Okutobala
Chitatu, Okutobala 1
Vinjeru vyakufuma kuchanya . . . ni . . . vyakupulikira luŵiro.—Yak. 3:17.
Kasi nyengo zinyake vikumusuzgani kupulikira? Themba Davide nalo nyengo zinyake vikalisuzganga kupulikira, ntheura likalomba kwa Chiuta kuti: “Ŵikani mwa ine khumbo la kumupulikirani.” (Sal. 51:12) Davide wakamutemwanga Yehova. Ndipouli, nyengo zinyake Davide vikamusuzganga kupulikira, ndipo nase nyengo zinyake vikutisuzga. Chifukwa wuli? Chakwamba ntchakuti nase tili kuhara mukhaliro wakuleka kupulikira. Chachiŵiri, Satana nyengo zose wakuyezgayezga kutipangiska kuti nase timugalukire Yehova nga umo iyo wakachitira. (2 Kor. 11:3) Chachitatu, tili kuzingilizgika na mzimu wachigaluka wa charu ichi, “mzimu uwo sono ukugwira ntchito mu ŵana ŵambura kupulikira.” (Efe. 2:2) Ntheura tikwenera kuŵikapo mtima chomene kulimbana na kuwura kufikapo kwithu, Dyabulosi, na charu ichi mwakuti tipulikire Yehova na awo ŵali kupika mazaza kuti ŵadangilirenge. w23.10 6 ¶1
Chinayi, Okutobala 2
Iwe wasunga vinyo liwemi m’paka sono.—Yoh. 2:10.
Kasi tingasambirako vichi ku munthondwe uwo Yesu wakachita wakuzgora maji kuŵa vinyo? Apa sambiro nda kujiyuyura. Yesu wakajikuzga yayi chifukwa cha kuchita munthondwe uwu, panji kujikuzga pa chilichose icho wakachita. M’malo mwake, wakajiyuyura ndipo mwakuwerezgawerezga wakapelekanga uchindami wose kwa Adada ŵake. (Yoh. 5:19, 30; 8:28) Usange tikumuyezga Yesu pakuŵa ŵakujiyuyura, tijikuzgenge yayi na ivyo tafiska kuchita. Tingajithumbwanga tekha yayi, kweni tijithumbwe kuti tili na Chiuta muwemi uyo tikumuteŵetera. (Yer. 9:23, 24) Tikwenera kumupa ntchindi izo zikumwenelera. Nakuti palije chiwemi chilichose icho tingafiska kuchita kwambura wovwiri wa Yehova. (1 Kor. 1:26-31) Para tili ŵakujiyuyura, usange tachitira ŵanji chinthu chiwemi tikhumbenge kuti tichindikikirepo yayi. Tikuŵa ŵakukhorwa pakumanya kuti Yehova wakuwona ndipo wakuzirwiska ivyo tikuchita. (Yaniskani na Mateyu 6:2-4; Heb. 13:16) Nadi tikukondweska Yehova para tikuyezga Yesu pakuŵa ŵakujiyuyura.—1 Pet. 5:6. w23.04 4 ¶9; 5 ¶11-12
Chinkhondi, Okutobala 3
Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.—Fil. 2:4.
Mwakovwirika na mzimu utuŵa, mpositole Paulosi wakachiska Ŵakhristu kuti ŵaghanaghanirenge vyakukhumba vya ŵanji. Kasi tingalondezga wuli ulongozgi uwu pa maungano? Tikumbukenge kuti ŵanyithu nawo ŵakukhumba kuzgorapo nga umo ise tikukhumbira. Ghanaghanirani fundo iyi. Para mukudumbiskana na ŵabwezi ŵinu, kasi mungayowoyanga waka chomene mwekha kwambura kuŵapa m’pata ŵanyinu kuti nawo ŵayowoyepo? Yayi. Namwe mukukhumba kuti nawo ŵayowoyengepo. Mwakuyana waka, pa maungano napo, tikukhumba kuti ŵanandi ŵazgorengepo. Nakuti nthowa yiwemi chomene yakukhozgera ŵabali na ŵadumbu ŵithu nkhuŵapa mwaŵi wakuti ŵalongorenge chipulikano chawo. (1 Kor. 10:24) Ntheura mazgoro ghithu ghakwenera kuŵa ghakudumura, ndipo para tachita nthena tikupeleka mwaŵi kuti ŵanyithu nawo ŵazgorepo. Nanga ni para zgoro lingaŵa lifupi, tigege kuyowoya fundo zinandi. Para tazgora vyose mu ndime, ntchakusuzga kuti ŵanyithu ŵazgorepo. w23.04 22-23 ¶11-13
Chisulo, Okutobala 4
Nkhuchita vinthu vyose ivi chifukwa cha makani ghawemi, mwakuti niphalireko ŵanyake makani agha.—1 Kor. 9:23.
Tikwenera kukumbuka kuzirwa kwa kulutilira kovwira ŵanji chomenechomene kwizira mu ntchito ya kupharazga. Para tili mu upharazgi, tikwenera kuŵa ŵakunozgeka kusintha. Tikukumana na ŵanthu ŵa vigomezgo vyakupambana kweniso ŵakufuma ku vigaŵa vyakupambana. Mpositole Paulosi wakasinthangasinthanga pakupharazga, ndipo tingasambirako kwa iyo. Yesu wakasankha Paulosi kuŵa “mpositole ku ŵamitundu.” (Rom. 11:13) Ntheura Paulosi wakapharazgiranga Ŵayuda, Ŵagiriki, ŵanthu ŵakusambira, ŵanthu bweka, ŵalara ŵa boma na mathemba. Kuti waŵafike pamtima ŵanthu wose aŵa, Paulosi wakazgoka “vinthu vyose ku ŵanthu ŵa mitundu yose.” (1 Kor. 9:19-22) Wakaghanaghaniranga chomene vya mitheto yawo, uko ŵakufumira, kweniso ivyo ŵakugomezga ndipo wakasinthanga kuyana na munthu uyo wakumupharazgira. Nase tingaŵafika pamtima ŵanthu awo tikuŵapharazgira para tikuyezgayezga kuti tiŵamanye makora na kusintha upharazgi withu mwakuti ukolerane na munthu uyo tikumupharazgira. w23.07 23 ¶11-12
Sabata, Okutobala 5
Muzga wa Fumu wakwenera kuchita mbembe yayi, kweni wakwenera kuŵa wakuzika ku wose.—2 Tim. 2:24.
Para munthu ngwakuzika ndikuti ngwankhongono, ngwakulopwa yayi. Pakukhumbikwira nkhongono kuti munthu waŵe wakuzika para wakumana na chiyezgo. Kuzika ntchimoza cha “vipambi vya mzimu.” (Gal. 5:22, 23) Lizgu la Chigiriki lakuti “kuzika” nyengo zinyake likagwiliskikanga ntchito pakulongosora hachi la muthondo ilo likuŵeteka. Ghanaghanirani za hachi la muthondo ilo sono ndakuzika. Nangauli hachi ili ndakuzika, kweni likuŵa kuti lichali na nkhongono zake. Pakuti ndise ŵanthu, kasi tingachita wuli kuti tiŵe ŵakuzika kweniso panyengo yimozamoza kuŵa ŵankhongono? Tingafiska yayi kuchita nthena pa ise tekha. Tikwenera kulomba mzimu wa Chiuta, kumulomba kuti watovwire kuŵa na mukhaliro uwemi chomene uwu. Nakuti pali ŵanthu ŵanandi awo ŵasambira kuŵa ŵakuzika. Mwachiyelezgero, ŵabali na ŵadumbu ŵithu ŵanandi ŵakulongora kuzika para ŵakumana na ŵanthu ŵakususka. Ndipo ivi vyawovwira ŵanji kuŵa na maghanoghano ghakwenelera kukhwaskana na Ŵakaboni.—2 Tim. 2:24, 25. w23.09 15 ¶3
Mande, Okutobala 6
Nkhalombanga, ndipo Yehova wanipa icho nkhalomba kwa iyo.—1 Sam. 1:27.
Mu mboniwoni yinyake yakuzizwiska, mpositole Yohane wakawona ŵalara 24 kuchanya kuti ŵakusopa Yehova. Ŵakalumbanga Yehova, ndipo ŵakayowoyanga kuti ngwakwenelera kupokera “uchindami, ntchindi na nkhongono.” (Chivu. 4:10, 11)Ŵangelo ŵakugomezgeka nawo ŵali na vifukwa vinandi vyakulumbira Yehova na kumuchindika. Iwo ŵakukhala nayo lumoza kuchanya ndipo ŵakumumanya makora. Ŵakumanya mikhaliro yake para ŵakuwona ivyo wakuchita. Para ŵakuwona umo Yehova wakuchitira vinthu, ŵakuchiskika kumulumba. (Yobu 38:4-7) Nase tikwenera kumulumba Yehova mu malurombo ghithu, tingayowoya ivyo tikumutemwera na kumuwongera. Apo mukuŵazga na kusambira Baibolo, yezgani kuwona mikhaliro iyo Yehova wakulongora iyo yikumukondweskani chomene. (Yobu 37:23; Rom. 11:33) Kufuma apo muphalirani Yehova umo mukujipulikira chifukwa cha mikhaliro iyo. Tingamulumbaso Yehova chifukwa chakuti wakutovwira ise kweniso Ŵakhristu ŵanyithu wose.—1 Sam. 2:1, 2. w23.05 3-4 ¶6-7
Chiŵiri, Okutobala 7
Mwendenge mwakwenelera Yehova.—Kol. 1:10.
Mu 1919, Babuloni Mukuru wakaŵavyaso mazaza pa ŵanthu ŵa Chiuta. Mu chaka ichi, “muzga wakugomezgeka na wavinjeru” wakambapo kuchita mulimo mwakuti ŵanthu ŵamitima yiwemi ŵambepo kwenda pa “Nthowa Yakupatulika.” (Mat. 24:45-47; Yes. 35:8) Mulimo wakunozga nthowa uwo ŵanji ŵakachita kumanyuma, ukawovwira ŵanthu awo ŵakamba kwenda pa msewu uwu, kumanya vinandi vyakukhwaskana na Yehova na khumbo lake, padera pa ivyo ŵakavimanyanga kale. (Zinth. 4:18) Ukawovwiraso kuti ŵakhalenge umoyo uwo ukukolerana na ivyo Yehova wakukhumba. Yehova wandakhazgepo kuti ŵanthu ŵake ŵasinthenge vyose ivyo vikukhumbikwa kusintha panyengo yimoza. M’malo mwake, waŵayenga ŵanthu ŵake mwapachokopachoko. Munthazi tizamuŵa ŵakukondwa chomene apo tose tizamukondweskanga Chiuta withu pa chilichose icho tikuchita. Msewu uliwose ukukhumbikwa kuwunozga nyengo na nyengo. Kwamba waka mu 1919, mulimo wakunozga “Nthowa Yakupatulika” walutilira kuchitika, na chilato chakuti ŵanthu ŵanandi ŵafumemo mu Babuloni Mukuru. w23.05 17 ¶15; 19 ¶16
Chitatu, Okutobala 8
Nikulekenge yayi napachoko.—Heb. 13:5.
Wupu Wakulongozga ukusambizga ŵabali awo ŵakovwira mu makomiti ghakupambanapambana gha Wupu Wakulongozga. Ŵabali aŵa pasono ŵakuchita milimo yinandi mwakugomezgeka mu gulu la Yehova. Mbakunozgeka makora kulutilira kuchita mulimo wakupwelelera mberere za Khristu. Para ŵakuphakazgika ŵaumaliro ŵaluta kuchanya kuumaliro kwa suzgo yikuru, kusopa kutuŵa kuzamulutilira pano pa charu chapasi. Tikuwonga chomene Yesu Khristu chifukwa wazamovwira ŵanthu ŵa Chiuta kulutilira kusopa Yehova mwakugomezgeka. Tikumanya kuti panyengo iyo tizamuwukilika na Gogi wa Magogi, uko nkhukolerana kwa mitundu. (Ezek. 38:18-20) Nangauli ŵazamuwukilika, kweni ŵanthu ŵa Chiuta ŵazamuleka yayi kusopa Yehova. Yehova wazamuŵathaska nadi. Mu mboniwoni, mpositole Yohane wakawona “mzinda ukuru” wa mberere zinyake za Khristu. Yohane wakaphalirika kuti “mzinda ukuru” uwu ndiwo wafuma mu “suzgo yikuru.” (Chivu. 7:9, 14) Ntheura tikumanya kuti Yehova wazamuŵaponoska! w24.02 5-6 ¶13-14
Chinayi, Okutobala 9
Lekani kuzimwa moto wa mzimu.—1 Tes. 5:19.
Kasi tingachita wuli kuti tipokere mzimu utuŵa? Tingawulomba kwa Chiuta, kusambira Baibolo, kweniso kukolerana na gulu la Chiuta ilo wakulilongozga na mzimu wake utuŵa. Kuchita nthena kutovwirenge kuti tiŵe na “vipambi vya mzimu. (Gal. 5:22, 23) Chiuta wakupeleka mzimu wake ku ŵekha awo mbakutowa mu maghanoghano kweniso awo ŵali na nkharo yiwemi. Wangalutilira yayi kutipa mzimu wake para tikulutilira kughanaghanira vinthu viheni kweniso kuvichita. (1 Tes. 4:7, 8) Kuti tilutilire kupokera mzimu utuŵa, tikweneraso yayi ‘kuyuyura mazgu ghauchimi.’ (1 Tes. 5:20) Apa mazgu ghakuti “uchimi,” ghakung’anamura mauthenga agho Yehova wakutipa kwizira mwa mzimu wake, nga mauthenga ghakukhwaskana na zuŵa lake kweniso kufupiskika kwa nyengo izo tilimo. Tikughanaghanapo yayi kuti zuŵa la Yehova lili kutali chomene panji kuti Aramagedoni yizenge para ise tafwa. M’malo mwake, nyengo zose tikukumbuka zuŵa ili na kukhazga kuti lizenge mwasonosono. Tikuchita nthena mwa kutangwanika chomene zuŵa lililose na “milimo iyo yikulongora kuti tikusopa Chiuta mwakujipeleka,” kweniso kulutilira kuŵa ŵakutowa mu maghanoghano na mu vyakuchita vithu.—2 Pet. 3:11, 12. w23.06 12 ¶13-14.
Chinkhondi, Okutobala 10
Kopa Yehova ni jando la vinjeru.—Zinth. 9:10.
Kasi ise pakuŵa Ŵakhristu tikwenera kuchita wuli para pa TV, pa foni yithu, panji pa kompyuta piza chithuzi chamuziro mwangozi? Nyengo yeneyiyo tikwenera kulaŵiska kumphepete. Kweni tingachita nthena pekha para tikukumbuka kuti chinthu chakuzirwa chomene kwa ise mbubwezi withu na Yehova. Nanga ni vithuzi ivyo tikuwona kuti ni vyamuziro yayi, vingawuska makhumbiro ghakugonana. Chifukwa wuli tikwenera kuvigega? Chifukwa tikukhumba yayi napachoko kwamba kughanaghana vya kuchita uzaghali mu mtima withu. (Mat. 5:28, 29) Mulara munyake wa ku Thailand zina lake David wakuti: “Ine nkhujifumbanga kuti: ‘Nangauli chithuzi ichi ntchamuziro yayi, kweni kasi Yehova wangakondwa para nkhulutilira kuchilaŵisiska?’ Kujifumba fumbo ili kukunovwira kuti nichitenge vinthu mwamahara.” Para topenge kuchita chilichose icho chingakhuŵazga Yehova, vitovwirenge kuchita vinthu mwamahara. “Kopa Yehova ni jando la vinjeru.” w23.06 23 ¶12-13
Chisulo, Okutobala 11
Lutani ŵanthu ŵane, njirani mu vipinda vinu vyamukati.—Yes. 26:20.
‘Vipinda vyamukati’ vingimira mipingo. Panyengo ya suzgo yikuru, tizamusanga chivikiliro icho Yehova wakutilayizga para tikulutilira kumuteŵetera lumoza na ŵabali na ŵadumbu ŵithu. Ntheura, tikwenera kuŵikapo mtima chomene sono kuti tiŵatemwenge ŵabali na ŵadumbu ŵithu kufumira pasi pamtima. Nyengo zinyake kuti tizakapone tizamukhumbikwira wovwiri wa ŵabali na ŵadumbu ŵithu. “Zuŵa likuru la Yehova” yizamuŵa nyengo yakusuzga chomene kwa waliyose. (Zef. 1:14, 15) Nanga mbateŵeti ŵa Yehova nawo ŵazamusuzgika. Kweni para tanozgekerathu sono, tizamukhala mwakufwasa na kovwira ŵanji. Tizamuzizipizga masuzgo ghalighose agho tizamusangana nagho. Para ŵabali na ŵadumbu ŵithu ŵakusuzgika, tizamuchita chilichose icho tingakwaniska kuti tiŵawovwire mwa kuŵalongora chiwuravi kweniso kuŵapa vyakukhumbikwa pa umoyo. Ndipo para pasono tikuŵatemwa ŵabali na ŵadumbu ŵithu kufumira pasi pamtima, tizamulutiliraso kuŵatemwa panyengo yakusuzga iyi. Paumaliro Yehova wazamutitumbika na umoyo wamuyirayira mu charu icho masoka gha chilengiwa na masuzgo ghanyake ghose vizamukumbukikaso yayi.—Yes. 65:17. w23.07 7 ¶16-17
Sabata, Okutobala 12
[Yehova] wazamumukhozgani, wazamumuzgorani ŵankhongono kuti muleke kusunkhunyika.—1 Pet. 5:10.
Mazgu gha Chiuta kanandi ghakulongosora ŵanalume ŵakugomezgeka kuŵa ŵankhongono panji kuti ŵakukhora. Kweni ni nyengo zose yayi apo ŵakajiwonanga kuŵa ŵankhongono. Mwachiyelezgero, Themba Davide nyengo zinyake likajiwonanga kuti ‘ndakukhora nga ni phiri,’ kweni nyengo zinyake likajiwonanga kuti ndakulopwa ndipo ‘likatenthemanga.’ (Sal. 30:7) Nangauli Samusoni wakaŵa na nkhongono zapadera, kweni wakamanyanga kuti kwambura nkhongono zakufuma kwa Chiuta, mbwenu ‘waŵenge wakulopwa nga mbanthu ŵanyake wose.’ (Ŵeru. 14:5, 6; 16:17) Ŵanalume ŵakugomezgeka aŵa ŵakaŵa ŵakukhora chifukwa chakuti Yehova wakaŵapa nkhongono. Mpositole Paulosi nayo wakamanyanga kuti wakakhumbikwiranga nkhongono zakufuma kwa Yehova. (2 Kor. 12:9, 10) Wakaŵa na masuzgo mu thupi. (Gal. 4:13, 14) Nyengo zinyake vikamusuzganga kuchita icho ntchiwemi. (Rom. 7:18, 19) Ndipo nyengo zinyake wakenjerwanga ndipo wakamanyanga yayi icho chimuchitikirenge. (2 Kor. 1:8, 9) Ndipouli, apo Paulosi wakaŵa wakulopwa, wakaŵaso wankhongono. w23.10 12 ¶1-2
Mande, Okutobala 13
Yehova wakuwona mu mtima.—1 Sam. 16:7.
Usange nyengo zinyake tikujiwona kuti ndise ŵambura kuzirwa, tikwenera kukumbuka kuti Yehova ndiyo wakatiguzira kwa iyo. (Yoh. 6:44) Iyo wakuwona viwemi mwa ise, ivyo ise taŵeneko tikuviwona yayi, ndipo wakumanya makora mtima withu. (2 Mid. 6:30) Ntheura tingakayikiranga yayi para wakuyowoya kuti ndise ŵakuzirwa kwa iyo. (1 Yoh. 3:19, 20) Pambere tindasambire unenesko, taŵanyake tikachita vinthu ivyo panji tichali kujiyimba navyo mulandu m’paka sono. (1 Pet. 4:3) Nanga Mbakhristu ŵakugomezgeka nawo ŵachali kusuzgika na tumaubudi tunyake. Imwe ke? Usange ni nthena, manyani kuti ŵateŵeti ŵa Yehova ŵanyake nawo ŵakasuzgikapo na maghanoghano ghakuyana waka. Mwachiyelezgero, mpositole Paulosi wakajiwonanga kuti ngwakusokwa para wakughanaghanira vya maubudi ghake. (Rom. 7:24, Baibolo la Malemba Ghakupatulika mu Mang’anamuliro gha Charu Chiphya Mateyu—Uvumbuzi) Mbunenesko kuti Paulosi apa wakaŵa kuti walapa kale zakwananga zake na kubatizika. Ndipouli, iyo wakati ni “muchoko chomene pa ŵapositole” wose kweniso “wakwananga chomene.”—1 Kor. 15:9; 1 Tim. 1:15. w24.03 27 ¶5-6
Chiŵiri, Okutobala 14
Ŵakasida nyumba ya Yehova.—2 Mid. 24:18.
Sambiro limoza ilo tikusambirapo pa vinthu viheni ivyo Themba Yehowashi wakasankha ndakuti tikwenera kuŵa na ŵabwezi awo ŵangatovwira kusankha makora vinthu, ŵabwezi awo ŵakutemwa Yehova kweniso kukhumba kumukondweska. Tingaŵa paubwezi na ŵanthu awo mbachekuru panji ŵawukirano. Kumbukani kuti Yehowashi wakaŵa mwana kwa mubwezi wake Yehoyada. Pa nkhani ya ŵabwezi ŵinu awo muli kusankha, jifumbani kuti: ‘Kasi ŵakunovwira kukhozga chipulikano chane mwa Yehova? Kasi ŵakunichiska kuti nikhalenge mwakukolerana na fundo za Chiuta? Kasi kanandi ŵakuyowoya vyakukhwaskana na Yehova na fundo zake zakuzirwa? Kasi ŵakulongora kuti ŵakuchindika fundo za Chiuta? Kasi ŵakuniphalira waka vinthu ivyo makutu ghane ghangatemwa kupulika nakale, panji ŵali na chikanga kuniphalira apo nkhwenera kunozga?’ (Zinth. 27:5, 6, 17) Unenesko ngwakuti para ŵabwezi ŵinu ŵakumutemwa yayi Yehova, ndikuti mbambura kukhumbikwa. Kweni para muli na ŵabwezi awo ŵakumutemwa Yehova, skepelerani kwa iwo chifukwa ŵamovwiraninge nyengo zose.—Zinth. 13:20. w23.09 9-10 ¶6-7
Chitatu, Okutobala 15
Ndine Alefa na Omega.—Chivu. 1:8.
Mazgu ghakuti Alefa ntchilembo chakwamba mu alifabeti ya Chigiriki, ndipo omega ntchilembo chaumaliro. Yehova pakuyowoya kuti iyo ni “Alefa na Omega,” wakutovwira kumanya kuti para iyo wamba kuchita chinthu m’paka wakuchimalizga. Yehova wakati walenga Adamu na Eva, wakaŵaphalira kuti: “Babanani, mwandane muzuzge charu chapasi na kuchithereska.” (Gen. 1:28) Panyengo iyi, Yehova tingati wakayowoya kuti “Alefa.” Wakayowoya mwakupulikikwa makora vya khumbo lake: Kuti nyengo yizenge apo ŵana ŵakufikapo na ŵakupulikira ŵa Adamu na Eva ŵazuzgenge charu chose na kuchizgora kuŵa paradiso. Para khumbo lake lazakafiskika, Yehova wazamuŵa nga wakuyowoya kuti “Omega.” Yehova wakati wamalizga kulenga “kuchanya na charu chapasi na vyose ivyo vilimo,” wakayowoyaso chinthu chinyake kuti wasimikizge kuti khumbo lake lifiskikenge nadi. Wakasimikizga kuti kwambura kutondeka wazamufiska khumbo lake ku ŵanthu na charu chapasi. Wazamufiska nadi paumaliro wa zuŵa la 7.—Gen. 2:1-3. w23.11 5 ¶13-14
Chinayi, Okutobala 16
Sengurani nthowa ya Yehova! Pangirani Chiuta withu msewu wakunyoloka mu chipalamba.—Yes. 40:3.
Ulendo wakufuma ku Babuloni kuluta ku Israyeli ukaŵa wa myezi yinayi ndipo ukaŵa wakusuzga chomene. Kweni Yehova wakaŵalayizga kuti wawuskengemo vyakujandizga vyose ivyo vingatondeska Ŵayuda kuweleraso kwawo. Ŵayuda ŵakugomezgeka ŵakamanya kuti vyandulo ivyo ŵangasanga para ŵangawelera ku Israyeli, ni vinandi chomene kuluska chilichose icho ŵangachileka ku Babuloni. Thumbiko likuru chomene likaŵa lakukhwaskana na kusopa kwawo. Ku Babuloni kukaŵavya tempile la Yehova. Kukaŵavya jotchero ilo Ŵaisrayeli ŵangapelekerapo sembe nga umo Dango la Mozesi likayowoyeranga, ndiposo kukaŵavya ŵasembe awo ŵangapeleka sembe izi. Kweniso ŵanthu awo ŵakasopanga ŵangoza mu msumba uwu ŵakaŵa ŵanandi chomene kuluska ŵanthu awo ŵakachindikanga Yehova panji fundo zake. Ntheura Ŵayuda masauzandi ghanandi awo ŵakatemwanga Yehova ŵakaŵa ŵakunweka kuwelera ku charu chawo uko ŵangakawezgeraposo kusopa kutuŵa. w23.05 14-15 ¶3-4
Chinkhondi, Okutobala 17
Lutilirani kwenda nga mbana ŵa ungweru.—Efe. 5:8.
Tikukhumbikwira wovwiri wa mzimu utuŵa wa Chiuta mwakuti tilutilire kuchita vinthu “nga mbana ŵa ungweru.” Chifukwa wuli? Chifukwa ntchakuti ntchakusuzga chomene kulutilira kuŵa ŵatuŵa mu charu cha nkharo zawakawaka ichi. (1 Tes. 4:3-5, 7, 8) Mzimu utuŵa ungatovwira kulimbana na kaghanaghaniro ka charu. Ivi vikusazgapo visambizgo vyake kweniso kaghanaghaniro ka ŵanthu ŵa mu charu ichi awo ŵakuwona vinthu mwakupambana na umo Chiuta wakuviwonera. Mzimu utuŵa ungatovwiraso kupambika “uwemi wa mtundu uliwose na urunji na unenesko.” (Efe. 5:9) Nthowa yimoza iyo tingachita kuti Chiuta watipe mzimu utuŵa, nkhulomba. Yesu wakayowoya kuti Yehova ‘wapelekenge mzimu utuŵa ku awo ŵakumulomba.’ (Luka 11:13) Ndipo para tikulumba Yehova pa maungano pamoza na Ŵakhristu ŵanyithu, tikupokeraso mzimu utuŵa. (Efe. 5:19, 20) Mzimu utuŵa wa Chiuta utovwirenge kuti tichitenge vinthu ivyo vikukondweska Chiuta. w24.03 23-24 ¶13-15
Chisulo, Okutobala 18
Lutilirani kulomba, ndipo mupikenge. Lutilirani kupenja, ndipo musangenge. Lutilirani kukhung’uska, ndipo kumujulikiraninge.—Luka 11:9.
Kasi mukukhumbikwira kuzikira chomene? Para ninthena lombani kuti muzikirenge. Kuzikira ntchimoza mwa vipambi vya mzimu. (Gal. 5:22, 23) Ntheura tingalomba mzimu utuŵa na kumupempha Yehova kuti watovwire kuŵa na vipambi vya mzimu. Para takumana na chinthu chinyake icho chingayezga kuzikira kwithu, tikwenera ‘kulutilira kulomba’ mzimu utuŵa kuti utovwire kuŵa ŵakuzikira. (Luka 11: 13) Tingamulombaso Yehova kuti watovwire kuwona vinthu nga umo iyo wakuviwonera. Pamanyuma pa kulomba, tikwenera kuchita vyose ivyo tingafiska kuti tiŵenge ŵakuzikira zuŵa lililose. Para tikulomba chomene kuti tiŵe ŵakuzikira na kuyezgayezga kuŵa na mukhaliro uwu, ndipo tiŵenge chomene ŵakuzikira nanga ni para tikaŵa munthu wambura kuzikira pakwamba. Vikovwiraso kuti tighanaghanirengepo pa viyelezgero vya mu Baibolo. Baibolo lili na viyelezgero vinandi vya ŵanthu awo ŵakaŵa ŵakuzikira. Para tingaghanaghanirangapo pa viyelezgero ivi, tingasambira nthowa za umo tingalongolera kuzikira. w23.08 22 ¶10-11
Sabata, Okutobala 19
Ponyani mikwawu yinu kuti mukore somba.—Luka 5:4.
Yesu wakamusimikizgira mpositole Petrosi kuti Yehova wamupwelelerenge. Yesu uyo wakaŵa kuti wawuskika panyengo iyi wakachitaso munthondwe unyake pakovwira Petrosi na ŵapositole ŵanyake kukora somba zinandi. (Yoh. 21:4-6) Tikukayika yayi kuti munthondwe uwu ukamusimikizgira Petrosi kuti Yehova wangaŵapa ivyo ŵakukhumbikwira mwambura kusuzga. Panji ŵapositole panyengo iyi ŵakakumbukira mazgu gha Yesu ghakuti Yehova wawovwirenge awo ŵakulutilira “kupenja dankha Ufumu wake.” (Mat. 6:33) Mwakukolerana na fundo iyi, Petrosi wakamba kudangizga uteŵeti pakwamba, bizinesi yake yayi. Wakapharazga mwachikanga chomene pa Pentekoste 33 C.E., ndipo ivi vikawovwira kuti ŵanthu ŵanandi ŵazomere uthenga uwemi. (Mil. 2:14, 37-41) Kufuma apo wakawovwira Ŵasamariya na ŵamitundu kuzomera Khristu. (Mil. 8:14-17; 10:44-48) Yehova wakamugwiliskira ntchito Petrosi munthowa yapadera chomene pakovwira ŵanthu ŵamitundu yose kwiza mu mpingo waunenesko. w23.09 20 ¶1; 23 ¶11
Mande, Okutobala 20
Usange muniphalirenge yayi loto lane pamoza na ng’anamuro lake, mudumulikenge tuchokotuchoko.—Dan. 2:5.
Pakati pajumpha vyaka viŵiri kufuma apo Ŵababuloni ŵakaparanyira Yerusalemu, Themba Nebukadinezara likalota loto lakofya lakukhwaskana na chikozgo. Themba ili likati likomenge ŵanalume wose ŵavinjeru, kusazgapo Daniyeli, usange ŵatondekenge kuyowoya ivyo lalota kweniso kupatawulira ng’anamuro lake. (Dan. 2:3-5) Daniyeli wakeneranga kuchitapo kanthu mwaluŵiro, chifukwa watondekenge mphanyi ŵanthu ŵanandi ŵakakomeka. Iyo “wakanjira na kupempha themba kuti limupe nyengo kuti waliphalire ng’anamuro la loto lake.” (Dan. 2:16) Ivyo wakachita apa vikulongora kuti Daniyeli wakaŵa na chikanga kweniso chipulikano. Chifukwa wuli tikuyowoya nthena? Chifukwa palije mu Baibolo apo pakuyowoya kuti Daniyeli wakaŵa kuti wapatawulirapo kale maloto. Wakapempha ŵanyake kuti “ŵalombe Chiuta wakuchanya kuti waŵachitire lusungu na kuŵavumbulira chisisi ichi.” (Dan. 2:18) Yehova wakazgora malurombo ghawo. Na wovwiri wa Chiuta, Daniyeli wakapatawulira loto la Nebukadinezara. Ntheura Daniyeli na ŵabwezi ŵake aŵa ŵakakomeka yayi. w23.08 3 ¶4
Chiŵiri, Okutobala 21
Uyo wazizipizgenge m’paka kuumaliro ndiyo wazamuponoskeka.—Mat. 24:13.
Ghanaghanirani vyandulo ivyo vikuŵapo chifukwa cha kuzikira. Para ndise ŵakuzikira, tikuŵa ŵakukondwa kweniso mtima withu ukuŵa mumalo. Ntheura, kuzikira kungatovwira kuti tiŵe na umoyo uwemi kweniso kuti maghanoghano ghithu ghaŵe ghakukhazikika. Para tikuzikira nawo ŵanyithu, tikuŵa nawo paubwezi uwemi. Tikuŵa ŵakukolerana chomene mu mpingo withu. Usange munthu munyake watikhuŵazga ndipo tikukwiya luŵiro yayi vingawovwira kuti vinthu vileke kuhenipirathu. (Sal. 37:8, mazgu ghamusi; Zinth. 14:29) Kweni chakuluska vyose, tikuyezga Adada ŵithu ŵakuchanya na kusendelera chomene kwa iwo. Kuzikira ni mukhaliro wakukondweska nadi uwo tose tikupindura nawo. Nangauli ntchipusu yayi nyengo zose kuŵa ŵakuzikira, kweni na wovwiri wa Yehova, tingalutilira kuŵa nawo mukhaliro uwu. Ndipo apo tikulindilira mwakuzikira charu chiphya, tingaŵa na chigomezgo chose kuti “jiso la Yehova likulaŵiska awo ŵakumopa, awo ŵakulindilira lusungu lwake.” (Sal. 33:18) Mphanyi tose taŵikapo mtima kulutilira kuvwara mukhaliro uwu wakuzikira. w23.08 22 ¶7; 25 ¶16-17
Chitatu, Okutobala 22
Usange [chipulikano] chilije milimo, ntchakufwa.—Yak. 2:17.
Yakobe wakati munthu wangayowoya kuti wali na chipulikano, kweni kasi milimo yake yili nkhu? (Yak. 2:1-5, 9) Yakobe wakayowoyaso vya munthu munyake uyo wangawona ‘mubali panji mudumbu walije chakuvwara panji chakurya’ kweni wakumovwira yayi. Nanga munthu wanthena wangayowoya kuti wali na chipulikano, kweni vyakuchita vyake vikulongora yayi, ntheura chipulikano chake ntchambura ntchito. Nga umo Yakobe wakayowoyera, ‘chipulikano usange chilije milimo, ntchakufwa.’ (Yak. 2:14-16) Yakobe wakayowoya vya Rahabi kuti ntchiyelezgero chiwemi cha munthu uyo wakalongora kuti wakaŵa na chipulikano kwizira mu vyakuchita vyake. (Yak. 2:25, 26) Iyo wakapulika vya Yehova kweniso wakamanya kuti wakawovwiranga Ŵaisrayeli. (Josh. 2:9-11) Wakalongora chipulikano kwizira mu milimo yake, pakuvikilira mphachi ziŵiri izo umoyo wawo ukaŵa pangozi. Ntheura mwanakazi wambura kufikapo uyu, uyo wakaŵa Muisrayeli yayi, wakapimika murunji nga umo wakaŵira Abrahamu. Chiyelezgero chake chikulongora kuzirwa kwa kuŵa na chipulikano icho chili na milimo. w23.12 5-6 ¶12-13
Chinayi, Okutobala 23
Mphanyi mwajintha misisi na kukhazikika pa fawundeshoni.—Efe. 3:17.
Pakuŵa Ŵakhristu, tikwenera kukhorwa waka na visambizgo vyakwambilira vya mu Baibolo yayi. Tikwenera kusambira “nanga ni vinthu vyakubisika vya Chiuta,” ndipo mzimu utuŵa wa Chiuta ungatovwira. (1 Kor. 2:9, 10) Namwe mungachita makora kwambapo kusambira Baibolo pamwekha kuti musendelere kufupi na Yehova. Mwachiyelezgero, mungachita kafukufuku pa umo Yehova wakalongoleranga chitemwa ku ŵateŵeti ŵake mu nyengo yakale na kuwona umo wakulongolera kuti namweso wakumutemwani chomene. Mungasandaso ndondomeko iyo Yehova wakanozga ya umo Ŵaisrayeli ŵakamusoperanga na kuyaniska na ndondomeko iyo Ŵakhristu ŵakumusopera mazuŵa ghano. Nyengo zinyake mungasanda mwakupwelelera mauchimi agho Yesu wakafiska pa nyengo iyo wakaŵa pa charu chapasi. Mungaŵa ŵakukondwa chomene para mungasambira nkhani izi mwakugwiliskira ntchito Watch Tower Publications Index panji Buku Lakupenjera Nkhani la Ŵakaboni ŵa Yehova. Kuchita kafukufuku pakusambira Baibolo kukhozgenge chipulikano chinu kweniso kumovwiraninge “kumumanya nadi Chiuta.”—Zinth. 2:4, 5. w23.10 18-19 ¶3-5
Chinkhondi, Okutobala 24
Kuluska vyose mutemwanenge chomene, chifukwa chitemwa chikubenekelera zakwananga zinandi.—1 Pet. 4:8.
Mazgu ghakuti “chomene” agho mpositole Petrosi wakagwiliskira ntchito apa ghakung’anamura “kutandawura.” Chigaŵa chachiŵiri cha vesi ili chikulongosora ivyo tingachita usange tili na chitemwa ichi. Usange tikuŵatemwa chomene ŵabali ŵithu vikutovwira kuti tibenekelerenge zakwananga zawo zinandi. Chitemwa ichi tingachiyelezgera na salu iyo yikutandawuka. Usange vinthu ivyo tikukhumba kubenekelera ni vinandi kweni salu njichoko, tingachita kuyitanura kuti m’paka yibenekelere. Chitemwa ichi nacho tingachita kutanura m’paka chibenekelere “zakwananga zinandi.” Kubenekelera ni nthowa yinyake yakuyowoyera kuti tagowoka. Para tikuŵatemwa chomene ŵabali ŵithu tiŵagowokerenge maubudi ghawo. Chitemwa chithu ku ŵabali chikwenera kuŵa chakukhora chomene mwakuti tingafiska kuŵagowokera nanga ni apo ntchakusuzga kuchita nthena. (Kol. 3:13) Usange tikugowokera ŵanji, tikulongora kuti tili na chitemwa chanadi kweniso tikulongora kuti tikukhumba kukondweska Yehova. w23.11 11-12 ¶13-15
Chisulo, Okutobala 25
Shafani wakamba kuliŵazga pamaso pa themba.—2 Mid. 34:18.
Apo Themba Yosiya likaŵa na vyaka 26, likamba kunozga tempile. Apo mulimo ukaŵa mukati, “buku la Dango la Yehova ilo likapelekeka mwa Mozesi” likasangika. Themba likati lapulika ivyo buku ili likayowoyanga, mwaluŵiro likachitapo kanthu na kusintha vinthu vinyake kuti likolerane na ivyo vikaŵa mu buku ili. (2 Mid. 34:14, 19-21) Kasi mungatemwa kuti muŵazgenge Baibolo sabata yiliyose? Usange mukuŵazga nakale, kasi mukukondwa apo mukuŵazga? Kasi mukusunga mavesi agho ghangamovwirani imwe pamwekha? Apo Yosiya wakaŵa na vyaka pafupifupi 39, wakanangiska vinthu ivyo vikapangiska kuti wataye umoyo wake. Wakajithemba m’malo mwa kufumba ulongozgi kwa Yehova. (2 Mid. 35:20-25) Apa sambiro ndakuwonekerathu. Kwali tili na vyaka vilinga panji tasambira Baibolo kwa vyaka vinandi, tikwenera kulutilira kupenja Yehova. Ivi vikusazgapo kulomba ulongozgi kwa Yehova nyengo zose, kusambira Mazgu ghake, na kupulikira ulongozgi wa Ŵakhristu ŵakukhwima mwauzimu. Para tichitenge nthena, ntchakuwonekerathu kuti tigegenge kubudiska vinthu vikuru ndipo tiŵenge ŵakukondwa.—Yak. 1:25. w23.09 12 ¶15-16
Sabata, Okutobala 26
Chiuta wakususka ŵakujikuzga, kweni ŵakujiyuyura wakuŵapa lusungu lukuru.—Yak. 4:6.
Baibolo likuzunura ŵanakazi ŵanandi awo ŵakatemwanga Yehova na kumuteŵetera. Ŵakaŵa “ŵakujikora mu vyakuchita” kweniso “ŵakugomezgeka mu vinthu vyose.” (1 Tim. 3:11) Ŵadumbu ŵachiwukirano ŵangasanga mu mpingo wawo ŵanakazi awo mbakukhwima mwauzimu awo ŵangaŵayezga. Imwe ŵadumbu ŵachiwukirano, ghanaghanirani ŵadumbu ŵakukhwima mwauzimu awo mukuŵamanya awo ŵangaŵa vyakuwonerapo vinu. Wonani makhaliro ghawo ghawemi na kughanaghanira umo namwe mungalongolera makhaliro agho. Kujiyuyura ni mukhaliro unyake wakuzirwa uwo Mkhristu wakukhwima mwauzimu wakwenera kuŵa nawo. Usange mwanakazi ngwakujiyuyura, wakuŵa paubwezi uwemi na Yehova kweniso ŵanji. Mwachiyelezgero, mwanakazi uyo wakutemwa Yehova wakuchindika ndondomeko ya umutu panji ya udangiliri iyo Yehova wali kukhazikiska. (1 Kor. 11:3) Ndondomeko iyi yikugwira ntchito ku mpingo na mu mbumba wuwo. w23.12 18-19 ¶3-5
Mande, Okutobala 27
Ntheura ŵafumu nawo ŵatemwenge ŵawoli ŵawo nga ni mathupi ghawo.—Efe. 5:28.
Yehova wakukhazga kuti mfumu watemwenge muwoli wake na kumupwelelera mwakuthupi na mwauzimu wuwo. Kuŵa na kaghanaghaniro kawemi, kuchindika ŵanakazi, kweniso kuŵa ŵakugomezgeka, vimovwiraninge kuti muŵe mfumu muwemi. Para mwatora nyengo zinyake mungazakaŵa dada. Kasi mungasambirako vichi kwa Yehova pa nkhani yakuŵa dada muwemi? Pali vinandi. (Efe. 6:4) Yehova wakamuphalira Mwana wake, Yesu, kuti wakumutemwa kweniso wakukondwa nayo. (Mat. 3:17) Usange muzamuŵa dada, nyengo zose muzakaŵaphalirenge ŵana ŵinu kuti mukuŵatemwa. Muzakaŵawongenge pafupipafupi pa viwemi ivyo ŵachita. Ŵadada awo ŵakuyezga Yehova, ŵakovwira ŵana ŵawo kuti ŵazakaŵe ŵabali kweniso ŵadumbu ŵakukhwima mwauzimu. Mungambako kunozgekera sono nthena kuŵa dada muwemi, mwakupwelelera ŵamumbumba yinu kweniso ŵabali na ŵadumbu ku mpingo. Kweniso muŵaphalirenge kuti mukuŵatemwa ndiposo kuti mbakuzirwa kwa imwe.—Yoh. 15:9. w23.12 28-29 ¶17-18
Chiŵiri, Okutobala 28
[Yehova] wamukhozganinge mu nyengo zinu.—Yes. 33:6.
Nangauli ndise ŵateŵeti ŵakugomezgeka ŵa Yehova, kweni nase tikusangana na masuzgo, nga umo vikuŵira na ŵanthu wose. Kweniso nyengo zinyake tikutambuzgika panji kususkika na ŵanthu awo ŵakutinkha ŵanthu ŵa Chiuta. Nangauli Yehova wakutivikilira mwamunthondwe yayi, kweni wakulayizga kuti watovwirenge. (Yes. 41:10) Na wovwiri wake, tingalutilira kuŵa ŵakukondwa, kusankha makora vinthu, kweniso kulutilira kuŵa ŵakugomezgeka nanga tingasangana na suzgo likuru chomene. Yehova wakulayizga kuti watipenge “mtende wa Chiuta,” nga umo Baibolo likuyowoyera. (Fil. 4:6, 7) Mtende uwo ukuyowoyeka apa ukung’anamura kukhazikika maghanoghano kweniso mtima chifukwa cha kuŵa paubwezi wakukhora na iyo. Mtende uwu “ukuluska maghanoghano ghose”; nguwemi chomene kuluska umo tingaghanaghanira. Mwachiyelezgero, kasi muli kulombapo chomene kwa Yehova ndipo pamanyuma mukazizwa chifukwa chakuti mukasanga mtende wa mu mtima? Uwu ndiwo tikuti “mtende wa Chiuta.” w24.01 20 ¶2; 21 ¶4
Chitatu, Okutobala 29
Lekani nilumbe Yehova, chilichose mukati mwane chilumbe zina lake lituŵa.—Sal. 103:1.
Awo ŵakutemwa Chiuta ŵakuŵa ŵakukhumbisiska kulumba zina lake na mtima wawo wose. Davide wakamanya kuti para tikulumba zina la Yehova ndikuti tikulumba Yehova iyomwenecho. Zina la Yehova likusazgapo lumbiri lwake, ntheura likutikumbuska za mikhaliro yake yose yakukondweska na milimo yake. Davide wakakhumbanga kuti nyengo zose watuŵiskenge zina la Adada ŵake na kulilumba. Wakakhumbanga kuchita nthena na ‘chilichose mukati mwake,’ panji kuti na mtima wose. Mwakuyana waka, Ŵalevi ŵakadangiliranga pakulumba Yehova. Mwakujiyuyura ŵakazomerezga kuti mazgu ghawo ghangapeleka mwakukwana yayi malumbo agho zina la Yehova likukhumbikwira. (Neh. 9:5) Mwambura kukayika, Yehova wakwenera kuti wakakondwa chomene na kulumbika kwanthena, kwakufumira pasi pa mtima. w24.02 9 ¶6
Chinayi, Okutobala 30
Mulimose umo talutira panthazi, tiyeni tilutilire kwenda mwakwenelera munthowa yeneyiyi.—Fil. 3:16.
Yehova wawonenge kuti muli ŵakutondeka yayi para mwatondeka kufiska chilato icho ntchinonono kwa imwe. (2 Kor. 8:12) Sambiranipo kanthu para mwasangana na vyakugongoweska. Kuluwa yayi ivyo mwafiskapo kale. Baibolo likuyowoya kuti “Chiuta ngwambura urunji yayi kuti waluwe mulimo winu.” (Heb. 6:10) Ntheura namwe mukwenera yayi kuluwa ivyo mwafiskapo kale. Mughanaghanirenge vilato ivyo mwafiskapo kale, nga kuŵa paubwezi uwemi na Yehova, kupharazga, kweniso kubatizika. Nga umo mukafiskira vilato vinyake ivi, mungalutilira kuŵikapo mtima na kufiskaso vilato vinyake ivyo muli navyo sono. Na wovwiri wa Yehova, mungafiska chilato chinu. Apo muli mu nthowa kuti mufiske chilato chinu, mukumbukenge kuwona umo Yehova wakumovwilirani ndipo ivi vimovwiraninge kuti mukondwenge apo mukuyezgayezga kuti mufiske chilato chinu. (2 Kor. 4:7) Ndipo para mugongowenge yayi, mutumbikikenge chomene.—Gal. 6:9. w23.05 31 ¶16-18
Chinkhondi, Okutobala 31
Adada ŵakumutemwani, pakuti imwe mukanitemwa ine ndipo mwagomezga kuti nili kwiza nga mwimiliri wa Chiuta.—Yoh. 16:27.
Yehova wakusanga nthowa zakulongolera ŵanthu ŵake kuti wakuŵatemwa kweniso wakukondwa nawo. Malemba ghakulongora nyengo ziŵiri apo Yehova wakaphalira Yesu kuti ni Mwana wake wakutemweka, uyo wakukondwa nayo. (Mat. 3:17; 17:5) Kasi mungatemwa kuti Yehova wamuphalirani yekha kuti wakukondwa namwe? Yehova wakuyowoya nase maso na maso yayi, kweni wakuyowoya nase kwizira mu Mazgu ghake. Para tikuŵazga mazgu gha Yesu agho ghali mu mabuku gha Makani Ghawemi, vikuŵa nga ‘tikupulika’ Yehova wakuyowoya kuti wakukondwa nase. Yesu wakayezga mikhaliro ya Awiske mwakufikapo. Ntheura usange tikuŵazga vyakuti Yesu wakakondwanga nawo ŵasambiri ŵake ŵakugomezgeka nangauli nawo ŵakaŵa ŵambura kufikapo, vikuŵa nga tikupulika Yehova wakuyowoya mazgu ghakuyana waka kwa ise. (Yoh. 15:9, 15) Para tikukumana na viyezgo, ndikuti Chiuta waleka kukondwa nase yayi. M’malo mwake, viyezgo vikutipa mwaŵi wakulongolera kuti tikumutemwa chomene Chiuta kweniso kuti tikumugomezga.—Yak. 1:12. w24.03 28 ¶10-11