Seputembala

Chiuta wali kumupa Yesu nkhongono zakumazgira masuzgo ghose gha ŵanthu. Apo Yesu wakachitanga minthondwe, wakalongora kuti wangawuskapo masuzgo ghose agho ise patekha tingaghawuskapo yayi. Mwachiyelezgero, wali na nkhongono zakutifwatura ku kwananga uko tili kuhara kweniso ku masuzgo ghose agho ghali kwiza chifukwa cha kwananga nga ni ulwari na nyifwa. (Mat. 9:​1-6; Rom. 5:​12, 18, 19) Minthondwe yake yili kulongora kuti wangachizga ulwari wa “mtundu uliwose” kweniso kuwuska ŵakufwa. (Mat. 4:23; Yoh. 11:​43, 44) Kweniso wali na nkhongono zakulekeskera vimphepo vikuru ndiposo kuŵafwatura ŵanthu ku mizimu yiheni. (Mrk. 4:​37-39; Luka 8:2) Ntheura ntchakukhozga chomene kumanya kuti Yehova wali kupeleka nkhongono zanthena ku Mwana wake! Tingaŵa na chigomezgo chose kuti vinthu viwemi ivyo Ufumu wa Chiuta wizenge navyo vizamufiskika nadi. Minthondwe iyo Yesu wakachita apo wakaŵa pa charu chapasi, yikutisambizga kuti wazamuchita vinandi chomene pa charu chose chifukwa iyo ni Themba la Ufumu wa Chiuta. w23.04 3 ¶5-7

Usange mu mpingo winu muli ŵapharazgi ŵanandi, ndipo para mwawuska woko kanandi ŵakumuwuskani yayi panji mungamba kughanaghana kuti ntchiwemi kuleka waka kuzgorapo. Kweni mungalekanga yayi kuzgorapo. Munozgekerenge mazgoro ghanandi pa maungano ghalighose. Ivi viwovwirenge kuti para ŵandamuwuskani kukwambilira, muŵeso na mwaŵi wakuzgorapo apo maungano ghakulutilira. Para mukunozgekera Gongwe la Mulinda, ghanaghanirani umo ndime yiliyose yikukolelerana na mutu wa nkhani. Para muchitenge nthena, musangenge mazgoro ghawemi, ndipo pafupifupi pa ndime yiliyose muŵenge na chakuzgorapo. Chinyake icho mungachita ndicho kunozgekera makora ndime izo zikulongosora visambizgo vyakunyang’amira ivyo ni vyakusuzga kuvilongosora. Chifukwa wuli? Chifukwa panji mbachoko awo ŵangakazgorapo pa ndime zanthena. Kweni kasi mungachita wuli usange mwayezgayezga kweni vichali kusuzga kusanga mwaŵi wakuzgorapo, ndipo pa maungano ghanandi agho ghajumpha mwaŵavya mwaŵi wakuzgorapo? Muphalirani uyo wakuchitiska Gongwe la Mulinda pambere maungano ghandambe na kumuphalilirathu fumbo ilo mukukhumba kuzakazgorapo. w23.04 21-22 ¶9-10

Yosefe wakapulikiranga luŵiro ulongozgi wa Yehova, ndipo ivi vikapangiska kuti waŵe mfumu muwemi chomene. Mwachiyelezgero, maulendo pafupifupi ghatatu ghose, wakapokera ulongozgi kwa Chiuta wakukhwaskana na mbumba yake. Ndipo pa maulendo ghose agha, Yosefe wakapulikiranga mwaluŵiro nangauli chikaŵanga chakusuzga. (Mat. 1:20; 2:​13-15, 19-21) Chifukwa cha kupulikira ulongozgi wa Chiuta, Yosefe wakamuvikilira Mariya na kumupwelelera. Ghanaghanirani umo vyakuchita vya Yosefe vikwenera kuti vikamuchiskira Mariya kuti wamutemwenge kweniso kumuchindika chomene. Ŵafumu, mungamuyezga Yosefe para mukupenjerezga ulongozgi wa mu Baibolo pa nkhani ya kupwelelera mbumba yinu. Para mukulondezga ulongozgi uwu, nanga vingaŵa kuti mukukhumbikwira kusintha vinthu vinyake, mukulongora kuti mukumutemwa muwoli winu kweniso mukukhozga nthengwa yinu. Mudumbu munyake wa ku Vanuatu, uyo wakhala mu nthengwa vyaka vyakujumpha 20 wakayowoya kuti: “Para mfumu wane wakupenja ulongozgi wa Yehova na kuwulondezga, nkhumuchindika chomene. Nkhujiwona wakuvikilirika kweniso ivyo wakusankha nkhuvigomezga chomene.” w23.05 21 ¶5

Ŵayuda awo ŵakawelera ku Israyeli ŵakaŵa “ŵanthu ŵatuŵa” kwa Chiuta wawo. (Doto. 7:6) Nangauli vili nthena, ŵanthu aŵa ŵakakhumbikwiranga nipera kusinthaso vinthu vinyake kuti ŵakondweske Yehova. Ŵayuda ŵanandi ŵakababikira ku Babuloni, ndipo ŵakwenera kuti ŵakatolerako umo Ŵababuloni ŵakachitiranga vinthu, kwali mpha nkhani ya kaghanaghaniro kawo panji mikhaliro yawo. Vyaka vinandi vyati vyajumphapo pamanyuma pakuti Ŵayuda ŵakwamba ŵawelera ku Israyeli, Kazembe Nehemiya wakazizwa chomene wati wasanga kuti ŵana awo ŵakababikira mu Israyeli ŵakachimanyanga yayi chiyowoyero cha Ŵayuda. (Doto. 6:​6, 7; Neh. 13:​23, 24) Kasi ŵawukirano aŵa ŵakatenge ŵasambirenge wuli kumutemwa Yehova na kumusopa usange ŵakuchimanya yayi Chihebere, chiyowoyero chikuru icho Mazgu gha Chiuta ghakalembekeramo? (Ezir. 10:​3, 44) Ntheura Ŵayuda aŵa ŵakakhumbikwiranga kusintha vinthu vinandi chomene, kweni chikaŵako chipusu kusintha para ŵangaŵa ku Israyeli, uko kusopa kutuŵa kukawezgekerangapo pachoko na pachoko.—Neh. 8:​8, 9. w23.05 15 ¶6-7

Nanga tingakhuka wuli, panji kuyezgayezga kuŵa ŵakujikora, kweni m’paka paŵenge vinyake vyakutimbanizga. Mwachiyelezgero, “vinthu vyamabuchi” vingatiwira ivyo vingatimalira nyengo iyo mphanyi tagwilirangapo ntchito pa chilato chithu. (Muph. 9:11) Nyengo zinyake tingasangana na suzgo iyo yingatigulura nkhongono panji kutigongoweska. (Zinth. 24:10) Pakuti ndise ŵanthu ŵambura kufikapo, nyengo zinyake tingabudiska vinthu vinyake ivyo vingapangiska kuti chiŵe chakusuzga kufiska chilato chithu. (Rom. 7:23) Panji tingajipulika ŵakuvuka. (Mat. 26:43) Kasi tingachita wuli para vinthu vili nthena? Kumbukani kuti para vinthu vinyake vyapangiska kuti muleke kufiska chilato chinu, chikung’anamura kuti mwatondeka yayi. Baibolo likuyowoya kuti nyengo zinyake tingasangana na masuzgo mwakuwerezgawerezga. Kweni likuyowoyaso mwakupulikikwa makora kuti tingawukaso. Nadi, para mukulutilira kuŵikapo mtima kuti mufiske chilato chinu nanga mungasangana na masuzgo, mukulongora Yehova kuti mukukhumba kumukondweska. Yehova wakukondwa chomene para wakuwona kuti mukuyezgayezga kufiska chilato chinu. w23.05 30 ¶14-15

Upayiniya ukovwira munyamata kusambira umo wangachitira makora vinthu na ŵanthu ŵakupambanapambana. Ukovwiraso umo wangapangira makora bajeti na kuyilondezga. (Fil. 4:​11-13) Nthowa yiwemi iyo munthu wangachita kuti wambe uteŵeti wanyengozose, nkhuchitako upayiniya wakanyengo, ivi vikovwira kuti wambe upayiniya wanyengozose. Upayiniya ungajura mulyango wa mauteŵeti ghanyake ghanyengozose, nga uteŵeti wa pa Beteli panji kovwirapo pa mulimo wakuzenga. Ŵabali wose ŵakwenera kuŵa na chilato cha kuteŵetera ŵabali na ŵadumbu mu mpingo pakuŵa ŵalara. Baibolo likuyowoya kuti ŵanalume awo ŵakunwekera mulimo uwu ‘ŵakukhumba mulimo uwemi.’ (1 Tim. 3:1) Chakwamba, mubali wakwenera kuŵa dankha muteŵeti wakovwira. Ŵateŵeti ŵakovwira, ŵakovwira ŵalara munthowa zinandi. Ŵalara na ŵateŵeti ŵakovwira ŵakuteŵetera ŵabali na ŵadumbu mwakujiyuyura kweniso ŵakuchitako mulimo wakupharazga mwamwamphu. w23.12 28 ¶14-16

Themba Yosiya wakaŵa muwukirano apo wakambanga kupenja Yehova. Wakakhumbanga kumanya vyakukhwaskana na Yehova na khumbo lake. Ndipouli, umoyo ukaŵa wakusuzga chomene kwa themba lachinyamata ili. Panyengo iyi, ŵanthu ŵanandi ŵakasopanga ŵangoza, ntheura Yosiya wakakhumbikwiranga chikanga kuti walekeske ŵanthu kuchita nthena. Nakuti wakalongora nadi chikanga. Pambere Yosiya wandafike vyaka 20, wakamba kuwuskapo kusopa kwautesi. (2 Mid. 34:​1, 2) Nanga mungaŵa mwana chomene, mungamuyezga Yosiya pakupenja Yehova na kusambira vyakukhwaskana na mikhaliro yake. Kuchita nthena kumovwiraninge kuti mujipeleke kwa iyo. Kasi ivi vikhwaskenge wuli umoyo winu? Luke uyo wakabatizika wali na vyaka 14 wakayowoya mazgu agha pa zuŵa ilo wakajipelekera kwa Yehova, wakati: “Kwamba waka sono, niŵikenge pakwamba kusopa Yehova pa umoyo wane na kuyezgayezga kumukondweska.” (Mrk. 12:30) Namwe mutumbikikenge chomene para muchitenge nthena. w23.09 11 ¶12-13

Apo mpositole Paulosi wakalembanga kalata iyi, mpingo wa Tesalonika ukaŵa kuti na chaka undakwaniske. Ŵanalume awo ŵakalongozganga ŵakwenera kuti ŵakamanyanga vinandi yayi kweniso panji ŵakabudiskanga vinthu vinyake. Kweni nawo ŵakeneranga kupika ntchindi. Apo suzgo yikuru yikusendelera, tizamukhumbikwira chomene kulondezga ulongozgi wa ŵalara ŵa mu mpingo withu kuluska umo tikuchitira sono. Pa nyengo iyo, panji chizamuŵa chakusuzga kupokera ulongozgi kufuma ku likuru lithu panji ku ofesi ya munthavi; ntheura ntchakuzirwa chomene kusambilirathu sono kutemwa na kuchindika ŵalara. Mulimose umo vingaŵira, tiyeni tilutilire kusungilira maghanoghano ghithu, mwa kuleka kuŵika mtima pa ivyo ŵakubudiska. Kweni tiŵike mtima pa fundo yakuti Yehova kwizira mwa Khristu wakulongozga ŵanalume ŵakugomezgeka aŵa. Nga umo chisoti chikuvikililira mutu wa msilikari, chigomezgo chithu nacho chikuvikilira maghanoghano ghithu. Tikumanya kuti vinthu ivyo charu chikupeleka ni vyawakawaka. (Fil. 3:8) Chigomezgo chithu chikutovwira kuti mitima yithu yiŵenge mu malo kweniso kuti tileke kusunkhunyika. w23.06 11-12 ¶11-12

Awo ŵachemeka na “mwanakazi uyo ntchindere” ŵakwenera kusankha ŵekha kuzomera kuluta panji yayi. Pali vifukwa vinandi vyakupulikikwa ivyo tikwenera kugegera uzaghali. Buku la Zintharika likumulongosora “mwanakazi uyo ntchindere” kuti wakuyowoya mazgu ghakuti: “Maji ghakwiba ghakunowa.” (Zinth. 9:17) Kasi “maji ghakwiba” ni vichi? Baibolo likuyaniska kugonana pakati pa mfumu na muwoli, na maji ghakusamphuska. (Zinth. 5:​15-18) Mfumu na muwoli awo ŵali kutorana mwakuyana na dango, ndiwo ŵali na wanangwa wa kugonana. Kasi vikupambana wuli na “maji ghakwiba”? Maji agha ghangimira kugonana kwambura kuzomerezgeka. Kugonana uku kanandi kukuchitika mwakubisilizga nga umo munkhungu wakuchitira para wakwiba vinthu vyaŵene. “Maji ghakwiba” ghangawoneka ghakunowa para awo ŵakuchita vinthu ivi ŵakughanaghana kuti palije uyo wamanyenge. Kweni apa ŵakujipusika waka ŵekha chifukwa Yehova wakuwona vyose. Kutaya ubwezi withu na Yehova, ntchinthu chakuŵinya chomene icho chingatichitikira pa umoyo withu. Ntheura vinthu ivyo vingapangiska kuti Yehova waleke kutitemwa ni ‘vyakunozga’ yayi. 1 Kor. 6:​9, 10. w23.06 22 ¶7-9

Wuli usange mukuwona kuti mukulomba mwa dango waka panji mukukondwa nayo yayi ntchito ya kupharazga? Lekani kughanaghana kuti Yehova waleka kumovwirani na mzimu wake. Ndimwe munthu wambura kufikapo, ndipo kaghanaghaniro kinu kangasintha nyengo na nyengo. Usange mwamphu winu wamba kuchepa, ghanaghanirani chiyelezgero cha mpositole Paulosi. Nangauli wakafwilirapo kumuyezga Yesu, kweni wakamanyanga kuti nyengo zinyake waŵavyenge khumbo likuru lakuchitira chinthu chinyake. Paulosi wakaŵikapo mtima kufiska uteŵeti wake, nangauli nyengo zinyake wakaŵavyanga khumbo lakuchita nthena. Mwakuyana waka, lekani kusankha waka vinthu kuyana na umo mukujipulikira. Ŵikanipo mtima kuchita icho ntchiwemi nanga vingaŵa kuti mukukhumba yayi kuchita chinthu icho. Para nyengo yajumphapo, kaghanaghaniro kinu nako kasinthenge usange mukulutilira kuyezgayezga kuchita icho ntchiwemi.—1 Kor. 9:16. w24.03 11-12 ¶12-13

Tingalongora chitemwa ku ŵabali na ŵadumbu ŵithu para tikuŵa nawo paubwezi na kuchezga nawo. (2 Kor. 6:​11-13) Taŵanandi ŵa ise tili mu mipingo iyo muli ŵabali na ŵadumbu ŵakufuma mu vigaŵa vyakupambanapambana kweniso ŵali na mikhaliro yakupambanapambana. Tingalutilira kuŵalongora chitemwa para tikuŵika mtima pa mikhaliro yawo yiwemi. Para tikuwona ŵanyithu nga umo Yehova wakuŵawonera, tikulongora kuti tikuŵatemwa. Chitemwa chizamukhumbikwira chomene pa suzgo yikuru. Para suzgo yikuru yazakayamba, ni nkhu uko tingazakasanga chivikiliro? Wonani ivyo Yehova wakaphalira ŵanthu ŵake kuchita apo Babuloni wakawukirika. Wakaŵaphalira kuti: “Lutani ŵanthu ŵane, njirani mu vipinda vinu vyamukati, ndipo jalani vijaro pamanyuma pinu. Bisamani kwa kanyengo kachoko, m’paka ukali ujumphe.” (Yes. 26:20) Nyengo zinyake mazgu agha ghangazakagwiraso ntchito kwa ise apo tizamukumana na suzgo yikuru. w23.07 6-7 ¶14-16

Muŵe na lumbiri luwemi pakuŵa ŵamahara. Jifumbani kuti: ‘Kasi ŵanthu ŵakuniwona kuti nkhuchita vinthu mwamahara? Panji kasi ŵakuniwona kuti ndine munthu uyo wakukhwimiska vinthu? Kasi nkhutegherezga na kulondezga maghanoghano gha ŵanji para ntchakwenelera kuchita nthena?’ Ntheura para nyengo zose tikuchita vinthu mwamahara ndipo tingayezgaso chomene Yehova na Yesu. Kuŵa ŵamahara kukusazgapo kuŵa ŵakunozgeka kusintha para vinthu vyasintha pa umoyo withu. Para vinthu vyasintha tingasangana na masuzgo agho takhazganga yayi. Mwachiyelezgero, mwamabuchi tingalwara chomene, panji uko tikukhala chuma chinganjira pasi, kweniso pangaŵa masuzgo gha vya ndyali ndipo vingakhwaska chomene umoyo withu. (Muph. 9:11) Kweniso tingayezgeka para uteŵeti withu wasintha. Tingakwaniska kuzgoŵera umoyo withu wasono para tingalondezga vinthu vinayi ivi: (1) kuzomerezga para vinthu vyasintha, (2) kughanaghanira ivyo mungachita pasono m’malo mwa ivyo mukachitanga kale, (3) kughanaghanira vinthu viwemi vyose ivyo vyachitikapo pa umoyo winu, ndipo (4) kovwira ŵanji. w23.07 21-22 ¶7-8

Ntchimi Daniyeli wakaŵa muwukirano apo Ŵababuloni ŵakamutoleranga ku wuzga, kutali na kukwawo ku Yerusalemu. Kweni nangauli wakaŵa muwukirano, ŵalara ŵa Ŵababuloni ŵakawona kanthu kanyake mwa Daniyeli. Ŵakawona ‘ivyo munthu wakuwona kuwaro’ kuti Daniyeli wakaŵa ‘wambura kalema kweniso wakuwoneka makora,’ ndiposo kuti wakafuma mu mbumba yakumanyikwa. (1 Sam. 16:7) Pa vifukwa ivi, Ŵababuloni ŵakamusambizga kuti wateŵeterenge mu nyumba yachifumu. (Dan. 1:​3, 4, 6) Yehova wakamutemwanga Daniyeli chifukwa cha ivyo muwukirano uyu wakasankha. Nakuti Daniyeli wakwenera kuti wakaŵa na vyaka pafupifupi 20 panji kujumphirapo, apo Yehova wakamuzunura pamoza na Nowa na Yobu, ŵanalume awo ŵakagomezgeka kwa Chiuta kwa vyaka vinandi. (Gen. 5:32; 6:​9, 10; Yobu 42:​16, 17; Ezek. 14:14) Yehova wakalutilira kumutemwa Daniyeli nyengo yose iyo wakaŵira na umoyo wake pa charu chapasi.—Dan. 10:​11, 19. w23.08 2 ¶1-2

Para mukukhumba kugura nyumba mungatemwa kuwona umo yili kuzengekera kweniso mungakhumba kumanya vyose vyakukhwaskana na nyumba iyo mukukhumba kugura. Tingachitaso mwakuyana waka para tikuŵerenga kweniso kusambira Baibolo. Para mungaliŵazga waka mwakuchimbilira, mbwe mumanyenge waka fundo zipusuzipusu waka ivyo ni “vinthu vyakwambilira, vya mazgu ghakupatulika gha Chiuta.” (Heb. 5:12) Nga umo mungachitira na nyumba iyo mukukhumba kugura, sambirani mwakupwelelera Baibolo kuti mulipulikiske makora. Nthowa yiwemi chomene yakusambilira Baibolo nkhumanya umo fundo zakupambanapambana za mu Baibolo zikukolerana na zinyake. Padera pakumanya waka unenesko uwo mukugomezga, ŵikanipo mtima kumanya chifukwa icho mukuwugomezgera. Kuti tipulikiske makora vigaŵa vyose vya Mazgu gha Chiuta, tikwenera kusanda mwakupwelelera fundo zakunyang’amira za mu Baibolo. Mpositole Paulosi wakachiska Ŵakhristu ŵanyake kuti ŵafwilirengepo kusambira Mazgu gha Chiuta mwakuti “ŵamanye makora uwo mbusani, utali, kutumphuka na kunyang’amira” kwa unenesko. Kuchita nthena kukaŵawovwiranga ‘kujintha misisi na kukhazikika’ mu chipulikano chawo. (Efe. 3:​14-19) Naseso tikwenera kuchita mwakuyana waka. w23.10 18 ¶1-3

Baibolo lili na viyelezgero vinandi vya ŵanthu awo ŵakaŵa ŵakuzikira. Mwalekerachi kuti musambire viyelezgero vya ŵanthu aŵa pa sambiro lamwaŵene? Mwachiyelezgero, nangauli Davide wakaŵa mwana chomene apo wakaphakazgikanga kuŵa themba lamunthazi la Israyeli, kweni wakalindilira vyaka vinandi pambere wandaŵe themba. Simiyoni na Ana ŵakasopa Yehova mwakugomezgeka apo ŵakalindiliranga Mesiya uyo wakalayizgika. (Luka 2:​25, 36-38) Apo mukusambira nkhani izi, sangani mazgoro gha mafumbo agha: Kasi ntchivichi icho chikwenera kuti chikawovwira munthu uyu kuzikira? Kasi wakapindura wuli chifukwa cha kuzikira? Kasi ningamuyezga wuli? Mungapinduraso para mungasambira za ŵanthu ŵanyake awo ŵakatondeka kuzikira. (1 Sam. 13:​8-14) Mungajifumba kuti: ‘Kasi ntchivichi icho chikwenera kuti chikaŵatondeska kuzikira? Kasi ŵakasangana na masuzgo wuli chifukwa cha kutondeka kuzikira?’ w23.08 25 ¶15

Mpositole Petrosi wakaŵa wakugomezgeka, iyo wakazomerezga yayi chilichose kumutondeska kulondezga Yesu. Mwachiyelezgero, panyengo yinyake Yesu wakayowoya fundo yinyake iyo ŵasambiri ŵake ŵakapulikiska yayi. (Yoh. 6:68) Kweni kwambura kulindilirapo dankha, ŵanandi ŵakawelera ndipo ŵakaleka kulondezga Yesu. Kweni Petrosi wakawelera yayi. Wakalongora kugomezgeka ndipo wakayowoya kuti ni Yesu pera uyo wali na “mazgu gha umoyo wamuyirayira.” Yesu wakamanya kuti Petrosi na ŵapositole ŵanyake ŵamusidenge. Ndipouli, Yesu wakaŵa na chigomezgo chose kuti Petrosi wazamuwelera na kulutilira kuŵa wakugomezgeka. (Luka 22:​31, 32) Yesu wakamanya kuti “mzimu ngwakukhumbisiska, kweni thupi ndakulopwa.” (Mrk. 14:38) Ntheura, nanga mphamanyuma pakuti wamukana Yesu kuti wakumumanya yayi, Yesu wakamujowora yayi mpositole wake. Yesu wati wawuka wakawonekera kwa Petrosi, ndipo panyengo iyi vikulongora kuti Petrosi wakaŵa yekha. (Mrk. 16:7; Luka 24:34; 1 Kor. 15:5) Wakwenera kuti wakakhozgeka chomene mpositole uyu chifukwa wakaŵa na chitima pa ivyo wakachita. w23.09 22 ¶9-10

Chiuta wakugowokera panji kubenekelera zakwananga za wose awo ŵakuŵa na chipulikano mwa iyo. Wakugowokerathu zakwananga zawo ndipo wakuzikonthoraso yayi. (Sal. 32:​1, 2) Wakuŵawona kuti mbarunji chifukwa cha chipulikano chawo. Nangauli Abrahamu, Davide, na ŵateŵeti ŵanyake ŵa Chiuta ŵakapimika kuti mbarunji kweni nawo ŵakaŵa ŵambura kufikapo. Kweni chifukwa chakuti ŵakaŵa na chipulikano, Chiuta wakaŵawonanga kuti mbambura kafukwa, chomenechomene para wakuŵayaniska na ŵanthu ŵambura chipulikano. (Efe. 2:12) Nga umo Paulosi wakalembera mu kalata yake, chipulikano ntchakuzirwa chomene kuti munthu waŵe paubwezi na Chiuta. Abrahamu na Davide ŵakaŵa paubwezi na Chiuta chifukwa chakuti ŵakaŵa na chipulikano. Nase kuti tiŵe paubwezi na Chiuta tikwenera kuŵa na chipulikano. w23.12 3 ¶6-7

Mazuŵa ghano Ŵakhristu wose ŵali na mwaŵi wakupeleka sembe kwa Yehova pakugwiliskira ntchito nyengo yawo, nkhongono, kweniso chuma chawo mwakuti ŵalutiske panthazi vinthu vya Ufumu wa Chiuta. Tingalongora kuti tikuzirwiska mwaŵi withu wakusopa Yehova para tikumupa sembe zithu ziwemi chomene. Mpositole Paulosi wakayowoya vinthu vyakupambanapambana vyakukhwaskana na kusopa kwithu ivyo tikwenera yayi kuvisurangako waka. (Heb. 10:​22-25) Vinthu ivi vikusazgapo, kulomba kwa Yehova, kupharazgira ŵanji, kuwungana, kweniso kuchiskana yumoza na munyake “chomene apo tikuwona zuŵa [la Yehova] likuneng’enera.” Chakuumaliro kwa buku la Chivumbuzi, mungelo wakuyowoya mazgu ghakulondezgapo agha kaŵiri kose mwakuti wadidimizge kuzirwa kwake. Mazgu ghake ngakuti: ‘Sopani Chiuta!’ (Chivu. 19:10; 22:9) Ntheura tingaluwanga yayi vinthu vyakunyang’amira ivyo tasambira vyakukhwaskana na tempile likuru lauzimu kweniso mwaŵi wapadera uwo tili nawo wakusopa Chiuta withu mukuru! w23.10 29 ¶17-18

Tose tikwenera ‘kulutilira kutemwana.’ Ndipouli, ntchakuzirwa kukumbuka kuti Yesu wakachenjezga kuti “chitemwa cha ŵanandi chizamuzizima.” (Mat. 24:12) Apa Yesu wakang’anamuranga kuti ŵasambiri ŵake wose ŵazamuleka kulongora chitemwa yayi. Ndipouli tikwenera kuŵa maso chomene kuti tileke kuzomerezga kuti mzimu wa charu ichi utimbanizge chitemwa chithu. Apo tili na fundo iyi mu maghanoghano, tiyeni tighanaghanire fumbo lakulondezgapo ili: Kasi ntchivichi chingatovwira kumanya usange tikuŵatemwa zanadi ŵabali ŵithu? Nthowa yimoza iyo tingamanyira usange tikuŵatemwa zanadi ŵabali na ŵadumbu ŵithu, nkhuwona umo tikuchitira nawo vinthu pa vyakuchitika vinyake. (2 Kor. 8:8) Mpositole Petrosi wakayowoyapo chimoza mwa vinthu ivi. Iyo wakati: “Kuluska vyose mutemwanenge chomene, chifukwa chitemwa chikubenekelera zakwananga zinandi.” (1 Pet. 4:8) Ntheura umo tikuchitira para ŵabali na ŵadumbu ŵithu ŵabudiska vinthu vinyake, vingalongora usange tikuŵatemwa zanadi. w23.11 10-11 ¶12-13

Para tikulongora chitemwa ku ŵanji mu mpingo apo ŵanyake tikuŵalongora yayi ndikuti tikupulikira yayi dango la Yesu lakukhwaskana na chitemwa. Mbunenesko kuti ŵanyake tikutemwana nawo chomene kuluska ŵanyake, nga umo vikaŵira na Yesu. (Yoh. 13:23; 20:2) Kweni mpositole Petrosi wakutikumbuska kuti tikwenera kuŵikapo mtima “kutemwa ŵabali” wose nga umo ŵanthu ŵakutemwerana pa ubali. (1 Pet. 2:17) Petrosi wakutichiska kuti tikwenera ‘kutemwana chomene kufumira mu mtima.’ (1 Pet. 1:22) Mu nkhani iyi, mazgu ghakuti ‘kutemwana chomene’ ghakusazgapo kutemwaso munthu uyo ntchakusuzga kumulongora chitemwa. Mwachiyelezgero, wuli usange mubali watibudira panji kutikhuŵazga? Nyengo zinyake tingakhumba nga kuti timuwezgere waka m’malo mwa kumulongora chitemwa. Ndipouli, Petrosi wakasambira kwa Yesu kuti kachitiro kanthena aka kakumukondweska yayi Chiuta. (Yoh. 18:​10, 11) Petrosi wakalemba kuti: “Lekani kuwezgera uheni pa uheni, nesi kutuka pa kutuka. Kweni mutumbikenge ŵanthu.” (1 Pet. 3:9) Para mukutemwa chomene ŵanji muŵenge ŵalusungu kweniso muŵaghanaghanirenge. w23.09 28-29 ¶9-11

Chikuŵa chakuzizika chomene na umo mwana wakukulira mwaluŵiro na kuŵa munthu mulara. Vikulongora kuti mwana wakukura waka yekha kwambura iyo kuchitapo kanthu. Ndipouli, kuti tikure mwauzimu tikwenera kuchitapo kanthu. (1 Kor. 13:11; Heb. 6:1) Kuti tifiske chilato ichi, tikwenera kuŵa paubwezi wakukhora na Yehova. Tikukhumbikwiraso mzimu utuŵa kuti tiŵe na mikhaliro ya Chiuta, kuti tiŵe na maluso ghakovwira, kweniso kuti tinozgekere milimo yithu ya munthazi. (Zinth. 1:5) Yehova wakalenga ŵanthu ŵanalume na ŵanakazi. (Gen. 1:27) Ntchakuwonekerathu kuti ŵanalume na ŵanakazi mathupi ghawo ngakupambana, kweni mbakupambanaso mu vigaŵa vinyake. Mwachiyelezgero, Yehova wakalenga ŵanalume na ŵanakazi kuti ŵafiske milimo yinyake iyo wakaŵalengera, ntheura ŵakukhumbikwira mikhaliro na maluso agho ghangaŵawovwira kuchita milimo yawo.—Gen. 2:18. w23.12 18 ¶1-2

Kasi Yesu wakukhumba kuti ŵanji nawo ŵagwiliskirenge ntchito zina la Awiske? Enya. Ŵalongozgi ŵanyake ŵavisopa ŵa mu nyengo yake ŵakagomezganga kuti ni muyuyuro kuzunura zina la Chiuta, kweni Yesu wakazomerezga yayi kuti mitheto ya ŵanthu yimutondeske kuchindika zina la Awiske. Ghanaghanirani panyengo iyo wakachizga munthu uyo wakaŵa na mzimu waukazuzi mu chigaŵa cha Ŵagerasa. Ŵanthu ŵakawopa chomene ndipo ŵakamupempha Yesu kuti wafumeko, ntheura wakawukako nadi ku malo agha. (Mrk. 5:​16, 17) Ndipouli, Yesu wakakhumbanga nipera kuti ŵanthu ŵa ku chigaŵa ichi ŵamanye zina la Yehova. Ntheura wakaphalira munthu uyo wakamuchizga kuti waphalire ŵanthu, ivyo iyo Yesu wachita yayi, kweni ivyo Yehova wachita. (Mrk. 5:19) Nanga ni mazuŵa ghano, Yesu wakukhumbaso kuti timanyiske ŵanthu zina la Awiske pa charu chose chapasi. (Mat. 24:14; 28:20) Para tikuchitapo chigaŵa chithu, tikukondweska Themba lithu, Yesu. w24.02 10 ¶10

Tili na mwaŵi kuŵa mu gulu la Yehova mu nyengo zaumaliro izi. Apo vinthu vikuhenipirahenipira mu charu ichi, Yehova watipa mbumba yauzimu yakukolerana. (Sal. 133:1) Iyo wakutovwiraso kuti tikondwenge mu mbumba zithu. (Efe. 5:33–6:1) Ndipo wakutipaso vinjeru ivyo vikutovwira kuti tiŵenge na mtende wa mumtima. Ndipouli, tikwenera kuŵikapo mtima kuteŵetera Yehova mwakugomezgeka. Chifukwa wuli? Chifukwa nyengo zinyake tingakhuŵara na ivyo ŵanyithu ŵangayowoya panji kuchita. Nyengo zinyake tingagongoweskeka na maubudi ghithu, chomenechomene para tachita ubudi wakuyana waka mwakuwerezgawerezga. Tikwenera kuzizipizga apo tikuteŵetera Yehova (1) para mubali panji mudumbu watikhuŵazga, (2) para munyithu wa mu nthengwa watikhuŵazga, kweniso (3) para tagongoweskeka chifukwa cha maubudi ghithu. w24.03 14 ¶1-2

Nyengo na nyengo mupulikenge nkhani za ŵabali na ŵadumbu awo ŵakasankha kusazgirako uteŵeti wawo. Panji ŵanyake ŵakanjira Sukulu ya Ŵapharazgi ŵa Ufumu panji kusamira ku malo uko kukukhumbikwira wovwiri. Para namwe mungafiska kujiŵikira chilato chanthena ichi, mungachita makora chomene. Ŵateŵeti ŵa Yehova mbakukhumbisiska kusazgirako uteŵeti wawo. (Mil. 16:9) Kweni wuli usange mukuwona kuti pasono mungafiska yayi? Mukwenera yayi kujiwona kuti ndimwe ŵakutondeka pakuyaniska na awo ŵakufiska. Chakuzirwa chomene nkhulutilira kuzizipizga. (Mat. 10:22) Kudelera yayi vichoko ivyo mukuchita na mtima wose pa kuteŵetera Yehova kuyana na nkhongono zinu kweniso maluso ghinu. Iyi ni nthowa yiwemi iyo mungalondezgera Yesu pamanyuma pa kubatizika.—Sal. 26:1. w24.03 10 ¶11

Adada ŵithu ŵakuchanya ŵakulayizga kuti ŵatigowokerenge para talapa. (Sal. 86:5) Ntheura usange talapa nadi zakwananga izo tikachita, tikwenera kuŵa na chigomezgo chose kuti Yehova watigowokera nga umo iyo wakuyowoyera. Kasi tingachita wuli kuti titonde maghanoghano ghakuti palije icho tingachita kuti Yehova wakondwe nase? Tikumbuke kuti Yehova wakutipulikiska ndipo wakukhwimiska vinthu yayi. Iyo wakukhazga vinandi kuluska ivyo tingafiska yayi. Wakuzirwiska vyose ivyo tikumuchitira chikuru tikuchita vyose ivyo tingafiska. Ghanaghaniraniso viyelezgero vya ŵanthu ŵakuzunulika mu Baibolo awo ŵakateŵetera Yehova na mtima wose. Mwachiyelezgero, ghanaghanirani vya mpositole Paulosi. Wakateŵetera mwamwamphu kwa vyaka vinandi, kwenda mitunda yitali na kwambiska mipingo yinandi. Kweni apo vinthu vikasintha pa umoyo wake ndipo wakaleka kuchita vinandi pa mulimo wakupharazga, kasi ndikuti Chiuta wakaleka kukondwa nayo? Yayi. Iyo wakalutilira kuchita ivyo wangafiska, ndipo Yehova wakamutumbika. (Mil. 28:​30, 31) Mwakuyana waka, nyengo zinyake ivyo tikumupa Yehova vingasintha. Kweni chakuzirwa chomene kwa iyo, ntchilato icho tikumuteŵetelera. w24.03 27 ¶7, 9

Kwizira mu malurombo agho wakalombanga kwa Yehova, Yesu wakalongora chiyelezgero chiwemi ku ŵasambiri ŵake icho ŵangatolerako. Nyengo yose iyo wakachitiranga uteŵeti wake pa charu chapasi, Yesu wakalombanga kanandi waka. Ndipouli, wakakhumbikwiranga kuchita kupatura nyengo yakulombera chifukwa kanandi wakaŵanga wakutangwanika chomene kweniso wakaŵanga na ŵanthu ŵanandi. (Mrk. 6:​31, 45, 46) Wakawukanga mulenjilenji mwakuti waŵe na nyengo yakulombera. Nakuti zuŵa linyake, wakalomba usiku wose pambere wandasankhe pa nkhani yinyake yakuzirwa. (Luka 6:​12, 13) Kweniso Yesu wakalomba mwakuwerezgawerezga pa usiku wakuti namachero ghake wafwenge apo wakaŵa pafupi chomene kumalizga chigaŵa chakusuzga chomene cha uteŵeti wake wa pa charu chapasi. (Mat. 26:​39, 42, 44) Chiyelezgero cha Yesu chikutisambizga kuti nanga tingaŵa ŵakutangwanika wuli, tikwenera kupatura nyengo yakulombera. Nga ni Yesu, nase tingakhumbikwira kupatura nyengo yakulombera. Tingasankha kuwuka mulenjilenji, panji mise tingachedwerako kugona mwakuti tilombe dankha. Para tichitenge nthena, tilongorenge Yehova kuti tikuwonga chomene chawanangwa chapadera ichi. w23.05 3 ¶4-5

Wonani mazgu ghakuti “watipungulira” agho ghali mu lemba la mwahuno. Dikishonare yinyake yakulongosora mazgu gha mu Baibolo, yikulongosora kuti mazgu agha ghakung’anamura kuti chitemwa chake “chikupungulikira pa ise nga ni mlonga.” Mazgu agha ghakulongora kuti Yehova wakuŵatemwa chomene ŵakuphakazgika! Ŵakuphakazgika ŵakumanya kuti “ŵakutemweka na Chiuta.” (Yuda 1) Mpositole Yohane wakalongosora umo ŵakuphakazgika ŵakujipulikira apo wakalemba kuti: “Wonani chitemwa icho Adada ŵalongora kwa ise, kuti tichemekenge ŵana ŵa Chiuta.” (1 Yoh. 3:1) Kasi Yehova wakutemwa ŵakuphakazgika pera? Yayi, Yehova walongora chitemwa chake kwa waliyose wa ise. Kasi ni nthowa wuli yikuru chomene iyo Yehova walongolera chitemwa chake? Ni sembe yakuwombora, iyo ntchawanangwa chikuru chomene icho Yehova wali kulongolera chitemwa chake kuluska waliyose mu chilengiwa chose.—Yoh. 3:16; Rom. 5:8. w24.01 28 ¶9-10

Lemba la mwahuno ili, likuvumbura icho chikawovwira Davide kuti waleke kopa. Likulongora kuti Davide nanga ni apo umoyo wake ukaŵa pangozi, iyo wakaghanaghaniranga ivyo Yehova wamuchitirenge munthazi. Davide wakamanyanga kuti Yehova wamupumuzgenge panyengo yakwenelera. Kweniso Yehova wakaŵa kuti wayowoya kale kuti Davide ndiyo waŵenge themba lakulondezgapo la Israyeli. (1 Sam. 16:​1, 13) Kwa Davide, vyose ivyo Yehova wakalayizga vikaŵa nga vyachitika kale. Kasi imwe Yehova wamulayizgani vichi? Nangauli tikukhazga kuti wativikilirenge ku masuzgo ghose yayi, kweni tikumanya kuti masuzgo ghose agho tikukumana nagho mu charu chiheni ichi, wazamughamazga mu charu chiphya. (Yes. 25:​7-9) Mlengi withu wali na nkhongono zakuwuskira ŵakufwa, kuchizga ŵalwari na kuwuskapo ŵakususka wose.—1 Yoh. 4:4. w24.01 6 ¶12-13

Ghanaghanirani chifukwa icho mukajipelekera kwa Yehova na kubatizika. Mukachita vyose ivi chifukwa chakuti mukakhumbanga kuŵa ku chigaŵa cha Yehova. Ghanaghaniraniso icho chikamukhorweskani kuti mwasanga nadi unenesko. Mukamumanya makora Yehova na kwamba kumuchindika na kumutemwa chomene pakuŵa Dada winu wakuchanya. Mukamba kuŵa na chipulikano ndipo vikamovwirani kuti mupere. Mukaleka kuchita vinthu ivyo Yehova wakutinkha na kwamba kuchita vinthu ivyo vikumukondweska. Mukajipulika makora mukati mwamanya kuti Chiuta wamugowokerani. (Sal. 32:2) Mukamba kuwungana kweniso kuphalirako ŵanyinu ivyo mukusambira. Pakuŵa Mkhristu wakujipeleka kweniso wakubatizika, sono mukwenda pa nthowa yakuluta ku umoyo, ndipo mwaŵikapo mtima kuleka kupatuka pa nthowa iyi. (Mat. 7:​13, 14) Lutilirani kuŵa ŵakukhora pakusopa Yehova, na ŵambura kusunkhunyika pakupulikira malango ghake. w23.07 17 ¶14; 19 ¶19

Para mukughanaghanirapo pa lurombo ulo mukalomba apo mukajipelekanga kwa Yehova, vizamumovwirani kuti musange nkhongono zakutondera chiyezgo chilichose. Mwachiyelezgero, kasi mungamba kuphotokerana na munthu munyake uyo ni mwanalume panji mwanakazi winu yayi? Yayi! Chifukwa muli kumulayizga kale Yehova kuti mungachita yayi nthena. Ntheura usange mwaleka kuzomerezga kuti makhumbiro ghaheni ghajinthe misisi mu mtima winu, chiŵenge chipusu kughamazga nyengo yeneyiyo. ‘Muzamupatukako’ ku ‘nthowa ya ŵaheni.’ (Zinth. 4:​14, 15) Kughanaghanirapo pa umo Yesu wakaŵikirapo mtima kukondweska Adada ŵake, namwe kungamovwirani kuti muŵikepo mtima kukana luŵiro chilichose icho chingakwiyiska Chiuta, uyo mukamulayizga kuti mumuteŵeterenge. (Mat. 4:10; Yoh. 8:29) Unenesko ngwakuti masuzgo kweniso viyezgo ivyo mukukumana navyo vikumupani mwaŵi wakuti mulongore kuti mwaŵikapo mtima ‘kulutilira kulondezga’ Yesu. Manyani kuti Yehova wamovwiraninge kuchita nthena. w24.03 9-10 ¶8-10