Meyi

Ŵakhristu ŵakwambilira nawo ŵakakhwaskika na njara yikuru chomene iyo yikachitika “pa charu chose.” Tikukayika yayi kuti mitu ya mbumba yikafipanga chomene mtima umo yiwovwilirenge mbumba zawo. Wuli pakuyowoya za ŵachinyamata awo ŵakakhumbanga kusazgirako uteŵeti wawo? Kasi ŵakawona kuti ŵalindizgepo dankha pachoko? Mulimose umo vikaŵira, Ŵakhristu aŵa ŵakazizipizga. Ŵakalutilira kupharazga mulimose umo ŵangafiskira, ndipo ŵakakondwanga chomene kugaŵiranako vinthu na Ŵakhristu ŵanyawo mu Yudeya. (Mil. 11:​29, 30) Awo ŵakapokera wovwiri, ŵakawona kuti Yehova wakuŵawovwira. (Mat. 6:​31-33) Ŵakwenera kuti ŵakamba kutemwana chomene na Ŵakhristu ŵanyawo awo ŵakaŵawovwira. Ndipo awo ŵakapeleka vyawanangwa panji awo ŵakachitako mulimo wakugaŵa wovwiri ŵakajiwonera ŵekha chimwemwe icho munthu wakuŵa nacho chifukwa cha mtima wakupeleka.—Mil. 20:35. w23.04 16 ¶12-13

Nyengo zinyake Yehova wakuzgora malurombo ghithu mwa kuchiska ŵanthu awo ŵakumusopa yayi kuti ŵatovwire. Mwachiyelezgero, wakapangiska Themba Aritazekisesi kuzomerezga Nehemiya kuwelera ku Yerusalemu mwakuti wakawovwirepo pa mulimo wakuzengaso msumba. (Neh. 2:​3-6) Mazuŵa ghano napo, Yehova wangapangiska awo ŵakumusopa yayi kuti ŵatovwire para tikukhumbikwira wovwiri. Malurombo ghithu kanandi ghakuzgoreka mu nthowa yapadera yayi. Kweni mazgoro agho tikupokera ndigho tikukhumbikwira nadi kuti ghatovwire kulutilira kuŵa ŵakugomezgeka kwa Adada ŵithu ŵakuchanya. Ntheura muŵenge maso kuwona umo Yehova wakuzgolera malurombo ghinu. Nyengo na nyengo, mukwenera kughanaghanirapo umo Yehova wakuzgolera malurombo ghinu. (Sal. 66:​19, 20) Padera pa kulomba kwa Yehova, tikulongoraso chipulikano para tikuzomerezga umo Yehova wazgolera malurombo ghithu nanga ghangazgoreka mu nthowa iyo takhazganga yayi.—Heb. 11:6. w23.05 11 ¶13; 12 ¶15-16

Apo tikajipeleka kwa Yehova, tikachita chilapo chakuti timusopenge na kuchita khumbo lake. Tikwenera kufiska chilapo ichi. Kufiska vyose ivyo tikalayizga ntchakusuzga chomene yayi. Vili nthena chifukwa Yehova wali kutilenga kuti tichitenge khumbo lake. (Chivu. 4:11) Wali kutilenga mu nthowa yakuti tiŵenge na khumbo la kumumanya na kumusopa, kweniso wali kutilenga mu chikozgo chake. Ntheura ivi vikupangiska kuti tisendelere kwa iyo na kuchita khumbo lake mwakukondwa. Chinyake ntchakuti, para tikuchita khumbo la Chiuta na kulondezga Mwana wake, ‘tikupumuzgika.’ (Mat. 11:​28-30) Ntheura lutilirani kukuzga chitemwa chinu pa Yehova. Mungachita nthena para mukughanaghanirapo chomene pa viwemi ivyo Yehova wamuchitirani kweniso vitumbiko ivyo wamusungirani munthazi. Para chitemwa chinu pa Chiuta chikukura, chiŵenge chipusu kumupulikira. (1 Yoh. 5:3) Yesu wakafiska kuchita khumbo la Chiuta chifukwa wakalombanga wovwiri kwa Yehova na kulutilira kuŵika mtima pa njombe iyo yikaŵa panthazi pake. (Heb. 5:7; 12:2) Nga ni Yesu, namwe mulombenge kwa Yehova kuti wamupani nkhongono na kulutilira kughanaghanirapo pa chigomezgo cha umoyo wamuyirayira. w23.08 27-28 ¶4-5

Tose tikutemwa ŵanthu awo mbakuzikira. Chifukwa wuli? Chifukwa ntchakuti kanandi tikuchindika ŵanthu awo ŵangalindilira chinthu chinyake kwambura kukhuŵara. Tikuwonga chomene kuti ŵanji ŵakuzikira nase para tabudiska vinthu vinyake. Ndipo tikuwonga kuti uyo wakatisambizganga Baibolo wakazikira nase apo vikatisuzganga kusambira, kuzomerezga, panji kulondezga ivyo Baibolo likusambizga. Chakuluska vyose, tikuwonga chomene kuti Yehova Chiuta wakazikira nase. Nangauli tikuzirwiska ŵanthu awo mbakuzikira, kweni ise taŵene ni nyengo zose yayi apo chingatiŵira chipusu kuzikira. Mwachiyelezgero, nyengo zinyake tingatondeka kuzikira para tikwendeska galimoto ndipo mzere wa magalimoto ngutali, chomene para tikuwona kuti tachedwa. Nyengo zinyake tingatondeka kujikora para ŵanji ŵatikwiyiska. Ndipo nyengo zinyake chingatiŵira chakusuzga kulutilira kulindilira layizgo la Yehova la charu chiphya. Ntheura tikwenera kuzikira muvigaŵa vyose ivi. w23.08 20 ¶1-2

Yehova wakaphalira Gidiyoni kuti wachepeske nambara ya ŵasilikari ŵake, wakachepeska kujumpha pa 99 peresenti. Iyo wakate waghanaghanenge kuti: ‘Kasi nkhwenera kuchepeskako nadi? Kasi vitiyenderenge makora?’ Ndipouli, Gidiyoni wakapulikira. Mazuŵa ghano napo, ŵalara ŵakuyezga Gidiyoni para ŵakupulikira ulongozgi uphya wa gulu. (Heb. 13:17) Gidiyoni wakapulikiranga Yehova nanga ni apo wakawopanga kweniso apo mulimo wake ukaŵa wakofya. (Ŵeru. 9:17) Yehova wati wamusimikizgira kuti waŵenge nayo, Gidiyoni wakakhorwa kuti Chiuta wamovwirenge kuvikilira ŵanthu ŵa Chiuta. Ŵalara awo ŵakukhala ku malo uko mulimo withu ngwakukanizgika ŵakuyezga Gidiyoni. Mwachikanga, ŵakulongozga pa maungano kweniso mu uteŵeti nanga ŵangaŵa kuti ŵawofyeka kuti ŵangakakika, kufumbika mafumbo, ntchito kuŵamalira panji kuŵachitira nkhaza. Mu nyengo ya suzgo yikuru, ŵalara ŵazamukhumbikwira chikanga kuti ŵapulikire ulongozgi uwo ŵazamupokera, nanga chingazakaŵa chakofya kulondezga ulongozgi uwo. w23.06 5-6 ¶12-13

Yehova wakawona milimo iyo Wasembe Mulara Yehoyada wakachitanga ndipo wakazomerezga kuti yilembeke mu Baibolo na chilato chakuti tisambireko kanthu. (Rom. 15:4) Ndipo Yehoyada wati wafwa, wakapika ntchindi zapadera, ŵakamusunga “mu Msumba wa Davide pamoza na mathemba, chifukwa wakachita uwemi mu Israyeli, kwa Chiuta waunenesko na nyumba yake. (2 Mid. 24:​15, 16) Nkhani ya Yehoyada yingawovwira waliyose wa ise kuŵa na wofi wakwenelera kwa Chiuta. Ŵalara ŵangamuyezga Yehoyada para nyengo zose ŵakupenjerezga nthowa za umo ŵangavikililira mpingo. (Mil. 20:28) Awo mbalara mu vyaka, nawo ŵangasambirako kwa Yehoyada kuti para ŵakopa Yehova na kulutilira kuŵa ŵakugomezgeka, Yehova wangaŵagwiliskira ntchito kufiska khumbo lake. Ŵawukirano ŵangasambirako kwa Yehova pa umo wakachitira vinthu na Yehoyada. Ŵangasambirako kulongora ntchindi ku ŵabali na ŵadumbu ŵachekuru, chomenechomene awo ŵateŵetera Yehova kwanyengo yitali. (Zinth. 16:31) Tose tingachita makora kukhozgera na mtima wose “awo ŵakulongozga” pakati pithu mwa kuŵapulikira.—Heb. 13:17. w23.06 17 ¶14-15

Pa maunangano, tikwenera kugwiliskira ntchito umanyi para tikughanaghanira unandi wa mafumbo agho tamuzgorapo. Para tikuwuska woko pafupipafupi, tingapangiska kuti uyo wakuchitiska wachichizgike kutiwuska mwakuwerezgawerezga nangauli ŵanyake ŵangaŵa kuti ŵandazgorepo. Kuchita nthena kungagongoweska ŵanji kuwuska mawoko ghawo kuti ŵazgorepo. (Muph. 3:7) Para ŵapharazgi ŵanandi ŵakuwuska mawoko ghawo kuti ŵazgorepo, tingatondeka kuzgorapo kanandi waka nga umo tikukhumbira. Nyengo zinyake, uyo wakuchitiska wangatiwuska na kutiwuska wuwo yayi. Ichi chingaŵa chakugongoweska chomene, kweni tikwenera yayi kukwiyira uyo wakuchitiska para wandatiwuske. (Muph. 7:9) Para tindazgorepo nga umo tikukhumbira, tikwenera kutegherezga waka mwakupwelelera para ŵanyithu ŵakuzgora na kuŵawonga pamanyuma pa maungano. Ŵabali na ŵadumbu ŵithu ŵangakhozgeka chomene para mungaŵawonga nga umo ŵatenge ŵakhozgekerenge muzgorengepo pa maungano. w23.04 23-24 ¶14-16

Musambirenge Mazgu gha Chiuta na kughanaghanirapo. Nga umo khuni likuŵira lakukhora para misisi yake yajintha chomene pasi, nase tingalutilira kuŵa ŵakukhora para chipulikano chithu chikujintha pa Mazgu gha Chiuta. Para khuni likukura, misisi yake nayo yikujintha chomene pasi kweniso kuthazira kutali. Nase para tikusambira Mazgu gha Chiuta na kughanaghanirapo, tikukhozga chipulikano chithu kweniso tikukhorwa kuti nthowa za Chiuta ndizo ni ziwemi chomene. (Kol. 2:​6, 7) Ghanaghanirani umo malango gha Yehova, ulongozgi wake, na chivikiliro chake vikawovwilira ŵateŵeti ŵake mu nyengo yakale. Mwachiyelezgero, Ezekiyeli wakalaŵisiska chomene apo mungelo wakapimanga mwakupwelelera tempile ilo wakawona mu mboniwoni. Mboniwoni iyi yikamukhozga chomene Ezekiyeli, ndipo nase yikutisambizga fundo zakuzirwa za umo tikwenera kulondezgera malango gha Yehova pa nkhani ya kusopa kutuŵa. (Ezek. 40:​1-4; 43:​10-12) Ndipo nase tikupindura para tikupatura nyengo yakusambira na kughanaghanirapo pa vinthu vyakunyang’amira vya mu Mazgu gha Chiuta. Tingaŵa na mtima wakukhora, kweniso kugomezga Yehova na mtima wose.—Sal. 112:7. w23.07 18 ¶15-16

Mu Baibolo muli viyelezgero viwemi vinandi vya ŵachinyamata ivyo mungatolerako. Ŵanyamata ŵakale aŵa ŵakamutemwanga chomene Chiuta ndipo ŵakafiska milimo yakupambanapambana kuti ŵapwelelere ŵanthu ŵa Chiuta. Mungasangaso viyelezgero viwemi pakati pa ŵabali ŵakukhwima mwauzimu mu mbumba yinu na mu mpingo. (Heb. 13:7) Ndipo muli na chakuwonerapo chakufikapo icho ni Yesu Khristu. (1 Pet. 2:21) Apo mukughanaghanirapo viyelezgero ivi, wonani mikhaliro yawo yiwemi iyo mungatolerako. (Heb. 12:​1, 2) Ndipo pamanyuma ghanaghanirani umo mungaŵayezgera ŵanalume aŵa. Munthu uyo wali na kaghanaghaniro kawemi wakughanaghanirapo dankha mwakupwelelera pambere wandachite chinthu. Ntheura fwiliranipo kuti muŵe na kaghanaghaniro kawemi. Chakwamba sambirani fundo za mu Baibolo na kughanaghanira umo zingamovwilirani. Kufuma apo londezgani fundo izo, kuti zimovwirani kusankha vinthu ivyo vingakondweska Yehova. (Sal. 119: 9.) Ivi vimovwiraninge kuti muŵe mubali wakukhwima mwauzimu.—Zinth. 2:​11, 12; Heb. 5:14. w23.12 24-25 ¶4-5

Ŵapapi ŵangasambizga makora ŵana ŵawo umo ŵangazgolera mwakuzika para ŵanji ŵakususka ivyo ŵakugomezga. (Yak. 3:13) Ŵapapi ŵanyake ŵakuyezgelera pa nyengo ya kusopa kwa mbumba. Ŵakudumbiskana nkhani izo ŵana ŵawo ŵangafumbika para ŵali ku sukulu, ndipo ŵakudumbiskana na kuyezgelera umo ŵangazgolera. Kweniso ŵakuŵasambizga ŵana ŵawo umo ŵangayowoyera mwakuzika, kweniso munthowa yakuti ŵanji ŵangakopeka na unenesko. Kuyezgelera kungawovwira ŵawukirano kuti ŵakhorwe kuti ŵasanga unenesko na kulongosolera ŵanyawo vifukwa vyakupulikikwa makora vyakukhwaskana na vigomezgo vyawo. Nkhani za pa chigaŵa chakuti “Ivyo Ŵachinyamata Ŵakufumba” izo zili pa jw.org zikusazgapo vyakulembapo panji kuti vyakuti ŵawukirano ŵachite. Vinthu ivi vili kupangika kuti viwovwire ŵawukirano kukhozga vigomezgo vyawo kweniso kuŵawovwira kunozgekera mazgoro kuti ŵakazgorenge mu mazgu ghawo na ghawo. Para tingasambira nkhani izi nga mbumba, tose tingasambira umo tingavikililira chipulikano chithu mwakuzika kweniso mu nthowa yakuti ŵanji ŵakopeke na unenesko. w23.09 17 ¶10; 18 ¶15-16

Kasi muli kujiŵikirapo chilato chauzimu kweni vikamusuzgani kuchifiska? Usange ni nthena, muli mwekha yayi. Mwachiyelezgero, Philip wakakhumbanga kuti walombenge malurombo ghakupulikikwa makora chomene kweniso kuti walombenge pafupipafupi, kweni vikamusuzganga kusanga nyengo yakulombera. Erika wakajiŵikira chilato chakuti wafikenge mwakutendekera ku maungano ghakunozgekera uteŵeti, kweni wakafikanga mwakuchedwa pafupifupi waka ungano uliwose. Usange pasono muli na chilato icho mundafiske, kugongowa yayi. Manyani kuti nanga chilato chingaŵa chipusu waka, kweni kuti muchifiske, kanandi pakukhumbikwira nyengo kweniso chitatata. Kweni pakuti muchali nawo mtima wakukhumba kufiska chilato chinu, ntchilongolero chakuti mukuzirwiska ubwezi winu na Yehova kweniso kuti mukukhumba kumupa viwemi chomene. Yehova wakuwonga chomene kuyezgayezga kwinu. Nakuti iyo wakukhazga kuti mumupenge vinandi kuluska ivyo mungakwaniska yayi. (Sal. 103:14; Mika 6:8) Ntheura jiŵikirani chilato icho mukuwona kuti mungafiska nadi. w23.05 26 ¶1-2

Nyengo zinyake ŵanthu awo mbachikanga ŵangachita wofi, kweni ŵakuzomerezga yayi kuti wofi uŵatondeske kuchita icho ntchakunyoloka. Daniyeli wakaŵa muwukirano wachikanga chomene. Iyo wakasambiranga ivyo ntchimi za Chiuta zikalemba, kusazgapo mauchimi gha Yeremiya. Chifukwa cha ivyo wakasambiranga, Daniyeli pamanyuma wakamanya kuti Ŵayuda ŵakaŵa pafupi kufwatulika nangauli ŵakaŵa kuti ŵakhala nyengo yitali ku Babuloni. (Dan. 9:2) Daniyeli wakawona kuti uchimi wa mu Baibolo ukafiskika, ndipo ivi vikwenera kuti vikamovwira kuti wagomezgenge chomene Yehova. Mazuŵa ghano napo, awo ŵakumugomezga chomene Chiuta nawo ŵangaŵa na chikanga chomene. (Yaniskani na Ŵaroma 8:​32, 37-39) Chakuzirwa chomene ntchakuti Daniyeli wakalombanga kwa Adada ŵake ŵakuchanya kanandi waka. (Dan. 6:10) Wakazomera zakwananga zake kwa Yehova na kumuphalira umo wakajipulikiranga. Kweniso Daniyeli wakalombanga wovwiri. (Dan. 9:​4, 5, 19) Daniyeli wakaŵa munthu nga ndise, ntheura chikanga wakachita kubabika nacho yayi. Kweni wakaŵa na chikanga chifukwa cha kusambira Mazgu gha Chiuta na kulomba, kweniso kugomezga chomene Yehova. w23.08 3 ¶4; 4 ¶7

Para tikupulikira ŵamazaza, tikupindura ndise pamoza na ŵanyithu. Kasi tikupindura wuli? Chimoza ntchakuti tikugega chilango icho tingapika chifukwa cha kuleka kupulikira dango. (Rom. 13:​1, 4) Para ise tikupulikira vingakhwaska umo ŵamazaza ŵangawoneranga Ŵakaboni ŵa Yehova. Mwachiyelezgero, vyaka vinandi ivyo vyajumpha, ku Nigeria ŵasilikari ŵakanjira mu Nyumba ya Ufumu panyengo ya maungano, ŵakapenjanga awo ŵakachitanga viwoneskero chifukwa cha kukana kupeleka msonkho. Kweni mulara wa ŵasilikari wakaphalira ŵasilikari kuti ŵafume, wakati: “Ŵakaboni ŵa Yehova nyengo zose ŵakupeleka msonkho.” Nyengo yiliyose para mwapulikira dango, mukuŵa kuti mwapeleka chithuzi chiwemi cha Ŵakaboni ndipo ivi nyengo yinyake vingazakavikilira mubali panji mudumbu munyinu. w23.10 9 ¶13

Ŵateŵeti ŵanyake ŵa Yehova ŵalindilira kwa nyengo yitali kuti charu ichi chimare. Mukawonero ka ise taŵanthu, layizgo la Chiuta ili lingawoneka nga likuchedwa kufiskika. Kweni Yehova wakumanya umo ŵateŵeti ŵake ŵakujipulikira. Nakuti wakasimikizgira ntchimi Habakuku kuti: “Mboniwoni iyi yikulindilira nyengo yake yakutemeka, ndipo yikuchimbilira kuumaliro wake, yitetenge chara. Nanga yingaziwulika, lindilira nipera! Pakuti yizamufiskika nadi. Yichedwenge chara!” (Hab. 2:3) Kasi apa Chiuta wakasimikizgiranga Habakuku kuti ndiyo pera wasangenge chandulo? Panji kasi mazgu agha nase ghangatovwira mazuŵa ghano? Yehova wakawovwira mpositole Paulosi kulemba mazgu ghakuyanako waka ku Ŵakhristu, awo ŵakulindilira mwakunweka charu chiphya. (Heb. 10:37) Ntheura tingaŵa na chigomezgo chose kuti nanga tingawona nga layizgo la Yehova lakuti watiponoskenge likuchedwa kufiskika, kweni ‘lifiskikenge nadi. Lichedwenge chara!’ w23.04 30 ¶16

Ŵaisrayeli ŵanandi ŵakakana ukaboni wakuwoneka na maso uwu, wakuti Yehova wakayowoyanga kwizira mwa Mozesi. (Maŵa. 14:​10, 11) Mwakuwerezgawerezga, ŵakakana fundo yakuti Yehova wakuŵalongozga kwizira mwa Mozesi. Pa chifukwa ichi, Yehova wakazomerezga yayi kuti muwiro uwu ukanjire mu Charu cha Layizgano. (Maŵa. 14:30.) Ndipouli, Ŵaisrayeli ŵanyake ŵakapulikira ulongozgi wa Yehova. Mwachiyelezgero, Yehova wakati: “Kalebi . . . wakanilondezga na mtima wose.” (Maŵa. 14:24) Chiuta wakamutumbika Kalebi, ndipo wakapika mwaŵi wakuti wasankhe malo agho wamukhala mu Charu cha Layizgano. (Josh. 14:​12-14) Ŵaisrayeli awo ŵakanjira mu Charu cha Layizgano, ŵakalongora chiyelezgero chiwemi pa nkhani ya kupulikira ulongozgi wa Yehova. Joshuwa wati wimikika kuŵa mulongozgi na kunjira m’malo mwa Mozesi, Ŵaisrayeli “ŵakamuchindikanga chomene mazuŵa ghose gha umoyo wake.” (Josh. 4:14) Paumaliro, Yehova wakaŵatumbika chomene na kuŵanjizga mu Charu cha Layizgano.—Josh. 21:​43, 44. w24.02 21 ¶6-7

Nga umo wakuchitira dokotala kuti wangamanya umo mtima withu ukugwilira ntchito para wangawona waka umo musipa wa pa woko lithu ukutimbira, nase tingamanyaso usange ubwezi withu na Chiuta ngwakukhora para tingasanda umo tikutemwera ŵanyithu. Usange tawona kuti chitemwa chithu ku Ŵakhristu ŵanyithu chamba kuchepa, vingalongoraso kuti chitemwa chithu kwa Chiuta chamba kuchepa. Kweni usange nyengo zose tikuŵatemwa Ŵakhristu ŵanyithu vikulongora kuti chitemwa chithu kwa Chiuta ntchakukhora. Usange chitemwa chithu ku ŵabali na ŵadumbu chamba kulopwa, ni suzgo likuru chomene. Chifukwa wuli? Chifukwa vingang’anamura kuti ubwezi withu na Yehova walopwa. Mpositole Yohane wakalongosora mwakupulikikwa makora fundo iyi apo wakati: “Uyo wakuleka kutemwa mubali wake uyo wakumuwona, wangamutemwa yayi Chiuta uyo wandamuwonepo.” (1 Yoh. 4:20) Kasi tikusambirapo vichi? Yehova wakukondwa nase pekha para ‘tikutemwana yumoza na munyake.’—1 Yoh. 4: 7-9, 11. w23.11 8 ¶3; 9 ¶5-6

Apo wakaŵa mwana, Themba Yehowashi wakasankha vinthu mwavinjeru. Pakuti wakaŵavye awiske, wakapulikira ulongozgi wa Wasembe Mukuru Yehoyada, uyo wakaŵa wakugomezgeka. Wasembe uyu wakamulera makora Yehowashi nga kuti ni mwana wake. Chifukwa cha chiyelezgero chiwemi cha Yehoyada, Yehowashi wakasankha kuteŵetera Yehova na kovwiraso ŵanthu kuteŵetera Yehova. Yehowashi wakanozgaso vyakuti tempile la Yehova linozgekeso. (2 Mid. 24:​1, 2, 4, 13, 14) Usange ŵapapi ŵinu panji munthu munyake wakumusambizgani kutemwa Yehova na kulondezga fundo zake, manyani kuti mwapika chinthu chakuzirwa chomene. (Zinth. 2:​1, 10-12) Ŵapapi ŵinu ŵangamusambizgani munthowa zakupambanapambana. Ndipo ŵakondwenge chomene para mupulikirenge ulongozgi uwo ŵakumupani kufuma mu Baibolo. Chakuzirwa chomene kuluska vyose ntchakuti mukondweskenge Chiuta na kuŵa nayo paubwezi wakukhora. (Zinth. 22:6; 23:​15, 24) Ivi ni vifukwa viwemi vyakuyezgera Yehowashi apo wakaŵa mwana. w23.09 8-9 ¶3-5

Yehova walayizga kuti wapulikenge malurombo ghithu. Chiuta withu wakutitemwa chifukwa chakuti tikumuteŵetera mwakugomezgeka, ntheura wazamulekapo yayi kupulika malurombo ghithu. (Sal. 10:17; 37:28) Kweni ichi chikung’anamura kuti watipenge chilichose icho tamulomba yayi. Vinyake tikwenera kulindilira waka, tizamupika mu charu chiphya. Yehova wakuwona dankha usange malurombo ghithu ghakukolerana na khumbo lake. (Yes. 55:​8, 9) Chimoza mwa khumbo la Chiuta ntchakuti charu chapasi chizure na ŵanthu ŵakukondwa awo mbakukolerana kweniso ŵakujilambika ku muwuso wake. Kweni Satana wakuti ŵanthu ŵangaŵa ŵakukondwa para ŵangajiwusanga ŵekha. (Gen. 3:​1-5) Kuti walongore kuti Satana ni mutesi, Yehova wazomerezga ŵanthu kuti ŵajiwusenge ŵekha. Kweni muwuso wa ŵanthu wiziska masuzgo ghanandi mazuŵa ghano. (Muph. 8:9) Tikumanya kuti pasono Yehova wangamazga yayi masuzgo ghose agho tikusangana nagho. w23.11 21 ¶4-5

Yehova wakalayizga kuti kwizira mwa Abrahamu “mitundu yinandi” yizamutumbikika. Ndipouli, apo Abrahamu wakaŵa na vyaka 100 kweniso Sara vyaka 90, ŵakaŵavya mwana. Mukawonera ka ise taŵanthu, vikaŵa vyambura machitiko kuti Abrahamu na Sara ŵaŵe na mwana. Apa Abrahamu wakayezgeka usange wali na chipulikano. ‘Kweni na chigomezgo wakaŵa na chipulikano, kuti waŵenge wiske wa mitundu yinandi.’ (Rom. 4:​18, 19) Ndipo pamanyuma, ivyo wakagomezganga vikafiskika. Wakaŵa wiske wa Yisake, mwana uyo wakamulindilira kwanyengo yitali. (Rom. 4:​20-22) Nase tingaŵa ŵakuzomerezgeka kwa Chiuta na kupimika ŵarunji kweniso kuŵa ŵabwezi ŵake nga umo wakaŵira Abrahamu. Nakuti fundo iyi ndiyo Paulosi wakadidimizga apo wakalemba kuti: “Mazgu ghakuti ‘wakamupima,’ ghakalembekera [Abrahamu] pera chara. Ghakalembekeraso ise tizamupimika ŵarunji, chifukwa tikugomezga Chiuta uyo wakawuska Yesu.” (Rom. 4:​23, 24) Nga ni Abrahamu nase tikwenera kuŵa na vyose, chipulikano, milimo, kweniso chigomezgo. w23.12 7 ¶16-17

Para mwasangana na suzgo ilo lamupangiskani kuti muŵe na wofi, kumbukani kuti Yehova wakuwona suzgo linu na kumanya umo mukujipulikira. Mwachiyelezgero, padera pakuwona umo Ŵaisrayeli ŵakatambuzgikiranga mu Eguputo, Yehova wakawonaso “vyakuŵinya vyawo.” (Eks. 3:7) Para mwasangana na masuzgo, nyengo zinyake mungawona yayi umo Yehova wakumovwilirani. Kasi mungachita wuli? Mulombani kuti wamovwirani kuwona umo wakumovwilirani. (2 Mathe. 6:​15-17) Kufuma apo ghanaghanirani mafumbo agha: Kasi mwakhozgekapo na nkhani panji mazgoro agho ŵabali na ŵadumbu ŵakupeleka pa maungano gha mpingo? Kasi mwakhozgekapo na fundo za mu buku lithu lakulongosora Baibolo, vidiyo, panji sumu za mu JW Broadcasting? Kasi munyake wali kumuphaliranipo mazgu ghakukhozga panji kumuŵelengeranipo lemba lakukhozga? Ntchipusu kuwona mwakupepuka chitemwa icho ŵabali na ŵadumbu ŵithu ŵakutilongora kweniso chakurya chauzimu icho tikupokera. Kweni ivi ni vyawanangwa vyakuzirwa chomene vyakufuma kwa Yehova. (Yes. 65:13; Mrk. 10:​29, 30) Vyawanangwa ivi vikulongora kuti Yehova wakumupwelelerani. (Yes. 49:​14-16) Kweniso vikutipa vifukwa vyakukwana vyakumugomezgera. w24.01 4-5 ¶9-10

Kukati kwakhala nyengo yichoko waka kuti wawelere kuchanya, Yesu wakakumbuska ŵasambiri ŵake vya mulimo uwo ŵakapika, wakuti ŵapharazge vya iyo “mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:8; Luka 24:​46-48) Nyengo yichoko waka yati yajumphapo, ŵalongozgi Ŵachiyuda ŵakakora mpositole Petrosi na Yohane na kwiza nawo panthazi pa Sanihedirini, ndipo ŵakati ŵanalume ŵakugomezgeka aŵa ŵaleke kupharazga kweniso ŵakaŵawofya. (Mil. 4:​18, 21) Kweni Petrosi na Yohane ŵakati: “Yeruzgani mwekha usange ntchakwenelera pamaso pa Chiuta kuti tipulikire imwe panji Chiuta. Kweni ise tingaleka yayi kuyowoya vinthu ivyo tili kuwona na kupulika.” (Mil. 4:​19, 20) Petrosi na Yohane ŵakati ŵafumiskika, ŵasambiri ŵakalomba kwa Yehova pa nkhani ya kuchita khumbo lake. Yehova wakazgora lurombo lwakufumira pasi pamtima ulu.—Mil. 4:31. w23.05 5 ¶11-12

Pambere Yesu wandize pa charu chapasi, wakaŵa kuti wakhala pamoza na Yehova kwa vyaka vinandi, ndipo vikapangiska kuti ŵatemwanenge chomene. Ubwezi wawo ngwakale chomene mu chilengiwa chose. Yehova wakayowoya mwakupulikikwa makora umo wakumutemwera Yesu nga umo tawonera mu lemba la muhanya uno. Yehova wakhumbenge mphanyi wakayowoya waka kuti ‘Uyu ndiyo nkhukondwa nayo.’ Ndipouli, wakakhumbanga kuti timanye umo wakumutemwera Yesu, ntheura wakamuchema kuti “Mwana wane wakutemweka.” Yehova wakanothanga nayo Mwana wake Yesu, chomenechomene chifukwa chakuti wakaŵa wakunozgeka kupeleka umoyo wake. (Efe. 1:7) Ndipo Yesu wakakayikanga yayi kuti Awiske ŵakumutemwa. Wakamanyanga kuti Adada ŵake ŵakumutemwa chomene. Kanandi waka wakayowoyanga na chigomezgo chose kuti Awiske ŵakumutemwa.—Yoh. 3:35; 10:17; 17:24. w24.01 28 ¶8

Tiyelezgere kuti munthu uyo mukumutemwa wamuyowoyerani chinthu chinyake chiheni chomene chakukhwaskana na imwe. Imwe mukumanya kuti ivyo wamuyowoyerani ni vyautesi, kweni ŵanyake ŵakugomezga kuti mbunenesko. Nakuti chiheni chomene ntchakuti nawo ŵakwambaso kuthandazga, ndipo ŵanthu ŵanandi ŵakugomezgaso. Kasi mungajipulika wuli? Kuyowoya unenesko vingamuŵinyani chomene. Chiyelezgero ichi chingatovwira kumanya umo Yehova wakajipulikira zina lake likati lanangika. Yumoza wa ŵana ŵake ŵauzimu wakayowoya utesi wakukhwaskana na iyo kwa mwanakazi wakwamba, Eva. Mwanakazi uyu wakagomezga utesi uwu. Ndipo paumaliro ŵapapi ŵithu ŵakwamba ŵakagalukira Yehova. Ntheura, ivi vili kunjizga kwananga na nyifwa pano pa charu chapasi. (Gen. 3:​1-6; Rom. 5:12) Masuzgo ghose agho tikuwona pa charu chapasi nga ni nyifwa, nkhondo, na matenda, viliko chifukwa cha mautesi agho Satana wakamba kuthandazga. Kasi Yehova vikumuŵinya chifukwa cha mautesi ghose agha kweniso masuzgo agho ghaŵapo chifukwa cha mautesi agha? Tikukayika yayi kuti vikumuŵinya chomene. Kweni Yehova ni mukali yayi panji kuti wakusunga vyakusingo. Nakuti wakulutilira kuŵa “Chiuta wakukondwa.”—1 Tim. 1:11. w24.02 8 ¶1-2

Kasi namwe mungamuyezga wuli Yosefe pa nkhani iyi? Mukwenera kusankhirathu sono ivyo muzamuchita para mwayezgeka. Sambirani kukana nyengo yeneyiyo vinthu ivyo Yehova wakutinkha na kuleka kuzomerezga kuti vikhazikike mu maghanoghano ghinu. (Sal. 97:10; 119:165) Kuchita nthena kuzamumovwirani kuti muleke kuchita kwananga para mwayezgeka. Panji mukumanya kuti muli kusanga unenesko, ndipo mukukhumba kuteŵetera Yehova na mtima wose, kweni pali chinyake icho chikumupangiskani kuti muziwulikenge kujipeleka kwa Yehova na kubatizika. Para ni nthena, yezgani Themba Davide. Mulombani Yehova kuti: “Nisandani, A Chiuta, na kumanya mtima wane. Nipimani, na kumanya vyenjezgo vya mu maghanoghano ghane. Wonani usange panji mungaŵa kendero kakupweteka mwa ine, ndipo nilongozgerani mu nthowa ya muyirayira.” (Sal. 139:​23, 24) Yehova wakutumbika awo “ŵakumupenja na mtima wose.” Para namwe mukuchitapo kanthu kuti mufiske chilato chinu cha kujipeleka na kubatizika, mukulongora kuti mukumupenja na mtima wose.—Heb. 11:6. w24.03 6 ¶13-15

Wasembe mukuru ndiyo wakimiranga ŵanthu panthazi pa Chiuta. Wasembe mukuru wakwamba wa Israyeli, wakimikika na Yehova apo ŵakapatuliranga chihema. Ndipouli, nga umo mpositole Paulosi wakalongosolera, “ŵanandi ŵakachitanga kuhalirana pa usembe chifukwa chakuti nyifwa yikaŵakanizganga kulutilira kuŵa ŵasembe.” (Heb. 7:​23-26) Ndipo chifukwa chakuti ŵasembe aŵa ŵakaŵa ŵambura kufikapo, nawo ŵakeneranga kupeleka sembe chifukwa cha zakwananga zawo. Iyi ndiyo ni mphambano yikuru pakati pa ŵasembe ŵakuru ŵa Israyeli na Wasembe Mukuru Chomene, Yesu Khristu. Pakuŵa Wasembe withu Mukuru, Yesu Khristu ni “muteŵeti . . . wa chihema chanadi, icho wakajintha ni Yehova, munthu chara.” (Heb. 8:​1, 2) Paulosi wakalongosora kuti chifukwa chakuti Yesu “wakukhalilira wamoyo muyirayira, usembe wake ulije ŵahaliri.” Paulosi wakatiso Yesu ‘ngwambura kufipirwa, ngwakupatulika ku ŵakwananga’ ndipo wakupambana na ŵasembe ŵakuru ŵa Israyeli, pakuti iyo “wakukhumbikwira kupeleka sembe zuŵa lililose yayi” chifukwa ngwambura kwananga. w23.10 26 ¶8-9

Mazgu ghakuti “kuchanya kwakale” ghakung’anamura maboma ghose gha ndyali agho ghakulongozgeka na Satana na viŵanda vyake. (Mat. 4:​8, 9; 1 Yoh. 5:19) Mu Baibolo mazgu ghakuti “charu” ghangang’anamuraso ŵanthu. (Gen. 11:1; Sal. 96:1) Lekani mazgu ghakuti “charu chakale,” ghakung’anamura ŵanthu ŵaheni ŵa mu charu ichi mazuŵa ghano. Vinthu viŵiri ivi “kuchanya” na “charu,” Yehova wazamuvinozga waka yayi, kweni wazamuviparanyirathu. Kufuma apo, wazamuŵikapo “machanya ghaphya na charu chapasi chiphya,” ilo ni boma liphya na ŵanthu ŵarunji. Yehova wazamunozga charu na kuchizga ŵanthu mwakuti ŵaŵe ŵakufikapo. Nga umo Yesaya wakayowoyerathu, charu chose chizamuŵa chakutowa nga umo ukaŵira munda wa Edeni. Wazamutizgoraso ŵaphya pakutichizgirathu ku matenda ghose. Ŵakupendera, ŵambura kuwona, na ŵakumangwa ŵazamuchizgika, kweniso ŵakufwa ŵazamuwuskika.—Yes. 25:8; 35:​1-7. w23.11 4 ¶9-10

“Suzgo yikuru” yizamwamba mwamabuchi. (Mat. 24:21) Kweni yizamuŵa yakupambanako na masoka ghanandi gha chilengiwa chifukwa chakuti tikumanya kuti yizenge nadi. Pafupifupi vyaka 2,000 ivyo vyajumpha, Yesu wakachenjezga ŵasambiri ŵake kuti ŵaŵe ŵakunozgeka vya zuŵa ili. Para tanozgekera, chizamuŵa chipusu kuzizipizga panyengo yakusuzga iyi na kovwira ŵanyithu nawo kuzakazizipizga. (Luka 21:36) Tizamukhumbikwira kuzizipizga kuti tilutilire kupulikira Yehova, na kugomezga kuti wativikilirenge. Kasi tizamuchita wuli para ŵabali ŵithu ŵataya katundu wawo yose? (Hab. 3:​17, 18) Tizamukhumbikwira kuŵa ŵachiwuravi, mwakuti tiŵawovwire pa vinthu ivyo ŵazamukhumbikwira. Kasi tizamuchita wuli usange tizamukhumbikwira kukhala pamoza na ŵabali na ŵadumbu kwakanyengo chifukwa cha kuwukilika na gulu la ŵamitundu? (Ezek. 38:​10-12) Tizamukhumbikwira kuŵa na chitemwa chanadi ku Ŵakhristu ŵanyithu kuti tizakajumphe panyengo yakusuzga iyi. w23.07 2 ¶2-3

Ŵakutorana ŵangasambirako kwa Prisika na Akwila, mbumba iyo Ŵakhristu ŵanandi ŵakwambilira ŵakayichindikanga chomene. (Rom. 16:​3, 4) Iwo ŵakagwiliranga ntchito lumoza, kupharazgira lumoza, kweniso kovwira ŵanji lumoza. (Mil. 18:​2, 3, 24-26) Nakuti palipose apo Baibolo likuyowoya vya Prisika na Akwila, likuzunura wose lumoza. Kasi mbumba zingasambirako vichi kwa iwo? Ghanaghanirani za ntchito izo imwe na munyinu mukukhumbikwira kugwira. Kasi vingachitika yayi kuti ntchito zinyake mugwilirenge lumoza, m’malo mwakuti waliyose wagwirenge waka payekhapayekha? Mwachiyelezgero, Prisika na Akwila ŵakapharazgiranga lumoza. Kasi namwe nyengo na nyengo ndimo mukuchitira? Akwila na Prisika ŵakagwilirangaso lumoza ntchito. Nangauli imwe na munyinu wa mu nthengwa mungaŵa kuti mukugwira ntchito zakupambana, kweni kasi mungagwilira lumoza yayi ntchito za panyumba? (Muph. 4:9) Para mukovwirana pakugwira ntchito, mukuŵa ŵakukolerana nga ni timu ya bola, kweniso mukuŵa na mipata yakuyowoya vyakusingo. w23.05 22-23 ¶10-12

Waliyose nyengo zinyake wakuŵa na wofi. Davide nayo nyengo zinyake wakawopanga. Mwachiyelezgero, apo Themba Sauli likakhumbanga kumukoma, Davide wakachimbilira ku Gati, msumba wa Ŵafilisiti. Akishi themba la Gati, mwaluŵiro wakamanya kuti Davide wakaŵa chinkhara pa nkhondo uyo ŵanthu ŵakamwimbira sumu apo wakakoma Ŵafilisiti “vikwi na vikwi.” Davide ‘wakawopa chomene.’ (1 Sam. 21:​10-12) Wakawopanga ivyo Akishi wamuchitirenge. Kasi ntchivichi chikamovwira Davide kuti waleke kopa? Mu Salimo 56, Davide wakayowoya umo wakajipulikiranga apo wakaŵa ku Gati. Salimo ili likulongora umo Davide wakawopera, kweniso icho chikamovwira kuti waleke kopa. Davide para wamba kopa, wakagomezganga Yehova. (Sal. 56:​1-3, 11.) Wakaŵa na vifukwa vyakupulikikwa vyakugomezgera Yehova. Na wovwiri wa Yehova, Davide wakachita vinthu vyachilendo chomene: Wakapusikizgira kuti ngwakufuntha! Ndipo pulani iyi yikakora nadi. Sono Akishi wakamuwonanga Davide kuti ni munthu wakufuntha, mulwani yayi. Ntheura Davide wakapona.—1 Sam. 21:13–22:1. w24.01 2 ¶1-3

Kasi mbanjani awo ŵakuyowoyeka mu lemba la mwahuno? Mbakuphakazgika awo ŵali kuwuskikira kuchanya. Ntheura para ŵakuphakazgika ŵaumaliro ŵaluta kuchanya para suzgo yikuru yili kuumaliro, mulimo wawo wakwamba nkhurwa nkhondo. Para ŵawuskikira kuchanya, ŵamurwa nkhondo pamoza na Khristu na ŵangelo ŵake pa kuparanya ŵalwani ŵa Chiuta. Ghanaghanirani fundo iyi. Pa charu chapasi, Ŵakhristu ŵanyake ŵakuphakazgika mbachekuru kweniso ŵalije nkhongono. Kweni para ŵawuskikira waka kuchanya ŵazamuŵa ŵankhongono kweniso ŵazamuŵa na umoyo wambura kufwa. Ndipo ŵazamurwa nkhondo pamoza na Yesu Khristu Themba lawo Lankhongono. Para nkhondo ya Aramagedoni yajumpha, ŵazamovwirana na Yesu pakovwira ŵanthu kuti ŵaŵe ŵakufikapo. Tikukayika yayi kuti para ŵazakaluta kuchanya, ŵazamovwira chomene ŵabali na ŵadumbu ŵawo ŵakutemweka awo ŵali pa charu chapasi kuluska umo ŵakachitiranga apo ŵakaŵa ŵambura kufikapo. w24.02 6-7 ¶15-16

Ŵanyake ŵakuziwulika kujipeleka kwa Yehova na kubatizika nangauli mbakunozgeka. Nyengo zinyake ŵakopa kuti para ŵazakabatizika, ŵangazakachita kwananga kukuru na kusezgeka. Para namwe mukopa, manyani kuti Yehova wamupaninge chilichose icho mukukhumbikwira “kuti mwendenge mwakwenelera [iyo] na kumukondweska pa chilichose.” (Kol. 1:10) Wamupaningiso nkhongono kuti muchite icho ntchiwemi. Iyo wawovwirapo kale ŵanandi kuchita icho ntchiwemi ndipo namwe wamovwiraninge. (1 Kor. 10:13) Lekani mbanthu ŵachoko chomene awo ŵakusezgeka mu mpingo Wachikhristu. Yehova wakovwira ŵanthu ŵake kulutilira kugomezgeka. Pakuŵa ŵanthu ŵambura kufikapo, waliyose wakuyezgeka kuti wachite chiheni. (Yak. 1:14) Ndipouli, mukwenera kusankha icho muchitenge para mwayezgeka. Fundo njakuti imwe ndimwe muli na mazaza gha kusankha umo muchitirenge na umoyo winu. Nangauli ŵanthu ŵanyake ŵakuwona kuti ŵangakwaniska yayi kukanizga makhumbiro ghaheni, kweni uwu mbutesi. Mungasambira kukanizga makhumbiro ghaheni. w24.03 5 ¶11-12