Yezgani Mishonale Wakuluska Wose
“Mundiyezgenge ine, umo naneso ndiliri wakuyezga Khristu.”—1 KOR. 11:1.
1. Cifukwa wuli tikwenera kuyezga Yesu Khristu?
MPOSITOLE Paulosi wakayezganga Yesu Khristu, uyo wakaŵa Mishonale wakuluska wose. Paulosi wakaciskaso Ŵakhristu ŵanyake kuti: “Mundiyezgenge ine, umo naneso ndiliri wakuyezga Khristu.” (1 Kor. 11:1) Pamanyuma pakuti Yesu wasambizga ŵapositole ŵake kukhumbikwa kwa kujiyuyura mwa kugeziska malundi ghawo, wakaŵaphalira kuti: “Ndamupani bambiro, lakuti namweso mucitenge nga ndi umo Ine ndamucitirani.” (Yoh. 13:12-15) Pakuŵa Ŵakhristu ŵa mazuŵa ghano, tili na udindo wa kuyezga Yesu Khristu mu kayowoyero, kacitiro, ndiposo kakhaliro kithu.—1 Pet. 2:21.
2. Nanga ni para Wupu Wakulongozga undamutumani kukapharazga ku caru cinyake, kasi mungaŵa na mtima wuli?
2 Mu nkhani iyo yajumpha, tikasambira kuti mishonale ni munthu uyo watumika ku caru cinyake kukapharazga makani ghawemi. Pa nkhani ya kupharazga, Paulosi wakafumba mafumbo ghakukondweska comene. (Ŵazgani Ŵaroma 10:11-15.) Wonani kuti Paulosi wakafumba kuti: “Ŵapulikenge wuli kwambura mupharazgi?” Pamanyuma wakayowoya mazgu ghanyake ghakufuma mu ucimi wa Yesaya kuti: “Nako nkhutowa kwa malundi gha awo ŵakwiza na makani ghakunozga gha viwemi!” (Yes. 52:7) Nanga ni para mundatumike ku caru cinyake kuti mukateŵetere nga ni mishonale, kweni mungaŵa na mtima wa kutemwa kupharazga. Mungayezga Yesu uyo wakaŵa mupharazgi wamwamphu wa makani ghawemi. Cilimika camara, ŵapharazgi ŵa Ufumu ŵakukwana 6,957,852 ŵakacita ‘mulimo wa upharazgi’ mu vyaru vyakukwana 236.—2 Tim. 4:5.
“Tasida Vyose, Ndipo Tamulondezgani”
3, 4. Kasi ni vici ivyo Yesu wakasida kucanya, ndipo ise tikwenera kucitaci kuti tiŵe ŵalondezgi ŵake?
3 Kuti wafiske uteŵeti uwo wakatumika pa caru capasi, Yesu “wakavura ucindami wake, wakajitolera kaŵiro ka muzga.” Wakaleka umoyo wake wa kucanya na ucindami wake. (Fil. 2:7) Cilicose ico tingacita kuti tiyezge Khristu cingaforako yayi ku ivyo Yesu wakacita apo wakizanga pa caru capasi. Kweni tingalutilira kuŵa ŵambura kusunkhunyika pakuyezga Yesu, na kuleka kudokera vinthu ivyo tikaŵa navyo kale mu caru ca Satana ici.—1 Yoh. 5:19.
4 Panyengo yinyake, mpositole Petrosi wakaphalira Yesu kuti: “Ehena, ise tasida vyose, ndipo tamulondezgani.” (Mat. 19:27) Mwaluŵiro, Petrosi, Andireya, Yakobe, na Yohane ŵakasida mikwawu yawo na kulondezga Yesu. Ŵakaleka nchito yawo ya ulovi na kwamba mulimo wa kupharazga. Kuyana na ivyo Luka wali kulemba, Petrosi wakati: “Wonani, ise tasida vithu, ndipo tamulondezgani.” (Luka 18:28) Taŵanandi ŵa ise kuti tikaleka “vithu” vyose yayi mwakuti tilondezge Yesu. Ndipouli, ‘tikajipata’ kuti tilondezge Khristu na kujipeleka na mtima wose kuŵa ŵateŵeti ŵa Yehova. (Mat. 16:24) Tasanga vitumbiko vinandi cifukwa ca kucita nthena. (Ŵazgani Mateyu 19:29.) Para tikuyezga Khristu mwa kuŵa na mtima wa kutemwa kupharazga, tiŵenge na cimwemwe, comenecomene para tawovwirapo munthu munyake kuti wasendelere kwa Ciuta ndiposo Mwana wake wakutemweka.
5. Yowoyani ciyelezgero cakulongora ivyo munthu uyo wakugwira nchito ku caru cinyake wangacita para wasambira unenesko wa mu Baibolo.
5 Mwanalume munyake wa ku Brazil, zina lake Valmir, uyo wakakhalanga mu caru ca Suriname, wakaŵa na kampani yakujima golide. Wakamwanga comene phere, ivyo vikacitiska kuti waŵe na umoyo waunyankhasi. Nyengo yinyake apo wakaŵa mu msumba unyake, Ŵakaboni ŵa Yehova ŵakamba kusambira nayo Baibolo. Wakasambiranga zuŵa lililose, wakasintha vinthu vinandi, ndipo wakaŵa pafupi kubapatizika. Wakati wawona kuti nchito yake yikumutondeska kulondezga ivyo wakusambira mu Baibolo, wakaguliska kampani yake na kuwelera kwake ku Brazil kuti wakawovwire mbumba yake mwauzimu. Ŵanthu ŵanandi awo ŵakugwira nchito ku vyaru vinyake, ŵakuwelera kwawo para ŵasambira unenesko wa mu Baibolo mwakuti ŵakawovwire ŵabali ŵawo mwauzimu ndiposo ŵanthu ŵanyake. Ŵapharazgi ŵanthena ŵakulongora nadi mtima wakutemwa kupharazga.
6. Kasi tingacitaci usange tingakwaniska yayi kusamira uko kukukhumbikwira ŵapharazgi ŵanandi ŵa Ufumu?
6 Ŵakaboni ŵanandi ŵasamira ku vigaŵa ivyo kukukhumbikwira ŵapharazgi ŵanandi ŵa Ufumu. Ŵanji ŵasamira nanga nkhu vyaru vinyake. Nangauli ise tingasamira yayi ku caru cinyake, kweni tingamuyezga Yesu usange nyengo zose tikufwilirapo kucita ivyo tingafiska mu uteŵeti.
Yehova Wakupeleka Masambiro Ghakukhumbikwira
7. Ni masukulu wuli agho ghanozgeka kuti ghawovwire awo ŵakukhumba kusazgirako maluso ghawo pakupharazga Ufumu?
7 Nga umo Yesu wakasambizgikira na Ŵadada ŵake, nase tingasanga candulo na masambiro agho Yehova wakutipa pa nyengo yasono. Yesu wakati: “Kuli kulembeka mu Ŵaprofeti, Ndipo wose ŵati ŵasambizgikenge na Ciuta.” (Yoh. 6:45; Yes. 54:13) Mazuŵa ghano, pali masukulu agho ghali kunozgeka kuti ghatovwire ise ŵapharazgi ŵa Ufumu. Nchakuwonekerathu kuti waliyose wa ise wakusanga candulo na Sukulu ya Uteŵeti wa Ciuta iyo yikucitika pa mpingo. Ŵapayiniya ŵakuŵa na mwaŵi wa kuluta ku Sukulu ya Uteŵeti wa Upayiniya. Ŵapayiniya ŵanandi awo ŵateŵetera vilimika vinandi ŵakuŵaso na mwaŵi wa kuluta ku sukulu iyi kaciŵiri. Ŵalara na ŵateŵeti ŵakovwira ŵakuluta ku Sukulu ya Uteŵeti wa Ufumu kuti ŵanyololere kasambizgiro kawo ndiposo uteŵeti uwo ŵakucitira ŵabali ŵawo. Ŵabali ŵanandi awo mbalara ndiposo ŵateŵeti ŵakovwira ŵambura kutora ŵakuluta ku Sukulu Yakusambizga Uteŵeti, uko ŵakukasambira umo ŵangawovwilira ŵanji pa mulimo wa kupharazga. Ndiposo ŵabali na ŵadumbu ŵanandi awo ŵakutumika mu vyaru vinyake kukapharazga, ŵakusambizgika ku Sukulu ya Gileadi.
8. Kasi ŵabali ŵanji ŵasankha kuleka vici cifukwa ca masambiro agho Yehova waŵapa?
8 Ŵakaboni ŵa Yehova ŵanandi ŵasintha vinthu vinyake kuti ŵalute ku masukulu agha. Kuti Yugu walute ku Sukulu Yakusambizga Uteŵeti ku Canada, wakaleka nchito iyo wakagwiranga cifukwa bwana wake wakakana kumupa holide. Yugu wakuti: “Nkhudandawurapo yayi. Nakuti ŵanipenge holide, mphanyi ŵalindiliranga kuti nigwirenge nchito kwa iwo nyengo zose. Kweni sono ndine wakunozgeka kucita mulimo wuliwose uwo Yehova wanganipa.” Kuti ŵagwiliskire nchito masambiro agho Ciuta waŵapa, ŵanandi ŵasankha kuleka vinthu ivyo ŵakavizirwiskanga comene pa umoyo wawo.—Luka 5:28.
9. Yowoyani ciyelezgero cakulongora umo visambizgo vya mu Malemba na kufwilirapo vikovwilira ŵanthu.
9 Visambizgo vya mu Malemba ndiposo kufwilirapo vikovwira comene ŵanthu kuti ŵasambire. (2 Tim. 3:16, 17) Wonani ivyo vikacitikira Saulo wa ku Guatemala. Mutu wake ukakoranga viŵi yayi kufuma waka apo wakababikira, ndipo msambizgi wake munyake wakaphalira anyina kuti ŵangamukoserezganga kuti wasambire kuŵazga yayi cifukwa ŵangamunangirathu. Saulo wakaleka sukulu kwambura kumanya kuŵazga. Kweni Kaboni munyake wakasambizga Saulo kuŵazga mwakugwiliskira nchito burosha la Dziperekeni pa Kuŵerenga ndi Kulemba. Mukuluta kwa nyengo, Saulo wakamanya kuŵazga mwakuti wakamba na kuyowoya nkhani mu Sukulu ya Uteŵeti wa Ciuta. Zuŵa linyake anyina ŵa Saulo ŵakakumana na asambizgi ŵake mu uteŵeti wa ku nyumba na nyumba. Ŵakati ŵapulika kuti Saulo wamanya kuŵazga, ŵakaphalira anyina kuti ŵakize nayo sabata yakulondezgapo. Saulo wakati waluta, asambizgi ŵakamufumba kuti: “Kasi ukukhumba kunisambizgaci?” Saulo wakamba kuŵazga ndime mu buku la Kasi Baibolo Likusambizgaci Comenecomene? Asambizgi ŵakati: “Nkhugomezga yayi kuti sono ukunisambizga.” Msambizgi uyu wakavumbatira Saulo, uku masozi ghali mu maso.
Kusambizga uko Kukucontha Mtima
10. Ni buku wuli ilo likovwira comene pakusambizga unenesko wa mu Baibolo?
10 Yesu wakasambizganga vinthu ivyo wakasambizgika na Yehova ndiposo ivyo vili mu Mazgu gha Ciuta. (Luka 4:16-21; Yoh. 8:28) Tikuyezga Yesu usange tikucita ivyo wakasambizga ndiposo kuskepelera ku Malemba. Mwantheura, tose tikuyowoya na kughanaghana vinthu vyakuyana, ndipo ici cikupangiska kuti tiŵe ŵakukolerana. (1 Kor. 1:10) Ndise ŵakukondwa kumanya kuti “muzga wa magomezgeko na wa vinjeru” wakupeleka mabuku ghakulongosora Baibolo kuti ghatovwire kusambizga vinthu vimoza na kufiska mulimo withu wa kupharazga. (Mat. 24:45; 28:19, 20) Limoza mwa mabuku agha ni buku la Baibolo Likusambizgaci?, ilo likusangika mu viyowoyero vyakukwana 179.
11. Kasi mudumbu munyake ku Ethiopia wakawovwira wuli munthu wakususka mwakugwiliskira nchito buku la Baibolo Likusambizgaci?
11 Kusambira Malemba mwakugwiliskira nchito buku la Baibolo Likusambizgaci? kungasintha nanga ni maghanoghano gha awo ŵakutisuska. Zuŵa linyake, mudumbu Lula, uyo ni mupayiniya wa ku Ethiopia, wakasambiranga Baibolo na munthu. Mwamabuci mbali wa munthu uyu wakiza mwaukali na kuyowoya kuti ŵalekere papo kusambira. Lula wakadumbiskana na mbali wa munthu uyu mwakuzikira, ndipo wakagwiliskira nchito ciyelezgero ico cikuyowoya za ndarama zautesi, ico cikusangika mu cipaturo 15 mu buku la Baibolo Likusambizgaci? Mbali wa munthu uyu wakatuna ndipo wakaŵazomerezga kuti ŵalutilire kusambira. Nakuti pa sambiro lakulondezgapo nayo wakaŵapo ndipo wakapempha kuti nayo wambe kusambira Baibolo, ndipo wakati walipirenge sambiro ili. Sambiro likamba mwakuti ŵakasambiranga katatu pa sabata ndipo wakakura mwauzimu.
12. Yowoyani ciyelezgero cakulongora umo ŵawukirano ŵangasambizgira makora unenesko wa mu Baibolo.
12 Ŵawukirano ŵangawovwira ŵanyawo mwakugwiliskira nchito buku la Baibolo Likusambizgaci? Apo Keanu, uyo ni muwukirano wa ku Hawaii wa vilimika 11 wakaŵazganga buku ili ku sukulu, munyake wakamufumba kuti: “Cifukwa wuli ukukondwelera yayi maholide?” Keanu wakaŵazga zgoro kufuma mu nkhani iyo yikusangika mu vyakusazgirapo ya mutu wakuti “Kasi Tikwenera Kukondwelera Maholide?” Pamanyuma wakajura pa vyamukati na kumufumba kuti wasankhe mutu uwo wamukondweska comene. Sambiro la Baibolo likambira penepapo. Cilimika camara ca uteŵeti, Ŵakaboni ŵa Yehova ŵakacitiska masambiro gha Baibolo ghakukwana 6,561,426 ndipo ŵanandi mwa iwo ŵakagwiliskira nchito buku la Baibolo Likusambizgaci? Kasi mukugwiliskira nchito buku ili pakusambizga ŵanthu Baibolo?
13. Kasi kusambira Baibolo kungakhwaska wuli ŵanthu?
13 Kusambira Malemba mwakugwiliskira nchito buku la Baibolo Likusambizgaci? kungakhozga awo ŵakukhumba kucita khumbo la Ciuta. Ŵakutorana awo mbapayiniya ŵapadera ku Norway ŵakamba kusambira Baibolo na mbumba yinyake ya ku Zambia. Ŵakutorana ŵa ku Zambia aŵa ŵakaŵa na ŵana ŵasungwana ŵatatu ndipo ŵakakhumbanga yayi kuŵaso na mwana munyake. Mwantheura, apo mwanakazi wakaŵaso na nthumbo, ŵakaghanaghana kuti wafumye. Pakati pakhala mazuŵa ghacoko waka kuti ŵakumane na dokotara, ŵakasambira nkhani ya mutu wakuti “Wonani Umoyo Nga ni Umo Ciuta Wakuwuwonera.” Cithuzithuzi ca mwana uyo wali munthumbo ico cili mu cipaturo ici cikaŵakhwaska comene mwakuti ŵakaghanaghana za kuleka kufumya nthumbo. Ŵakalutilira kukura mwauzimu, ndipo mwana uyo ŵakababa ŵakamuthya zina la mbali uyo wakasambiranga nawo Baibolo.
14. Yowoyani ciyelezgero cakulongora uwemi wa kulondezga ivyo tikusambizga.
14 Nthowa yakuzirwa comene iyo Yesu wakasambizgiranga njakuti wakacitanga ivyo wakasambizganga. Ŵanthu ŵanandi ŵakutemwa nkharo yiwemi ya Ŵakaboni ŵa Yehova awo ŵakucita nga ni Yesu pa nkhani iyi. Munthu munyake wa bizinesi ku New Zealand, ŵakamuswera galimoto yake na kumwibira burifikesi. Wakakaphara ku polisi, ndipo wapolisi wakamuphalira kuti: “Burifikesi yako ungayisanga pekha usange wangasora ni Kaboni wa Yehova.” Mudumbu uyo wakapelekeranga manyuzipepara wakayisanga. Munthu uyu wakati wamanyiskika kuti yasangika, wakaluta ku nyumba ya mudumbu uyu. Mtima ukakhazikika apo wakawona kuti cikalata cake cakuzirwa comene cikaŵa mwenemumo. Mudumbu uyu wakamuphalira kuti: “Nchiwemi kuti namuwezgerani katundu winu, cifukwa ndine yumoza wa Ŵakaboni ŵa Yehova.” Munthu uyu wakazizikika comene ndipo wakakumbuka ivyo wapolisi wangumuphalira namulenji. Apa nchakuwonekerathu kuti Ŵakhristu ŵaunenesko ŵakucita ivyo Baibolo likusambizga ndipo ŵakuyezga Yesu.—Heb. 13:18.
Wonani Ŵanthu nga Umo Yesu Wakaŵawoneranga
15, 16. Kasi tingacita wuli kuti ŵanthu ŵanweke na uthenga uwo tikupharazga?
15 Vyakucita vya Yesu ku ŵanthu vikapangiska kuti ŵatemwenge uthenga wake. Mwaciyelezgero, citemwa na kujiyuyura vikapangiska kuti ŵanthu ŵakuyuyulika ŵasendelere kwa iyo. Wakalongoranga lusungu kwa awo ŵakizanga kwa iyo na kuŵapembuzga na mazgu ghalusungu, ndiposo kuŵacizga matenda ghawo. (Ŵazgani Marko 2:1-5.) Ise tingacita yayi minthondwe, kweni tingalongora citemwa, kujiyuyura, na lusungu. Mikhaliro iyi yikuguzira ŵanthu ku unenesko.
16 Lusungu lukawovwira apo mupayiniya munyake wapadera zina lake Tariua wakafika pa nyumba ya mucekuru munyake zina lake Beere wa pa cirwa ca Kiribati ku South Pacific. Nangauli mucekuru uyu wakalongora kuti wakakhumbanga yayi kutegherezga, Tariua wakati wawona kuti wakwenda mwakusuzgikira, wakamulengera lusungu. Mupayiniya uyu wakamufumba kuti: “Kasi muli kupulikapo ivyo Ciuta walayizga ŵalwari na ŵacekuru?” Pamasinda pake, wakaŵazga lemba kufuma mu ucimi wa Yesaya. (Ŵazgani Yesaya 35:5, 6.) Mucekuru uyu wakazizwa comene, ndipo wakati: “Naŵazga Baibolo kwa vilimika vinandi ndipo ŵazungu ŵa mishoni ŵa ku chalichi kwithu ŵanendera kwa vilimika vinandi, kweni nkhakwamba kuwona mazgu agha mu Baibolo.” Sambiro la Baibolo likamba, ndipo Beere wakakura mwauzimu. Mbunenesko kuti wakasuzgikiranga kwenda, kweni wali kubapatizika, wakulongozga kagulu ako kali ku cigaŵa ici, ndiposo wakwendendeka mu cirwa ici, kupharazga makani ghawemi.
Lutilirani Kuyezga Khristu
17, 18. (a) Ni mwauli umo mungaŵira mupharazgi wakucita makora? (b) Kasi ni vitumbiko wuli ivyo vikulindilira awo ŵakuzirwiska uteŵeti wawo?
17 Vinthu vyakukondweska ivyo vikucitika mu uteŵeti, vikulongora kuti ŵanthu ŵanandi ŵanganweka na uthenga withu usange tikulongora mikhaliro iyo Yesu wakaŵa nayo. Ipo nchakwenelera nadi kuti tilondezgenge Khristu pakupharazga mwamwamphu.
18 Apo ŵanthu ŵanyake ŵakazgoka ŵasambiri ŵa Yesu, Petrosi wakafumba kuti: “Kasi tamkuŵa na vici?” Yesu wakazgora kuti: “Yose uyo wali kusida nyumba, panji ŵabali, panji ŵadumbu, panji wiske, panji nyina, panji ŵana, panji minda, cifukwa ca zina lane, wati wapokerenge vya mphapikira makhumi pera khumi, ndipo wati waharenge umoyo wamuyirayira.” (Mat. 19:27-29) Ivi ndivyo nase tizamupokera usange tilutilirenge kuyezga Yesu Khristu, uyo ni Mishonale wakuluska wose.
Kasi Mungazgora Wuli?
• Kasi Yehova wakutisambizga wuli kuti tiŵe ŵapharazgi?
• Cifukwa wuli buku la Baibolo Likusambizgaci? ndakovwira comene mu uteŵeti withu?
• Kasi tingamuyezga wuli Yesu pa nkhani ya umo tikuwonera ŵanthu?
[Cithuzithuzi pa peji 17]
Apo Yesu wakacema Petrosi, Andireya, Yakobe, na Yohane kuti ŵamulondezge, ŵakacitapo kanthu mwaluŵiro
[Cithuzithuzi pa peji 19]
Limoza mwa mabuku agho ghakutovwira kuti tisambizgenge vinthu vimoza nda Baibolo Likusambizgaci?