Layizgo Lakuzirwa Comene

NILI kucita layizgo lakuzirwa comene. Ndine mama wa ku Spain. Lekani nilongosore ivyo vikacitiska kuti nicite layizgo ili.

Pa nyumba ya ŵapapi ŵane pakaŵavya mtende na kukolerana. Mbumba yithu yikaŵa na citima cikuru comene apo mudumbu wane mucoko uyo wakaŵa na vilimika vinayi wakafwa pangozi. Kweniso, nkharo yiheni ya adada yikacitiskanga amama kuleka kukondwa na nthengwa. Ndipouli, suzgo ili likaŵatondeska yayi amama kutisambizga nkharo yiwemi, ine pamoza na mudumbu wane mulara.

Mukuluta kwa nyengo, mudumbu wane wakatora, naneso nkhatengwa. Pakati pajumpha kanyengo kacoko waka, amama ŵakakoleka na nthenda ya kansa, iyo paumaliro ŵakafwa nayo. Kweni pambere ŵandafwe, ŵakatilekera usambazi wakuzirwa comene.

Munyawo munyake wakaŵaphalirapo za cilindizga ca m’Malemba ca ciwuka, ndipo ŵakazomera kuti waŵasambizgenge Baibolo. Nyengo yakuti ŵali pafupi kufwa, cilindizga ca mu Baibolo cikaŵapangiska kuti ŵaŵe na umoyo wacandulo ndiposo wacimwemwe.

Ine na mudumbu wane tikati tawona umo Baibolo likaŵawovwilira, nase tikamba kusambira Mazgu gha Ciuta. Kukati kwakhala mwezi umoza kuti mwana wane waciŵiri wababike, uyo wakaŵa msungwana ndipo zina lake tikamuthya Lucía, nkhabapatizika na kuŵa yumoza wa Ŵakaboni ŵa Yehova.

Zuŵa la ubapatizo wane likaŵa lakuzirwa comene kwa ine. Likaŵa lakuzirwa comene cifukwa cakuti sono ndine mteŵeti wa Yehova, najipatulira kuti nimuteŵetere umoyo wane wose. Cifukwa cinyake cikaŵa cakuti nkheneranga kupharazgira ŵana ŵane ŵaŵiri, musepuka na msungwana.

Kweni cifukwa caciŵiri ici cikatimbanizgika. Apo Lucía wakaŵa na vilimika vinayi, wakamba kusuzgika comene na munthumbo. Pamasinda pa kumupima kanandi waka ku cipatala, adokotara ŵakati ku ciŵindi cake kukatupa cinthu cikuru nga ni wolenji. Adokotara ŵakayowoya kuti Lucía wakaŵa na kansa yakofya comene ya ku ciŵindi. Apa ndipo Lucía wakambira kusuzgika na kansa kwa vilimika vinkhondi na viŵiri, ndipo nyengo zinandi tikakhalanga nayo ku cipatala.

Wakaŵa na Mzimu Wakujipeleka

Mu nyengo yakusuzga iyi, kanandi Lucía wakanikhozganga mwa kunivumbatira na kunifyofyontha. Awo ŵakagwiranga nchito mu cipatala nawo ŵakazizikikanga na umo Lucía wakazizipizgiranga matenda agha. Nyengo zose wakaŵa wakunozgeka kukolerana na ŵanesi, ndipo wakaŵawovwiranga kupelekera yogati, juwisi na vinthu vinyake ku ŵana ŵalwari awo ŵakaŵa mu mawodi ghapafupi. Ŵanesi ŵakamupa kajekete ndiposo baji mwakuti wamanyikwenge kuti ni movwiri wa ŵanesi.

Munthu munyake uyo wakugwira nchito pa cipatala wakati: “Lucía wakanikhozganga comene. Wakaŵa mwana waphamphu ndiposo waluso, wakatemwanga kudinda vithuzithuzi. Wakaŵa wakufwatuka, ndipo wakacitanga vinthu nga ni mulara.”

Lucía wakacitanga nthena cifukwa cakuti Mazgu gha Ciuta ndigho ghakamukhozganga. (Heb. 4:12) Nga umo Mazgu gha Ciuta ghakuyowoyera, Lucía wakaŵa na cigomezgo kuti mu caru ciphya, ‘nyifwa kuti yamukuŵakoso cara; panji nesi citengero kuti camukuŵakoso cara, nesi kulira, panji nesi kuŵinya.’ (Civ. 21:4) Cifukwa ca kughanaghanira ŵanji, wakagwiliskiranga nchito mpata wuliwose uwo wasangika kuŵaphalirako ivyo Baibolo likuyowoya. Cigomezgo cakuti ŵakufwa ŵazamuwuka cikamovwira comene kuti walutilire kuŵa wakukondwa mwambura kupwelerako za suzgo lake. (Yes. 25:8) Wakalutilira kucita nthena mpaka apo wakafwira.

Pakaŵa pa zuŵa ili apo nkhacita layizgo lakuzirwa comene. Lucía wakatondekanga kubenura maso ghake. Awiske ŵakamukora woko lake linyake, nane linyake. Nkhamuphwepwelezga nkhati: “Kudandaura yayi, nikulekenge yayi. Mtima m’malo. Para wazakawuka, uzamuŵa makora. Uzamusuzgikaso yayi, nizamuŵa nawe.”

Nkhwenera kusungilira layizgo ili. Nkhumanya kuti ciŵenge cipusu yayi kulindilira. Kweni usange nkhugomezga Yehova na kulutilira kuŵa wakugomezgeka kwa iyo, nizamuŵako apo mwana wane wazamuwuka.

Wali Kutilekera Ciharo

Cikanga ico Lucía wakalongora, ndiposo umo mpingo ukatovwilira, vikamukhwaska comene mufumu wane uyo pa nyengo iyo wakaŵa kaboni yayi. Pa zuŵa ilo Lucía wakafwira, mufumu wane wakaniphalira kuti wasinthenge maghanoghano ghake. Pakati pajumpha masabata ghacoko waka, wakapempha yumoza wa ŵalara ku mpingo kuti wamusambizgenge Baibolo. Pakajumpha nyengo yitali yayi, mufumu wane wakamba kuluta ku maungano ghose. Na wovwiri wa Yehova, wakaleka kukhweŵa hona, cinthu ico cikaŵa cakusuzga comene kusintha pa umoyo wake.

Nicali na citima cifukwa ca nyifwa ya Lucía, ndipouli, nkhuwonga comene Yehova cifukwa ca ciharo ico Lucía wali kutilekera. Ine na mufumu wane tikupembuzgana na cilindizga cakuti ŵakufwa ŵazamuwuka, mwakuti nyengo zinyake, mu maghanoghano tikumuwona Lucía na tumaso twake twakukondweska ndiposo tumatama uto muli cimwemwe.

Nyifwa ya mwana wane yikakhwaskaso comene munthu munyake. Pa zuŵa la Cisulo namulenji, apo kavula kakalokwanga, mama munyake uyo mwana wake wakasambiranga lumoza sukulu na Lucía wakiza ku nyumba kwithu. Nayo mwana wake msepuka wa vilimika 11 wakafwa na nthenda ya nga ya Lucía. Wakati wapulika ivyo vikacitikira Lucía, mama uyu wakapenjerezga uko tikukhala ndipo wakatisanga. Wakakhumbanga kumanya umo nkhuzizipizgira na nyifwa ya Lucía, ndipo wakasacizga kuti tipange wupu uwo cilato cake nkhupembuzga ŵanyithu awo suzgo la nga ni lithu laŵawira.

Nkhamuphalira kuti ine nili kusanga kale cipembuzgo kufuma mu limoza mwa malayizgo gha mu Baibolo, ndiposo kuti cipembuzgo ici cikuluska cilicose ico munthu wangapeleka. Wakakondwa apo nkhamuŵazgira mazgu gha Yesu gha pa Yohane 5:28, 29. Wakazomera kuti nambe kusambira nayo Baibolo, ndipo mwaluŵiro wakamba kusanga “mtende wa Ciuta, uwo ukuzungura kuwamo kose.” (Fil. 4:7) Kanandi para tikusambira Baibolo na mama uyu, tikukhala dankha cete, na kwamba kujiwona taŵene nga tili mu caru ciphya, tikupokelera ŵana ŵithu kufuma ku malaro.

Nangauli Lucía wakakhala na umoyo kwa nyengo yicoko waka, kweni wali kutilekera ciharo camuyirayira. Cipulikano cake cawovwira kuti ine na mufumu wane tikolerane pakusopa Ciuta, ndipo naŵa wakusimikizga comene kuti nilutilirenge kuŵa na cipulikano cakukhora. Nchambura kukayikiska kuti tose ise ŵakutemweka ŵithu ŵali kufwa, awo ŵangazakawuskika, tikulindilira cinthu cakuzirwa comene.

[Cithuzithuzi pa peji 20]

Paradiso uyo Lucía wakadinda