LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • es25 pp. 108-118
  • Novembala

Vidiyo palije.

Phepani, pali suzgo linyake.

  • Novembala
  • Kusanda Malemba Zuŵa na Zuŵa—2025
  • Mitu Yichoko
  • Chisulo, Novembala 1
  • Sabata, Novembala 2
  • Mande, Novembala 3
  • Chiŵiri, Novembala 4
  • Chitatu, Novembala 5
  • Chinayi, Novembala 6
  • Chinkhondi, Novembala 7
  • Chisulo, Novembala 8
  • Sabata, Novembala 9
  • Mande, Novembala 10
  • Chiŵiri, Novembala 11
  • Chitatu, Novembala 12
  • Chinayi, Novembala 13
  • Chinkhondi, Novembala 14
  • Chisulo, Novembala 15
  • Sabata, Novembala 16
  • Mande, Novembala 17
  • Chiŵiri, Novembala 18
  • Chitatu, Novembala 19
  • Chinayi, Novembala 20
  • Chinkhondi, Novembala 21
  • Chisulo, Novembala 22
  • Sabata, Novembala 23
  • Mande, Novembala 24
  • Chiŵiri, Novembala 25
  • Chitatu, Novembala 26
  • Chinayi, Novembala 27
  • Chinkhondi, Novembala 28
  • Chisulo, Novembala 29
  • Sabata, Novembala 30
Kusanda Malemba Zuŵa na Zuŵa—2025
es25 pp. 108-118

Novembala

Chisulo, Novembala 1

Mwafumiska mazgu gha malumbo mu milomo ya ŵana na ŵabonda.—Mat. 21:16.

Usange ndimwe mupapi, wovwirani ŵana ŵinu kunozgekera mazgoro ghakwenelera ghakuyana na msinkhu wawo. Nyengo zinyake, nkhani zikuruzikuru, nga zakukhwaskana na masuzgo gha mu nthengwa panji nkhani zakukhwaskana na kugonana, zikusambirika pa maungano, kweni kanandi pakuŵa waka ndime yimoza panji ziŵiri izo mwana wangazgorapo. Kweniso wovwirani ŵana ŵinu kumanya chifukwa icho ni nyengo zose yayi apo ŵaŵawuskenge para ŵawuska woko. Para mwaŵalongosolera fundo iyi ŵakhuŵarenge yayi para ŵasankha ŵanyake kuti ŵazgorepo m’malo mwa iwo. (1 Tim. 6:18) Tose tinganozgekera mazgoro ghakukhozga agho ghangachindika Yehova na kukhozga Ŵakhristu ŵanyithu. (Zinth. 25:11) Nangauli nyengo zinyake tingayowoyapo ivyo vikatichitikirapo, kweni tikwenera kugega kuyowoya chomene vya ise. (Zinth. 27:2; 2 Kor. 10:18) Tikwenera kuyezgayezga kuŵika mtima pa Yehova, Mazgu ghake, kweniso ŵanthu ŵake nga ni gulu.—Chivu. 4:11. w23.04 24-25 ¶17-18

Sabata, Novembala 2

Tileke kugona tulo nga umo ŵakuchitira ŵanthu wose, kweni tiŵe maso na kusungilira maghanoghano ghithu.—1 Tes. 5:6.

Chitemwa ntchakuzirwa chomene kuti tiŵe maso kweniso kusungilira maghanoghano ghithu. (Mat. 22:​37-39) Kutemwa Chiuta kukutovwira kuti tizizipizgenge para tikupharazga nanga ni apo kungatichemera masuzgo. (2 Tim. 1:​7, 8) Chifukwa chakuti awo mbambura kugomezga nawo tikuŵatemwa, tikulutilira kupharazga pa telefoni panji pa makalata. Tikulutilira kugomezga kuti zuŵa linyake ŵazengezgani ŵithu ŵazamusintha na kwamba kuchita icho ntchakunyoloka. (Ezek. 18:​27, 28) Kutemwa ŵazengezgani ŵithu kukusazgaposo kutemwa Ŵakhristu ŵanyithu. Tikulongora chitemwa ichi para ‘tikukhwimiskana na kuzengana.’ (1 Tes. 5:11) Nga umo ŵakuchitira ŵasilikari kuti ŵakovwirana pa nkhondo, nase tikukhwimiskana yumoza na munyake. Tingaŵakhuŵazgira dala yayi ŵabali na ŵadumbu ŵithu panji kuŵawezgera uheni pa uheni. (1 Tes. 5:​13, 15) Tikulongoraso chitemwa para tikuchindika ŵabali awo ŵakulongozga mu mpingo.—1 Tes. 5:12. w23.06 10 ¶6; 11 ¶10-11

Mande, Novembala 3

Para [Yehova] wayowoya chinthu, asi wachichitenge?—Maŵa. 23:19.

Nthowa yimoza iyo tingakhozgera chipulikano chithu nkhughanaghanirapo pa sembe yakuwombora. Sembe yakuwombora yikutisimikizgira kuti malayizgo gha Chiuta ghazamufiskika nadi. Para tikughanaghanirapo mwakupwelelera pa chifukwa icho sembe yakuwombora yikapelekekera, kweniso umo Yehova wakajikomolera kuti wapeleke sembe iyi, tikukhozga chipulikano chithu kuti layizgo la Chiuta lakuti charu chiphya icho muzamuŵa umoyo uwemi lifiskikenge nadi. Chifukwa wuli tikuyowoya nthena? Kasi vikenda wuli kuti sembe yakuwombora yipelekeke? Yehova wakatuma Mwana wake wapadera, uyo wakamutemwanga chomene, kufuma kuchanya na kuzakababika pa charu chapasi nga munthu wakufikapo. Apo wakaŵa pa charu chapasi, Yesu wakazizipizga masuzgo ghakupambanapambana. Pamanyuma wakatambuzgika na kufwa nyifwa yakuŵinya chomene. Apa Yehova wakapeleka mtengo wakudura chomene. Chiuta withu wachitemwa wakatenge wazomerezgenge yayi kuti Mwana wake wasuzgike na kufwa kuti tikhale umoyo uwemi kwakanyengo kachoko waka. (Yoh. 3:16; 1 Pet. 1:​18, 19) Chifukwa chakuti wakapeleka mtengo wakudura chomene, Yehova wazamufiska nadi layizgo lake la charu chiphya umo ŵanthu ŵazamukhala kwamuyirayira. w23.04 27 ¶8-9

Chiŵiri, Novembala 4

Iwe Nyifwa, kasi luwozga lwako luli nkhu?—Hos. 13:14.

Kasi Yehova ngwakukhumbisiska nadi kuwuska ŵakufwa? Enya. Wakawovwira na mzimu utuŵa ŵanthu ŵanandi awo ŵakalembako Baibolo kuti ŵalembe layizgo lake la chiwuka cha munthazi. (Yes. 26:19; Chivu. 20:​11-13) Ndipo para Yehova walayizga, nyengo zose wakufiska. (Josh. 23:14) Nakuti Yehova ngwakukhumbisiska chomene kuwuska awo ŵali kufwa. Ghanaghanirani ivyo Yobu wakayowoya. Wakagomezganga na mtima wose kuti nanga wangafwa, Yehova wakudokera kuzakamuwonaso kuti ngwamoyo. (Yobu 14:​14, 15, mazgu ghamusi) Yehova wakudokeraso chomene kuzakaŵawonaso ŵateŵeti ŵake wose awo ŵali kufwa. Ngwakukhumbisiska kuŵawuska, mwakuti ŵaŵe na umoyo uwemi kweniso wakukondweska. Wuli pakuyowoya za ŵanthu mabiliyoni ghanandi awo ŵali kufwa kwambura kuŵa na mwaŵi wakumanya unenesko wakukhwaskana na Yehova? Chiuta withu wachitemwa wakukhumbaso kuŵawuska ŵanthu aŵa. (Mil. 24:15) Wakukhumba kuti nawo ŵazakaŵe na mwaŵi wakuŵa ŵabwezi ŵake na kukhala kwamuyirayira pa charu chapasi.—Yoh. 3:16. w23.04 9 ¶5-6

Chitatu, Novembala 5

Tisangenge nkhongono mwa Chiuta.—Sal. 108:13.

Kasi mungachita wuli kuti mukhozge chigomezgo chinu? Mwachiyelezgero, usange chigomezgo chinu ntchakuti muzamukhala pa charu chapasi kwamuyirayira, ŵazgani nkhani zakukhwaskana na Paradiso na kughanaghanirapo. (Yes. 25:8; 32:​16-18) Ghanaghanirani umo umoyo uzamuŵira mu charu chiphya. Ndipo mujitore kuti muli mu charu chiphya. Para nyengo na nyengo tikughanaghanirapo chigomezgo chithu cha charu chiphya, masuzgo ghithu tighawonenge kuti ‘ngakanyengo na yakupepuka.’ (2 Kor. 4:17) Chigomezgo icho Yehova watipa chingatovwira kuzizipizga masuzgo. Iyo wali kupeleka kale ivyo mukukhumbikwira kuti mupokere nkhongono kufuma kwa iyo. Ntheura para mukukhumba wovwiri kuti mufiske mulimo winu, muzizipizge chiyezgo, panji mulutilire kukondwa, mulombani Yehova kufumira pasi pamtima kweniso musambirenge pamwekha. Zomerani wovwiri kufuma ku ŵabali na ŵadumbu. Nyengo na nyengo mughanaghanirengepo chigomezgo chinu. Para muchitenge nthena “mukhozgekenge na nkhongono zose mwakuyana na nkhongono [za Chiuta] zauchindami kuti muzizipizge vinthu vyose ndiposo muzikire na kuŵa na chimwemwe.”—Kol. 1:11. w23.10 17 ¶19-20

Chinayi, Novembala 6

Muwongenge Chiuta pa chilichose.—1 Tes. 5:18.

Tili na vifukwa vinandi chomene vyakuwongera Yehova mu malurombo ghithu. Tingamuwonga chifukwa cha vinthu ivyo tili navyo, nakuti kuchita nthena ntchakwenelera nadi chifukwa chawanangwa chilichose chiwemi chikufuma kwa iyo. (Yak. 1:17) Mwachiyelezgero, tingamuwonga chifukwa cha kutowa kwa charu chapasi na vilengiwa ivyo vilimo. Tingamuwongaso chifukwa cha kutipa umoyo, mbumba, ŵabwezi kweniso chigomezgo chiwemi cha munthazi. Kweniso tikwenera kumuwonga Yehova chifukwa cha kutizomerezga kuŵa nayo paubwezi uwemi chomene. Tingakhumbikwira kuyezgayezga kuti tighanaghanirepo vifukwa ivyo ise patekha tili navyo vyakumuwongera Yehova. Tikukhala mu charu icho ŵanthu ŵanandi mbambura kuwonga. Kanandi ŵanthu ŵakuŵika mtima pa ivyo ŵakukhumba m’malo mwa kuŵika mtima pa ivyo ŵangachita kuti ŵalongore kuwonga pa ivyo ŵali navyo. Usange nase tingaŵalondezga, malurombo ghithu ghaŵenge waka na mundandanda wa vinthu ivyo tikukhumba pera. Kuti ivi vileke kutichitikira, tikwenera kulutilira kuŵa na mzimu wakuwonga, ndipo timuwongenge Yehova pa vyose ivyo wakutichitira.—Luka 6:45. w23.05 4 ¶8-9

Chinkhondi, Novembala 7

Walutilire kulomba mu chipulikano, kwambura na kukayika.—Yak. 1:6.

Yehova pakuŵa Dada withu wachitemwa, wakukhumba yayi kuti tisuzgikenge. (Yes. 63:9) Ndipouli, wakutivikilira ku viyezgo vyose yayi, ivyo tingaviyaniska na milonga panji dimi la moto. (Yes. 43:2) Nangauli vili nthena, wakutilayizga kuti watovwirenge kuti ‘tambuke’ panji kuti titonde viyezgo ivi. Ndipo wazomerezgenge yayi kuti viyezgo ivyo tikukumana navyo vinange ubwezi withu na iyo. Yehova wakutipaso nkhongono yake ya mzimu utuŵa kuti yitovwire kuzizipizga. (Luka 11:13; Fil. 4:13) Ntheura, tingaŵa na chigomezgo chose kuti nyengo zose Yehova watipenge ivyo tikukhumbikwira nadi mwakuti tizizipizge na kulutilira kuŵa ŵakugomezgeka kwa iyo. Yehova wakukhazga kuti timugomezgenge. (Heb. 11:6) Nyengo zinyake, tingamba kuwona nga kuti suzgo yithu yajumpha msinkhu withu. Tingamba na kukayikira wuwo usange Yehova watovwirenge. Kweni Baibolo likutisimikizgira kuti na nkhongono ya Chiuta ‘tingaŵenuka chiliŵa.’ (Sal. 18:29) Ntheura m’malo mwa kulutilira kukayikira, tikwenera kulomba na chipulikano chose, na kugomezga kuti Yehova wazgorenge malurombo ghithu.—Yak. 1:​6, 7. w23.11 22 ¶8-9

Chisulo, Novembala 8

Madimi [gha chitemwa] ni moto wakugolera, dimi la Ya. Maji ghakututuka ghangazimwa yayi chitemwa, nanga ni milonga yingachikukura yayi.—Sumu. 8:​6, 7.

Lemba ili likulongosora makora chomene umo chitemwa chanadi chiliri! Mazgu agha ghakusimikizgira awo ŵali mu nthengwa kuti ŵangafiska kutemwana zanadi. Kuti ŵakutorana ŵalutilire kutemwana umoyo wawo wose, waliyose wakwenera kuyezgayezga kuti chitemwa chileke kuzizima. Kuti tipulikiske, tiyeni tighanaghanire za moto. Moto ungalutilira kugolera chikuru pali munthu wakuwusonkhezga. Kweni para munthu waleka kusonkhezga, moto ukuzimwa. Mwakuyana waka, chitemwa cha pakati pa mfumu na muwoli chingalutilira kuŵa chankhongono pekha para ŵenecho ŵakukhozga ubwezi wawo. Nyengo zinyake ŵakutorana ŵangawona kuti chitemwa chawo chamba kuzizima, chomenechomene para ŵasangana na suzgo la vya ndalama, ulwari, panji kulera ŵana. Kuti “dimi la Ya” lileke kuzimwa, mfumu na muwoli, wose ŵakwenera kuyezgayezga kuŵa paubwezi wakukhora na Yehova. w23.05 20-21 ¶1-3

Sabata, Novembala 9

Ungopanga yayi.—Dan. 10:19.

Kasi tikwenera kuchita vichi kuti tiŵe na chikanga? Ŵapapi ŵithu ŵangatichiska kuti tiŵe ŵachikanga, kweni tingachita kuhara yayi mukhaliro uwu nanga iwo ŵangaŵa kuti ŵali na chikanga. Kuŵa na chikanga vikuyana waka na kusambira luso liphya. Nthowa yimoza iyo mungasambilira luso, nkhulaŵisiska chomene ivyo msambizgi wakuchita ndipo pamanyuma kumuyezga. Mwakuyana waka, tingaŵa ŵachikanga para tikulaŵisiska chomene umo ŵanji ŵakulongolera mukhaliro uwu na kuŵayezga. Nga ni Daniyeli, nase tikwenera kughamanya makora Mazgu gha Chiuta. Tikwenera kuŵa paubwezi wakukhora na Yehova, ndipo tingachita nthena para tikuyowoyeskana nayo mu lurombo kanandi waka na kumuphalira umo tikujipulikira. Kweniso tikwenera kumugomezga Yehova, na kukhorwa kuti nyengo zose watovwirenge. Para tachita nthena, tiŵenge ŵachikanga usange chipulikano chithu chayezgeka. Ŵanthu awo ŵakulongora chikanga ŵakuchindikika na ŵanji. Kweniso ŵangawovwira kuti ŵanthu ŵamitima yiwemi ŵamumanye Yehova. Ntheura tili na vifukwa vyakupulikikwa vyakuŵira ŵachikanga. w23.08 2 ¶2; 4 ¶8-9

Mande, Novembala 10

Musande vinthu vyose.—1 Tes. 5:21.

Lizgu la Chigiriki ilo lili kung’anamurika kuti “musande vinthu,” ŵakaliyowoyanga pa nkhani ya kuyezga vinthu vyakuzirwa nga ni golide panji siliva kuti ŵawone usange ni vyanadi. Nase tikwenera kuyezga ivyo tikupulika panji kuŵerenga kuti timanye usange ni vyaunenesko nadi. Kuchita nthena nkhwakuzirwa chomene apo suzgo yikuru yikusendelera. M’malo mwa kugomezga waka chilichose icho ŵanthu ŵakuyowoya, ise tigwiliskirenge ntchito luso lwa kughanaghana na kuyaniska ivyo ŵanthu ŵakuyowoya na ivyo Baibolo likuyowoya kweniso gulu la Yehova. Para tichitenge nthena, tipusikikenge yayi na mautesi gha viŵanda. (Zinth. 14:15; 1 Tim. 4:1) Nga ni gulu, ŵateŵeti ŵa Yehova ŵazamupona pa suzgo yikuru. Kweni tikumanya yayi ivyo vichitikirenge waliyose payekha. (Yak. 4:14) Mulimose umo vingaŵira, kwali suzgo yikuru yizamutisanga tichali ŵamoyo kwali yizamusanga tafwa, kweni tizamupokera njombe ya umoyo wamuyirayira chikuru tikulutilira kuŵa ŵakugomezgeka. Mphanyi tose talutilira kughanaghanira vya chigomezgo chithu chiwemi chomene ichi na kuŵa ŵakunozgeka apo zuŵa la Yehova likusendelera. w23.06 13 ¶15-16

Chiŵiri, Novembala 11

Yavumbura chisisi chake ku ŵateŵeti ŵake.—Am. 3:7.

Tikumanya yayi umo mauchimi ghanyake gha mu Baibolo ghazamufiskikira. (Dan. 12:​8, 9) Kweni chifukwa chakuti tikumanya yayi umo uchimi unyake uzamufiskikira, vikung’anamura kuti uchimi uwo uzamutondeka kufiskika yayi. Mwambura kukayika, tingagomezga kuti Yehova wazamutivumbulira ivyo tikukhumbikwira kumanya panyengo yakwenelera, nga umo wakachitira mu nyengo yakale. Ntchemerezgo ya “bata na mtende” yizamuchitika. (1 Tes. 5:3) Pamanyuma maboma gha ndyali ghazamuwukira chisopa chautesi na kuchiparanya. (Chivu. 17:​16, 17) Kufuma apo ŵazamuwukira ŵanthu ŵa Chiuta. (Ezek. 38:​18, 19) Vyakuchitika ivi vizamulongozgera ku nkhondo yaumaliro, iyo ni nkhondo ya Aramagedoni. (Chivu. 16:​14, 16) Tili na chigomezgo chose kuti vinthu ivi vichitikenge sonosono apa. Kweni m’paka kufika panyengo iyo, tiyeni tilutilire kuwonga Adada ŵithu ŵakuchanya pakuŵa maso na mauchimi gha mu Baibolo na kovwira ŵanji kuchita nthena. w23.08 13 ¶19-20

Chitatu, Novembala 12

Tilutilire kutemwana chifukwa chitemwa chikufuma kwa Chiuta.—1 Yoh. 4:7.

Mpositole Paulosi wakati walongosora za chipulikano, chigomezgo kweniso chitemwa, wakamalizga na mazgu ghakuti “chikuru chomene pa vyose ivi ntchitemwa.” (1 Kor. 13:13) Chifukwa wuli Paulosi wakayowoya nthena? Chifukwa ntchakuti, munthazi umu tizamukhumbikwiraso yayi kuti tiŵe na chipulikano mu malayizgo gha Chiuta ghakukhwaskana na charu chiphya chifukwa vinthu vyose ivyo tikugomezga vizamuŵa kuti vyafiskika kale. Kweni nyengo zose tizamukhumbikwira kutemwa Yehova kweniso ŵanthu. Nakuti, chitemwa chithu pa iwo chizamulutilira kukura m’paka muyirayira. Chifukwa chinyake ntchakuti chitemwa ndicho ntchimanyikwiro cha Ŵakhristu ŵaunenesko. Yesu wakaphalira ŵasambiri ŵake kuti: “Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:35) Kweniso, para tikutemwana tikuŵa ŵakukolerana. Paulosi wakati chitemwa “chikukakilira ŵanthu pamoza.” (Kol. 3:14) Mpositole Yohane wakaŵalembera Ŵakhristu ŵanyake kuti: “Uyo wakutemwa Chiuta wakwenera kutemwaso mubali wake.” (1 Yoh. 4:21) Usange tikutemwana yumoza na munyake, tikulongora kuti tikutemwa Chiuta. w23.11 8 ¶1, 3

Chinayi, Novembala 13

Tiyeni tiwuskeko uzito uliwose.—Heb. 12:1.

Pakuŵa Ŵakhristu, Baibolo likuyaniska umoyo withu na chiphalizgano. Uyo wachimbirenge m’paka paumaliro ndiyo wazamupokera umoyo wamuyirayira. (2 Tim. 4:​7, 8) Tikwenera kuchita vyose ivyo tingafiska kuti tilutilire kuchimbira, chifukwa sono tili pafupi chomene na mzere waumaliro. Mpositole Paulosi, wakayowoyapo vinthu ivyo vingatovwira kuti nase tiluske pa chiphalizgano ichi. Wakayowoya kuti “tiwuskeko uzito uliwose . . . ndipo tizizipizge pakuchimbira pa chiphalizgano icho chaŵikika panthazi pithu.” Kasi Paulosi wakang’anamuranga kuti palije kalikose ako Mkhristu wakwenera kunyamura? Yayi. M’malo mwake wakang’anamuranga kuti tikwenera kutaya vyekha ivyo ni vyambura kukhumbikwa. Vinthu ivi vingatichedweska pakuchimbira na kutipangiska kuti tivuke mwaluŵiro. Kuti tizizipizge pakuchimbira, tikwenera kumanya mwaluŵiro chilichose icho chingatiphyora waka ndipo tichiwuskeko mwaluŵiro. Panyengo yimozamoza, tikwenera yayi kutaya katundu uyo ngwakukhumbikwira kuti tinyamure. Chifukwa kuchita nthena kungapangiska kuti tileke kuŵa ŵakwenelera kulutilira kuchimbira pa chiphalizgano.—2 Tim. 2:5. w23.08 26 ¶1-2

Chinkhondi, Novembala 14

Ndipo kujitozga kwinu kuleke kuŵa kwa kuwaro—1 Pet. 3:3.

Mahara ghakutovwira kuti tichindikenge maghanoghano gha ŵanji. Mwachiyelezgero, ŵadumbu ŵithu ŵanyake ŵakutemwa kuphoda apo ŵanyake yayi. Ŵakhristu ŵanyake ŵakutemwa kumwapo moŵa pachoko apo ŵanyake ŵakumwapo yayi napachoko. Ŵakhristu wose ŵakukhumba umoyo uwemi kweni ŵakusankha nthowa zakupambana za umo ŵangapwelelera umoyo wawo. Para nyengo zose tikughanaghana kuti ise ndise tikusankha makora vinthu na kuchichizga ŵanyithu mu mpingo kuti ndivyo nawo ŵenderenge, tingakhuŵazga ŵanji kweniso tingambiska kugaŵikana mu mpingo. (1 Kor. 8:9; 10:​23, 24) Mwachiyelezgero m’malo mwa kutipa malango ghakukhwima pa nkhani ya kavwaliro, Yehova wakutipa waka fundo zakuti tilondezgenge. Tikwenera kuvwara mwakwenelera pakuŵa ŵateŵeti ŵa Yehova, na kulongora kuti ndise ŵamahara, ŵasoni kweniso ŵantchindi. (1 Tim. 2:​9, 10) Ntheura tikwenera yayi kuvwara munthowa yakuti ŵanthu ŵalaŵiskenge waka ise. Kweniso fundo za mu Baibolo ziwovwirenge ŵalara kugega kuŵika malango pa nkhani ya kavwaliro na katozgero ka sisi. w23.07 23-24 ¶13-14

Chisulo, Novembala 15

Tegherezgani chomene kwa ine, murye viwemi, ndipo mukondwenge chomene na icho ntchakututuŵiska nadi.—Yes. 55:2.

Yehova wakutovwira kumanya ivyo tingachita kuti munthazi mwithu muŵe muwemi. Awo ŵakuzomera ntchemo yakufuma ku “mwanakazi uyo ntchindere” ŵakukondwa para ŵakuchita nkharo zawakawaka. Vyakuchita vyawo vikuŵatolera ku “Dindi.” (Zinth. 9:​13, 17, 18) Ivi vikupambana chomene na awo ŵakuzomera ntchemo yakufuma ku “vinjeru vyenecho.” (Zinth. 9:1) Tikusambira kutemwa icho Yehova wakutemwa na kutinkha icho wakutinkha. (Sal. 97:10) Ndipo tikukondwa kuchemerakoso ŵanji kuti nawo ŵasange chandulo na “vinjeru vyenecho.” Tili nga mbateŵeti awo “ŵakuchemerezga mu malo ghakukwera gha msumba, kuti: ‘Yose uyo ni muzeleza, wize kuno.’” Vitumbiko ivyo tikuvisanga pamoza na awo ŵakuzomera ntchemo iyi ni vyakanyengo waka yayi. Ni vya umoyo wose, ndipo vikutipa mwaŵi wa “kuzakakhala” kwamuyirayira para ‘tendenge nyolonyolo mu nthowa ya mahara.’—Zinth. 9:​3, 4, 6. w23.06 24 ¶17-18

Sabata, Novembala 16

Munthu wambura kukalipa luŵiro ni muwemi kuluska munthu wankhongono, na uyo wakujikora kuluska uyo wathereska msumba.—Zinth. 16:32.

Kasi mukujipulika wuli usange munyinu wa ku ntchito panji ku sukulu wamufumbani vyakukhwaskana na vigomezgo vinu? Kasi mukuŵa na wofi? Taŵanandi ndimo tikujipulikira. Kweni fumbo lanthena lingatovwira kumanya ivyo munyithu wakughanaghana kweniso ivyo wakugomezga, ndipo lingatipa mwaŵi wakuti timupharazgire makani ghawemi. Ndipouli, nyengo zinyake munthu wangafumba fumbo chifukwa chakuti wakukolerana navyo yayi ivyo tikugomezga panji wangafumba na chilato chakuti tigazgane nayo. Ivi vikwenera kutizizika yayi. Nakuti ŵanyake ŵali kuphalirika fundo zautesi zakukhwaskana na vigomezgo vithu. (Mil. 28:22) Chinyake ntchakuti, tikukhala mu “mazuŵa ghaumaliro,” nyengo iyo ŵanthu ŵanandi ‘mbanonono’ kweniso ‘mbakofya.’ (2 Tim. 3:​1, 3) Nyengo zinyake mungajifumba kuti, ‘Kasi ningaŵa wuli wakuzika kweniso walusungu apo munyake wakususka ivyo nkhugomezga kufuma mu Baibolo?’ Kasi chingamovwirani ntchivichi? Kuzika ndiko kungamovwirani. Munthu wakuzika wakukwiya luŵiro yayi kweni wakuŵa wakujikora para ŵanji ŵamukhuŵazga kweniso para wakumanya makora yayi umo wangazgolera. w23.09 14 ¶1-2

Mande, Novembala 17

Uŵimikenge kuŵa ŵakaronga mu charu chose chapasi.—Sal. 45:16.

Nyengo zinyake tikupokera ulongozgi uwo ukutovwira kuti tileke kutemwa chomene vinthu vyakuthupi kweniso kuti tileke kuchita vinthu ivyo vingatipangiska kuswa malango gha Chiuta. Para tikulondezga ulongozgi wa Yehova, tikutumbikika chomene. (Yes. 48:​17, 18; 1 Tim. 6:​9, 10) Tikukayika yayi kuti Yehova walutilirenge kugwiliskira ntchito ŵanthu kuti watipe ulongozgi pa nyengo ya suzgo yikuru m’paka mu Muwuso wa Vyaka 1,000. Kasi tizamulutilira kulondezga ulongozgi uwo tizamupokera? Vikuthemba pa umo tikuchitira na ulongozgi uwo Yehova wakutipa sono. Ntheura, tiyeni nyengo zose tilondezgenge ulongozgi uwo Yehova wakutipa, kusazgapo uwo tikupokera kufuma ku ŵanalume awo ŵakutilaŵilira. (Yes. 32:​1, 2; Heb. 13:17) Apo tikuchita nthena, tili na vifukwa vyakukwana vyakumugomezgera Mulongozgi withu Yehova, uyo wakutivikilira ku vinthu ivyo vingananga ubwezi withu na iyo, ndipo wakutilongozgera ku nthowa yakuluta ku umoyo wamuyirayira. w24.02 25 ¶17-18

Chiŵiri, Novembala 18

Mwaponoskeka na lusungu lwake lukuru.—Efe. 2:5.

Mpositole Paulosi wakakondwanga kuteŵetera Yehova, kweni wakasangananga na masuzgo ghakupambanapambana. Iyo kanandi wakendanga mitunda yitaliyitali, nangauli kwenda kukaŵa kwakusuzga mu nyengo yakale. Pa maulendo ghake, nyengo zinyake Paulosi wakaŵanga “mu ulwani wa milonga” kweniso mu “ulwani wa vigeŵenga.” Nyengo zinyakeso ŵalwani ŵake ŵakamutimbanga. (2 Kor. 11:​23-27) Kweniso ni nyengo zose yayi apo Ŵakhristu ŵanyake ŵakawongeranga ntchito iyo Paulosi wakachitanga kuti waŵawovwire. (2 Kor. 10:10; Fil. 4:15) Ntchivichi chikawovwira Paulosi kulutilira kuteŵetera Yehova? Paulosi wakasambira vinandi vyakukhwaskana na Yehova kufuma mu Malemba kweniso ku vinthu ivyo vikamuchitikirapo pa umoyo wake. Paulosi wakakhorwa kuti Yehova Chiuta wakumutemwa nadi. (Rom. 8:​38, 39; Efe. 2:​4, 5) Ndipo wakamba kumutemwa chomene Yehova. Wakalongora kuti wakumutemwa chomene Yehova ‘pakuteŵetera ŵatuŵa na kulutilira kuŵateŵetera.”—Heb. 6:10. w23.07 9 ¶5-6

Chitatu, Novembala 19

Waliyose wajilambikenge ku ŵamazaza.—Rom. 13:1.

Ŵanthu ŵanandi ŵakuzomerezga kuti tikukhumbikwira maboma gha ku charu kweniso kuti tikwenera kupulikira malango ghanyake agho “ŵamazaza” ŵakuŵika. Kweni ŵanthu ŵeneŵaŵa aŵa nyengo zinyake ŵakutondeka kupulikira malango ghanyake agho ŵakughatemwa yayi panji agho ŵakuwona kuti ngakufyenya. Baibolo likuyowoya kuti Satana ndiyo wakulongozga maboma gha ŵanthu agho ghakupangiska masuzgo, kweniso kuti sonosono apa ghaparanyikenge. (Sal. 110:​5, 6; Muph. 8:9; Luka 4:​5, 6) Likutiphaliraso kuti “uyo wakulimbana na wamazaza, wakulimbana na ndondomeko ya Chiuta.” Pasono, Yehova wazomerezga maboma kuwusa mwakuti vinthu vinyake viŵeko makora, ndipo wakukhazga kuti tikwenera kughapulikira. Ntheura, tikwenera ‘kuŵapa vyose ivyo ŵakukhumba,’ kusazgapo misonkho, ntchindi, kweniso kuŵapulikira. (Rom. 13:​1-7) Nyengo zinyake dango tingaliwona kuti ndambura kwenelera, ndakukhwima, panji ndakusuzga kulipulikira. Kweni nipera tikupulikira ŵamazaza aŵa chifukwa chakuti Yehova wakutiphalira kuti ndimo tichitirenge, chikuru ivyo ŵakutiphalira vikususkana yayi na malango ghake.—Mil. 5:29. w23.10 8 ¶9-10

Chinayi, Novembala 20

Mzimu wa Yehova ukamupa nkhongono.—Ŵeru. 15:14.

Apo Samusoni wakababikanga, Ŵafilisiti ndiwo ŵakawusanga Ŵaisrayeli ndipo ŵakaŵatambuzganga. (Ŵeru. 13:1) Ŵaisrayeli ŵakasuzgikanga chomene chifukwa chakuti Ŵafilisiti ŵakaŵawusanga mwankhaza. Yehova wakasankha Samusoni kuti ‘wadangilire pa kuponoska Israyeli mu woko la Ŵafilisiti.’ (Ŵeru. 13:5) Kuti wafiske mulimo wakusuzga uwu, Samusoni wakakhumbikwiranga kuthemba Yehova. Zuŵa linyake, ŵankhondo ŵa Ŵafilisiti ŵakiza kuti ŵazakakore Samusoni pa Lehi, uko kukwenera kuti kukaŵa ku Yuda. Ŵanalume ŵa mu Yuda ŵakawopa chomene, ntheura ŵakawona kuti ŵamupeleke waka Samusoni ku ŵalwani. Ŵakamukaka Samusoni na vingwe viphya viŵiri na kumupeleka ku Ŵafilisiti. (Ŵeru. 15:​9-13) Ndipouli, “mzimu wa Yehova ukamupa nkhongono” Samusoni ndipo vingwe ivyo wakaŵa navyo mu mawoko vikalakatika. Pamanyuma “wakasanga chiwangwa chiphya cha miskati ya mbunda yanalume,” ndipo wakachitora na kukomera Ŵafilisiti 1,000.—Ŵeru. 15:​14-16. w23.09 2 ¶3-4

Chinkhondi, Novembala 21

Ichi chikukolerana na khumbo lamuyirayira ilo wakaŵa nalo lakukhwaskana na Khristu, Yesu Fumu yithu.—Efe. 3:11.

Yehova wavumbura pachoko na pachoko ‘khumbo lake lamuyirayira’ mu Baibolo. Nakuti iyo wangatondekapo yayi kufiska chifukwa ‘wakuchita chilichose kuti wafiske khumbo lake.’ (Zinth. 16:4) Ndipo ivyo Yehova wakuchita vikukhalilira muyirayira. Kasi khumbo la Yehova ndakuti wuli, ndipo ni vinthu wuli ivyo wasintha na chilato chakuti wafiske khumbo lake? Chiuta wakaphalira ŵanthu ŵakwambilira khumbo ilo wakaŵa nalo kwa iwo. Khumbo lake likaŵa lakuti ‘ŵababane, ŵandane ŵazuzge charu chapasi na kuchithereska, na kuŵa na mazaza pa vyamoyo vyose’ pa charu chapasi. (Gen. 1:28) Adamu na Eva ŵakati ŵagaluka, ŵakanjizga kwananga pa charu chapasi, kweni khumbo la Yehova likamalira papo yayi. Iyo wakasintha waka umo khumbo lake lifiskikirenge. Mwaluŵiro, wakanozga kuti wakhazikiske Ufumu kuchanya uwo uzamufiska khumbo lake la pakwamba ku ŵanthu na charu chapasi.—Mat. 25:34. w23.10 20 ¶6-7

Chisulo, Novembala 22

Kuŵenge kuti Yehova ni movwiri wane yayi, mphanyi nili kuparanyika kale.—Sal. 94:17.

Yehova wangatovwira kuti tileke kuwelera nyuma. Ni nyengo zose yayi apo chingaŵa chipusu kuchita nthena, chomenechomene para tasuzgika na suzgo ilo kwanyengo yitali. Nyengo zinyake suzgo lithu lingaŵa lakusuzga chomene kuluska ilo mpositole Petrosi wakaŵa nalo. Kweni Yehova wangatipa nkhongono kuti tileke kuwelera nyuma. (Sal. 94:​18, 19) Mwachiyelezgero, mubali munyake wakagonananga na ŵanalume ŵanyake kwa vyaka vinandi pambere wandasambire unenesko. Kweni wakalekerathu nkharo yaukazuzi iyi. Ndipouli, nyengo zinyake wakasuzgikangaso na makhumbiro ghaheni agha. Kasi ntchivichi chikamovwira kuti waleke kuthera? Iyo wakulongosora kuti: “Yehova wakutipa nkhongono.” Iyo wakutiso: “Na mzimu wa Yehova . . . , namanya kuti ntchamachitiko kulutilira kukhala mwakukolerana na fundo za Yehova . . . Yehova wakunigwiliskira ntchito, kweniso wakulutilira kunipa nkhongono nangauli nili wambura kufikapo.” w23.09 23 ¶12

Sabata, Novembala 23

Njombe ya kujiyuyura na kopa Yehova mbusambazi, uchindami, na umoyo.—Zinth. 22:4.

Imwe ŵabali ŵanyamata, vichitikenge vyekha yayi kuti muŵe mwanalume wakukhwima mwauzimu. Mukwenera kusankha ŵabali ŵa viyelezgero viwemi awo mungalondezga, muŵe na kaghanaghaniro kawemi, muŵe ŵakugomezgeka, muŵe na maluso ghakovwira, kweniso munozgekere milimo iyo mungazakaŵa nayo munthazi. Nyengo zinyake mungawona nga mungakwaniska yayi para mukughanaghanira ivyo mukukhumbikwira kuchita kuti muŵe mwanalume wakukhwima mwauzimu. Kweni mungafiska. Kumbukani kuti Yehova ngwakukhumbisiska chomene kumovwirani. (Yes. 41:​10, 13) Kweniso ŵabali na ŵadumbu mu mpingo winu nawo ŵamovwiraninge. Para mufiskenge kuŵa mwanalume wakukhwima mwauzimu, muŵenge ŵakukondwa pa umoyo winu kweniso ŵakukhorwa. Tikumutemwani chomene imwe ŵabali ŵachinyamata. Mphanyi Yehova wamutumbikani apo mukuchitapo kanthu sono kuti muŵe ŵanalume ŵakukhwima mwauzimu. w23.12 29 ¶19-20

Mande, Novembala 24

[Sulaniko] maubudi.—Zinth. 19:11.

Tiyelezgere kuti muli pa phwando na ŵabali na ŵadumbu. Mwakondwa chomene na phwando ili ndipo mose mukujambuliska chithuzi. Mukujambuliskaso vithuzi vinyake viŵiri kuchitira kuti panji chakwamba chira chindawoneke makora. Apa sono ndikuti muli na vithuzi vitatu. Kweni pa chithuzi chimoza, mukuwona kuti mubali munyake wandasekelere. Mukuchisisita waka chifukwa chakuti muli kale na vithuzi viŵiri ivyo waliyose wakusekelera kusazgapo na mubali uyo. Nyengo zinandi tikukumbukanga nyengo izo tikachezga na ŵabali na ŵadumbu. Kweni tiyelezgere kuti pa nyengo yinyake mubali panji mudumbu wakayowoya panji kuchita chinthu icho chikatikhuŵazga. Kasi tingachita wuli usange takumbuka ivyo wakachita? Tingachita makora kuwuskamo waka maghanoghano ghaheni agha, nga umo tikusisitira chithuzi icho chindawoneke makora. (Efe. 4:32) Tingafiska kuchita nthena chifukwa pali nyengo zinandi ziwemi izo tikachezga nayo makora izo tingakumbukira. Ivi ndivyo ni vinthu vyakuzirwa ivyo tikwenera kukumbukira na kuvisunga. w23.11 12-13 ¶16-17

Chiŵiri, Novembala 25

Ŵanakazi ŵajitozgenge na vyakuvwara vyakwenelera, . . . nga mbanakazi awo ŵakuti ŵakusopa Chiuta.—1 Tim. 2:​9, 10.

Mazgu gha Chigiriki agho ghakagwiliskirika ntchito pa lemba ili ghakung’anamura kuti mwanakazi Wachikhristu wakwenera kuvwara mwantchindi kweniso mwakughanaghanira njuŵi za ŵanji. Tikunotha namwe ŵadumbu ŵithu ŵakutemweka imwe mukulondezga ulongozgi uwu. Umanyi ni mukhaliro unyake uwo ŵadumbu wose ŵakukhwima mwauzimu ŵakwenera kuŵa nawo. Kasi umanyi ni vichi? Ni luso lwakumanya icho ntchakwenelera na chambura kwenelera ndipo pamanyuma na kusankha chinthu icho ntchakwenelera. Ghanaghanirani chiyelezgero cha Abigelu. Mfumu wake wakasankha makora yayi vinthu pa nkhani yinyake ivyo vikatenge vipangiskenge mbumba yose kusangana na soka lakofya chomene. Abigelu wakachitapo kanthu mwaluŵiro. Chifukwa chakuti wakachita vinthu mwaumanyi wakaponoska ŵanthu ŵamumbumba yake yose. (1 Sam. 25:​14-23, 32-35) Umanyi ungatovwiraso kumanya apo tikwenera kuyowoya na apo tikwenera kukhala chete. Ndipo ungatovwiraso kuti tichitenge vinthu mwakwenelera kweniso mwakughanaghanira ŵanji.—1 Tes. 4:11. w23.12 20 ¶8-9

Chitatu, Novembala 26

Tiyeni tikondwe mu chigomezgo cha uchindami wa Chiuta.—Rom. 5:2.

Mazgu agha mpositole Paulosi wakalembera ŵabali ŵa mpingo wa ku Romu. Ŵabali na ŵadumbu aŵa, ŵakasambira vya Yehova na Yesu, ndipo ŵakalongora chipulikano, na kuzgoka Ŵakhristu. Ntheura Chiuta ‘wakaŵapima kuŵa ŵarunji chifukwa cha chipulikano’ ndipo wakaŵaphakazga na mzimu wake utuŵa. (Rom. 5:1) Nadi, apa sono ŵakaŵa na chigomezgo chanadi icho chingatondeka yayi. Pamanyuma Paulosi wakalembera kalata Ŵakhristu ŵakuphakazgika ŵa ku Efeso vyakukhwaskana na chigomezgo icho Chiuta wakaŵapa. Chigomezgo ichi chikasazgangapo kupokera ‘chiharo icho chasungikira ŵatuŵa.’ (Efe. 1:18) Kweniso Paulosi wakaphalira Ŵakolose uko ŵazamupokera njombe yawo. Iyo wakati ‘chigomezgo ichi chasungikira imwe kuchanya.’ (Kol. 1:​4, 5) Ipo chigomezgo cha Ŵakhristu ŵakuphakazgika ntchakuti ŵakuwuskikira ku umoyo wamuyirayira kuchanya, uko ŵamuwusa na Khristu.—1 Tes. 4:​13-17; Chivu. 20:6. w23.12 9 ¶4-5

Chinayi, Novembala 27

Mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu.—Fil. 4:7.

Lizgu lakwambilira ilo lili kung’anamulika kuti ‘kuvikilira,’ ŵakaliyowoyanga pakulongosora za ŵasilikari awo ŵakavikiliranga msumba kuti uleke kuwukilika. Ŵanthu awo ŵakakhalanga mu msumba uwu ŵakagonanga mwakufwasa, pakumanya kuti ŵasilikari ŵakaŵavikiliranga. Mwakuyana waka, para mtende wa Chiuta wavikilira mitima yithu na maghanoghano ghithu, mtima ukuŵa mu malo, pakumanya kuti tili ŵakuvikilirika. (Sal. 4:8) Nga umo vikaŵira kwa Hana, nanga suzgo lithu lingamara nyengo yeneyiyo yayi, tingaŵa na mtende wa mu mtima. (1 Sam. 1:​16-18) Ndipo para tili na mtende wa mu mtima, kanandi chikuŵa chipusu kughanaghana makora na kusankha makora vinthu. Kasi mukwenera kuchita vichi? Para mwasangana na suzgo, phalirani mulinda winu, uyo ni Yehova. Mwawuli? Lombani m’paka musange mtende wakufuma kwa Chiuta. (Luka 11:9; 1 Tes. 5:17) Para mwakumana na suzgo, koserani kulomba ndipo Yehova wamupaninge mtende wake uwo uvikilirenge mtima na maghanoghano ghinu.—Rom. 12:12. w24.01 21 ¶5-6

Chinkhondi, Novembala 28

Adada ŵithu imwe muli kuchanya, zina linu lituŵiskike.—Mat. 6:9.

Kuti watuŵiske zina la Awiske, Yesu wakazizipizga vinthu vinandi nga nkhutambuzgika, kuneneka, kweniso kumuyowoyera mautesi. Wakamanya kuti wapulikira kale Awiske mu vinthu vyose ndipo pakaŵavya chifukwa chakuti wachitire soni. (Heb. 12:2) Kweniso wakamanyanga kuti Satana ndiyo wakamuwukiranga mwakudunjika panyengo yakusuzga iyi. (Luka 22:​2-4; 23:​33, 34) Satana wakakhumbanga kuti watondeske Yesu kugomezgeka, kweni vikamutonda. Yesu wakalongora pakweru kuti Satana ni mutesi chomene kweniso kuti Yehova wali na ŵateŵeti ŵakugomezgeka, awo ŵakulutilira kugomezgeka nanga ŵangakumana na chiyezgo wuli. Kasi namwe mukukhumba kukondweska Themba linu ilo likuwusa? Lutilirani kulumba zina la Yehova, mwakovwira ŵanji kumumanya makora Chiuta withu. Para muchitenge nthena, mulondezgenge mendero gha Yesu. (1 Pet. 2:21) Nga ni Yesu, muŵenge kuti mukukondweska Yehova na kulongora kuti mulwani wake Satana ni mutesi. w24.02 11-12 ¶11-13

Chisulo, Novembala 29

Kasi ningamuwezgera vichi Yehova pa viwemi vyose ivyo wanichitira? —Sal. 116:12.

Mu vyaka 5 ivyo vyajumpha, ŵanthu ŵakujumpha 1 miliyoni ŵali kubatizika na kuŵa Ŵakaboni ŵa Yehova. Usange mwajipeleka kwa Yehova, ndikuti mwasankha kuŵa msambiri wa Yesu Khristu, kweniso kuchita khumbo la Chiuta ndiko kuŵenge kwakuzirwa chomene pa umoyo winu. Kasi kujipeleka kwinu kukusazgapo vichi? Yesu wakati: “Usange munthu wakukhumba kunilondezga, wajipate.” (Mat. 16:24) Lizgu la Chigiriki ilo lili kung’anamulika kuti ‘kujipata’ lingang’anamulikaso kuti “kujikana” panji kuti “kuleka kujikhalira wekha.” Pakuŵa ŵateŵeti ŵakujipeleka kwa Yehova, mukwenera kukana chilichose icho chikususkana na khumbo lake. (2 Kor. 5:​14, 15) Ivi vikusazgapo kukana “milimo ya thupi,” nga uzaghali. (Gal. 5:​19-21; 1 Kor. 6:18) Kasi mukuwona kuti kulondezga malango agha nkhwakufyenya? Usange mukumutemwa Yehova kweniso kukhorwa kuti malango ghake ngakovwira nyengo zose, muwonenge kuti nkhwakufyenya yayi.—Sal. 119:97; Yes. 48:​17, 18. w24.03 2 ¶1; 3 ¶4

Sabata, Novembala 30

Nkhukondwa nawe.—Luka 3:22.

Yehova wakupeleka mzimu wake utuŵa ku awo wakukondwa nawo. (Mat. 12:18) Tingajifumba kuti, ‘Kasi nili kulongorapo chipambi cha mzimu wa Chiuta pa umoyo wane?’ Kasi sono mukuwona kuti ndimwe ŵakuzikira chomene kuluska apo mukaŵa mundamumanye Yehova? Nakuti para mukulongora chomene vipambi vya mzimu wa Chiuta, muŵengeso na ukaboni wakukwana wakuti Yehova wakukondwa namwe. Yehova wakugwiliskira ntchito chiwombolero kuti chovwire ŵanthu awo wakukondwa nawo. (1 Tim. 2:​5, 6) Kweni wuli usange tikukayikira nipera kuti Yehova wakukondwa nase, nangauli tili na chipulikano mu sembe yakuwombora kweniso tili kubatizika? Kumbukani kuti ni nyengo zose yayi apo tikwenera kugomezga ivyo mtima withu ukutiphalira, kweni tikwenera kugomezga Yehova. Iyo wakuwona wose awo ŵali na chipulikano mu sembe yakuwombora kuti mbarunji mu maso ghake ndipo wakulayizga kuti waŵatumbikenge.—Sal. 5:12; Rom. 3:26. w24.03 30 ¶15; 31 ¶17

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani