Febuluwale

Apo Themba Hezekiya likalwara chomene, likaŵeyelera Yehova kuti walichizge. Yehova wakazgora nadi lurombo lwake ndipo wakalichizga. (2 Mathe. 20:​1-6) Kweni apo mpositole Paulosi wakaŵeyelera Yehova kuti wawuskemo “munga mu thupi” lake, Yehova wakawuskapo yayi suzgo lake. (2 Kor. 12:​7-9) Mpositole Yakobe na Petrosi wose ŵaŵiri Themba Herode likakhumbanga kuŵakoma. Yakobe wakakomeka, apo Petrosi wakathaskika mwamunthondwe. (Mil. 12:​1-11) Nyengo zinyake tingajifumba kuti, ‘Chifukwa wuli Yehova wakaponoska Petrosi pera, Yakobe yayi?’ Baibolo likuyowoya yayi. Icho tingasimikizga ntchakuti nthowa za Yehova ‘zose ni zaurunji.’ (Doto. 32:4) Nyengo zinyake Yehova wangazgora lurombo lwithu munthowa iyo takhazganga yayi. Kweni chifukwa chakuti tikugomezga kuti nyengo zose Yehova wakuchita vinthu mwachitemwa kweniso mwaurunji, tikudandawura yayi na nthowa iyo wasankha kuzgolera malurombo ghithu.—Yobu 33:13. w23.11 21 ¶6

Yakobe uyo wakakhuŵilizgika na mzimu wakayowoya kuti ŵanthu ŵavinjeru ‘mbakunozgeka kupulikira.’ Ghanaghanirani ivyo fundo iyi yikung’anamura. Tikwenera kuŵa ŵakukhumbisiska chomene kupulikira awo Yehova wali kuŵapa mazaza. Ndipouli, Yehova wakukhumba yayi kuti tipulikirenge munthu uyo wakutiphalira kuti tisuleko malango ghake. (Mil. 4:​18-20) Chingaŵa chipusu kupulikira Yehova kuluska ŵanthu. Nakuti Yehova nyengo zose wakupeleka ulongozgi wakufikapo. (Sal. 19:7) Kweni ndimo viliri yayi na ŵanthu awo ŵali kupika mazaza. Nangauli vili nthena, kweni Adada ŵithu ŵakuchanya ŵali kupeleka mazaza ku ŵapapi, ŵalara ŵaboma, na ŵalara mu mpingo. (Zinth. 6:20; 1 Tes. 5:12; 1 Pet. 2:​13, 14) Para tikuŵapulikira ndikuti tikupulikiraso Yehova. w23.10 6 ¶2-3

Nthowa yimoza iyo tingakhozgera chipulikano chithu nkhughanaghanirapo pa nkhongono za Yehova. Iyo ni Chiuta Wankhongonozose wangafiska ivi kwambura kutondeka. (Yobu 42:2; Mrk. 10:27: Efe. 3:20) Wakaphalira Abrahamu na Sara kuti ŵaŵenge na mwana mu uchekuru wawo. (Gen. 17:​15-17) Wakaphaliraso Abrahamu kuti mphapu yake yizamuhara charu cha Kenani. Panyengo yose iyo mphapu ya Abrahamu, awo ŵakaŵa ŵana ŵa Israyeli, ŵakaŵa ŵazga mu Eguputo, vikawonekanga nga kuti layizgo ili lingafiskika yayi. Kweni likafiskika. Wakaphaliraso Mariya, uyo wakaŵa wambura kugonapo na mwanalume, kuti wababenge Mwana wa Chiuta uyo Yehova wakalayizgirathu mu munda wa Edeni kuti wizenge, vyaka masauzandi ghanandi kumanyuma. (Gen. 3:15) Tikukhozga chipulikano chithu chakuti Yehova wali na nkhongono zakufiskira layizgo lake la charu chiphya, para tikughanaghanirapo pa malayizgo agho wakalayizgapo kumanyuma, na umo wakaghafiskira.—Josh. 23:14; Yes. 55:​10, 11. w23.04 28 ¶10-12

Yehova wakazgora malurombo gha Davide ghakuti wamuponoske. (1 Sam. 19:​10, 18-20; 2 Sam. 5:​17-25) Nase tingagomezga kuti Yehova wazgorenge malurombo ghithu. (Sal. 145:18) Yehova wangazgora malurombo ghithu mu nthowa iyo takhazganga yayi. Mpositole Paulosi wakalomba Chiuta kuti ‘wamuwuskiremo munga mu thupi lake.’ Katatu kose, Paulosi wakalomba mwakudunjika vya suzgo lake likuru ili. Kasi Yehova wakazgora malurombo ghake? Enya, kweni umo Paulosi wakakhumbiranga yayi. M’malo mwa kumuwuskirapo suzgo, Yehova wakamupa waka nkhongono izo wakakhumbikwiranga kuti walutilire kumuteŵetera mwakugomezgeka. (2 Kor. 12:​7-10) Nase Yehova wangazgora malurombo ghithu mwakupambana na umo ise takhazgiranga. Kweni tingaŵa na chigomezgo chose kuti Yehova wakumanya makora umo wangatovwilira. Nakuti ‘wangachita vinandi nkhanira kuluska vinthu vyose ivyo tikulomba panji kughanaghana.’ (Efe. 3:20) Pa chifukwa ichi, wangazgora malurombo ghithu panyengo iyo takhazganga yayi panji wangazgora mu nthowa iyo ise takhazganga yayi. w23.05 8-9 ¶4-6

Ntchiwemi kuti tose nyengo na nyengo tighanaghanirenge ivyo Baibolo lalayizga vyakukhwaskana na chiwuka icho chizamuchitika munthazi. Chifukwa wuli? Chifukwa tikumanya yayi usange nase tikumanenge na ulwari ukuru panji usange mwamabuchi munthu uyo tikumutemwa wangafwa. (Muph. 9:11; Yak. 4:​13, 14) Chigomezgo chithu cha chiwuka chingatovwira kuti tizizipizge masuzgo ghanthena agha. (1 Tes. 4:13) Malemba ghakutisimikizgira kuti Adada ŵithu ŵakuchanya ŵakutimanya makora ndipo ŵakutitemwa chomene. (Luka 12:7) Kuti Yehova watiwuske na wunthu withu kweniso maghanoghano ghithu, wakwenera kutimanya makora nadi. Yehova wakutitemwa chomene lekani watipa mwaŵi wakuti tizakakhale kwamuyirayira, ndipo usange tingafwa wazamutiwuska. Chifukwa wuli tikwenera kugomezga kuti chiwuka chiliko nadi? Chifukwa chakuti uyo watilayizga wakukhumbisiska kweniso wali na nkhongono za kuwuskira ŵakufwa. w23.04 8-9 ¶2-4

Yosefe na Mariya, ŵakachitirangaso vinthu pamoza kuti ŵakhozge ubwezi wawo na Yehova. Iwo ŵakamanyanga kuti ntchakuzirwa kusopera Yehova lumoza nga mbumba. (Luka 2:​22-24; 4:16) Ichi ntchiyelezgero chiwemi chomene ku ŵakutorana mazuŵa ghano. Usange muli na ŵana nga umo vikaŵira kwa Yosefe na Mariya, nyengo zinyake chingaŵa chakusuzga kuluta ku maungano panji kusanga nyengo ya kuchitira sambiro la mbumba. Chingaŵaso chakusuzga chomene kusanga nyengo yakusambilira panji kulombera lumoza nga ni mfumu na muwoli. Kweni kumbukani kuti para mukusopera Yehova pamoza, muŵenge paubwezi uwemi na iyo kweniso namwe mutemwanenge chomene. Ntheura kusopa Yehova ndiko kuŵenge pakwamba pa umoyo winu. Usange mu mbumba yinu muli masuzgo, kuchitira lumoza kusopa kwa mbumba kungaŵa kwakusuzga. Usange ni nthena, mungamba dankha kusambira kwanyengo yichoko waka. Kuchita nthena kovwirenge kuti mwambe kutemwana chomene kweniso mukhumbenge chomene kuchitira lumoza vinthu vyauzimu. w23.05 22 ¶7-8

Kasi kopa chomene Yehova kukamovwira wuli Obadiya? Chinthu chimoza ntchakuti kukamovwira kuŵa munthu wakuchita vinthu mwaunenesko kweniso mwakugomezgeka; lekani themba likamwimika kuti walaŵilirenge vya panyumba yachifumu. (Yaniskani na Nehemiya 7:2.) Kopa Chiuta kukamovwiraso Obadiya kuti waŵe na chikanga chomene—mukhaliro uwo wakakhumbikwiranga nadi. Iyo wakaŵako mu nyengo iyo Themba Ahabu likawusanga. (1 Mathe. 16:30) Kweniso muwoli wake, Yezebeli, uyo wakasopanga Baala, wakatinkhanga chomene Yehova mwakuti wakafika na pa kuyezgayezga kuwuskapo kusopa kutuŵa mu chigaŵa chose cha ufumu wa mafuko 10 gha Israyeli. Nakuti wakakoma ntchimi zinandi za Chiuta. (1 Mathe. 18:4) Apo Yezebeli wakamba kupenja ntchimi za Chiuta kuti wazikome, Obadiya wakabisa ntchimi 100 mu mphanji, ‘mu magulu gha ŵanthu 50 ndipo wakazipanga chingwa na maji.’ (1 Mathe. 18:​13, 14) Yezebeli wamanyenge ivyo Obadiya wakachita mphanyi wakamukoma. Pakuŵa munthu, Obadiya nayo wakaŵa na wofi ndipo wakakhumbanga yayi kufwa. Kweni Obadiya wakatemwanga chomene Yehova na ŵateŵeti ŵake kuluska umoyo wake. w23.06 16 ¶9-10

Yehova wakulutilira kulongozga ŵanthu ŵake mazuŵa ghano nga umo wakachitira kumanyuma. Wakutilongozga kwizira mu Baibolo, kweniso Mwana wake uyo ni mutu wa mpingo. Kasi pali ukaboni wakulongora kuti Chiuta wakulutilira kutilongozga kwizira mu ŵanthu awo wimika? Enya. Mwachiyelezgero, ghanaghanirani ivyo vikachitika kuumaliro wa vyaka vya m’ma 1800. Charles Taze Russell na ŵanyake, ŵakamba kupulikiska makora fundo yakuti Ufumu wa Chiuta uzamwamba kuwusa mu 1914. (Dan. 4:​25, 26) Mauchimi gha mu Baibolo ndigho ghakaŵawovwira kuti ŵamanye fundo iyi. Kasi Yehova wakaŵalongozganga apo ŵakachitanga kafukufuku? Ntchakuwonekerathu kuti wakaŵalongozganga. Ivyo vikachitika mu 1914 vikalongora nadi kuti Ufumu wa Chiuta wamba kuwusa. Nkhondo Yakwamba ya pa Charu Chose yikamba, kweniso kukaŵa nthenda zakwambukira, vindindindi na njara. (Luka 21:​10, 11) Yehova wakagwiliskiranga nadi ntchito ŵanalume Ŵachikhristu aŵa kuti wawovwire ŵanthu ŵake. w24.02 22 ¶11

Ise pakuŵa ŵanthu ŵa Yehova, tikumanya kuti wakutitemwa ndipo wakukhumba kuti tikondwenge na umoyo. (Rom. 8:​35-39) Kweniso ndise ŵakukhorwa kuti fundo za mu Baibolo nyengo zose tikusanga nazo chandulo para tikuzilondezga. (Yes. 48:​17, 18) Kweni kasi tingachita wuli usange tasangana na masuzgo mwamabuchi? Mwachiyelezgero, munyithu wamumbumba wangatikhuŵazga. Tingaŵa na suzgo la matenda ilo lingatitondeska kuchita uteŵeti uwo tikukhumba. Tingasangana na soka lachilengiwa. Panji tingatambuzgika chifukwa cha ivyo tikugomezga. Para tasangana na masuzgo ghanthena, tingajifumba kuti: ‘Chifukwa wuli ivi vikuchitikira ine?’ Kasi ndikuti nananga chinthu chinyake? Kasi ivi vikulongora kuti Yehova wakunitumbika yayi? Kasi namwe muli kujipulikapo nthena? Usange ni nthena kugongowa yayi. Ŵateŵeti ŵanandi ŵa Yehova ŵakugomezgeka nawo ŵali kujipulikapo nthena.—Sal. 22:​1, 2; Hab. 1:​2, 3. w23.04 14 ¶1-2

Para tayezgeka, mwaluŵiro tikukana kaghanaghaniro kalikose panji kuchita chilichose icho chingananga ubwezi withu na Chiuta. Yehova wakukhazga kuti ‘timupulikirenge kufumira pasi pa mtima.’ (Rom. 6:17) Ulongozgi wake nyengo zose ndise tikusanga nawo chandulo, ndipo tingasintha yayi malango ghake. (Yes. 48:​17, 18; 1 Kor. 6:​9, 10) Satana wakugwiliskira ntchito nthambuzgo kuti watitondeske kuŵa ŵakukhora. Chilato chake ntchakuti ‘watimilimitizge,’ mwakuti wanange ubwezi withu na Yehova. (1 Pet. 5:8) Ŵakhristu mu nyengo yakale ŵakawofyekanga, kutimbika, kweniso kukomeka chifukwa cha kuŵikapo mtima kulutilira kuŵa ŵakugomezgeka. (Mil. 5:​27, 28, 40; 7:​54-60) Satana wachali kugwiliskira ntchito nthambuzgo mazuŵa ghano. Tikusanga ukaboni uwu para tikuwona umo ŵabali na ŵadumbu ŵithu ku Russia na vyaru vinyake ŵakutambuzgikira mwankhaza. Kweniso ŵakususka ŵakutambuzga ŵabali na ŵadumbu mu nthowa zakupambanapambana. Padera pa nthambuzgo, Satana wakugwiliskiraso ntchito “mauryarya” ghake.—Efe. 6:11. w23.07 15-16 ¶6-9

Apo mukulutilira kusambira Baibolo, chitemwa chinu pa Yehova nacho chikurenge chomene. Chitemwa ichi ndicho chikumuchiskani kulondezga ivyo mukusambira. Mukusankha makora vinthu kuyana na fundo za mu Baibolo. Mwasintha nkharo yinu chifukwa mukukhumba kukondweska Chiuta. Nga umo mwana wakuyezgera mupapi wachitemwa, namwe mukuyezga Adada ŵinu ŵakuchanya. (Efe. 5:​1, 2) Jifumbani kuti: ‘Kasi sono nkhumutemwa chomene Yehova kuluska pakwamba nati nazgoka waka Mkhristu? Kufuma apo nkhabatizikira, kasi kaghanaghaniro kane na vyakuchita vyane vikukolerana na Yehova, chomenechomene pakulongora chitemwa ku ŵabali na ŵadumbu ŵane?’ Para ‘chitemwa icho mukaŵa nacho pakwamba’ chazizima, mungagongowanga yayi. Vyanthena ivi ndivyo vikachitikiraso Ŵakhristu ŵakwambilira. Kweni Yesu wakaŵaleka yayi, ndipo nase watilekengepo yayi. (Chivu. 2:​4, 7) Iyo wakumanya kuti chitemwa icho tikaŵa nacho pakwamba apo tikasambiranga unenesko tingaŵaso nacho. w23.07 8 ¶2-3

Mpositole Petrosi wakabudiska vinthu vinandinandi waka. Chakwamba Petrosi wakajithemba chomene, wakajikuzga na kuyowoya kuti iyo wagomezgekenge nanga ŵapositole ŵanyake wose ŵangamuchimbira Yesu. (Mrk. 14:​27-29) Chachiŵiri, Petrosi wakatondeka kuti walutilire kuŵa maso kanandi waka. (Mrk. 14:​32, 37-41) Kufuma apo, mzinda wati wiza kuzakamukora Yesu, Petrosi wakamuchimbira. (Mrk. 14:50) Paumaliro, Petrosi wakamukana Yesu katatu kuti wakumumanya yayi, ndipo wakachita na kulapa wuwo. (Mrk. 14:​66-71) Kasi Petrosi wakachita wuli wati wamanya kuti wachita kwananga kukuru? Chitima chikakwera ndipo wakamba kulira chomene. (Mrk. 14:72) M’malo mwakuti wamupe ulongozgi Petrosi pa ivyo wakachita, Yesu wakaphalira mubwezi wake uyu kuti wamupenge maudindo ghakusazgikira. (Yoh. 21:​15-17) Petrosi wakamanya kuti wakachita kwananga kukuru, kweni wakagongowa yayi. Chifukwa wuli? Chifukwa wakaŵa na chigomezgo chose kuti Yesu wachali kumutemwa. Kasi tikusambirako vichi?Yehova wakutisimikizgira kuti wakutitemwa ndipo ngwakunozgeka kutigowokera.—Rom. 8:​38, 39. w24.03 18-19 ¶13-15

Uzaghali ukwiziska masuzgo nga kukhozgeka soni, kujiwona wawakawaka, nthumbo za pa thengere, kweniso kutimbanizga nthengwa. Ntheura ni mahara chomene kukana ntchemo ya mwanakazi uyo ntchindere. Padera pakuti awo ŵakuchita uzaghali ŵakunanga ubwezi wawo na Yehova, ŵakutoraso matenda agho ŵangafwa nawo. (Zinth. 7:23) Vesi 18 la Zintharika chaputara 9 likumalizga na mazgu ghakuti: “Ŵalendo ŵa mwanakazi uyu ŵali kusi ku Dindi.” Chifukwa wuli pera ŵanandi ŵakuzomera ntchemo ya mwanakazi uyu iyo yikulongozgera ku masuzgo? (Zinth. 9:​13-18) Chipingo chakuzara chomene nkhuwonelera vinthu vyamuziro. Ŵanji ŵakughanaghana kuti kuwonelera vyamuziro nkhwakofya yayi. Kweni kuwonelera vyamuziro nkhwakofya, munthu wakujichindika yayi nesi kuchindika ŵanji, kweniso vikusuzga kuti munthu wavileke. Para munthu wawona vithuzithuzi vyamuziro, vikusuzga kuti vifumemo mu maghanoghano. Chinyake ntchakuti vithuzithuzi vyamuziro, m’malo mwa kukoma viŵaro vya munthu kuŵa vyakufwa ku uzaghali, ivyo vikupangiska kuti makhumbiro ghaheni ghagolere chomene. (Kol. 3:5; Yak. 1:​14, 15) Nadi, ŵanandi awo ŵakuwonelera vinthu vyamuziro paumaliro ŵakuchita nadi uzaghali. w23.06 23 ¶10-11

Nangauli vyaru vinyake vingayezga kulimbana nawo Ufumu wa pa Charu Chose wa Britain na America, kweni vizamuwuthereskapo yayi. Tikumanya fundo iyi chifukwa chakuti “libwe” ilo likwimira Ufumu wa Chiuta ndilo lizamuteketa vikandiro, chigaŵa cha chikozgo icho chikwimira Ufumu wa pa Charu Chose wa Britain na America. (Dan. 2:​34, 35, 44, 45) Kasi ndimwe ŵakukhorwa kuti uchimi wa Daniyeli wakuyowoya za vikandiro vya chisulo na dongo ngwaunenesko? Usange ni nthena, ivi vikhwaskenge umo mukukhalira umoyo winu wa zuŵa na zuŵa. Muŵikenge mtima pa kujiwunjikira usambazi mu charu ichi yayi icho sonosono apa chiparanyikenge. (Luka 12:​16-21; 1 Yoh. 2:​15-17) Kupulikiska uchimi uwu kumovwiraningiso kuwona kuzirwa kwa mulimo wakupharazga na kusambizga. (Mat. 6:33; 28:​18-20) Pamanyuma pakusambira uchimi uwu, jifumbani kuti: ‘Kasi vyakusankha vyane vikulongora kuti ndine wakukhorwa kuti Ufumu wa Chiuta umazgenge sonosono apa maboma ghose gha ŵanthu?’ w23.08 11 ¶13-14

Mujiyuyurenge na kuzomerezga kuti vinthu vinyake ivyo mukukhumba kuchita, mungachita yayi pasono chifukwa cha uchekuru, ulwari panji umo vinthu viliri pa umoyo winu. Nga ni Barazilayi, kuchita soni yayi kukana mauteŵeti ghanyake agho mungafiska yayi chifukwa cha msinkhu winu panji ulwari. (2 Sam. 19:​35, 36) Nga ni Mozesi, zomerani kuti ŵanji ŵamovwirani kweniso gaŵiraniko ŵanji milimo usange ntchakwenelera. (Eks. 18:​21, 22) Mzimu wa kujiyuyura uwu umovwiraninge kuti muleke kukhazga vinandi kuluska ivyo mungafiska, ivyo paumaliro vingamutondeskani kuti muchimbire makora. Tikwenera yayi kujiyimba mulandu chifukwa cha ivyo ŵanji ŵasankha uheni. Tingaŵasankhira yayi vyakuchita ŵanyithu, nesi kuŵavikilira nyengo zose ku masuzgo agho ghangiza chifukwa chakuti ŵakasankha uheni vinthu. Mwachiyelezgero, mwana munyamata panji msungwana wangasankha kuleka kuteŵetera Yehova. Para mwana wasankha nthena ŵapapi ŵakuŵa na chitima chomene. Ndipouli, ŵapapi awo ŵakujiyimba mulandu chifukwa chakuti mwana wawo wasankha uheni yekha, ŵakujiphyora chomene. Ŵakuyegha katundu uyo Yehova wakukhazga kuti ndiwo yayi ŵakwenera kuyeya. w23.08 29 ¶11-12

Samusoni wakaŵa wambura kufikapo nga ndise, ntheura nyengo zinyake wakasankhanga makora yayi vinthu. Chinthu chinyake icho wakasankha chikapangiska kuti wanjire mu suzgo yikuru. Samusoni wati wateŵetera nga ni mweruzgi kwakanyengo, “wakatemwa mwanakazi munyake mu Dambo la Soreki, zina lake Delila.” Nyengo yinyake kumanyuma Samusoni wakakhumbanga kutora mwanakazi munyake Mufilisiti, kweni ni Yehova uyo wakamuphalira Samusoni kuti wachite nthena mwakuti wasange m’pata wakulimbana na Ŵafilisiti. Pamanyuma, Samusoni wakakhala mu nyumba ya mwanakazi muhule mu msumba wa Ŵafilisiti ku Gaza. Panyengo iyi, Chiuta wakamupa nkhongono Samusoni kuti wanyamure vijaro vya pa chipata cha msumba, ndipo ivi vikapangiska kuti msumba uŵe wambura kuvikilirika. (Ŵeru. 14:​1-4; 16:​1-3) Kweni pa nkhani ya Delila vikaŵa vyakupambanako, chifukwa Delila wakwenera kuti wakaŵa Muisrayeli. Delila wakazomera kupoka ndalama zinandi ku Ŵafilisiti mwakuti wamwendere mphiska Samusoni. w23.09 5 ¶12-13

Mahara ghangatovwira kuŵa ŵakuzika. Munthu wamahara wakulongora mzimu wakujikora para ŵanji ŵakususka vigomezgo vyake. Kanandi para ŵanthu ŵakutifumba mafumbo ŵakuyowoya yayi chifukwa chenecho icho ŵakufumbira. Ntheura pambere tindazgore, tingachita makora kumanya kuti tingamanya yayi icho chapangiska munthu kufumba fumbo. (Zinth. 16:23) Wonani umo Gidiyoni wakazgolera ŵanalume ŵa Efurayimu. Mwaukali ŵakamufumba chifukwa icho pakwamba wakaŵachema yayi kuti ŵalutire lumoza kukalimbana na ŵalwani ŵa Israyeli. Kweni kasi chikaŵa chifukwa wuli chenecho icho ŵakakwiyira nthena? Panji ntchifukwa cha kujikuzga. Mulimose umo vikaŵira, Gidiyoni wakachita vinthu mwamahara. Ndipo wakayezgayezga kumanya chifukwa icho ŵakakwiyira chomene ndipo wakaŵazgora mwakuzika. Kasi pakaŵa uwemi wuli? Iwo “ŵakatuna.”—Ŵeru. 8:​1-3. w23.09 16 ¶8-9

Nga umo vikuŵira na dada na mwana wake, Yehova na Yesu ŵakutemwana chomene. Tikukayika yayi kuti vikamuŵinya chomene kuwona Mwana wake wakusuzgika. Mupapi waliyose uyo mwana wake wali kufwapo wakumanya umo nyifwa ya mwana yikuŵinyira. Nangauli tikumanya kuti chiwuka chiliko, kweni para wakutemweka withu wafwa vikutiŵinya chomene. Chiyelezgero ichi chikutovwira kumanya umo Yehova wakwenera kuti wakajipulikiranga apo wakawonanga Mwana wake wakutemweka wakusuzgika na kufwa mu 33 C.E. (Mat. 3:17) Kwamba sono m’paka pa Chikumbusko, mungachita makora chomene kusambira vinandi vya Yesu pa sambiro lamwaŵene panji pa Kusopa kwa Mbumba. Ndipo pa zuŵa la Chikumbusko, kuluwa yayi kuwonelera pulogiramu yapadera ya Kusopa kwa Mulenji. Para tanozgekereska mtima withu apo Chikumbusko chikusendelera, tovwirenge makora ŵanji kuti nawo ŵazakasange chandulo.—Ezir. 7:10. w24.01 11 ¶10-12

Nthowa yimoza iyo Yehova wangatipira nkhongono, nkhumulomba. Yehova wazgorenge malurombo ghithu pakutipa “nkhongono zakuluska zakawiro.” (2 Kor. 4:7) Kweniso tingasanga nkhongono para tikuŵazga Mazgu ghake na kughanaghanirapo. (Sal. 86:11) Mazgu agho Yehova wakutiphalira mu Baibolo ghali na “nkhongono.” (Heb. 4:12) Para mukulomba kwa Yehova na kuŵazga Mazgu ghake, musangenge nkhongono izo mukukhumbikwira kuti muzizipizge, mulutilire kuŵa ŵakukondwa, panji mufiske uteŵeti uwo ngwakusuzga. Wonani umo Yehova wakakhozgera ntchimi Yona. Yona wakachimbira mulimo wakusuzga uwo Yehova wakamupa. Pa chifukwa ichi, wakakhala pachoko waka kuti wataye umoyo wake pamoza na awo wakaŵa nawo mu ngalaŵa apo kukaŵa chimphepo chikuru. Ŵakwendeska ngalaŵa ŵakati ŵamuponya mu nyanja, chisomba chikuru chikamumira, ndipo wakaŵa mu malo gha mdima munthumbo ya chisomba ichi. Kasi Yona wakachita wuli kuti wasange nkhongono apo wakaŵa mu malo ghayekha mu nthumbo ya chisomba? Wakalomba.—Yona 2:​1, 2, 7. w23.10 13 ¶4-6

Nangauli makalata gha mpositole Petrosi ghakalembekera Ŵakhristu ŵakwambilira, kweni Yehova wali kughasazgamo mu Mazgu ghake. Ntheura nase tingasanga chandulo na makalata agha. (Rom. 15:4) Tazingilizgika na ŵanthu awo ŵakugomezga yayi mauchimi gha mu Baibolo. Ŵakususka ŵangatinyoza chifukwa chakuti tapharazga kwa vyaka vinandi kuti umaliro uli pafupi chomene. Nakuti ŵanthu ŵanyake ŵakuti umaliro wizengepo yayi. (2 Pet. 3:​3, 4) Para tapulika mazgu agha kwa munthu uyo tikumupharazgira, munyithu wa ku ntchito, panji wamumbumba yithu, chipulikano chithu chingasunkhunyika. Petrosi wakalongosora ivyo vingatovwira. Ku ŵanyake vingawoneka nga kuti Yehova wakuchedwa kuparanya charu chiheni ichi. Kweni mazgu gha Petrosi ghangatovwira chifukwa ghakutikumbuska kuti umo Yehova wakuwonera nyengo vikupambana chomene na umo ise taŵanthu tikuwonera. (2 Pet. 3:​8, 9) Kwa Yehova vyaka 1,000 vili nga ni zuŵa limoza. Yehova ngwakuzikira ndipo wakukhumba yayi kuti munyake waparanyike. Kweni para zuŵa lake liza, charu ichi chizamuparanyika. w23.09 26-27 ¶2-5

Chifukwa wuli mpositole Paulosi wakalembera kalata Ŵakhristu Ŵachihebere ŵa mu Yudeya? Vikulongora kuti pali vifukwa vikuru viŵiri ivyo wakwenera kuti wakalembera kalata iyi. Chakwamba, kuti waŵakhozge. Ŵanandi ŵa iwo ŵakakulira mu chisopa Chachiyuda. Ŵalongozgi ŵawo ŵa chisopa chakale ŵakwenera kuti ŵakaŵanyozanga pakuti ŵakazgoka Ŵakhristu. Chifukwa wuli? Chifukwa Ŵakhristu ŵakaŵavya tempile lakuti ŵangasoperako, kweniso ŵakaŵavya jotchero lakupelekerapo sembe kwa Chiuta, ndiposo ŵasembe ŵakuti ŵaŵasambizgenge. Ivi vikwenera kuti vikaŵagongoweska ŵasambiri ŵa Khristu aŵa na kulopweska chipulikano chawo. (Heb. 3:​12, 14) Ŵanyake panji ŵakayezgeka kuti ŵawelereso waka ku chisopa Chachiyuda. Chachiŵiri, Paulosi wakati Ŵakhristu Ŵachihebere aŵa ŵakafwilirangapo yayi kuti ŵapulikiske visambizgo viphya vyauzimu panji vyakunyang’amira, ivyo ni “chakurya chakukhoma” chakufuma mu Mazgu gha Chiuta. (Heb. 5:​11-14) Vikulongora kuti ŵanyake ŵakaŵa ŵachali kukoleska Dango la Mozesi. w23.10 24-25 ¶3-4

Ŵadumbu ŵanyake ŵakusankha kuleka kutengwa. (Mat. 19:​10-12) Manyani kuti Yehova na Yesu ŵakumuwonani kuti muli ŵakuzirwa nangauli mundatengwe. Pa charu chose, ŵadumbu ŵambura kutengwa ŵanandi ni viyelezgero viwemi mu mpingo. Chifukwa cha kutemwa ŵanji kweniso kughanaghanira ŵanji, vikuŵachiska kuti ŵaŵe ŵalongosi panji ŵamama ŵauzimu ŵa ŵabali na ŵadumbu ŵanandi. (Mrk. 10:​29, 30) Ŵanyake ŵakuchita uteŵeti wanyengozose. Ŵadumbu ŵakuchita vinandi chomene pa mulimo wakupharazga makani ghawemi uwo ukuchitika pa charu chose chapasi. (Sal. 68:11) Kasi namwe sono mungaghanaghanirapo kuti mwambe uteŵeti wanyengozose? Mungachitako upayiniya, mulimo wakuzenga, panji kukateŵetera pa Beteli. Muphalirani Yehova vya chilato chinu. Yowoyaniso na ŵanji awo ŵali kufiska chilato chakuyana na chinu, na kumanya ivyo mungachita kuti namwe mufiske. Pamanyuma sangani nthowa izo zingamovwirani kuti mufiske nadi chilato chinu. Para mwafiska chilato chinu vingawovwira kuti muŵe na mwaŵi unandi wakuchita mauteŵeti ghanyake mu gulu la Yehova. w23.12 22 ¶16-17

Apo suzgo yikuru yikusendelera, ntchakuzirwa chomene kukumbuka kuti tikwenera kupulikira dango lakuti tipharazgenge. Nyengo zinyake chingaŵa chakusuzga kuŵika mtima pa mulimo wakupharazga para tili na suzgo la ndalama panji para ŵanthu ŵakutisuska mu uteŵeti. Kasi ntchivichi chingatovwira kuti tiŵikenge vinthu vya Ufumu pa malo ghakwamba? Kulutilira kugomezga “Yehova wa mawumba” kuti wali nase. Watovwirenge para tikulutilira kuŵika vinthu vya Ufumu pakwamba kuluska ivyo ise tikukhumba. Ntheura tikwenera yayi kopa. (Hag. 2:4) Yehova wakukhumba kuti tiŵikenge mtima withu wose pa mulimo wakuponoska umoyo uwo ngwakuzgora ŵanthu kuŵa ŵasambiri. Hagayi wakachiska ŵanthu ŵa Yehova kuti ŵambireso kuzenga tempile. Yehova wakalayizga kuti para ŵambiraso, ‘waŵapenge vitumbiko.’ (Hag. 2:​18, 19) Nase tingaŵa ŵakusimikizga kuti Yehova watitumbikenge para tikuŵika pakwamba mulimo uwo wali kutipa. w23.11 16 ¶8; 17 ¶11

Mu kalata yake iyo wakalembera Ŵaroma, mpositole Paulosi wakati ŵanthu wose mbakwananga. Ipo kasi Chiuta wangakondweskeka wuli na ise na kutiwona kuti ndise ŵarunji panji ŵambura kafukwa? Kuti wawovwire Ŵakhristu wose ŵamitima yiwemi kuzgora fumbo ili, Paulosi wakayowoya chiyelezgero cha Abrahamu. Yehova wakati Abrahamu ni murunji nangauli wakakhalanga mu charu cha Kenani. Chifukwa wuli Yehova wakati Abrahamu ni murunji? Kasi ntchifukwa chakuti wakapulikiranga Dango la Mozesi? Yayi. (Rom. 4:13) Dango ili likapelekeka ku mtundu wa Israyeli vyaka vyakujumpha 400 vikati vyajumphapo kufuma apo Chiuta wakayowoyera kuti Abrahamu ni murunji. Ipo chifukwa wuli Chiuta wakati Abrahamu ni murunji? Yehova wakamulongora lusungu lukuru Abrahamu ndipo wakamuchema murunji chifukwa cha chipulikano chake.—Rom. 4:​2-4. w23.12 3 ¶4-5

Pa usiku uwo ntchimi Natani yikaphalira Themba Davide mazgu gha mulemba la mwahuno, Yehova wakaphalira Natani kuti ni Davide yayi uyo wazengenge tempile. (1 Mid. 17:​3, 4, 11, 12) Kasi Davide wakachita wuli wakati wapokera uthenga uwu? Wakaŵikapo mtima kuwunjika ndalama na vinthu ivyo mwana wake Solomoni wakakhumbikwiranga kuzakavigwiliskira ntchito pa mulimo uwu. (1 Mid. 29:​1-5) Davide wati wamanyiskika waka kuti ndiyo yayi wazengenge tempile, mwaluŵiro Yehova wakachita nayo phangano. Yehova wakalayizga Davide kuti yumoza wa ŵana ŵake wazamuwusa muyirayira. (2 Sam. 7:16) Mu charu chiphya, mu Nyengo ya Muwuso wa Vyaka 1,000, Davide wazamukondwa chomene kumanya kuti Themba ilo likuwusa, Yesu, lili kufuma mu mphapu yake. Nkhani iyi yikutovwira kumanya kuti nanga tingatondeka kumuchitira Yehova vyose ivyo takhumbanga kumuchitira, Chiuta withu wangatipa vinthu vinyake viwemi ivyo takhazganga yayi. w23.04 16 ¶8-10

Mungasanga mavesi agho ghangamovwirani para mukwenjerwa. Mwachiyelezgero, mungasanga fundo zakukhozga para mungaŵazga buku la Yobu, Salimo, Zintharika kweniso mazgu gha Yesu agho ghakusangika mu buku la Mateyu chaputara 6. Para mukulomba kwa Yehova na kuŵazga Mazgu ghake, mupembuzgikenge. Tingaŵa na chigomezgo chose kuti Yehova waŵenge nase nyengo yiliyose para tasangana na masuzgo. Watilekenge tekha yayi. (Sal. 23:4) Yehova watilayizga kuti wativikilirenge, watikhozgenge, watovwirenge, kweniso watipembuzgenge. Pakuyowoya za Yehova, lemba la Yesaya 26:3 likuti: “Musungilirenge awo ŵakuyegamira kwa imwe fikepo. Muŵapenge mtende wambura kumara, chifukwa ŵakuthemba imwe.” Ntheura gomezgani Yehova na kuchita vyose ivyo mungafiska kuti musange chandulo na wovwiri uwo wakumupani. Para muchitenge nthena, musangengeso nkhongono nanga mungaŵa mu nyengo ya masuzgo. w24.01 25 ¶16-17

Mazgu agho ghali mu lemba la mwahuno ghakufiskika mazuŵa ghano. Kweniso mazgu ghakupembuzga ghakulondezgapo agha nagho ghakufiskika mazuŵa ghano, ghakuti: “Ŵana ŵako wose ŵazamusambizgika na Yehova, ndipo mtende wa ŵana ŵako uzamuŵa ukuru. Uzamukhozgeka chomene mu urunji. . . . Pakuti uzamuwopa kalikose yayi, pazamuŵavya chakukutenthemeska, chizamuŵapo yayi pafupi nawe.” (Yes. 54:​13, 14) Nanga ni “chiuta wa nyengo iyi,” uyo ni Satana, wangatondeska yayi mulimo wakusambizga ŵanji uwo ŵanthu ŵa Yehova ŵakuchita mazuŵa ghano. (2 Kor. 4:4) Kusopa kutuŵa kwawezgekerapo, ndipo kuzamufipiskikaso yayi. Kuŵengepo muyirayira. Palije chilwero icho chapangikira ise icho chitondenge. w24.02 4 ¶10

Pakuŵa Ŵakhristu, chilapo chithu cha kujipeleka kwa Yehova tikuchiwona mwakupepuka yayi. Ivi vikukhwaska umo tikusankhira vinthu kweniso umo tikuchitira vinthu pa nkhani za mu mbumba. Tikuŵikapo mtima kupwelelera mbumba yithu, kweni tikudangizga vyakukhumba vya mbumba yithu yayi kuluska ivyo Yehova wakukhumba. (Mat. 10:​35, 36; 1 Tim. 5:8) Nyengo zinyake, tingakhumbikwira kusankha vyakuchita ivyo ŵachibali ŵithu ŵangakondwa navyo yayi na chilato chakuti tikondweske Yehova. Dada withu wakuchanya ndiyo wakambiska mbumba, ndipo wakukhumba kuti ziŵenge zakukondwa. (Efe. 3:​14, 15) Para tikukhumba kuŵa ŵakukondwa zanadi, tichitenge ivyo Yehova wakukhumba. Manyani kuti Yehova wakuzirwiska chomene ivyo mukujinora kuti mumuteŵetere uku mukupwelelera mbumba yinu kweniso kuchita nayo vinthu mwantchindi ndiposo mwachitemwa.—Rom. 12:10. w24.02 18 ¶11, 13