Ogasiti

Wonani fundo ziŵiri zakuzirwa mu salimo ili: (1) Ŵanthu ŵakugomezgeka ŵakusangana na masuzgo. (2) Yehova wakutiponoska ku masuzgo ghithu. Kasi Yehova wakutiponoska wuli? Nthowa yimoza iyo wakutiponoskera, nkhutovwira kuwona mwakwenelera umoyo wa mu charu ichi. Nangauli Yehova wakulayizga kuti tiŵenge ŵakukondwa para tikumuteŵetera, kweni ivi vikung’anamura kuti tilekenge kusangana na masuzgo yayi pasono. (Yes. 66:14) Iyo wakutichiska kuti tiŵike mtima pa vinthu viwemi ivyo vikwiza munthazi, apo tizamuŵa na umoyo wamuyirayira. (2 Kor. 4:​16-18) Kweni panyengo yasono wakutovwira waka kuti tilutilire kumuteŵetera zuŵa lililose. (Chit. 3:​22-24) Kasi tingasambirako vichi ku ŵateŵeti ŵa Yehova ŵakugomezgeka, ŵa mu nyengo yakale kweniso ŵa mazuŵa ghano? Nyengo zinyake tingasangana na masuzgo agho takhazganga yayi. Kweni para tikuthemba Yehova, watovwirenge nyengo zose.—Sal. 55:22. w23.04 14-15 ¶3-4

Pa nkhani iyi tingasambirako kwa Yosefe na Mariya, awo ŵakaŵa ŵakunozgeka kupulikira ŵamazaza nanga ni apo chikaŵa chakusuzga kuchita nthena. (Luka 2:​1-6) Apo Mariya wakaŵa na nthumbo ya myezi 9, iyo na Yosefe ŵakakhumbikwiranga ŵapulikire dango linyake nangauli likaŵa lakusuzga. Augusto, uyo wakawusanga ufumu wa Romu wakalangura kuti ŵanthu ŵalembeske mu kaundura. Yosefe na Mariya ŵakeneranga kuluta ku Betelehemu, mtunda wa makilomita 150 wakwenda mu mapiri. Ulendo uwu ukaŵa wakusuzga, chomenechomene kwa Mariya. Mbumba iyi yikwenera kuti yikafipiranga mtima Mariya kweniso mwana uyo wakaŵa kuti wandababike. Wuli usange nthumbo yiwukenge uku ŵachali munthowa? Iyo wakaŵa kuti wababenge mwana uyo wazamuŵa Mesiya munthazi. Kweni kasi ichi chikaŵa chifukwa chakuti ŵalekere kupulikira boma? Yosefe na Mariya ŵakazomerezga yayi kuti ivyo ŵakafipanga navyo mtima viŵatondeske kupulikira dango. Yehova wakaŵatumbika chifukwa cha kupulikira. Mariya wakafika makora ku Betelehemu, wakababa mwana wankhongono, kweniso chifukwa cha kupulikira kwawo vikawovwira kuti uchimi ufiskike.—Mika 5:2. w23.10 8 ¶9; 9 ¶11-12

Kasi mungachita wuli usange mukuchita wofi kuzgorapo pa maungano? Nyengo zinyake kunozgekera makora kungamovwirani chomene. (Zinth. 21:5) Para mwayimanya makora nkhani iyo tisambirenge, muchitenge wofi yayi kuzgorapo. Kweniso muzgorenge mwakudumura. (Zinth. 15:23; 17:27) Para muzgorenge mwakudumura muchitenge wofi yayi. Para muzgorenge mwakudumura kweniso mu mazgu ghinu na ghinu, mulongorenge kuti mwanozgekera makora kweniso kuti nkhani iyo mwayipulikiska makora. Wuli usange mwayezga kulondezga masachizgo agha kweni muchali kuchita wofi kuti muzgorengepo pa maungano kujumpha pa kamoza? Manyani kuti Yehova wakuwonga chomene kuyezgayezga uko mukuchita kuti muzgorengepo. (Luka 21:​1-4) Yehova wakutipempha kuchita vinthu ivyo tingatondeka kufiska yayi. (Fil. 4:5) Manyani ivyo mungafiska, na kujiŵikira chilato kuti mufiske, kweniso lombani Yehova kuti wamupani chikanga. Pakwamba, mungajiŵikira chilato cha kuzgorapo zgoro limoza lifupi. w23.04 21 ¶6-8

Mpositole Paulosi wakutiyaniska na msilikari uyo wali maso kweniso wavwara kunozgekera nkhondo. Msilikari uyo wachali pa ntchito wakwenera kuŵa wakunozgeka nyengo zose kurwa nkhondo. Ndimoso viliri na ise. Tikulutilira kuŵa ŵakunozgeka vya zuŵa la Yehova, para tikuvwalirathu chakujivikilira pa chifuŵa cha chipulikano na chitemwa, kweniso chisoti cha chigomezgo. Chakuvwara chakuvikilira pa chifuŵa chikuvikilira mtima wa msilikari. Chipulikano na chitemwa vikuvikilira mtima withu wakuyelezgera. Vikutovwira kuti tilutilire kuteŵetera Chiuta na kulondezga Yesu. Chipulikano chikutovwira kuti tileke kukayika kuti Yehova wazamutipa njombe chifukwa cha kumupenja na mtima wose. (Heb. 11:6) Chikutovwiraso kuti tilutilire kugomezgeka kwa Mulongozgi withu, Yesu, nanga vingaŵa kuti tasangana na masuzgo ghakuru. Tingakhozga chipulikano chithu mwakuti tiŵe ŵakunozgeka kuzizipizga masuzgo, para tikusambirako ku Ŵakhristu ŵa mazuŵa ghano awo ŵakulutilira kuŵa ŵakugomezgeka nangauli ŵakutambuzgika panji ŵakusangana na masuzgo gha vyachuma. Kweniso tingagega chipingo cha kutemwa chomene ndalama na vinthu vyakuthupi, para tingasambirako ku Ŵakhristu awo ŵakukhala umoyo wambura kukhumba vinandi mwakuti ŵaŵike vya Ufumu pakwamba. w23.06 10 ¶8-9.

Kujikora ni para munthu wakulongozga makora maghanoghano ghake, kweniso vyakuchita vyake. Kujikora nkhwakukhumbikwa chomene para tikukhumba kufiska chilato chithu, chomenechomene para chilato icho tikukhumba kufiska ntchinonono. Kumbukani kuti kujikora ntchimoza mwa vipambi vya mzimu, ntheura lombani Yehova kuti wamupani mzimu wake kuti umovwirani kuti muŵe na mukhaliro uwu. (Luka 11:13; Gal. 5:​22, 23) Lekani kulindilira kuti vinthu viŵe dankha makora. Mu charu ichi, vingachitika yayi kuti vinthu viŵirethu makora. Para tilindilirenge kuti vinthu viŵe dankha makora, tifiskenge yayi chilato chithu. Nyengo zinyake tingagongowa chifukwa chakuti chilato icho tajiŵikira chikuwoneka chakusuzga kuti tichifiske. Usange ndimo viliri kwa imwe, mungachita makora kuchigaŵa kuti mufiskengeko pachokopachoko. Mwachiyelezgero, usange chilato chinu ntchakuti muŵe na mukhaliro unyake, mungamba kuwulongora mwapachokopachoko. Usange chilato chinu ntchakuti muŵazge Baibolo lose, mungamba kuŵazga dankha kwa nyengo yichoko waka. w23.05 29 ¶11-13

Mu mazuŵa ghose ghaumaliro agha, Yehova wagwiliskira ntchito gulu lake kupeleka chakurya chinandi chauzimu kuti chiwovwire tose ise kulutilira kwenda pa “Nthowa Yakupatulika.” (Yes. 35:8; 48:17; 60:17) Tingayowoya kuti para munthu wazomera sambiro la Baibolo, wakuŵa na mwaŵi wakwenda pa “Nthowa Yakupatulika.” Ŵanyake ŵakwendapo mtunda uchoko waka na kuleka kwenda pa msewu uwu. Kweni ŵanji ŵaŵikapo mtima kwenda pa nthowa iyi mwakuti ŵakafike uko ŵakuluta. Kasi ŵakuluta nkhu? Kwa awo ŵali na chigomezgo cha kuchanya, “Nthowa Yakupatulika” iyi yikuŵalongozgera ku “paradiso wa Chiuta” kuchanya. (Chivu. 2:7) Awo ŵali na chigomezgo cha kuzakakhala pa charu chapasi, nthowa iyi yikuŵalongozgera ku umaliro wa muwuso wa vyaka 1,000 vya Khristu apo waliyose wazamuŵa kuti ngwakufikapo. Usange mukwenda pa msewu uwu, kulaŵiska kumanyuma yayi. Kweniso kuwuleka yayi m’paka mumalizge ulendo winu wakuluta mu charu chiphya. w23.05 17 ¶15; 19 ¶16-18

Para mukughanaghanirapo pa viwemi vyose ivyo Yehova wamuchitirani, muŵenge ŵakukhumbisiska kujipeleka kwa iyo. (Sal. 116:​12-14.) Baibolo likuti “chawanangwa chilichose chiwemi na chawanangwa chilichose chakufikapo” chikufuma kwa Yehova. (Yak. 1:17) Kweni chawanangwa chapadera chomene pa vyose, ni sembe yakuwombora ya Mwana wake, Yesu. Ghanaghanirani kuzirwa kwa sembe iyi. Yatipa mwaŵi wakuŵa paubwezi wakukhora na Yehova kweniso kuti tizakasange umoyo wamuyirayira. (1 Yoh. 4:​9, 10) Kujipeleka kwa Yehova ni nthowa yiwemi chomene iyo mungalongolera kuti mukuwonga chitemwa chikuru chomene icho Yehova wali kumulongorani, kusazgapo na vyawanangwa vyose ivyo wamupani.—Doto. 16:17; 2 Kor. 5:15. w24.03 5 ¶8

Apo nkharo za ŵanthu zafika sono mu charu ichi, nase tikujipulika nga umo wakajipulikiranga munthu murunji Loti. Iyo “wakakweŵekanga chomene na nkharo ya ukwakwa ya ŵanthu ŵakwananga,” chifukwa wakamanyanga kuti Adada ŵithu ŵakuchanya ŵakutinkha nkharo ziheni. (2 Pet. 2:​7, 8) Chifukwa chakuti Loti wakawopanga chomene Yehova kweniso kumutemwa, wakakana kutolerako nkharo za ŵanthu ŵa uko wakakhalanga. Nase mazuŵa ghano tikukhala pakati pa ŵanthu awo ŵakuchindika viŵi yayi fundo za Yehova, ndipo ŵanyake ŵakuzichindika na pachoko wuwo yayi. Nangauli vili nthena, ise tingalutilira kuŵa ŵatuŵa chikuru tikulutilira kukhozga chitemwa chithu pa Chiuta kweniso kumopa. (Zinth. 14:2) Kuti tifiske kuchita nthena, mwachitemwa Yehova wakutikhozga kweniso kutichiska kwizira mu buku la Zintharika. Ŵakhristu wose, ŵanalume na ŵanakazi, ŵana na ŵalara wuwo, ŵangasanga chandulo na ulongozgi wa vinjeru uwo ukusangika mu buku ili. Para tikopa Yehova tikuŵa maso kuti tileke kuchezga na ŵanthu ŵa nkharo ziheni. w23.06 20 ¶1-2; 21 ¶5

Vingachitika kuti mukususkika na ŵamumbumba yinu, panyake muli kujinora vinthu vinyake na chilato chakuti mudangizge vinthu vya Ufumu pa umoyo winu. (Mat. 6:33) Usange ni nthena, manyani kuti Yehova wakumanya vyose ivyo mukuchita kuti mumuteŵetere. (Heb. 6:10) Ndipo panji namwe mwajiwonera mwekha kuti mazgu gha Yesu agha ngaunenesko, agho ghakuti: “Palije uyo wasida nyumba panji ŵakuru panji ŵanung’una panji ŵadumbu panji nyina panji wiske panji ŵana panji minda chifukwa cha ine na chifukwa cha makani ghawemi uyo walekenge kusanga vyakusazgikira 100 mu nyengo yino, nyumba, ŵakuru panji ŵanung’una, ŵadumbu, anyina, ŵana, na minda, pamoza na nthambuzgo, ndipo mu nyengo iyo yikwiza umoyo wamuyirayira.” (Mrk. 10:​29, 30) Nakuti vitumbiko ivyo mwasanga ni vinandi chomene kujumpha vinthu vyose ivyo muli kujinora.—Sal. 37:4. w24.03 9 ¶5

Ŵakhristu mu Yudeya ŵakati ŵasangana na njara yikuru, ŵabali na ŵadumbu ŵa mpingo wa mu Antiyoke ŵakachitapo kanthu kuti ŵaŵawovwire Ŵakhristu ŵanyawo. “Ŵakadumura kuti ŵatumizgenge wovwiri ku ŵabali awo ŵakakhalanga mu Yudeya. Waliyose wakapeleka kuyana na umo wakafiskira.” (Mil. 11:​27-30) Nangauli ŵabali awo ŵakakhwaskika na njara iyi ŵakakhalanga kutali, kweni Ŵakhristu ŵa ku Antiyoke ŵakaŵikapo mtima kovwirapo. (1 Yoh. 3:​17, 18) Nase mazuŵa ghano tingalongora chiwuravi ku Ŵakhristu ŵanyithu para tamanya kuti ŵasangana na soka la chilengiwa. Tikwenera kuŵa ŵakunozgeka kovwirapo, nyengo zinyake tingafumba ŵalara usange tingakawovwirapo uko kwachitika soka la chilengiwa, tingapeleka vyawanangwa vyakovwira pa ntchito ya pa charu chose, panji tingaŵalombera awo ŵakhwaskika na soka la chilengiwa. Ŵabali na ŵadumbu ŵithu ŵangakhumbikwira wovwiri kuti ŵasange vyakukhumbikwira vya zuŵa na zuŵa. Ipo para Fumu yithu, Khristu Yesu, yikwiza kuzakeruzga charu ichi, mphanyi yazakatisanga kuti tikulongora chiwuravi na kutichema kuti ‘tizakahare Ufumu.’—Mat. 25:​34-40. w23.07 4 ¶9-10; 6 ¶12

Yesu wakayezganga Yehova pakuchita vinthu na ŵanthu mwamahara. Iyo wakatumika pa charu chapasi kuzakapharazga ku “mberere zakuzgeŵa za nyumba ya Israyeli.” Ndipouli iyo wakachitanga vinthu mwamahara apo wakachitanga uteŵeti wake. Mwachiyelezgero, mwanakazi munyake uyo wakaŵa Muisrayeli yayi wakamupempha kuti wamuchizgire mwana wake msungwana uyo ‘wakasuzgikanga uheni chomene na chiŵanda.’ Yesu wakamulongora chiwuravi mwanakazi uyu, ndipo wakamuchizgira mwana wake. (Mat. 15:​21-28) Wonaniso chiyelezgero chinyake. Kukwambilira kwa uteŵeti wake, Yesu wakayowoya kuti: “Waliyose uyo wakunikana . . . , nane nizamumukana.” (Mat. 10:33) Kweni iyo wakamukana yayi Petrosi, nangauli Petrosi wakamukana katatu. Yesu wakamanya kuti Petrosi wapera, kweniso kuti wakaŵa munthu wachipulikano. Yesu wati wawuskika, wakawonekera kwa Petrosi ndipo tikukayika yayi kuti wakamusimikizgira kuti wamugowokera kweniso kuti wakumutemwa. (Luka 24:​33, 34) Yehova Chiuta na Yesu Khristu ŵakuchita vinthu mwamahara. Ise ke? Yehova wakukhazga kuti tichitenge vinthu mwamahara. w23.07 21 ¶6-7

Kasi tingaŵasimikizgira wuli awo ŵakukayikira layizgo la Chiuta la Paradiso kuti lizamufiskika nadi? Chakwamba, Yehova iyomwenecho ndiyo wakulayizga. Buku la Chivumbuzi likuti: “Uyo wakakhala pa chitengo wakati: ‘Wonani! Nkhupanga vinthu vyose kuŵa viphya.’” Iyo wali na vinjeru, nkhongono, na khumbo kuti wafiske layizgo ili. Chachiŵiri, layizgo lake ili lizamufiskika nadi kwambura kutondeka, ndipo kwa iyo vili nga lili kufiskika kale. Lekani iyo wakati: “Chifukwa mazgu agha ngakugomezgeka na ghaunenesko. . . . Ghafiskika!” Chachitatu, para Yehova wamba kuchita chinthu chinyake, wakuwoneseska kuti m’paka wafiske, lekani iyo wakuti: “Ndine Alefa na Omega.” (Chivu. 21:6) Yehova wazamulongora nadi kuti Satana ni mutesi kweniso ngwakutondeka. Para munthu wazakayowoya kuti “Ivi vingachitika yayi,” mungazakamuŵazgira lemba la Chivumbuzi 21: 5, 6 na kumulongosolera. Mulongorani umo Yehova wakulongolera kuti layizgo ili lizamufiskika nadi mwakuchita kusayina nga kuti ndiyo walembapo siginecha.—Yes. 65:16. w23.11 7 ¶18-19

Yehova wakalayizga Abrahamu layizgo ili apo wakaŵa na vyaka 75 ndipo wakaŵa kuti walije mwana. Kasi Abrahamu wakawona kuti layizgo ili likufiskika? Wakawona lose yayi. Wati wambuka Mlonga wa Yufurate na kulindilira vyaka 25, Abrahamu wakawona mwana wake Yisake wakubabika, ndipo pamanyuma pa vyaka 60, wakawonaso ŵazukuru ŵake Esau na Yakhobe ŵakubabika. (Heb. 6:15) Kweni Abrahamu wakawona yayi kuti ŵana ŵake ŵakuzgoka mtundu ukuru na kuhara Charu cha Layizgano. Ndipouli, mwanalume wakugomezgeka uyu wakaŵa paubwezi wakukhora na Mlengi wake. (Yak. 2:23) Ndipo para Abrahamu wazakawuskika, wazamukondwa chomene kumanya kuti chipulikano chake na kuzizipizga kwake vikawovwira kuti mitundu yose pa charu chapasi yitumbikike. (Gen. 22:18) Kasi sambiro ndakuti wuli apa? Nyengo zinyake tingawona yayi malayizgo ghose gha Yehova kuti ghakufiskika. Ndipouli, para tikuzikira nga Abrahamu, tingaŵa na chigomezgo chose kuti Yehova watitumbikenge sono kweniso wazamutitumbika chomene munthazi mu charu chiphya icho walayizga.—Mrk. 10:​29, 30. w23.08 24 ¶14

Apo wakaŵa mwana, Themba Uziya wakaŵa wakujiyuyura. Wakasambira “kopa Chiuta waunenesko.” Wakakhala vyaka 68 ndipo pafupifupi umoyo wake wose, Yehova wakamutumbika. (2 Mid. 26:​1-4.) Uziya wakathereska mitundu yinandi iyo yikaŵa yilwani yake ndipo wakawoneseska kuti Yerusalemu ngwakuvikilirika. (2 Mid. 26:​6-15) Uziya wakaŵa wakukondwa zanadi chifukwa chakuti Chiuta wakamovwira pa vyose ivyo wakachita. (Muph. 3:​12, 13) Themba Uziya likazgoŵera kuti ilo ndilo liphalirenge ŵanji vyakuchita. Panji ivi ndivyo vikapangiska kuti wambe kuwona kuti wangachita chilichose icho wakukhumba. Zuŵa linyake Uziya wakanjira mu tempile la Yehova ndipo mwakujikuzga wakawotcha vyakununkhira pa jotchero. Kweni themba likazomerezgekanga yayi kuchita nthena. (2 Mid. 26:​16-18) Wasembe Mukuru Azariya wakayezga kumukanizga, kweni Uziya wakakwiya chomene. Chachitima ntchakuti Uziya wakatondeka kulutilira kugomezgeka ndipo Yehova wakamulanga na nthenda ya vyoni. (2 Mid. 26:​19-21) Walutilirenge kuŵa wakujiyuyura, wakatenge waŵenge na umoyo uwemi chomene. w23.09 10 ¶9-10

Nanga mphamanyuma pakuti waŵa Mkhristu wakuphakazgika, mpositole Petrosi wakakhumbikwiranga kulutilira kulimbana na suzgo lake. Mu 3 6 C.E., Chiuta wakatuma Petrosi kwa Koroneliyo uyo wakaŵa Muyuda yayi. Chiuta wakamuphakazga Koroneliyo na mzimu utuŵa, ndipo uwu ukaŵa ukaboni wakuti “Chiuta wakutemwera yayi” kweniso kuti ŵamitundu nawo ŵangaŵa mu mpingo Wachikhristu. (Mil. 10:​34, 44, 45) Kufuma apo Petrosi wakamba kurya na ŵamitundu, chinthu icho wakaŵa kuti wangachita yayi. Ndipouli, Ŵakhristu ŵanyake Ŵachiyuda ŵakawonanga kuti Ŵayuda na ŵamitundu ŵangalyera pamoza yayi. Apo Ŵayuda ŵanyake awo ŵakaŵa na maghanoghano agha ŵakiza ku Antiyoke, Petrosi wakaleka kurya na ŵabali awo ŵakaŵa ŵamitundu, panji chifukwa chakuti wakawopanga kukhuŵazga Ŵakhristu Ŵachiyuda. Mpositole Paulosi wakawona upusikizgi wake ndipo wakamuchenya Petrosi pawumba. (Gal. 2:​13, 14) Nangauli wakabudiska vinthu ivi, kweni Petrosi wakawelera nyuma yayi. w23.09 22 ¶8

Para mungajisanda mwaunenesko mungamanya apo mukwenera kusintha, kweni kugongowa yayi. “Fumu njalusungu,” ndipo yimovwiraninge kunozga apo mukukhumbikwira kuti muchite makora. (1 Pet. 2:3) Mpositole Petrosi wakutisimikizgira kuti: “Chiuta . . . wazamumalizga kumusambizgani. Wazamumukhozgani.” Panyengo yinyake, Petrosi wakajiwonanga kuti ngwambura kwenelera kuŵa pamoza na Yesu. (Luka 5:8) Kweni chifukwa cha wovwiri wachitemwa wa Yehova na Yesu, Petrosi wakalondezga Yesu mwakugomezgeka. Ntheura Yehova wakazomerezga Petrosi kunjira “mu Ufumu wamuyirayira wa Fumu yithu na Mponoski Yesu Khristu.” (2 Pet. 1:11) Iyi yikaŵa njombe yiwemi chomene. Para namwe muwelerenge nyuma yayi nga umo wakachitira Petrosi, na kuzomerezga Yehova kuti wamusambizgani, muzamupokera njombe ya umoyo wamuyirayira. ‘Muzamupokera chiponosko chinu, iyo ni njombe ya chipulikano chinu.’—1 Pet. 1:9. w23.09 30 ¶14; 31 ¶16-17

Chihema chikaŵa na luŵaza lumoza likuru ilo likaŵa na mpanda, ndipo ndimo ŵasembe ŵakachitiranga milimo yawo. Jotchero likuru lamkuŵa lakotcherapo sembe likaŵa mu luŵaza, pamoza na chiŵiya chamkuŵa cha maji agho ŵasembe ŵakagezanga pambere ŵandambe kuchita milimo yawo yakupatulika. (Eks. 30:​17-20; 40:​6-8) Mazuŵa ghano, Ŵakhristu ŵakuphakazgika ŵakuteŵetera mwakugomezgeka pa charu chapasi mu luŵaza lwamukati lwa tempile lauzimu. Chiŵiya panji kuti beseni likuru la maji ntchikumbusko chiwemi chomene kwa iwo, nga umo viliri na Ŵakhristu wose, kuti ŵakwenera kulutilira kuŵa ŵakutowa mwakuthupi na mwauzimu wuwo. Kweni kasi ‘ŵamzinda ukuru’ ŵakumusopera nkhu Yehova? Mpositole Yohane wakawona kuti ‘ŵimilira panthazi pa chitengo,’ apo tingati ni luŵaza lwakuwaro pa charu chapasi, uko “ŵakumuchitira [Chiuta] uteŵeti wakupatulika muhanya na usiku mu tempile lake.” (Chivu. 7:​9, 13-15) Tikuwonga chomene mwaŵi wapadera uwu wakusopa Yehova mu tempile lake likuru lauzimu. w23.10 28 ¶15-16

Nthowa yinyake iyo Yehova wakutipira nkhongono nkhwizira mu ŵalara. (Yes. 32:​1, 2) Ntheura para mukufipa mtima na vinthu vinyake, phalirani ŵalara. Ndipo para ŵamupani wovwiri, zomerani mwaluŵiro. Yehova wangagwiliskira ntchito ŵalara kuti wamovwirani kuŵa ŵankhongono. Ivyo Baibolo likulayizga vya kuzakakhala na umoyo kwamuyirayira kwali nkhuchanya panji mu paradiso pa charu chapasi vingatipa nkhongono. (Rom. 4:​3, 18, 19) Chigomezgo chithu chikutipa nkhongono kuti tizizipizge viyezgo, tipharazgenge makani ghawemi, kweniso kuchita milimo yakupambanapambana mu mpingo. (1 Tes. 1:3) Chigomezgo chakuyana waka ichi ndicho chikakhozgaso mpositole Paulosi. Iyo ‘wakafyenyekanga,’ ‘wakahangayikanga,’ “kutambuzgika,” na “kuponyeka pasi.” Umoyo wake ukaŵa pangozi. (2 Kor. 4:​8-10) Paulosi wakasanga nkhongono zakuzizipizgira chifukwa cha kuŵika mtima pa chigomezgo icho wakaŵa nacho. (2 Kor. 4:​16-18) Paulosi wakaŵika mtima pa chigomezgo chake cha munthazi cha umoyo wamuyirayira kuchanya. Paulosi wakaghanaghanirangapo pa chigomezgo ichi, ndipo ivi vikapangiska kuti wunthu wake wamukati ‘uzgokenge uphya zuŵa na zuŵa.’ w23.10 15-16 ¶14-17

Para mukulomba ghanaghanirani usange ni nyengo yakwenelera kwa Yehova yakuti wazgore lurombo lwinu. Nyengo zinyake tingawona kuti tikukhumbikwira kuti Yehova wazgore mwaluŵiro malurombo ghithu. Ndipouli, Yehova ndiyo wakumanya makora nyengo yakwenelera yakutovwilira. (Heb. 4:16) Para tikupika nyengo yeneyiyo yayi ivyo talomba, tingamba kughanaghana kuti zgoro la Yehova ndakuti ‘Yayi.’ Kweni wangaŵa kuti wachali wandazgore. Mwachiyelezgero, muwukirano wangalomba kuti wachire ku nthena yake. Kweni mbwe wakuchira yayi. Usange Yehova wangamuchizga mwamunthondwe, Satana wangayowoya kuti muwukirano uyu wakulutilira kuteŵetera Yehova chifukwa chakuti wamuchizga. (Yobu 1:​9-11; 2:4) Kweniso Yehova wali kutema kale nyengo iyo wazamuwuskirapo matenda ghose. (Yes. 33:24; Chivu. 21:​3, 4) M’paka kufika panyengo iyi, tileke kukhazga kuti Yehova watichizgenge mwamunthondwe. Ntheura mubali uyu wakwenera kulomba Yehova kuti wamupe nkhongono na mtende wa mumtima kuti wazizipizge ulwari wake na kulutilira kuteŵetera Chiuta mwakugomezgeka. w23.11 24 ¶13

Nangauli Samusoni wakabudiska chomene, kweni wakawelera nyuma yayi. Wakapenjerezga m’pata kuti wafiske mulimo wake uwo Chiuta wakamupa wakuthereska Ŵafilisiti. (Ŵeru. 16:​28-30) Samusoni wakaŵeyelera Yehova kuti: “Lekani niwezgere nduzga Ŵafilisiti.” Chiuta waunenesko wakazgora lurombo lwa Samusoni ndipo wakamupaso nkhongono zinandi. Ntheura Samusoni wakakoma Ŵafilisiti ŵanandi pa zuŵa ili kuluska kumasinda kose. Nangauli Samusoni wakasangana na masuzgo ghakuru chifukwa cha ivyo wakabudiska, kweni wakaleka yayi kuchita khumbo la Yehova. Nase para tabudiska vinthu vinyake ndipo tachenyeka panji taleka kuchita uteŵeti unyake, tingaweleranga nyuma yayi. Tikumbuke kuti Yehova ngwakunozgeka kutigowokera. (Sal. 103:​8, 9) Nangauli tingabudiska vinthu vinyake, Yehova wangatipa nkhongono zake kuti tichite khumbo lake, nga umo wakachitira kwa Samusoni. w23.09 6 ¶15-16

Para mwazizipizga mukuŵa ŵakuzomerezgeka na Yehova. Kweni ichi chikung’anamura kuti Yehova wakukondwa para mukusangana na viyezgo panji masuzgo yayi. M’malo mwake wakukondwa na imwe chifukwa chakuti mwazizipizga mwakugomezgeka. Ntheura ntchakukhozga chomene kumanya kuti para tikuzizipizga tikukondweska Yehova. (Sal. 5:12) Kumbukani kuti Abrahamu wakazizipizga viyezgo ndipo Chiuta wakakondwa nayo. Yehova wakamuwonanga kuŵa mubwezi wake kweniso kuti ni munthu wakunyoloka. (Gen. 15:6; Rom. 4:​13, 22) Ndimo vingaŵiraso kwa ise. Kuti Chiuta watitemwe vikuthemba pa unandi wa ivyo tachita mu gulu lake yayi panji mauteŵeti agho tingaŵa nawo. Iyo wakukondwa nase para tikuzizipizga mwakugomezgeka. Ndipo tose tingazizipizga, kwali tili ŵamsinkhu wuli, kwali vinthu vili wuli kwa ise, panji tili na maluso wuli. Kasi pasono mukuzizipizga suzgo yinyake? Usange ni nthena, manyani kuti mukumukondweska Yehova. Para tamanya kuti Chiuta wakukondwa nase, chigomezgo chithu chakuti wazamutitumbika chikuŵa chanadi. w23.12 11 ¶13-14

Mwanalume Wachikhristu wakwenera kusambira kuyowoyeskana makora na ŵanthu. Mwanalume uyo wakumanya kuyowoya makora na ŵanji wakutegherezga kweniso kupulikiska umo ŵanji ŵakujipulikira. (Zinth. 20:5) Wangamanya maghanoghano gha munthu pakuwona waka umo munthu uyo wakuyowoyera kweniso chisko chake. Vyose ivi mungavimanya yayi para mukuleka kuchezga na ŵanthu. Usange kanandi pakuyowoyeskana na ŵanthu mukutemwa kulemba waka meseji, imelu, na nthowa zinyake, mbwenu vimuŵiraninge vyakusuzga kumanya umo mungayowoyeskerana na ŵanthu maso na maso. Ntheura, sangani mipata iyo mungayowoyeskerana na ŵanji maso na maso. (2 Yoh. 12) Mwanalume Wachikhristu wakwenera kusambira umo wangajiwovwilira iyo na ŵamumbumba yake. (1 Tim. 5:8) Ntchakuzirwa chomene kusambira luso lunyake ulo lungamovwirani kusanga ntchito. (Mil. 18:​2, 3; 20:34; Efe. 4:28) Mulimbikirenge ntchito na kuwoneseska kuti mukumalizga mulimo uwo mwamba. Ŵanyake ŵawonenge ndipo muŵenge na lumbiri luwemi pa nkhani iyi. Para muchitenge nthena, chiŵenge chipusu kusanga ntchito na kuyisungilira. w23.12 27 ¶12-13

Baibolo para likuyowoya vya “zuŵa la Yehova,” likuyowoya vya nyengo iyo Yehova wakweruzgira ŵalwani ŵake na kuponoska ŵanthu ŵake. Kale, nyengo zinyake Yehova wakalanganga mitundu yinyake. (Yes. 13:​1, 6; Ezek. 13:5; Zef. 1:8) Mu nyengo yithu yino, “zuŵa la Yehova” lizamwambira apo ŵandyali ŵazamuwukira visopa vyose vyautesi na kumalira pa Aramagedoni. Kuti tizakapone pa “zuŵa ili,” tikwenera kunozgekerathu sono. Yesu wakasambizga kuti tikwenera kunozgekera suzgo yikuru pera yayi, kweni tikweneraso ‘kunozgekera’ zuŵa la Yehova. (Mat. 24:21; Luka 12:40) Mu kalata iyo wakalembera Ŵatesalonika mwakovwirika na mzimu, mpositole Paulosi wakagwiliskira ntchito viyelezgero vinandi kuti wawovwire Ŵakhristu kunozgekera zuŵa likuru la cheruzgo la Yehova. Paulosi wakamanyanga kuti zuŵa la Yehova lizenge nyengo yeneyira yayi. (2 Tes. 2:​1-3) Ndipouli, wakachiska ŵabali ŵake nga kuti zuŵa ilo lizenge waka namachero ghake, ndipo nase ulongozgi wake ungatovwira. w23.06 8 ¶1-2

Mu 1978 mu msumba wa Tokyo, ku Japan, mukazengeka nyumba yitali chomene. Ŵanthu ŵakazizwanga chomene na nyumba iyi kuti yikulutilira kutchintha ku vindindindi vikuruvikuru ivyo vikachitikanga mu msumba uwu. Kasi chisisi chikagona mpha kuti nyumba iyi yilutilire kutchintha? Ŵakuzenga ŵakagwiliskira ntchito vinthu vyakukhora kweniso vyakuti vingathifuka waka na kuweleraso pa malo ghake, mwakuti vikawovwira kuti nyumba iyi yitchinthenge ku vindindindi. Ŵakhristu ŵali nga nyumba iyi. Munthowa wuli? Mkhristu wakwenera kuŵa wakukhora, kweni panyengo yimozaso wakwenera kuŵa wakuthifuka panji kuti wambura kukhwimiska vinthu. Wakwenera kuŵa wakukhora na wambura kusunkhunyika pa nkhani ya kulondezga malango na fundo za Yehova. Wakwenera kuŵa wakupulikira luŵiro kweniso wambura kulekelera vinthu. Kweni panyengo yimozamozaso, wakwenera kuŵa ‘wakupulikiska,’ panji wambura kukhwimiska vinthu usange ntchakwenelera kuchita nthena. (Yak. 3:17) Mkhristu uyo wakuchita mwakwenelera pa nkhani iyi wagegenge kuŵa wakukhwimiska vinthu panji kulekelera vinthu. w23.07 14 ¶1-2

Yesu wakatonda viyezgo vyakufuma kwa Satana Dyabulosi, kusazgapo chiyezgo chakuti waleke kugomezgeka kwa Chiuta. (Mat. 4:​1-11) Satana wakaŵikapo mtima chomene kuti Yesu wanangire Chiuta mwakuti watondeke kupeleka sembe yakuwombora. Apo wakachitanga uteŵeti wake pa charu chapasi, Yesu wakazizipizgaso viyezgo vinyake. Wakatambuzgikanga kweniso ŵalwani ŵake ŵakakhumbanga kumukoma. (Luka 4:​28, 29; 13:31) Wakeneranga kuzizipizga ivyo ŵasambiri ŵake ŵakabudiskanga. (Mrk. 9:​33, 34) Apo wakeruzgikanga, ŵakamutambuzganga na kumunena. Pamanyuma wakafwa nyifwa yakuŵinya chomene kweniso yakukhozga soni. (Heb. 12:​1-3) Kuumaliro kwa umoyo wake, wakeneranga kuzizipizga yekha chifukwa Yehova wakamuvikilira yayi. (Mat. 27:46) Apa ntchakuwonekerathu kuti Yesu wakasuzgika chomene kuti wapeleke umoyo wake kuŵa sembe yakuwombora. Para tikughanaghanira ivyo Yesu wakachita pakupeleka umoyo wake chifukwa cha ise, vikutipangiska kuti timutemwenge chomene. w24.01 10-11 ¶7-9

Kuzikira kukutovwiraso pakuchita vinthu na ŵanji. Kukutovwira kuti titegherezgenge mwakupwelelera para ŵanji ŵakuyowoya. (Yak. 1:19) Kuzikira kukutovwiraso kuti tiŵe pa mtende na ŵanji. Kukutovwiraso kuti tileke kuchitapo kanthu mwaluŵiro panji kuyowoya mazgu ghakulasa para tikusuzgika maghanoghano. Ndipo usange tili ŵakuzikira, tikwiyenge luŵiro yayi para ŵanji ŵatikhuŵazga. M’malo mwa kuwezgera, ‘tilutilirenge kuzizipizgirana na kugowokerana na mtima wose.’ (Kol. 3:​12, 13) Kuzikira kungatovwiraso kusankha makora vinthu. M’malo mwakuchimbilira pakuchita vinthu panji kuchita kwambura kughanaghanirapo dankha, tifufuzenge dankha na kusanda masachizgo agho tili nagho. Mwachiyelezgero, usange tikupenja ntchito, nyengo zinyake tingazomera waka ntchito yakwamba iyo yasangika. Kweni para tili ŵakuzikira, tighanaghanirengepo dankha umo ntchito iyo yikhwaskirenge mbumba yithu na umoyo withu wauzimu. Para ndise ŵakuzikira, tigegenge kusankha uheni. w23.08 22 ¶8-9

Usange mukugongowa chifukwa chakuti mukulimbana na makhumbiro ghaheni, kughanaghanirapo layizgo ilo mukalayizga Yehova apo mukajipelekanga kwa iyo, kungamovwirani kulimbana na makhumbiro ghaheni. Mwawuli? Para mwajipeleka kwa Yehova, ndikuti mwajipata. Ichi chikung’anamura kuti mwakana kuchita chilichose icho chikuleka kukondweska Yehova. (Mat. 16:24) Ntheura para mwayezgeka panji kukumana na suzgo lililose, musoŵenge chakuchita yayi. Vili nthena, chifukwa muŵenge kuti muli kusankha kale ivyo vingamovwirani kuti mulutilire kugomezgeka kwa Yehova. Nyengo zose muŵikengepo mtima kukondweska Yehova. Ndipo namwe muŵenge nga ni Yobu. Nangauli wakakumana na masuzgo ghakuru chomene, kweni iyo wakayowoya mwakusimikizga kuti: “Nitayengepo chara kunyoloka kwane.”—Yobu 27:5. w24.03 9 ¶6-7

Yehova, “Chiuta wa chitemwa,” wali nase. (2 Kor. 13:11) Iyo wakutemwa waliyose payekha. Ndise ŵakukhorwa kuti ‘tazingilizgika na chitemwa chakugomezgeka’ cha Yehova. (Sal. 32:10) Para tikughanaghanirapo chomene pa umo Yehova walongolera chitemwa chake kwa ise, timanyengeso umo wakutipwelelera kweniso ubwezi uwo tili nawo na iyo. Tingamulomba mwakufwatuka na kumuphalira umo chitemwa chake chiliri chakukhumbikwa kwa ise. Tingamuphalira ivyo tikwenjerwa navyo, chifukwa tikumanya kuti wakutipulikiska kweniso ngwakukhumbisiska kutovwira. (Sal. 145:19) Nga umo vikuŵira kuti para kwazizima tikusendelera kufupi na moto, mwakuyana waka tikusendelera kwa Yehova chifukwa ngwachitemwa. Nangauli chitemwa cha Yehova ntchankhongono, kweni ntchalusungu. Ntheura mukondwenge chifukwa Yehova wakumutemwani. Mphanyi tose talongora kuti tikutemwa Yehova mwakuyowoya kuti: “Nkhutemwa Yehova.”—Sal. 116:1. w24.01 31 ¶19-20

Yesu wakachita vinandi padera pakuphalira waka ŵanthu kuti Chiuta zina lake ni Yehova. Ŵayuda awo Yesu wakaŵasambizganga ŵakamanyanga kale zina la Chiuta. Kweni Yesu wakaŵa panthazi ‘kumulongosora’ makora Yehova. (Yoh. 1:​17, 18) Mwachiyelezgero, Malemba Ghachihebere ghakuvumbura kuti Yehova ngwalusungu kweniso wachiwuravi. (Eks. 34:​5-7) Yesu wakalongosora makora mikhaliro iyi kuluska waliyose, apo wakayowoya ntharika ya mwana wakuzgeŵa na dada wake. Tikuwona makora kuti Yehova ngwalusungu chomene kweniso ngwachiwuravi, para tikuŵazga vyakukhwaskana na dada wa mu ntharika iyi. Wati wawona mwana wake uyo wapera wakwiza patali, wakamuchimbilira, wakamuvumbatira, na kumugowokera na mtima wose. (Luka 15:​11-32) Yesu wakaŵalongosora Awiske umo ŵaliri nadi. w24.02 10 ¶8-9

Yehova wakusamphuska panji kuti kusanguluska wose awo ŵasweka mtima. Kasi tingamuyezga wuli Yehova pa nkhani ya kulengera ŵanji lusungu kweniso kuŵasanguluska? Nthowa yimoza iyo tingachitira ivi, nkhuŵa na mikhaliro iyo yingatovwira kuti tilengerenge ŵanji lusungu na kuŵasanguluska. Kasi yinyake mwa mikhaliro iyi ni njini? Kasi ntchivichi chingatovwira kuti tilutilire kutemwana na ‘kusanguluskana’ zuŵa lililose? (1 Tes. 4:18) Tikwenera kulengera ŵanyithu chitima, kutemwa ŵabali kweniso kuŵa ŵalusungu. (Kol. 3:12; 1 Pet. 3:8) Kasi mikhaliro iyi yingatovwira wuli? Usange tikuŵalengera lusungu ŵabali withu kweniso kuŵaghanaghanira tizamuŵa na mtima wakukhumbisiska kuŵawovwira usange ŵakusuzgika. Yesu wakayowoya kuti “mulomo ukuyowoya ivyo vili kuzura mu mtima. Munthu muwemi kufuma pa usambazi wake uwemi, wakufumiska vinthu viwemi.” (Mat. 12:​34, 35) Ntheura kusanguluska ŵabali na ŵadumbu ŵithu ni nthowa yimoza yakuzirwa chomene iyo tikulongolera kuti tikuŵatemwa nadi. w23.11 10 ¶10-11

Tikwenera kupempha wovwiri para tikukhumba kuti tipulikiske uchimi unyake wa mu Baibolo. Wonani chiyelezgero ichi. Tiyelezgere kuti mukuluta ku malo ghanyake ghachilendo, kweni mubwezi winu uyo muli nayo paulendo uwu wakumanyako makora ku malo agho. Wakumanyapo apo mukwenda sono kweniso uko msewu uliwose ukuluta. Tikukayika yayi kuti mungakondwa chomene kuti mubwezi winu wakazomera kuti mulute lumoza. Mwakuyana waka, Yehova wakumanya makora apo sono tili mu nyengo zaumaliro izi ndipo wakumanyaso ivyo vikwiza kunthazi apo tikwenda pa nthowa yakuya ku umoyo. Ntheura kuti tipulikiske uchimi wa mu Baibolo, tikwenera kujiyuyura waka na kulomba kuti Yehova watovwire. (Dan. 2:28; 2 Pet. 1:​19, 20) Nga ni mupapi waliyose muwemi, Yehova wakukhumba ŵana ŵake ŵaŵe na munthazi muwemi. (Yer. 29:11) Kweni mwakupambana na mupapi waliyose uyo ngwambura kufikapo, Yehova wangatiphalira ivyo vichitikenge munthazi, ndipo nyengo zose wakuneneska. Ndipo wakazomerezga kuti mauchimi ghalembeke mu Mazgu ghake mwakuti timanyirethu vyakuchitika vyakuzirwa pambere vindachitike.—Yes. 46:10. w23.08 8 ¶3-4