Disembala

Kasi Yehova waliso na nkhongono zakuwuskira ŵakufwa? Enya! Iyo ‘Ngwankhongonozose.’ (Chivu. 1:8) Ntheura wali na nkhongono zakuthereskera mulwani waliyose, nanga ni nyifwa. (1 Kor. 15:26) Chifukwa chinyake icho tikumanyira kuti Chiuta wali na nkhongono zakuwuskira ŵakufwa ntchakuti iyo wakuluwa yayi, wakukumbukira chilichose. Nyenyezi yiliyose wakuyichema zina. (Yes. 40:26) Kweniso wakukumbukira awo ŵali kufwa. (Yobu 14:13; Luka 20:38) Ntheura wakukumbukiraso chilichose chakukhwaskana na awo wazamuŵawuska, kusazgapo umo ŵakawonekeranga, wunthu wawo, ivyo ŵakakumana navyo, kweniso maghanoghano ghawo. Apa ntchakuwonekerathu kuti tingagomezga layizgo la Yehova lakukhwaskana na chiwuka chifukwa tikumanya kuti wali na khumbo na nkhongono zakufiskira layizgo ili. Wonani chifukwa chinyake icho tikugomezgera layizgo la Chiuta lakuti wazamuwuska ŵakufwa: Yehova wali kuwuskapo kale ŵakufwa. Mu nyengo yakale, wakapeleka nkhongono ku ŵanalume ŵanyake ŵakugomezgeka, kusazgapo Yesu, kuti ŵaŵuske ŵakufwa. w23.04 9-10 ¶7-9

Para tikuyowoya mwaluso kweniso mwakuzika, ŵanthu ŵanandi ŵangategherezga ndipo chidumbirano chingalutilira. Mbunenesko kuti para munyake chilato chake ntchakuti wakukhumba waka tigazganenge nayo panji kutinyoza waka, tikwenera kulutilira yayi kudumbiskana nayo. (Zinth. 26:4) Kweni ŵanthu ŵanandi ndimo ŵangaŵira yayi. Nakuti ŵanandi ŵangategherezga. Ntchakuwonekerathu kuti ntchakuzirwa chomene kuŵa ŵakuzika. Lombani Yehova kuti wamupani nkhongono izo mukukhumbikwira kuti mulutilire kuŵa ŵakuzika para mukuzgora munthu uyo wakumufumbani mafumbo ghakusuzga panji uyo wakumususkani. Kumbukani kuti para mwachita vinthu mwakuzika vingawovwira kuti paleke kuŵa kugazgana na munthu uyo mukudumbiskana. Ndipo para ŵategherezgi ŵithu tingaŵazgoranga mwakuzika kweniso mwantchindi vingaŵawovwira kuti ŵasinthe umo ŵakutiwonera ise kweniso unenesko wa mu Baibolo. ‘Nyengo zose muŵe ŵakunozgeka kuvikilira’ vigomezgo vinu, “kweni muchitenge nthena mwakuzika ndiposo na ntchindi zikuru.” (1 Pet. 3:15) Nadi, longorani kuti ndimwe ŵankhongono pakuŵa ŵakuzika. w23.09 19 ¶18-19

Wonani vinthu vinayi ivyo tingalongolera kuti ndise ŵakuzikira. Chakwamba, munthu uyo ngwakuzikira wakukalipa luŵiro chara. Wakulutilira kukhazika mtima pasi na kukorako ukali para ŵanyake ŵamwavya panji para wakusuzgika maghanoghano. (Eks. 34:6) Chachiŵiri, munthu uyo ngwakuzikira wangalindilira mwakufwasa. Usange chinthu chinyake chachedwa, munthu wanthena wakugega kwamba kuchita vinyake panji kukwiya. (Mat. 18:​26, 27) Chachitatu, munthu uyo ngwakuzikira wakuchita vinthu mwakuchimbilira yayi. Para munthu wakuzikira wali na mulimo wakuzirwa chomene uwo wakukhumbikwira kuti wawuchite, wakuchimbilira kwambapo waka yayi nesi kugwira kuti nimarenimare. M’malo mwake, wakupatura nyengo yakukwana yakughanaghanira umo wangawuchitira mulimo uwo. Pamanyuma wakujiŵikira utali wa nyengo iyo wangachitira mulimo uwo. Chachinayi, munthu uyo ngwakuzikira wakuyezgayezga kuzizipizga viyezgo kwambura kudandawuradandawura. Wakuchita chilichose icho wangafiska kuti walutilire kuzizipizga uku wakulutilira kuŵaso wachimwemwe. (Kol. 1:11) Pakuŵa Ŵakhristu, tikwenera kulongora kuzikira mu vigaŵa vyose ivi. w23.08 20-21 ¶3-6

Chifukwa chikuru icho tikwenera kuvikililira mtima withu wakuyelezgera, ntchakuti Yehova wakusanda mtima withu. Ichi chikung’anamura kuti wakuwona ivyo ŵanthu ŵangaviwona yayi ndipo wakumanya umo tiliri nadi. Iyo watitemwenge chomene usange tikulutilira kughanaghanira ulongozgi wake wavinjeru uwo ungatovwira kuŵa na umoyo wamuyirayira. (Yoh. 4:14) Ivi viwovwirenge kuti tileke kupwetekeka na nkharo ziheni kweniso mautesi ghakupambanapambana ghakufuma kwa Satana na charu chake ichi. (1 Yoh. 5:​18, 19) Apo tikukhozga ubwezi withu na Yehova, chitemwa chithu pa iyo chikurenge kweniso timopenge chomene. Chifukwa chakuti tikukhumba yayi kuŵakhuŵazga Adada ŵithu, tigegenge nanga nkhughanaghanira zakuchita vinthu viheni. Marta, mudumbu wa ku Croatia uyo wakayezgeka kuti wachite uzaghali, wakalemba kuti: “Chikaniŵiranga chinonono chomene kughanaghana makora, kweniso kulimbana na khumbo la kuchita kwananga uko kukuŵa kwakukondweska kwanyengo yichoko waka. Kweni kopa Yehova kukanivikilira.” Kasi kopa Chiuta kukamuvikilira wuli? Marta wakayowoya kuti wakaghanaghanirangapo masuzgo agho wangasangana nagho para wangachita uzaghali. Nase tingachita mwakuyana waka. w23.06 20-21 ¶3-4

Yesu wakamanya kuti khumbo la Yehova nkhutuŵiska zina lake, icho chikung’anamura kususka mautesi ghose agho layowoyereka. Lekani Yesu Khristu uyo ni Fumu yithu wakasambizga ŵalondezgi ŵake kulomba kuti: “Adada ŵithu imwe muli kuchanya, zina linu lituŵiskike.” (Mat. 6:9) Yesu wakamanyanga kuti iyi ni nkhani yikuru iyo yikukhwaska chilengiwa chose. Palije waliyose mu chilengiwa chose uyo wali kuchitapo vinandi pa kutuŵiska zina la Yehova kuluska Yesu. Kweni apo Yesu wakakakika, ŵalwani ŵake ŵakamwimbanga mulandu wakuti wakuyuyura Chiuta. Yesu wakawona kuti kuyuyura zina lituŵa la Awiske nkhwananga kukuru chomene. Ntheura wakasuzgika chomene maghanoghano kuti ŵakamwimba mulandu uwu na kumweruzga kuti ngwakwananga. Ichi ndicho chikwenera kuŵa chifukwa icho Yesu ‘wakasuzgikira chomene mu mtima’ mu maora agho wakaŵa pafupi kukakika.—Luka 22:​41-44. w24.02 11 ¶11

Pa chiphalizgano chithu cha umoyo, tikwenera kutemwa chomene Yehova na Yesu kuluska umo tikutemwera ŵabali ŵithu ŵakuthupi. (Mat. 10:37) Kweni ichi chikung’anamura kuti tizelezgenge udindo withu wamumbumba yayi, nga kuti ndiwo ukutitondeska kuteŵetera makora Chiuta na Khristu. M’malo mwake, kuti tikondweske Chiuta na Khristu tikwenera kufiska udindo withu wamumbumba. (1 Tim. 5:​4, 8) Tiŵenge ŵakukondwa chomene para tichitenge nthena. Nakuti Yehova wakumanya kuti mbumba yiŵe yakukondwa ni para mfumu na muwoli ŵakutemwana na kuchindikana, kweniso para ŵapapi ŵakutemwa ŵana ŵawo na kuŵasambizga, ndiposo para ŵana nawo ŵakupulikira ŵapapi ŵawo. (Efe. 5:33; 6:​1, 4) Kwali muli na udindo wuli mu mbumba, gomezgani vinjeru vya mu Baibolo m’malo mwa kulondezga waka umo mukujipulikira, mitheto yinu, panji ivyo awo ŵakuti ni nkhwantha pa nkhani za nthengwa ŵangayowoya. Paturani nyengo ya kusambilira mabuku ghithu ghakulongosora Baibolo. Mu mabuku agha muli masachizgo ghakovwira chomene gha umo tingalondezgera fundo za mu Baibolo. w23.08 28 ¶6-7

Ŵanakazi Ŵachikhristu ŵakwenera kuŵa na maluso ghakovwira. Maluso agho msungwana wangasambira pa wana uchoko ghakulutilira kumovwira pa umoyo wake wose. Mwachiyelezgero, sambirani kulemba na kuŵazga makora. Mu mitheto yinyake, ŵakuwona kuti ntchakuzirwa yayi kuti ŵanakazi ŵasambire kulemba na kuŵazga. Kweni vinthu ivi ni vyakuzirwa kwa Mkhristu waliyose. (1 Tim. 4:13) Ntheura kuzomerezga chilichose yayi kumutondeskani kusambira kulemba na kuŵazga makora. Kasi musangenge chandulo wuli? Maluso agha ghangamovwirani kusanga ntchito kweniso kuti muyisungilire. Kweniso ghangamovwirani kuti musambirenge na kusambizga makora Mazgu gha Chiuta. Chakuzirwa chomene ntchakuti muŵenge paubwezi uwemi na Yehova chifukwa cha kuŵazga na kughanaghanirapo pa mazgu ghake.—1 Tim. 4:15. w23.12 20 ¶10-11

Mulombenge Yehova kuti wamovwirani kugega viyezgo. Pakuŵa ŵanthu ŵambura kufikapo, nyengo zose tikukhumbikwira kulimbana na makhumbiro ghakuchita icho ntchiheni. Satana wakuchita chilichose kuti wapangiske kuŵa chakusuzga kulimbana na suzgo ili. Nthowa yimoza njakuti wakuyezgayezga kunanga maghanoghano ghithu na vyakusanguluska vyawakawaka. Vyakusanguluska vyanthena vingapangiska kuti tiŵe na maghanoghano ghaheni, ndipo maghanoghano agha ghangapangiska kuti tichite kwananga kukuru. (Mrk. 7:​21-23; Yak. 1:​14, 15) Tikukhumbikwira wovwiri wa Yehova para tikukhumba kuti tigege chiyezgo cha kuchita icho ntchiheni. Yesu wakasazgamo fundo iyi mu lurombo lwake lwa chiyelezgero. Iyo wakati: “Mungatitoleranga mu kuyezgeka chara, kweni mutiwombore kwa muheni.” (Mat. 6:13) Yehova ngwakunozgeka kutovwira, kweni tikwenera kumulomba. Tikweneraso kuchita vinthu mwakuyana na malurombo ghithu. w23.05 6-7 ¶15-17

Para ŵakutorana ŵakuzirwiska ubwezi wawo na Yehova, vikovwira kuti ŵalondezgenge fundo zake. Ndipo ivi vikovwiraso kuti ŵagege panji kulimbana na masuzgo agho ghangapangiska kuti chitemwa chawo chizizime. Ŵanthu ŵakukhwima mwauzimu ŵakuyezgayezgaso chomene kuyezga Yehova na kuŵa na mikhaliro iyo wali nayo nga ni lusungu, kuzikira na kugowoka. (Efe. 4:32–5:1) Ŵakutorana awo ŵali na mikhaliro iyi chikuŵa chipusu kuti chitemwa chawo chikure. Mudumbu munyake zina lake Lena, uyo wakhala mu nthengwa vyaka vyakujumpha 25 wakayowoya kuti, “Ntchipusu kutemwa na kuchindika munthu wauzimu.” Wonani chiyelezgero cha mu Baibolo ichi. Apo Yehova wakasankhanga mbumba iyo mungazakababikira Mesiya, wakasankha Yosefe na Mariya nangauli kukaŵa ŵanthu ŵanandi ŵa mu mphapu ya Davide. Chifukwa wuli? Chifukwa chakuti wose ŵakaŵa paubwezi wakukhora na Yehova, ndipo Yehova wakamanya kuti mu nthengwa yawo ŵazamumudangizganga iyo. w23.05 21 ¶3-4

Nangauli mulongozgi withu, Yesu, ngwakufikapo, kweni ŵabali awo wali kuŵasora kuti ŵalongozgenge mbambura kufikapo. Nyengo zinyake vingatisuzga kuŵapulikira, chomenechomene para ŵatipempha kuchita chinthu icho ise tindakhumbe. Mpositole Petrosi nayo nyengo yinyake vikamusuzga kupulikira ulongozgi uwo wakapika. Mungelo wakati wamuphalira kuti warye vinyama ivyo vikaŵa vyakufipirwa kuyana na Dango la Mozesi, Petrosi wakakana, ndipo wakakana kamoza pera yayi kweni katatu. (Mil. 10:​9-16) Chifukwa wuli wakakana? Wakawona kuti ulongozgi uphya uwu ngwambura kupulikikwa kwa iyo. Nyengo yinyake, mpositole Paulosi wakapulikira apo Ŵanalume ŵalara ku Yerusalemu ŵakamuphalira kuti watore ŵanalume ŵanayi ŵalute lumoza ku tempile ndipo wajitozge kuti walongore kuti wakulondezga Dango. Paulosi wakamanyanga kuti Ŵakhristu ŵali pasi pa Dango yayi. Kweniso kuti iyo wakanangapo yayi. Ndipouli, “zuŵa lakulondezgapo Paulosi wakatora ŵanalume ŵara na kujitozga pamoza na iwo.” (Mil. 21:​23, 24, 26) Pakuti Paulosi wakapulikira, wakawovwira kuti paŵe mtende pakati pa ŵabali.—Rom. 14:​19, 21. w23.10 10 ¶15-16

Nyengo zinyake mungaghanaghanapo yayi za mukhaliro wa kopa kuti ungaŵa wakuzirwa para munthu wakukhumba kuŵa na mubwezi muwemi. Ndipouli, awo ŵakukhumba kuŵa paubwezi wakukhora na Yehova ŵakwenera ‘kumopa.’ Kwali tateŵetera Yehova kwanyengo yitali wuli, waliyose wa ise wakwenera kulutilira kumopa. Kweni kasi kopa Chiuta chikung’anamurachi? Munthu uyo wakopa Chiuta mwakwenelera wakulongora kuti wakutemwa Chiuta, ndipo wakuchita yayi chinthu chilichose icho chingananga ubwezi wake na iyo. Yesu wakaŵa na wofi wanthena uwu. (Heb. 5:7) Iyo wakawonanga Yehova nga ntchinthu chakofya yayi. (Yes. 11:​2, 3) M’malo mwake, wakamutemwanga chomene ndipo wakaŵa wakukhumbisiska kumupulikira. (Yoh. 14:​21, 31) Nga ni Yesu, nase tikumuchindika chomene Yehova chifukwa iyo ngwachitemwa, ngwavinjeru, ni murunji, kweniso ngwankhongono. Nase tikumanya kuti Yehova wakutitemwa ndipo wakukhwaskika na umo tikuchitira na ulongozgi wake. Tingamukwenyerezga Yehova panji tingakondweska mtima wake.—Sal. 78:41; Zinth. 27:11. w23.06 14 ¶1-2; 15 ¶5

Themba Uziya wakati waŵa wankhongono chomene, wakaluwa kuti Yehova ndiyo wakamupanga nkhongono na kumutumbika pa vyose ivyo wakachitanga. Kasi tikusambirapo vichi apa? Tikwenera kujikumbuskanga kuti vitumbiko vyose ivyo tili navyo kweniso mwaŵi wa mauteŵeti agho tikuchita vikufuma kwa Yehova. M’malo mwa kujikuzga pa ivyo tachita, tikwenera kumuwonga Yehova pa ivyo tikukwaniska kuchita. (1 Kor. 4:7) Tikwenera kujiyuyura na kuzomerezga kuti ndise ŵambura kufikapo ndipo tikukhumbikwira ulongozgi panji ntchenyo. Mubali munyake uyo wali na vyaka pafupifupi 60 wakalemba kuti: “Nasambira kuti ningakwiyanga yayi panji kukhuŵara para ŵanji ŵaniphalira ivyo nabudiska. Para napika ntchenyo chifukwa cha ivyo nabudiska, nkhuyezga kusintha na kulutilira kumuchitira Yehova ivyo ningakwaniska.” Unenesko ngwakuti para tikopa Yehova na kulutilira kuŵa ŵakujiyuyura, vinthu vikutiyendera makora chomene pa umoyo withu.—Zinth. 22:4. w23.09 10 ¶10-11

Ŵakhristu ŵakwambilira ŵakakhumbikwiranga kuzizipizga. Padera pa kusangana na masuzgo agho waliyose wakusangana nagho, ŵakasanganaso na masuzgo ghanyake pakuŵa Ŵakhristu. Ŵanandi ŵa iwo padera pakutambuzgika na ŵalongozgi ŵachisopa Chachiyuda na ŵalara ŵa boma la Romu, ŵakatambuzgikangaso na ŵabali ŵawo. (Mat. 10:21) Ndipo mukati mu mpingo, nyengo zinyake ŵakeneranga kuti ŵalimbane na ŵachigaluka na visambizgo vyawo vyautesi. (Mil. 20:​29, 30) Ndipouli, Ŵakhristu aŵa ŵakazizipizga. (Chivu. 2:3) Kasi ŵakachita wuli kuti ŵazizipizge? Ŵakaghanaghanirapo chomene viyelezgero vya ŵanthu ŵa mu Malemba awo nawo ŵakazizipizga, nga ni Yobu. (Yak. 5:​10, 11) Ŵakalomba Yehova kuti waŵape nkhongono. (Mil. 4:​29-31) Ndipo iwo ŵakaŵika mtima pa vitumbiko ivyo ŵangazakasanga para ŵalutilira kuzizipizga. (Mil. 5:41) Nase tingazizipizga para nyengo zose tikusambira na kughanaghanirapo viyelezgero vya ŵanthu awo ŵakusangika mu Baibolo kweniso mu mabuku ghithu, awo nawo ŵakazizipizga. w23.07 3 ¶5-6

Yehova na Yesu ŵazamutilekapo yayi. MpositolePetrosi wati wamukana Yesu, wakaŵa na chinthu chakuzirwa chomene chakuti wasankhe. Kasi walekenge panji walutilirenge kukosera pakuŵa msambiri wa Khristu? Yesu wakalomba kwa Yehova kuti chipulikano cha Petrosi chileke kulopwa. Yesu wakamuphalira Petrosi vyakuti wakamulombera kweniso wakamuphalira kuti wakamugomezganga kuti wazamukhozganga ŵabali ŵake. (Luka 22:​31, 32) Petrosi wakwenera kuti wakakhozgekanga chomene para wakumbuka mazgu gha Yesu agha. Para tikukhumbikwira kuti tipange chakusankha chakuzirwa, Yehova wangagwiliskira ntchito ŵaliska ŵachitemwa kuti ŵatipe wovwiri uwo tikukhumbikwira mwakuti tilutilire kugomezgeka. (Efe. 4:​8, 11) Nga umo Yehova wakawovwilira Petrosi na ŵapositole ŵanyake mwakuthupi, nase watovwirengeso para tikuŵika uteŵeti pa malo ghakwamba mu umoyo withu. w23.09 24-25 ¶14-15

Yehova wakuwona vyose ivyo tikuchitira ŵanyithu nanga vingaŵa vichoko wuli. Wakuviwona kuŵa sembe yakuzirwa kweniso wakuviwona kuŵa ngongoli iyo wawezgerengepo. Usange kumasinda mukateŵeterapo kale nga muteŵeti wakovwira panji mulara, Yehova wakukumbuka mulimo uwo mukachita kumasinda na chitemwa icho chikamuchiskani kuti muchite nthena. (1 Kor. 15:58) Wakuwonaso chitemwa icho mukulutilira kulongora. Yehova wakukhumba kuti tikuzgenge chitemwa chithu pa iyo kweniso ku ŵanji. Tingakuzga chitemwa chithu pa Yehova para tikuŵazga Mazgu ghake na kughanaghanirapo kweniso para tikulomba nyengo zose. Tingakuzga chitemwa chithu pa ŵabali na ŵadumbu para tikuŵawovwira munthowa zakupambanapambana. Apo chitemwa chithu chikukura, tisendelerenge chomene kwa Yehova kweniso tiŵenge paubwezi wakukhora na ŵabali na ŵadumbu. Ndipo tiŵenge paubwezi uwu kwamuyirayira. w23.07 10 ¶11; 11 ¶13; 13 ¶18

Mkhristu waliyose wakwenera kusankha yekha umo wangapwelelera umoyo wake. Malango ghachoko waka gha mu Baibolo, nga dango la kuziŵizga ndopa kweniso kuchita vyamzimu, ndigho ghekha Mkhristu wakwenera kughanaghanirapo para wakusankha wovwiri wa munkhwala uwo wangapokera. (Mil. 15:20; Gal. 5:​19, 20) Kweni vigaŵa vinyake vyose ni nkhani ya waliyose payekha. Kwali tikuwona kuti wovwiri unyake ndiwo ngwakwenelera, kweni tikwenera kuchindika ivyo ŵabali na ŵadumbu ŵithu ŵasankha pa nkhani ya wovwiri uwo ŵangapokera. Pa nkhani iyi, tikwenera kukumbukira fundo zinayi izi: (1) Ni Ufumu wa Chiuta pera uwo uzamuwuskapo matenda kwamuyirayira. (Yes. 33:24) (2) Mkhristu waliyose wakwenera ‘kukhorwa’ pa iyo yekha kuti wasankha mwamahara pa nkhani ya munkhwala. (Rom. 14:5) (3) Tikwenera yayi kweruzga ŵanji panji kuŵakhuŵazga. (Rom. 14:13) (4) Ŵakhristu ŵakulongora chitemwa, ndipo ŵakuwona kuti mtende wa mu mpingo ngwakuzirwa chomene kuluska wanangwa wawo wakusankha vinthu.—Rom. 14:​15, 19, 20. w23.07 24 ¶15

Kasi mukumutemwa chomene Yehova? Tikukayika yayi kuti mukumutemwa! Kwamba waka mu nyengo yakale, ŵanthu ŵanandi ŵalongora kuti ŵakumutemwa chomene Yehova. (Sal. 104:​33, 34) Ŵanandi ŵajinora vinthu vinyake kuti ŵateŵetere Yehova. Ivi ndivyo ŵakachitanga Ŵanaziri panji kuti ‘ŵakupelekeka’ ŵa mu nyengo ya Ŵaisrayeli.’ Lizgu ili likalongosoranga vya Muisrayeli wamwamphu uyo wajinora vinthu vinyake mwakuti wateŵetere Yehova munthowa yapadera. Dango la Mozesi likazomerezganga mwanalume panji mwanakazi kupanga chilapo chapadera kwa Yehova pakusankha kuŵa Munaziri kwakanyengo. (Maŵa. 6:​1, 2) Para Muisrayeli wapanga chilapo chakuŵa Munaziri, wakeneranga kulondezga ulongozgi uwo Ŵaisrayeli ŵanyake wose ŵakalondezganga yayi. Ipo chifukwa wuli pera Muisrayeli wakasankhanga kuŵa Munaziri? Wakwenera kuti wakachitanga nthena chifukwa cha kumutemwa chomene Yehova, kweniso wakakhumbanga kuwonga kufumira pasi pa mtima vitumbiko ivyo wasanga.—Doto. 6:5; 16:17. w24.02 14 ¶1-2

Mu Baibolo lizgu la Chihebere ilo lili kung’anamulika kuti “kugomezgeka,” panji “chitemwa chakugomezgeka” kanandi likuyowoya vya chitemwa icho Chiuta wali nacho pa ŵateŵeti ŵake. Lizgu ili likugwiliskirikaso ntchito pakulongosora za chitemwa icho ŵateŵeti ŵa Chiuta ŵakulongorana. (2 Sam. 9:​6, 7) Para nyengo yikujumphapo tingaŵa ŵakukhora chomene pa nkhani ya kugomezgeka. Tiyeni tiwone umo Daniyeli wakaŵira wakukhora pa nkhani ya kugomezgeka. Daniyeli wakayezgeka kanandi waka pa nkhani ya kugomezgeka. Kweni apo wakayezgeka chomene ni apo wakaŵa na vyaka vya m’ma 90. Ŵalaraŵalara awo ŵakateŵeteranga Themba Dariyasi ŵakamutinkhanga chomene Daniyeli ndipo ŵakamuchindikanga yayi Chiuta wake. Ntheura ŵakapanga pulani yakuti Daniyeli wakomeke. Ŵakapangiska themba kuti lisayine dango ilo lipangiskenge Daniyeli kulongora usange wagomezgekenge kwa Chiuta panji kwa themba. Icho Daniyeli wakeneranga kuchita kuti walongore kugomezgeka kwa themba, ntchakuti wakeneranga kuleka kulomba kwa Yehova kwa mazuŵa 30. Kweni Daniyeli wakakana kuleka kugomezgeka.—Dan. 6:​12-15, 20-22. w23.08 5 ¶10-12

Yehova wakukhumba kuti tilutilire kulongora chitemwa ku ŵabali na ŵadumbu ŵithu. Para mubali panji mudumbu wandatichitire makora vinthu vinyake, tingaŵa na chigomezgo chose kuti nayo wakukhumba kulondezga fundo za mu Malemba kweni panji wachita waka nthena chifukwa chakuti wakaghanaghanirapo waka makora yayi. (Zinth. 12:18) Chiuta wakuŵatemwa ŵateŵeti ŵake ŵakugomezgeka nangauli ŵakubudiska vinthu vinyake. Wakutijowora yayi nanga tingabudiska vinthu vinyake, nesi kutisungira vyakusingo. (Sal. 103:9) Ntheura ntchakuzirwa chomene kuti nase tiyezgenge Adada ŵithu ŵakuchanya pa nkhani yakugowokera ŵanji. (Efe. 4:32–5:1) Kumbukaniso kuti apo umaliro ukusendelera, tikwenera kulutilira kuŵa paubwezi wakukhora na ŵabali na ŵadumbu ŵithu. Tikwenera kukhazga kuti titambuzgikenge chomene. Nyengo zinyake tingajalirika mu jele chifukwa cha chipulikano chithu. Para vyanthena vyazakachitika, ndipo tizamukhumbikwira chomene ŵabali na ŵadumbu ŵithu kuluska kumasinda kose.—Zinth. 17:17. w24.03 15-16 ¶6-7

Mu Baibolo muli nkhani za ŵawukirano awo ŵakasendelera kwa Yehova, na kuŵa nayo paubwezi, ndipo ŵakaŵa na umoyo wakukhorweska. Davide njumoza wawo. Apo iyo wakaŵa mwana, wakasankha kuŵa paubwezi na Chiuta ndipo pamanyuma wakaŵa themba. (1 Mathe. 3:6; 9:​4, 5; 14:8) Para mungasambira vyakukhwaskana na Davide, chiyelezgero chake namwe chingamuchiskani kuti muteŵetere Yehova mwakugomezgeka. Panji mungasambiraso vinandi vyakukhwaskana na Mariko na Timote. Muwonenge kuti ŵakateŵetera Yehova kwambira waka apo ŵakaŵa ŵachoko ndipo ŵakalutilira kuŵa ŵakugomezgeka kwa Chiuta. Umo mukugwiliskira ntchito umoyo winu pasono ndivyo vilongorenge umo umoyo winu uzamuŵira munthazi. Para mukugomezga Yehova m’malo mwa kugomezga pa kapulikiskiro kinu, wamovwiraninge kuti musankhenge vinthu mwamahara. Namwe mungaŵa na umoyo wakukondwa kweniso wakukhorweska. Mukumbukenge kuti Yehova wakuzirwiska ivyo mukumuchitira. Palije nthowa yiwemi chomene iyo mungagwiliskira ntchito umoyo winu kuluska kuteŵetera Adada ŵinu ŵakuchanya, Yehova. w23.09 13 ¶18-19

Mpositole Paulosi wakamanyanga kuti Ŵakhristu ŵanyake nawo mbambura kufikapo. Mwachiyelezgero, ŵabali na ŵadumbu ŵanyake mu mipingo ya mu Yerusalemu ŵakakayikiranga usange Paulosi wazgoka nadi msambiri. (Mil. 9:26) Pamanyuma, ŵanyake ŵakamuyowoyeranga mautesi mwakuti ŵanange lumbiri lwake. (2 Kor. 10:10) Paulosi wakawona mubali munyake waudindo uyo wakachita vinthu ivyo mphanyi vikakhuŵazga ŵanji. (Gal. 2:​11, 12) Ndipo mubwezi wake munyake wapamtima, Mariko, nayoso wakamukhuŵazga chomene. (Mil. 15:​37, 38) Paulosi wakatenge wazomerezgenge vinthu ivi kumupangiska kuleka kuchezga na awo ŵakamukhuŵazga. Kweni iyo wakalutilira kuŵawona mwakwenelera ŵabali na ŵadumbu aŵa kweniso kuteŵetera Yehova mwakugomezgeka. Kasi ntchivichi chikawovwira Paulosi kuzizipizga? Paulosi wakaŵatemwanga ŵabali na ŵadumbu. Chitemwa chikamovwira kuti waŵike mtima pa mikhaliro yiwemi ya ŵabali na ŵadumbu, m’malo mwa maubudi ghawo. Chitemwa chikamovwiraso Paulosi kuchita ivyo vili mu lemba la mwahuno. w24.03 15 ¶4-5

Mu Baibolo muli nkhani zinandi izo zikulongora kuzirwa kwa mukhaliro wakuzika. Mwachiyelezgero Yisake. Apo wakakhalanga mu chigaŵa cha Ŵafilisiti ku Gerara, ŵazengezgani ŵake ŵa sanji ŵakawunda visimi ivyo ŵateŵeti ŵa awiske ŵakajima. M’malo mwa kulimbana nawo, Yisake wakasankha kusamukira chapataliko na kukajimaso visimi vinyake. (Gen. 26:​12-18) Kweni nipera Ŵafilisiti ŵakatiso maji agho ghakaŵa mu chigaŵa icho wakasamukirako Yisake ghakaŵa ghawo. Nangauli vikaŵa nthena, Yisake wakachita vinthu mwamtende. (Gen. 26:​19-25) Kasi ntchivichi chikamovwira kulutilira kuŵa wakuzika nangauli ŵanji ŵakaŵikapo mtima kulimbana nayo? Ntchakuwonekerathu kuti wakasambirako ku chiyelezgero cha ŵapapi ŵake, ndipo wakasambirako vinandi kwa Abrahamu pa umo wakachitiranga vinthu mwamtende, kweniso kwa Sara uyo wakaŵa na “mzimu wakufwasa na wakuzika.”—1 Pet. 3:​4-6; Gen. 21:​22-34. w23.09 15 ¶4

Yehova wakatuma Mwana wake wapadera pa charu chapasi kuzakasambizga ŵanthu vya Ufumu kweniso kupeleka umoyo wake kutiwombora ku kwananga na nyifwa. Kufuma apo, Yesu wakawuskikira kuchanya kuti wakaŵe Fumu ya Ufumu wa Chiuta. Fundo yikuru ya mu Baibolo njakuti Yehova wazamutuŵiska zina lake, ndipo lizamutuŵiskika para khumbo lake kulazga ku charu chapasi lazakafiskika mwakugwiliskira ntchito Ufumu wake pasi pa Khristu. Khumbo la Yehova lingasinthika yayi. Iyo walayizga kuti vyose vifiskikenge nga umo wali kuyowoyera. (Yes. 46:​10, mazgu ghamusi; Heb. 6:​17, 18) Panyengo yake, charu chizamuŵa paradiso ndipo ŵana ŵa Adamu na Eva awo ŵazamuŵa ŵarunji na ŵakufikapo, ‘ŵazamukondwa na umoyo muyirayira.’ (Sal. 22:26) Kweni ni ivi pera yayi ivyo Yehova wazamufiska. Iyo wazamovwiraso kuti ŵateŵeti ŵake wose kuchanya na charu chapasi ŵaŵe ŵakukolerana. Ndipo waliyose wazamujilambika kwa Yehova pakuŵa Muwusi wawo. (Efe. 1:​8-11) Kasi ntchakukondweska yayi kuwona umo Yehova wakufiskira khumbo lake? w23.10 20 ¶7-8

Ŵayuda awo ŵakaŵa ku Babuloni ŵati ŵafika ku Yerusalemu, pakajumpha nyengo yichoko waka mbwenu ŵakamba kukumana na suzgo la vya ndalama, kususkika kweniso ndyali zikamba kwenda makora yayi mu charu ichi. Ivi vikapangiska kuti ŵanyake vyambe kuŵasuzga kuŵika mtima pa mulimo wakuzengaso Tempile la Yehova. Lekani Yehova wakatuma ntchimi ziŵiri, Hagayi na Zekariya kuti zikawovwire ŵanthu kuti ŵaŵeso na mtima wakukhumba kuzenga tempile. (Hag. 1:1; Zek. 1:1) Ndipouli, pati pajumpha vyaka pafupifupi 50, Ŵayuda ku Yerusalemu ŵakalopwaso mwauzimu. Ezira, mulembi wa Dango wakanyamuka kufuma ku Babuloni kuluta ku Yerusalemu kuti wakaŵawovwire ŵanthu ŵa Chiuta kuti ŵaŵikenge kusopa Yehova pa malo ghakwamba mu umoyo wawo. (Ezir. 7:​1, 6) Mauchimi agho Hagayi na Zekariya ŵakaphalira ŵanthu ŵa Chiuta kumanyuma, nase ghangatovwira kuti tigomezgenge Yehova kuti watovwirenge nanga tingakumana na masuzgo wuli pa umoyo withu.—Zinth. 22:19. w23.11 14-15 ¶2-3

Kasi tingalongora wuli kuti tikuŵatemwa Ŵakhristu ŵanyithu? Nthowa yimoza ndiyo kuŵasanguluska. Tingalutilira “kusanguluskana yumoza na munyake” usange tikuchitirana lusungu. (1 Tes. 4:18) Kasi tingachita wuli kuti tilutilire kuŵa na chitemwa chanadi? Usange tikuchita vyose ivyo tingafiska kuti tiŵagowokerenge ŵabali ŵithu para ŵatibudira. Chifukwa wuli mazuŵa ghano ndipo ntchakukhumbikwa chomene kulongorana chitemwa? Wonani chifukwa icho Petrosi wakayowoya. Iyo wakati: “Umaliro wa vinthu vyose waneng’enera. Ntheura, . . . mutemwanenge chomene.” (1 Pet. 4:​7, 8) Kasi tikwenera kulindilira vichi apo umaliro wa charu ichi ukusendelera chomene? Pakuyowoya za ŵasambiri ŵake Yesu wakayowoyerathu kuti: “Muzamutinkhika na mitundu yose chifukwa cha zina lane.” (Mat. 24:9) Kuti tilutilire kuŵa ŵakugomezgeka kwa Yehova nangauli tikutinkhika tikwenera kulutilira kuŵa ŵakukolerana. Usange tikuchita nthena, Satana wazamutipatura yayi.—Fil. 2:​1, 2. w23.11 13 ¶18-19

Unenesko wa Mazgu gha Chiuta uli na nkhongono chomene. Apo tikusambizga ŵanthu unenesko wakukhwaskana na Yehova kweniso umo iyo waliri nadi, tikuwona kuti pakuŵa vyakufumapo viwemi chomene. Ŵanthu ŵakuleka kubulumutizgika na mautesi gha Satana, ndipo ŵakwamba kuwona mikhaliro yakukondweska ya Dada withu. Ŵakuzizwa na nkhongono zambura chigoti izo wali nazo. (Yes. 40:26) Ŵakusambira kumugomezga chifukwa chakuti ni murunji. (Doto. 32:4) Ŵakusambirako vinandi kufuma ku vinjeru vyake. (Yes. 55:9; Rom. 11:33) Ndipo ŵakupembuzgika kumanya kuti iyo ntchitemwa. (1 Yoh. 4:8) Apo ŵakulutilira kusendelera kwa Yehova, chigomezgo chawo cha kuzakasanga umoyo wamuyirayira pakuŵa ŵana ŵake chikuŵa chanadi. Tili na mwaŵi wapadera chomene wakovwira ŵanthu kusendelera kwa Adada ŵithu ŵakuchanya. Para tikuchita nthena, Yehova wakutiwona kuti ndise “ŵantchito ŵanyake.”—1 Kor. 3:5. w24.02 12 ¶15

Usange ndimwe msambiri wa Baibolo panji mukulereka na ŵapapi awo Mbakaboni, kasi mukughanaghana vya kubatizika? Para ni nthena, muli na chilato chiwemi chomene. Kweni pambere mundabatizike, mukwenera kujipeleka dankha kwa Yehova. Kasi munthu wakuchita vichi kuti wajipeleke kwa Yehova? Wakumulayizga Yehova mu lurombo kuti wasopenge iyo pera kweniso wadangizgenge khumbo la Chiuta mu umoyo wake. Ichi chikung’anamura kuti wakumulayizga Yehova kuti walutilirenge kumutemwa ‘na mtima wake wose na umoyo wake wose na maghanoghano ghake ghose na nkhongono zake zose.’ (Mrk. 12:30) Munthu wakujipeleka kwa Yehova kwayekha. Apo ubatizo ukuŵa wapakweru, ndipo vikovwira awo ŵakuwonelera kumanya kuti muli kujipeleka kale kwa Yehova. Manyani kuti para mwajipeleka kwa Yehova ndikuti mwachita chilapo, ndipo mukwenera kuyezgayezga kuchifiska chifukwa ndivyo Yehova wakukhazga.—Muph. 5:4. w24.03 2 ¶2; 3 ¶5

Nthengwa zose zikukumana na masuzgo. Baibolo likuyowoya mwambura kubisa kuti ŵanthu awo ŵanjira mu nthengwa ŵaŵenge na “suzgo mu thupi lawo.” (1 Kor. 7:28) Chifukwa wuli? Chifukwa nthengwa yikupangika na ŵanthu ŵaŵiri ŵambura kufikapo, awo ŵali na mikhaliro yakupambana kweniso ŵakutemwa vinthu vyakupambana. Nyengo zinyake ŵakuŵa ŵakupambana mitheto panji kwakukulira. Nyengo zinyakeso ŵangalongora tunkharo uto panji tukawonekanga yayi pambere ŵandatorane. Vyose ivi vingambiska masuzgo. M’malo mwa kuzomerezga kuti waliyose wa iwo wapangiskako suzgo ilo, na kusanga nthowa iyo yingawovwira kulimazga, waliyose wangamba kwimba mulandu munyake. Nyengo zinyake ŵangawona kuti nthowa yakovwira nkhupatukana waka panji kupatana. Kweni kasi kuchita nthena nkhwakovwira nadi? Yayi. Yehova wakukhumba kuti mfumu na muwoli ŵalutilire kukhala lumoza nanga vingaŵa kuti yumoza mu nthengwa ngwakusuzga. w24.03 16 ¶8; 17 ¶11

Apo mukaŵa kuti mwabatizika, chigomezgo chinu chakuzakakhala kwamuyirayira pa charu chapasi chikalutilira kukura ndipo mukalutiliranga kusambira vinandi na kuŵa ŵakukhwima mwauzimu. (Heb. 5:13–6:1) Mukwenera kuti mwawona kuti mazgu agho ghakusangika pa Ŵaroma 5:​2-4 ngaunenesko. Mwasanganapo na masuzgo ghakupambanapambana, kweni mwazizipizga ndipo mwawona kuti Chiuta wakukondwa namwe. Chifukwa chakuti mukumanya kuti Chiuta wakumutemwani na kukondwa namwe, sono muli na vifukwa vinandi chomene vyakukhazgira kuti muzamupika ivyo Chiuta wali kumulayizgani. Sono chigomezgo chinu ntchakukhora chomene kuluska pakwamba, ndipo ntchanadi kwa imwe. Chikumovwirani chomene umo mukwenera kuchitira vinthu pa umoyo winu, nga umo mukwenera kuchitira vinthu na ŵamumbumba yinu, umo mukusankhira vinthu, kweniso umo mukugwiliskilira ntchito nyengo yinu. Mpositole Paulosi wakasazgirapo fundo yakuzirwa chomene yakukhwaskana na chigomezgo icho tili nacho padera pa kuŵa ŵakuzomerezgeka na Chiuta. Wakutisimikizgira kuti ivyo tikugomezga vizamufiskika nadi.—Rom. 15:13. w23.12 12-13 ¶16-19

Para takumana na suzgo likuru, tikutondeka kughanaghana makora nga umo vikuŵira para vinthu vili makora waka. Tingaŵa nga ni ngalaŵa iyo yikututuzgika waka na chimphepo chankhongono. Kasi Yehova wakutovwira wuli para tamba kusuzgika chomene maghanoghano? Wakutilayizga kuti watikhozgenge. Para kuli chimphepo, sitima yikwamba kulegha panji kuti kugenukagenuka. Kweni kuti yikhazikike, sitima zinyake zikuŵa na tuvisulo tunyake mumphepete uto tukovwira kuti zikhazikike. Tuvisulo utu tukovwira kuti yileke kugenukagenuka chomene, ndipo vikovwira kuti yikafike makora. Kweni tuvisulo utu tukugwira makora ntchito para sitima yikwenda. Mwakuyana waka, Yehova wangatovwira kuti tiŵe ŵakukhora pekha para tikulutilira kumuteŵetera mwakugomezgeka panyengo ya masuzgo. w24.01 22 ¶7-8

Para mwamba kopa, jifumbani kuti, ‘Kasi ni vichi ivyo Yehova wali kuchita kale?’ Ghanaghaniranipo pa vinthu ivyo wali kulenga. Mwachiyelezgero, para ‘tikulaŵisiska’ umo Yehova wakupwelelelera viyuni na maluŵa, vinthu ivyo vikalengeka mu chikozgo chake yayi kweniso ivyo vikumusopa yayi, mbwenu tigomezgenge chomene kuti nase watipwelelerenge. (Mat. 6:​25-32) Ghanaghaniraniso ivyo Yehova wachitira ŵasopi ŵake. Mungasambira za munthu munyake mu Baibolo, uyo wakalongora chipulikano chikuru chomene, panji mungaŵazga za ivyo vikachitikira muteŵeti munyake wa Yehova wa mazuŵa ghano. Kweniso ghanaghaniranipo pa umo Yehova wakumupwelelerani. Kasi Yehova wakamovwirani wuli kuti mumanye unenesko? (Yoh. 6:44) Kasi Yehova wazgora wuli malurombo ghinu? (1 Yoh. 5:14) Kasi zuŵa lililose mukusanga chandulo wuli na sembe yakuwombora ya Mwana wake?—Efe. 1:7; Heb. 4:​14-16. w24.01 4 ¶6; 7 ¶17