Kasi Cigomezgo Cinu mwa Ciuta Nchakukhora Wuli?
“Kweni penjani nanga Ufumu.”—MATEYU 6:33.
1, 2. Kasi munyamata munyake wakacita wuli na nchito yake, ndipo cifukwa wuli?
MUNYAMATA wakakhumbanga kucita vinandi mu mpingo. Kweni suzgo likaŵa lakuti wakatondekanga kufika pa maungano nyengo zose cifukwa ca nchito iyo wakagwiranga. Kasi wakacita wuli kuti wamazge suzgo ili? Wakacepeska vyakukhumba mu umoyo wake, wakaleka nchito yira, ndipo wakasanga nchito yinyake iyo yikamupanga mupata wa kucita milimo ya mpingo. Sono wakusanga ndarama zicoko comene kuluska kale, kweni wakupwelelera makora mbumba yake, nakuti wakovwira comene mu mpingo.
2 Kasi mukucimanya cifukwa ico munyamata uyu wakacitira nthena? Kasi mukughanaghana kuti muŵenge imwe mphanyi ndimo mukacitira? Ŵakhristu ŵanandi ndimo ŵacitira, ndipo ŵakulumbika comene. Ivyo ŵakucita vikulongora kuti ŵakugomezga ivyo Yesu wakayowoya kuti: “Penjani nanga Ufumu wake, na urunji wake; ndipo vyose vyeneivi viti visazgikirengeko kwa imwe.” (Mateyu 6:33) Ŵakugomezga kuti Yehova ndiyo waŵavwirenge, caru yayi.—Zintharika 3:23, 26.
3. Cifukwa wuli ŵanyake ŵangakayika usange nchakwenelera lero kupenja dankha Ufumu wa Ciuta?
3 Pakuwona nyengo zinonono izo tilimo, ŵanandi ŵangawona nga kuti ivyo munyamata uyu wakacita ni vyambura mahara. Lero ŵanthu ŵanyake ŵali mu ukavu wa kutinya nyinda apo ŵanyake usambazi ŵakucita kukandapo waka. Ŵanandi mu vyaru ivyo ni vikavu ŵangazomera yayi kutaya mwaŵi uliwose wa nchito uwo wasangika. Kweni mu vyaru visambazi, ŵanandi awo usambazi ŵakucita kukandapo ŵakulimbikira kuti uleke kumara nangauli kuli masuzgo gha vya cuma, kusinthasintha nchito, kweniso mabwana agho ghakukhumba kuti ŵagwirenge nchito nyengo yitali. Pakuwona umo vikusuzgira kuti munthu wasange vyakukhumbikwa pa umoyo, ŵanyake ŵangafumba kuti, ‘Kasi nchakwenelera nipera kupenja dankha Ufumu?’ Kuti tizgore fumbo ili, tiyeni timanye dankha ŵanthu awo Yesu wakayowoyanga nawo.
“Mungenjerwanga”
4, 5. Kasi Yesu wakalongora wuli kuti nchakwenelera kuti ŵanthu ŵa Ciuta ŵaleke kwenjerwa comene na vinthu vya zuŵa na zuŵa?
4 Yesu wakaŵa mu Galileya, ndipo wakayowoyanga ku wumba wa ŵanthu ŵakufuma ku malo ghanandi. (Mateyu 4:25) Usange ŵakaŵapo ŵasambazi pa ŵanthu aŵa, ŵakaŵa ŵacoko waka. Kweni ŵanandi ŵakwenera kuti ŵakaŵa ŵakavu. Ndipouli, Yesu wakaŵaciska kuti ŵaleke kudangizga usambazi wa thupi kweni ŵajiŵikire usambazi wakuzirwa comene, usambazi wauzimu. (Mateyu 6:19-21, 24) Iyo wakati: “Mungenjerwanga na umoyo winu, kuti muryengeci, panji mumwengeci; panji na thupi linu, muvwarengeci. Asi umoyo ukuluska vyakurya, ndipo thupi likuluska vyakuvwara?”—Mateyu 6:25.
5 Mazgu gha Yesu ghakwenera kuti ghakatindika ŵanandi awo ŵakamupulikizganga. Iwo ŵakamanyanga kuti usange ŵaleka kufukafuka, mbwenu mbumba zawo zisuzgikenge. Ndipouli, Yesu wakaŵakumbuska za tuyuni. Tuyuni tukupenja cakurya na malo ghakukhalapo zuŵa na zuŵa, kweni Yehova wakutupwelelera. Yesu wakayowoyaso umo Yehova wakupwelelera maluŵa gha mu thondo, agho ngakutowa kuluska umo wakavwaliranga Solomoni mu ucindami wake wose. Sono usange Yehova wakupwelelera tuyuni na maluŵa, kasi wangaleka wuli kutipwelelera? (Mateyu 6:26-30) Nga umo Yesu wakayowoyera, umoyo na mathupi ghithu ni vyakuzirwa comene kuluska vyakurya ivyo tikugura kuti tilere umoyo withu na vyakuvwara ivyo tikuvwarika mathupi ghithu. Ntheura usange tikumalira nkhongono zithu zose kujiryeska na kujivwarika, kuleka kusidako zakuti titeŵetere nazo Yehova, ndikuti tikuluwa cifukwa ico tiliri ŵamoyo.—Mupharazgi 12:13.
Kughanaghanira Pakucita Vinthu
6. (a) Kasi Ŵakhristu ŵali na mulimo wuli? (b) Kasi Ŵakhristu ŵakugomezga njani comene?
6 Yesu wakaphaliranga ŵategherezgi ŵake kuti ŵaleke kugwira nchito na kulindilira kuti Ciuta ndiyo wawovwirenge mbumba zawo yayi. Nanga tungaŵa tuyuni tukupenja vyakurya vyawo kweniso vya twana twawo. Ntheura, Ŵakhristu ŵakeneranga kugwira nchito kuti ŵasange cakurya. Ŵakeneranga kupwelelera mbumba zawo. Ŵakhristu awo ŵakaŵa ŵateŵeti na ŵazga ŵakeneranga kulimbikira kuteŵetera mabwana ghawo. (2 Ŵatesalonika 3:10-12; 1 Timote 5:8; 1 Petros 2:18) Kanandi mpositole Paulosi wakasonanga mahema kuti wajovwire. (Milimo 18:1-4; 1 Ŵatesalonika 2:9) Ndipouli, Ŵakhristu ŵara kuti ŵakathembanga nchito izo ŵakacitanga pa umoyo wawo yayi. Ŵakagomezganga mwa Yehova. Pa cifukwa ici, ŵakaŵa na mtende mu mtima uwo ŵanji ŵakaŵavya. Uyo wakalemba Salmo wakati: “Awo ŵakutamira Yehova ŵali nga ndi Ziyoni, lupiri lwambura masunkhuniko lukukhalilira muyirayira.”—Salmo 125:1.
7. Kasi uyo wakuleka kugomezga comene Yehova wangaŵa na maghanoghano wuli?
7 Waliyose uyo wakuleka kugomezga comene Yehova wangaŵa na maghanoghano ghanyake. Ŵanthu ŵanandi ŵakuwona usambazi wa thupi kuŵa nthowa yimoza yakukhalira makora. Ntheura, ŵapapi ŵakuciska ŵana ŵawo kuti ŵasambire comene mwakuti kunthazi ŵazakasange nchito ya ndarama zinandi. Nchacitima kuti mbumba zinyake za Ŵakhristu zasuzgikapo pawaka, cifukwa ŵana ŵawo ŵaleka vinthu vyauzimu na kwamba kujipenjera usambazi.
8. Kasi Ŵakhristu ŵakughanaghanira wuli pakucita vinthu nyengo zose?
8 Ntheura, Ŵakhristu ŵamahara ŵakumanya kuti fundo ya Yesu njakovwira comene lero nga umo yikaŵira kale, ndipo ŵakuyezga kughanaghanira pakucita vinthu. Nangauli ŵakumalira maora ghanandi pa nchito yakulembeka kuti ŵafiske milimo iyo ŵali kupika mu Malemba, ŵakukana kujarika kumaso na mtima wa kupenja ndarama zinandi uwo ungaŵacitiska kusurako vinthu vyauzimu.—Mupharazgi 7:12.
“Lekani Kwenjerwa”
9. Kasi Yesu wakuŵapanikizgira wuli awo ŵakugomezga nadi mwa Yehova?
9 Mu Upharazgi wake wa pa Phiri, Yesu wakaciska awo ŵakamupulikizganga kuti: “Lekani kwenjerwa, kuti, Tiryengeci? panji, Timwengeci? panji, Tivwarengeci? Cifukwa vyose vyeneivi Ŵamitundu ŵakupenja: cifukwa Ŵawiskemwe ŵa kucanya ŵakumanya kuti mukukavuka vyose vyeneivi.” (Mateyu 6:31, 32) Mazgu agha ngakukhozga nadi! Usange tikugomezga nadi Yehova, iyo watovwirenge nyengo zose. Kweniso mazgu gha Yesu agha ghakutiphalira kanthu kanyake. Ghakutikumbuska kuti usange ‘tikupenja comene’ vinthu vya thupi, tikughanaghana nga ‘mbamitundu,’ ŵanthu awo Mbakhristu ŵaunenesko yayi.
10. Apo mwanalume munyake wakiza kuzakafumba fundo kwa Yesu, kasi Yesu wakavumbura wuli ivyo munthu yura wakatemwanga comene?
10 Nyengo yimoza, mwanalume musambazi comene wakafumba Yesu ico wangacita kuti wasange umoyo wamuyirayira. Yesu wakamukumbuska ivyo Dango likayowoyanga, ilo pa nyengo iyo likagwiranga nchito. Munthu yura wakamuphalira Yesu kuti: “Vyose vyeneivi ndili kusungilira: kwakhalasoci?” Ivyo Yesu wakazgora vikwenera kuti vikazizika ŵanandi. Iyo wakati: ‘Usange ukukhumba kuŵa wakufikapo, ukaguliske ivyo uli navyo, na kuŵapa ŵakavu, ndipo wize kandilondezga.’ (Mateyu 19:16-21) Mwanalume yura wakafumapo wacitima, cifukwa wakakhumba yayi kutaya usambazi wake. Nangauli wakatemwanga Yehova, kweni wakatemweska comene vyuma vyake.
11, 12. (a) Kasi Yesu wakayowoya fundo wuli yakovwira pa nkhani ya usambazi? (b) Kasi usambazi ungamutimbanizga wuli munthu pakuteŵetera Yehova?
11 Cakucitika ici cikacitiska Yesu kuyowoya ivyo ŵanandi ŵakaghanaghana kuti wangayowoya yayi. Iyo wakati: “Nkhunonono kuti musambazi wanjire mu Ufumu wa kucanya. . . . Nchipusu kuti ngamira yisolote mu jiso la katimo [sindano], kwakuluska kuti musambazi wanjire mu Ufumu wa Ciuta.” (Mateyu 19:23, 24) Kasi apa Yesu wakang’anamuranga kuti palije musambazi uyo wazamuhara Ufumu? Ndimo viliri yayi, cifukwa iyo wakalutizga kuti: “Kwa Ciuta vyose ni vyamacitiko.” (Mateyu 19:25, 26) Ndipo nadi, na wovwiri wa Yehova ŵasambazi ŵanyake kale ŵakaŵa Ŵakhristu ŵakuphakazgika. (1 Timote 6:17) Ndipouli, pakaŵa cifukwa ico Yesu wakayowoyera mazgu ghakutindika ghara. Wakacenjezganga.
12 Usange munthu wakungangamira ku usambazi wake nga umo wakacitira mwanalume musambazi yura, cingamuŵira cinonono kuti wateŵetere Yehova na mtima wose. Ivi vingacitikira awo mbasambazi kale na “awo ŵakukhumba kusambazgika.” (1 Timote 6:9, 10) Munthu wangaluwa kuti ni ‘mukavu mwauzimu,’ para wakugomezga comene usambazi wa thupi. (Mateyu 5:3) Pa cifukwa ici, wangamba kuwona ngati wakukhumbikwiraso wovwiri wa Yehova yayi. (Duteronome 6:10-12) Wangamba kukhumba kupokera nchindi zapadera mu mpingo. (Yakobe 2:1-4) Ndipo wangamalira nyengo yinandi pa kusangwa na usambazi wake m’malo mwa kuteŵetera Yehova.
Wonani Usambazi Mwakwenelera
13. Kasi ni maghanoghano wuli ghaheni agho Ŵakhristu ŵa mu Laodikeya ŵakaŵa nagho?
13 Ŵanyake awo ŵakatondeka kuwuwona makora usambazi ŵakaŵa Ŵakhristu ŵa mu mpingo wakale wa Laodikeya. Yesu wakaŵaphalira kuti: “Ukuti, Ndine musambazi, ndipo ndasambazgika, ndipo kuti nkhukavuka kanthu cara; ndipo ulive kumanya kuti uli musokwa na wa vitima na mukavu na wacibulumutira na wa nkhuli.” Ŵakhristu ŵa mu Laodikeya ŵakaŵa mu citima cifukwa ca usambazi wawo yayi. Kweni nchifukwa cakuti ŵakagomezganga usambazi kuluska kugomezga Yehova. Pa cifukwa ici, ŵakaŵa ŵakulupuka mwauzimu, ndipo kukakhala pacoko kuti Yesu ‘waŵawukure mu mulomo’ wake.—Civumbuzi 3:14-17.
14. Cifukwa wuli Ŵakhristu Ŵacihebere ŵakenelera nadi kulumbika na Paulosi?
14 Kweni Paulosi wakalumba Ŵakhristu Ŵacihebere cifukwa ca mtima wawo mu nyengo ya kuzikizgika. Iyo wakati: “Mukaŵalengera lusungu awo ŵakaŵa mu vikondo, ndiposo mukakunthirapo mu kukondwa kuskogha kwa mphango zinu, uku mukumanya kuti mwaŵene muli na mphango ziwemi zakuluska na zakukhalilira.” (Ŵahebere 10:34) Ŵakhristu ŵara ŵakakwenyelera yayi cifukwa ca kupokeka katundu wawo. Ŵakalutilira kuŵa ŵacimwemwe cifukwa cakuti ŵakakoleska usambazi wawo wakuzirwa comene, “mphango ziwemi . . . zakukhalilira.” Nga ni wamalonda wa mu ntharika ya Yesu uyo wakamara vyake vyose kuti wasange ngale ya mtengo wapatali, nawo ŵakaŵikapo mtima kuti ŵakoleske cilindizga ca Ufumu, nanga ŵangataya vinandi wuli. (Mateyu 13:45, 46) Uwu ukaŵa mtima uwemi nadi!
15. Kasi mwanakazi munyake ku Liberia wakacita wuli kuti wapenje dankha vinthu vya Ufumu?
15 Ŵanandi lero ŵali na mtima uwemi wakuyana waka uwu. Mwaciyelezgero, ku Liberia, Mkhristu munyake mwanakazi wakasolekera ku yunivesite. Mu caru ici, ŵanthu ŵakuwona kuti uwu ni mwaŵi ukuru wakuti munthu wangazakawovwirika nawo kunthazi. Kweni mwanakazi uyu wakaŵa mupayiniya, mupharazgi wa nyengo zose, ndipo wakapokera kalata yakuti wakacite upayiniya wapadera wa kanyengo. Wakasankha kupenja dankha Ufumu na kulutilira mu uteŵeti wa nyengo zose. Wakaluta uko wakacitiranga uteŵeti wake ndipo wakambiska masambiro gha Baibolo 21 mu myezi yitatu. Mudumbu muwukirano uyu pamoza na ŵanyake ŵanandi ŵakuyana nayo ŵakupenja dankha Ufumu, nanga nkhutaya mwaŵi wakuti ungazakaŵawovwira kuthupi. Kasi ŵakucita wuli kuti ŵaŵenge na mtima uwu mu caru cakutemwa usambazi ici? Ŵasambira kuŵa na makhaliro ghawemi ghanandi. Tiyeni tiwonepo ghanji mwa makhaliro agha.
16, 17. (a) Cifukwa wuli kujiyuyura nkhwakuzirwa usange tikukhumba kugomezga mwa Yehova? (b) Cifukwa wuli tikwenera kugomezga vilayizgo vya Ciuta?
16 Kujiyuyura: Baibolo likuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere Iye, ndipo tiwanyoroskenge nthowa zako. Ungajinenanga wekha wavinjeru.” (Zintharika 3:5-7) Nyengo zinyake, cinthu cinyake cingawoneka kuŵa cakovwira kuyana na umo ŵanthu ŵakuwonera. (Yeremiya 17:9) Ndipouli, Mkhristu wanadi wakulaŵiska kwa Yehova kuti wamulongozge. (Salmo 48:14) ‘Mu nthowa zake zose,’ kwali mpha vinthu vya mpingo, masambiro panji nchito, vyakusanguluska, panji pa cilicose, iyo mwakujiyuyura wakupenja fundo kwa Yehova.—Salmo 73:24.
17 Kugomezga vilayizgo vya Yehova: Paulosi wakati: “Uyo wakusendelera kwa Ciuta wakwenera kupulikana kuti waliko, ndipo kuti ngwakuŵalambula [wakuŵapa njombe] ŵeneawo ŵakumupenja.” (Ŵahebere 11:6) Usange tikukayika kuti Yehova wafiskenge vilayizgo vyake, cingaŵa cipusu ‘kusuŵilira nkhanira na caru.’ (1 Ŵakorinte 7:31) Kweni usange cipulikano cithu nchakukhora, tiŵikengepo mtima kuti tipenje dankha Ufumu. Kasi tingacita wuli kuti tiŵe na cigomezgo cakukhora? Tikwenera kusendelera kwa Yehova mu lurombo lwakufumira pasi pa mtima nyengo zose, kweniso kwizira mu sambiro la taŵene nyengo na nyengo. (Salmo 1:1-3; Ŵafilipi 4:6, 7; Yakobe 4:8) Nase tingalomba nga umo wakacitira Fumu Davide kuti: “Nkhutamira Imwe, Yehova, nkhuti, ‘Ndimwe Ciuta wane.’ Nawo mbukuru wa uwemi winu!”—Salmo 31:14, 19.
18, 19. (a) Kasi mwamphu ukukhozga wuli cigomezgo cithu mwa Yehova? (b) Cifukwa wuli Mkhristu wakwenera kunozgeka kujipata?
18 Kulimbikira pakuteŵetera Yehova: Paulosi wakalongora kuti kugomezga vilayizgo vya Yehova vikwendera lumoza na mwamphu apo wakalemba kuti: “Tikukhumba kuti imwe, munthu na munthu, mulongore mwamphu weneuwo pera wa ku cigomezgo cakufikapo kuya kafika na ku umaliro.” (Ŵahebere 6:11) Usange tikutangwanika na kuteŵetera Yehova, iyo watovwirenge. Nyengo yiliyose para wakutovwira, cigomezgo cithu mwa iyo cikuŵa cankhongono, tikuŵa “ŵakukhora, ŵambura kusunkhunyika.” (1 Ŵakorinte 15:58) Cipulikano cithu cikuweleramo, ndipo cigomezgo cithu cikukhora.—Ŵaefeso 3:16-19.
19 Kuŵa ŵakunozgeka kujipata: Paulosi wakaleka nchito iyo mphanyi yikamovwira kusanga usambazi mwakuti walondezge Yesu. Tikukayika yayi kuti wakasankha cinthu camahara, nangauli nyengo zinyake wakasuzgikiranga kusanga vinthu. (1 Ŵakorinte 4:11-13) Yehova wandatilayizge kuti vinthu vitenderenge makora pera, nyengo zinyake ŵateŵeti ŵake ŵakusuzgika. Para tikuŵa ŵakunozgeka kucepeskako vyakukhumba mu umoyo na kujipata tikulongora kuti citatata cithu pakuteŵetera Yehova nchakukhora.—1 Timote 6:6-8.
20. Cifukwa wuli kuzizipizga nkhwakuzirwa kwa munthu uyo wakucita dankha vinthu vya Ufumu?
20 Kuzizipizga: Musambiri Yakobe wakaciska Ŵakhristu ŵanyake kuti: “Ntheura zizipizgani, mwa ŵabali, yisuke yize Fumu.” (Yakobe 5:7) Nchakusuzga kuzizipizga mu caru ici, apo vinthu vikucitika mwaluŵiro comene. Tikukhumba kuti vinthu vicitike luŵiro. Kweni Paulosi wakuticiska kuti tilondezge “awo ŵakuhalira malayizgano mu cipulikano na cizizipizgo.” (Ŵahebere 6:12) Muŵe na mtima wa kulindilira Yehova. Umoyo wamuyirayira mu paradiso pa caru capasi ngwakwenelera nadi kuwulindilira!
21. (a) Kasi tikulongora vici para tikucita dankha vinthu vya Ufumu? (b) Kasi mu nkhani yakulondezgapo tizamudumbiskana vici?
21 Nadi, fundo ya Yesu ya kupenja dankha Ufumu njakovwira. Usange ndimo tikucitira, tikulongora kuti tikugomezga nadi mwa Yehova, ndipo tikusankha nthowa yiwemi iyo Mkhristu wangacitira vinthu. Kweni, Yesu wakayowoyaso fundo yinyake yakuti tipenje ‘dankha . . . urunji [wa Ciuta].’ Mu nkhani yakulondezgapo, tizamuwona cifukwa ico fundo iyi njakukhumbikwira comene lero.
Kasi Mungalongosora?
• Kasi Yesu wakaticiska kuti tiwuwonenge wuli usambazi wa thupi?
• Kasi tikusambiraci mu ntharika ya Yesu ya ngamira na jiso la sindano?
• Kasi ni makhaliro wuli ghakwenelera Ŵakhristu agho ghangatovwira kuti tipenje dankha Ufumu wa Ciuta?
[Cithuzithuzi pa peji 19]
Ŵanandi awo ŵakapulika mazgu gha Yesu ŵakaŵa ŵakavu
[Cithuzithuzi pa peji 21]
Wamalonda wa mu ntharika ya Yesu wakamara vyake vyose kuti wasange ngale yimoza ya mtengo wapatali
[Cithuzithuzi pa peji 21]
Mwanalume musambazi wakatemweska comene vyuma vyake kuluska Ciuta
[Cithuzithuzi pa peji 22]
Usange tikutangwanika na kuteŵetera Yehova, iyo watovwirenge