. Iyo wakukhazga kuti muchite vinandi kuluska ivyo mungafiska yayi. (2 Kor. 8:12) Manyani kuti Yehova wakumuyaniskani na ŵanji yayi pa ivyo mukuchita. (Mat. 25:​20-23) Iyo wakuzirwiska chomene uteŵeti winu uwo mukuchita na mtima wose, kugomezgeka kwinu, na kuzizipizga kwinu. w23.08 29 ¶10-11

Yehova wakamuzgora Samusoni pakumupa maji mwamunthondwe. Samusoni wakati wamwa maji, “nkhongono zake zikaweleramo ndipo wakasisipuka.” (Ŵeru. 15:19 mazgu ghamusi) Nakuti vikuwoneka kuti maji agha ghakaŵa kuti ghachalipo apo Samuyeli wakakhuŵilizgika na mzimu kulemba buku la Ŵeruzgi, nangauli pakajumpha vyaka vinandi. Ŵaisrayeli awo ŵakawonanga maji ghakufuma pa malo agha, ŵakakumbuskikanga kuti usange ŵathembenge Yehova, waŵawovwirenge para ŵakukhumba wovwiri. Nase tikwenera kulaŵiska kwa Yehova kuti watovwire kwali tili na maluso wuli panji ivyo tili kukwaniska kuchita mu gulu lake. Tikwenera kujiyuyura na kuzomerezga kuti tingachita ivyo Yehova watipempha kuchita pekha para tingathemba iyo. Nga umo Samusoni nkhongono zikaweleramo wati wamwa maji agho Yehova wakamupa, nase tikhozgekenge mwauzimu para tikugwiliskira ntchito vyose ivyo Yehova wakutipa.—Mat. 11:28. w23.09 4 ¶8-10

Kasi tingachita wuli para ŵanji ŵakuyowoya vinthu vyakukwenyerezga? Mwachiyelezgero, para munyake wakuyowoya vinthu viheni kukhwaskana na Yehova panji wakunyoza fundo za mu Baibolo. Tikwenera kulomba Yehova kuti watovwire na mzimu wake kweniso kutipa vinjeru kuti tizgore mwakuzika. Wuli usange pamanyuma tamanya kuti tindazgore makora? Tingayilomberaso nkhani iyi na kughanaghanirapo umo tingachitira makora paulendo unyake. Para tachita nthena, Yehova watipenge nadi mzimu wake utuŵa kuti tikorengeko ukali withu na kuchita vinthu mwakuzika. Mavesi ghanandi mu Baibolo ghangatovwira kuti tikorengeko kayowoyero kithu para tasangana na vinthu vyakukwiyiska. Mzimu wa Chiuta ungatovwira kukumbukira mavesi agha. (Yoh. 14:26) Mwachiyelezgero, fundo izo tikuzisanga mu buku la Zintharika zingatovwira kuŵa ŵakuzika. (Zinth. 15:18) Buku ili likuyowoyaso chifukwa icho ntchiwemi kuŵa ŵakuzika para tatimbanizgika maghanoghano.—Zinth. 10:19; 17:27; 21:23; 25:15. w23.09 15 ¶6-7

Mpositole Petrosi wakateŵetera Yehova mwakugomezgeka kwa vyaka vinandi. Iyo wakaŵanga lumoza na Yesu mu upharazgi, wakamba mulimo wakupharazgira ŵanthu awo ŵakaŵa Ŵayuda yayi, kweniso pamanyuma wakazakaŵa yumoza wa mu wupu wakulongozga. Kweni cha kuumaliro kwa umoyo wake, Yehova wakamupa milimo yinyake yakusazgikira. Cha m’ma 62-64 C.E., Yehova wakamugwiliskira ntchito kulemba makalata ghaŵiri agho ni mabuku gha Baibolo gha 1 na 2 Petrosi. (2 Pet. 1:​12-15) Petrosi wakalemba makalata ghake panyengo iyo Ŵakhristu ŵanyake ŵakakumananga na “viyezgo vyakupambanapambana.” (1 Pet. 1:6) Ŵanthu ŵaheni ŵakanjizga visambizgo vyautesi na nkharo zaukazuzi mu mpingo Wachikhristu. (2 Pet. 2:​1, 2, 14) Ŵakhristu awo ŵakakhalanga mu Yerusalemu ŵakaŵa pafupi kukumana na “umaliro wa vinthu vyose.” Umaliro uwu ukaŵa wakuti ŵasilikari ŵa Ŵaroma ŵaparanyenge msumba uwu na mgonezi wa Ŵayuda. (1 Pet. 4:7) Lekani tikukayika yayi kuti makalata gha Petrosi ghakawovwira Ŵakhristu kumanya ivyo ŵakeneranga kuchita kuti ŵazizipizge viyezgo ivyo ŵakakumananga navyo pa nyengo iyo, kweniso kunozgekera viyezgo vya munthazi. w23.09 26 ¶1-2

Nga ni Yesu, nase kanandi tikusambira kupulikira para takumana na masuzgo ghanyake. Mwachiyelezgero, muliri wa COVID-19 ukati wamba, tikaphalirika kuti tileke kuwungana mu Nyumba za Ufumu kweniso kupharazga nyumba na nyumba. Kasi imwe vikamusuzgani kupulikira? Ndipouli, chifukwa chakuti mukapulikira mukavikilira umoyo winu kweniso vikawovwira kuti mpingo uŵe wakukolerana na kukondweska Yehova. Tose sono tili ŵakunozgeka makora chomene kupulikira ulongozgi uliwose uwo tingazakapokera panyengo ya suzgo yikuru. Umoyo withu ukuthemba pa kupulikira ulongozgi. (Yobu 36:11) Chifukwa chikuru icho tikupulikira Yehova ntchakuti tikumutemwa kweniso tikukhumba kumukondweska. (1 Yoh. 5:3) Tingamuwezgerapo yayi Yehova pa vyose ivyo watichitira. (Sal. 116:12) Kweni tingamupulikira iyo na awo wali kuŵapa mazaza kutidangilira. Usange tikupulikira, tikulongora kuti tili ŵavinjeru. Ndipo para tili ŵavinjeru, tikukondweska mtima wa Yehova.—Zinth. 27:11. w23.10 11 ¶18-19

Usange mungelo wangayowoya namwe, kasi mungapulikira ivyo wangamuphalirani? Chakukondweska ntchakuti mazuŵa ghano mungelo wakuyowoya na “mtundu uliwose, fuko lililose, lulimi lulilose, na ŵanthu wose.” Kasi wakuyowoya vichi? Iyo wakuti: ‘Mopani Chiuta na kumuchindika. Sopani Uyo wakalenga kuchanya na charu chapasi.’ (Chivu. 14:​6, 7) Yehova ndiyo ni Chiuta yekha waunenesko uyo waliyose wakwenera kumusopa. Tikumuwonga chomene Yehova chifukwa cha kutipa mwaŵi wapadera wakuti timusopenge mu tempile lake likuru lauzimu. Kasi tempile lauzimu ni vichi chomene, ndipo tingazisanga nkhu fundo zakulongosora umo tempile ili liliri? Tempile lauzimu kuti ni nyumba yakuzengeka nadi yayi. Kweni ni ndondomeko ya Yehova yakumusopera mwakuzomerezgeka pasi pa sembe yakuwombora ya Yesu. Mpositole Paulosi wakalongosora vinandi vya ndondomeko iyi mu kalata iyo wakalembera Ŵakhristu Ŵachihebere ŵa mu Yudeya. w23.10 24 ¶1-2

Mu 5 22 B.C.E., ŵalwani ŵa Ŵayuda ŵakalekeska ntchito yakuzenga tempile la Yehova. Kweni Zekariya wakaŵasimikizgira Ŵayuda kuti Yehova waŵawovwirenge na mzimu wake wankhongono kuti ŵalutilire kuzenga tempile lake nanga pangaŵa masuzgo ghanyake. Mu 5 20 B.C.E., Themba Dariyasi likaŵazomerezga kuti ŵalutizge kuzenga tempile ndipo likaŵapa na ndalama wuwo kweniso likatuma ŵalongozgi mu chigaŵa icho kuti ŵaŵawovwireko. (Ezir. 6:​1, 6-10) Yehova wakalayizga ŵanthu ŵake kuti wazamuŵawovwira para ŵazamuŵika pakwamba mulimo wakuzengaso tempile lake. (Hag. 1:​8, 13, 14; Zek. 1:​3, 16) Ŵayuda ŵati ŵakhozgeka na ntchimi izi, mu 520 B.C.E. ŵakambiraso mulimo wakuzenga tempile ndipo ŵakamalizga kuzenga pambere vyaka 5 vindakwane. Ivi vikachitika chifukwa chakuti Ŵayuda ŵakadangizga khumbo la Chiuta nangauli ŵakakumananga na masuzgo. Ivi vikawovwira kuti ŵateŵeterenge Yehova na chimwemwe.—Ezir. 6:​14-16, 22. w23.11 15 ¶6-7

Nangauli ŵanthu ŵanandi ŵali kupulikapo vya Abrahamu, kweni ŵanandi ŵakumanya vinandi yayi vya iyo. Ndipouli, imwe mukumanya vinandi vyakukhwaskana na Abrahamu. Mwachiyelezgero, mukumanya kuti Baibolo likuyowoya kuti Abrahamu ni “wiske wa wose awo ŵali na chipulikano.” (Rom. 4:11) Kweni nyengo zinyake mungajifumba kuti, ‘Kasi nane ningaŵa na chipulikano nga cha Abrahamu?’ Enya mungaŵa nacho. Nthowa yimoza iyo tingaŵira na chipulikano nga ntcha Abrahamu, nkhusambira vya iyo. Nyengo zose Abrahamu wakapulikiranga ivyo Chiuta wamuphalira. Iyo wakasamira kutali, ndipo kwa vyaka vinandi wakakhalanga mu mahema, kweniso nyengo yinyake wakayezgeka kuti wapeleke mwana wake wakutemweka kuŵa sembe. Wakachita vyose ivi chifukwa wakaŵa na chipulikano chakukhora. Chifukwa cha chipulikano chake kweniso milimo yake yiwemi, Abrahamu wakakondweska Chiuta ndipo wakaŵa mubwezi wake. (Yak. 2:​22, 23) Yehova wakukhumbaso tose, kusazgapo imwe, kuti tiŵe mubwezi wake. Lekani wakakhuŵilizga Paulosi na Yakobe kulemba vya Abrahamu. w23.12 2 ¶1-2

Ŵadumbu sambirani kuyowoyeskana makora na ŵanthu. Ŵakhristu ŵakwenera kusambira kuyowoyeskana makora na ŵanthu. Pa nkhani iyi, Yakobe wakayowoya mazgu agho ghali mu lemba la mwahuno. Usange mukutegherezga para ŵanji ŵakuyowoya, mukulongora kuti muli ŵalusungu. (1 Pet. 3:8) Para mukuwona kuti mundapulikiske makora ivyo munthu munyake wayowoya panji umo wakujipulikira, mufumbani mafumbo ghakwenelera. Ndipo ghanaghaniranipo dankha pambere mundayowoyepo. (Zinth. 15:​28, mazgu ghamusi) Jifumbani kuti: ‘Kasi ivyo nkhukhumba kuyowoya ni vyaunenesko kweniso ni vyakukhozga? Kasi vilongorenge kuti ndine walusungu kweniso nkhumuchindika?’ Sambiraniko ku ŵadumbu awo ŵakuyowoya mwavinjeru na ŵanyawo. (Zinth. 31:26) Mutegherezgenge chomene umo ŵakuyowoyera. Para mungasambira kuyowoyeskana makora na ŵanyinu, muŵenge paubwezi uwemi na ŵanji na kuŵa nawo pa mtende. w23.12 21 ¶12

Mazuŵa ghano, Yehova wangagwiliskira ntchito ŵamumbumba yithu, ŵabwezi ŵithu, panji ŵalara kuti watovwire. Ndipouli, para tasuzgika maghanoghano tingamba kujipatura. Tingakhumba kukhala waka kwatekha. Nakuti ntchakawiro kuchita nthena. Kasi chingatovwira ntchivichi kuti tipokere wovwiri wa Yehova? Yezgayezgani kuleka kujipatura. Para tikujipatura, kanandi tikwamba kughanaghana waka vya taŵene na masuzgo agho tikujumphamo. Kaghanaghaniro kanthena kangatipangiska kuti tisankhe uheni vinthu. Mbunenesko kuti tose nyengo zinyake tikukhumba kuŵa patekha, chomenechomene para tasangana na suzgo likuru chomene. Ndipouli para tikujipatura kwa nyengo yitali, tingaŵa kuti tikukana wovwiri wa Yehova uwo wakutipa kwizira mu ŵanyithu. Ntheura tikwenera kuzomera wovwiri wakufuma ku ŵamumbumba yithu, ŵabwezi ŵithu, kweniso ŵalara. Muwonenge kuti ni nthowa iyo Yehova wakugwiliskira ntchito kuti wamovwirani.—Zinth. 17:17; Yes. 32:​1, 2. w24.01 24 ¶12-13

Ŵanaziri ŵakalapa kuti ŵametenge yayi sisi lawo. Iyi yikaŵa nthowa yimoza yakulongolera kuti ŵakupulikira Yehova na mtima wose. Chachitima ntchakuti nyengo zinyake Ŵanaziri ŵakachindikikanga yayi panji kukhozgeka. Nakuti nyengo zinyake Ŵanaziri ŵakakhumbikwiranga kulongora chikanga kuti ŵasungilire chilapo chawo na kulutilira kuŵa ŵakupambanako na ŵanji. (Am. 2:12) Chifukwa chakuti tikusankha kupulikira Yehova, tikuŵa ŵakupambana na ŵanthu wose. Tikukhumbikwira chikanga kuti tijiphare ku sukulu panji ku ŵanyithu ŵa ku ntchito kuti ndise Ŵakaboni ŵa Yehova. Apo nkharo za mu charu ichi zikuhenipirahenipira, chiŵenge chakusuzga chomene kuti nyengo zose tilondezgenge fundo za mu Baibolo kweniso kuphalirako ŵanji makani ghawemi. (2 Tim. 1:8; 3:13) Ntheura nyengo zose tikumbukenge kuti, ‘tikukondweska mtima wa Yehova’ para tikulongora chikanga na kuŵa ŵakupambana na ŵanthu awo ŵakuteŵetera Yehova yayi.—Zinth. 27:11; Mal. 3:18. w24.02 16 ¶7; 17 ¶9

Ghanaghanirani umo mpingo wa ku Romu ukaŵira. Ŵanyake ŵakaŵa Ŵayuda, awo ŵakasambizgika Dango la Mozesi, apo ŵanyake ŵakaŵa Ŵamitundu awo ŵakakulira mu mitheto yakupambanapambana. Ŵakhristu ŵanyake ŵakwenera kuti ŵakaŵa ŵazga apo ŵanyake ŵakaŵa ŵanangwa, ndipo nyengo zinyake ŵanyake mwa iwo ŵakaŵa ŵeneko ŵa ŵazga aŵa. Kasi Ŵakhristu aŵa ŵakakwaniska wuli kulutilira kulongora chitemwa nangauli ŵakaŵa ŵakupambana? Mpositole Paulosi wakaŵachiska kuti ‘ŵapokeleranenge.’ Kasi wakang’anamuranga vichi? Mazgu agho ghali kung’anamulika kuti ‘kupokelera’ ghakung’anamura kupokelera makora munthu munyake, kwali mpha nyumba pithu panji kuŵa nayo paubwezi. Mwachiyelezgero, Paulosi wakaphalira Filimoni umo wangapokelelera Onesimo, muzga wake uyo wakamuchimbira, kuti: “Umupokelere makora.” (Filim. 17) Kweniso Prisila na Akwila ŵakamupokelera Apolo, uyo wakamanyanga vinandi yayi vyakukhwaskana na Chikhristu pakuyaniska na iwo, ‘pakumutolera pamphepete.’ (Mil. 18:26) Ŵakhristu aŵa ŵakazomerezga yayi kuti ŵaŵe ŵakugaŵikana chifukwa chakuti ŵakapambananga, m’malo mwake ŵakalutilira kupokelerana. w23.07 6 ¶13

Chifukwa chikuru icho mukwenera kujipelekera kwa Yehova ntchakuti mukumutemwa. Chitemwa chinu chikuthemba pa umo mukujipulikira waka yayi. Kweni chikujintha pa ‘kumumanya makora Chiuta’ kweniso “kupulikiska vinthu vyamzimu.” Vinthu ivi ni ivyo muli kusambira vyakukhwaskana na Yehova, ivyo vikupangiska kuti ubwezi winu na iyo wambe kukura. (Kol. 1:9) Chifukwa cha kusambira Baibolo, mwakhorwa kuti (1) Yehova ngwanadi, (2) Baibolo ni Mazgu ghake, ndipo (3) wakugwiliskira ntchito gulu lake kuti wafiske khumbo lake. Awo ŵajipeleka kwa Yehova ŵakwenera kumanya visambizgo vyakwambilira vya Baibolo kweniso kulondezga fundo za Chiuta pa umoyo wawo. Ŵakuyezgayezga kuphalirako ŵanyawo ivyo ŵasambira mu Baibolo. (Mat. 28:​19, 20) Ŵakwamba kumutemwa chomene Yehova, ndipo ŵakuŵa ŵakukhumbisiska kusopa iyo pera. Kasi ndimo viliriso kwa imwe? w24.03 4-5 ¶6-8

Abigelu wakatengwa kwa Nabala, uyo Baibolo likuti wakaŵa wankhaza na wankharo yiheni. (1 Sam. 25:3) Chikwenera kuti chikaŵa chakusuzga chomene kwa Abigelu kukhala na mwanalume wanthena. Kasi Abigelu wakaŵa na mwaŵi uliwose wakuti wangamazgira nthengwa yake? Enya. Wakasanga mwaŵi uwu apo Davide, uyo wakaŵa kuti wazamuŵa themba la Israyeli, wakiza kuti wazakakome mfumu wake uyo wakayowoyera msinjiro Davide na ŵanthu ŵake. (1 Sam. 25:​9-13) Abigelu wakatenge wachimbirenge, na kuzomerezga kuti Davide wamukome Nabala. Kweni wakanjilirapo na kumuŵeyelera Davide kuti wamuleke wamoyo Nabala. (1 Sam. 25:​23-27) Kasi ntchivichi chikamutuma kuti wachite nthena? Abigelu wakatemwanga Yehova ndipo wakachindikanga chomene fundo za Yehova zakukhwaskana na nthengwa. Wakamanyanga kuti Yehova wakuwona kuti nthengwa njakupatulika. Iyo wakakhumbanga kukondweska Chiuta, ndipo ichi ndicho chikwenera kuti chikamutuma kuchita chilichose mwakuti waponoske ŵamunyumba yake, kusazgapo mfumu wake. Wakachitapo kanthu mwaluŵiro kuti wakanizge Davide kukoma Nabala. w24.03 16-17 ¶9-10

Kasi ŵalipo ŵanyake mu mpingo winu awo ŵakuyezgayezga kusintha vinthu vinyake na chilato chakuti ŵachite vinandi pakuteŵetera Yehova? Kasi mukumanyapo ŵawukirano ŵanyake awo ŵakuyezgayezga kuti ŵaŵe ŵakupambana na ŵanyawo ku sukulu nangauli ntchakusuzga kuchita nthena? Kasi ŵalipo awo ŵakusuzgikira kuti ŵaŵe ŵakugomezgeka chifukwa chakuti ŵamumbumba yawo ŵakuŵasuska? Tiyeni tigwiliskire ntchito m’pata uliwose kuti tiŵakhozge ŵasopi ŵanyithu aŵa na kuŵawonga chifukwa cha mzimu wawo wakujipata kweniso chikanga icho ŵakulongora. (Filim. 4, 5, 7) Yehova wakumanya kuti tikukhumba kumukondweska ndipo tili ŵakukhumbisiska kujinora vinyake kuti tichitenge vinthu mwakuyana na chilapo chithu. Wakulongoraso kuti wakutichindika pakutipa mwaŵi wakuti tilongore tekha kuti tikumutemwa chomene. (Zinth. 23:​15, 16) Ipo mphanyi tose talutilira kuŵikapo mtima kumuteŵetera Yehova na mtima wose na kumupa viwemi chomene. w24.02 18 ¶14; 19 ¶16

Muŵe nga mukuwona ivyo vikachitika chakuumaliro kwa 29 C.E. apo Yesu wakambanga uteŵeti wake. Yesu na anyina, a Mariya, ŵachemeka ku chiphikiro cha nthengwa ku Kana. Mariya wakovwirapo pakupwelelera ŵalendo awo ŵiza pa ukwati uwu. Kweni apo chiphikiro cha nthengwa chili mukati, pakuwuka suzgo linyake lakuti vinyo wamara. Panji vinyo wamara chifukwa chakuti ŵalendo mbanandi chomene. Mwaluŵiro Mariya wakuluta kwa mwana wake na kumuphalira kuti: “Ŵalije vinyo.” (Yoh. 2:​1-3) Kasi Yesu wakuchitapo vichi? Mwamunthondwe wakuzgora maji kuŵa “vinyo liwemi.” (Yoh. 2:​9, 10) Yesu wakachita minthondwe yinandi apo wakachitanga uteŵeti wake pa charu chapasi. Wakagwiliskira ntchito nkhongono zake zakuzizwiska kulyeska ŵanthu masauzandi ghanandi. Mwachiyelezgero, pa minthondwe yake yiŵiri iyo wakalyeska ŵanalume 5,000, kweniso pamanyuma ŵanalume 4,000, wakwenera kuti wakalyeska ŵanthu ŵakujumpha 27,000 usange tingasazgako ŵanakazi na ŵana awo ŵakaŵapo. (Mat. 14:​15-21; 15:​32-38) Panyengo izi, Yesu wakachizgaso ŵalwari ŵanandi.—Mat. 14:14; 15:​30, 31. w23.04 2 ¶1-2

Para takumana na suzgo likuru, mazuŵa ghanyake tingajipulika kuti tilijirethu nkhongono kweniso tingasuzgika maghanoghano. Nga ni Eliya, tingamba kuwona kuti ntchakusuzga kuwuka, nga tingagonanga waka. (1 Mathe. 19:​5-7) Tikukhumbikwira wovwiri kuti tilutilire kuteŵetera Yehova. Mu nyengo nga izi, Yehova wakutisimikizgira kuti watovwirenge, nga umo wakuyowoyera mu lemba la mwahuno ili. Themba Davide likapokera wovwiri wanthena uwu. Apo likakumana na masuzgo kweniso apo ŵalwani ŵakalizingilizga likayowoya kwa Yehova kuti: “Woko linu lamalyero likunifighilira.” (Sal. 18:35) Kanandi Yehova wakutovwira kwizira mu ŵanyithu. Mwachiyelezgero, apo Davide wakalopwa, mubwezi wake Yonatani wakamwendera na kumukhozga. (1 Sam. 23:​16, 17) Mwakuyana waka, Yehova wakasankha Elisha kuti wawovwire Eliya.—1 Mathe. 19:​16, 21; 2 Mathe. 2:2. w24.01 23-24 ¶10-12

Yehova ni Chiuta wakupa, ndipo wakupeleka vinthu vinandi chomene. Mikhaliro iyi yikuwonekera makora mu chiyelezgero cha mwanakazi uyo wakwimira “vinjeru vyenecho,” icho chikuyowoyeka pa Zintharika chaputara 9. Mavesi gha mu chaputara ichi ghakuyowoya kuti mwanakazi wakuyelezgera uyu, wanozga makora nyama yake, wasazga vinyo lake, kweniso wanozga makora thebulu mu nyumba yake. (Zinth. 9:2) Mwakusazgirapo, kuyana na vesi 4 na 5: “Mwanakazi uyu [uyo wakwimira vinjeru vyenecho] wakuyowoya na munthu muzeleza kuti: ‘Zanga, uryeko chingwa chane.’” Chifukwa wuli tikwenera kuzomera ntchemo yakufuma ku vinjeru vyenecho? Yehova wakukhumba kuti ŵana ŵake ŵaŵe ŵavinjeru kweniso ŵakuvikilirika. Iyo wakukhumba yayi kuti tisambirengepo kanthu para tavimyantha dankha. Lekani “ŵakunyoloka wakuŵasungira vinjeru viwemi.” (Zinth. 2:7) Para tikopa Yehova mwakwenelera, tiŵenge ŵakukhumbisiska kumukondweska. Titegherezgenge ulongozgi wake wavinjeru, na kuwulondezga mwakukondwa.—Yak. 1:25. w23.06 23 ¶14-15

Nanga tingaŵa kuti tikuchita vinandi yayi pakuteŵetera Yehova, kweni tili na chigomezgo chose kuti Yehova wakuwona vyose ivyo tikumuchitira kufumira pasi pa mtima kuti timukondweske. Kasi tikumanya wuli fundo iyi? Mu nyengo ya Zekariya, Yehova wakaphalira ntchimi yake kuti yipange mphumphu kufuma pa golide na siliva ilo Ŵayuda awo ŵakaŵa ku Babuloni ŵakatumizganga. (Zek. 6:11) “Mphumphu yikuru” iyi yikaŵa “chikumbusko” chifukwa cha mtima wawo wakupeleka. (Zek. 6:​14, mazgu ghamusi) Tili na chigomezgo chose kuti Yehova wazamuluwapo yayi vyose ivyo tikuchita kuti timuteŵetere nanga mphanyengo zakusuzga. Tikukayika yayi kuti mu mazuŵa ghaumaliro agha tilutilirenge kusangana na masuzgo agho takhazganga yayi, ndipo munthazi umu vinthu vilutilirenge kuhenipa. (2 Tim. 3:​1, 13) Ndipouli, tikwenera kufipa mtima chomene yayi. Kumbukani mazgu agho Yehova wakaphalira ŵanthu ŵake mu nyengo ya Hagayi. Wakati: “Ine nili namwe . . . kopa chara.” (Hag. 2:​4, 5) Nase tingaŵa ŵakusimikizga kuti Yehova waŵenge nase chikuru tikuchita vyose ivyo tingafiska kuti tichite khumbo lake. w23.11 19 ¶20-21

Chikaŵa chipusu waka kuti Yehova waleke kuzomerezga kuti ivyo Petrosi wakabudiska vilembeke mu Baibolo. Kweni wakazomerezga kuti vilembeke mwakuti ise tisambirepo kanthu. (2 Tim. 3:​16, 17) Para tikusambira vyakukhwaskana na ivyo Petrosi wakabudiskanga, vitovwirenge kumanya kuti Yehova wakukhazga kuti tichitenge vinthu mwakufikapo yayi. Wakukhumba kuti tingaweleranga nyuma yayi kweni tilutilire kuchita vyose ivyo tingafiska nangauli ndise ŵambura kufikapo. Chifukwa wuli ntchakuzirwa kulutilira kusintha nkharo yithu? Nanga ni para tikuwona kuti tasintha nkharo yinyake, kweni tingachitaso vyeneviravira. Kweni tikulutilira kuchitapo kanthu kuti tifiske chilato chithu. Tose tikuyowoya panji kuchita vinthu vinyake ivyo pamanyuma tikudandawura navyo. Ndipouli, tikwenera kuthera yayi panji kuwelera nyuma chifukwa Yehova watovwirenge kuti tichite makora. (1 Pet. 5:10) Lusungu ulo Yesu wakalongora Petrosi, uyo nangauli wakabudiskanga vinthu vinyake lingatikhukiska kuti tilutilire kuteŵetera Yehova. w23.09 20-21 ¶2-3

Yesu mphanyi wakamuchizga nadi Lazaro nga umo Marita wakayowoyera mu lemba la mwahuno. Kweni Yesu wakakhumbanga kuchita chinthu chinyake chakuzizwiska. Wakamulayizga kuti: “Mudumbu wako wawukenge.” Wakayowoyaso kuti: “Ndine chiwuka na umoyo.” (Yoh. 11:​23, 25) Nadi, Chiuta wakamupa nkhongono Yesu zakuwuskira ŵakufwa. Pambere Lazaro wandafwe, Yesu wakaŵa kuti wawuskapo kale mwana msungwana uyo wakafwa waka, kweniso wakawuska msepuka pa zuŵa lenelilo wakafwira. (Luka 7:​11-15; 8:​49-55) Kweni apa pakaŵa fumbo lakuti kasi wangamuwuska munthu uyo pajumpha mazuŵa ghanayi kufuma apo wakafwira kweniso uyo wamba kuvunda? Mariya, mudumbu munyake wa Lazaro, wakuluta kukakumana na Yesu. Mariya wakuyowoyaso ivyo munung’una wake wanguyowoya pakwamba, wakuti: “Fumu, muŵenge kuno, mphanyi mudumbu wane wandafwe.” (Yoh. 11:32) Yesu nayo chitima chamukora chomene, wati wawona na kupulika kuti ŵakulira. Nayoso wakuthiska masozi chifukwa cha kuŵalengera lusungu ŵabwezi ŵake. Wakumanya makora umo vikuŵinyira para munthu wakutemweka wake wafwa. Apa ngwakukhumbisiska kuwuskapo suzgo ilo lapangiska kuti ŵabwezi ŵake ŵaŵe na chitima na kuthiska masozi. w23.04 10-11 ¶12-13