Kupharazga Makani Ghawemi ku Mapiri gha Andes

TOSE umo tikaŵira ŵakukwana 18 tikafika uko tikalutanga, ndipo tikagona pa malo ghakubinkha comene. Tikambwambwanthanga mu vyakudika vithu cifukwa ca kuzizima, uku civula cikulikitika pacanya pa kanyumba kamalata ako tikagonamo. Kanyumba aka kakawonekanga kawuvwawuvwa comene, ico cikatikayikiska usange tikaŵa ŵakwamba kugonamo.

Cifukwa wuli taŵanthu ŵakukwana 18 tikaluta ku malo agha? Cikaŵa cifukwa ca kupulikira dango la Yesu lakuti tipharazge makani ghawemi mpaka “ku vigoti vya caru.” (Mil. 1:8; Mat. 24:14) Tikaluta kukapharazga ku cigaŵa cakutali, pacanya pa mapiri gha Andes, mu caru ca Bolivia.

Nkhwakusuzga Kufikako

Suzgo lakwamba likaŵa la umo tingafikira ku malo agha. Tikasanga kuti ku malo agha mabasi ghakwendako viŵi yayi. Apo basi yikati yiza, tikasanga kuti njicoko comene mwakuti ŵanji ŵa ise tikasoŵa mipando ndipo tikimilira. Kweni tose tikafika uko tikapukwa.

Cilato cithu cikaŵa cakuti tipharazge ku mizi iyo yili pacanya pa mapiri gha Andes. Tikati takhira basi, tose tikendera pamoza na kwamba kukwera mapiri ghatali, uku tanyamura katundu withu.

Nangauli mizi yikawonekanga yicokoyicoko, kweni nyumba zikaŵa patalipatali comene, ico cikapangiska kuti titore nyengo yitali kuti tifike ku mizi yakupambanapambana. Para tamara pa muzi unyake, tikawonangaso muzi unyakeso kunthazi. Kanandi tikapulukanga cifukwa ca tunthowa twa mu minda ya kumalo agha.

“Kumasinda uku Mukaŵa Nkhu?”

Mwanakazi munyake wakakondwa comene cifukwa ca kupulika utali wa ulendo uwo tikenda, mwakuti wakatipa nkhuni ndiposo khicini lake kuti tiphike cakurya ca muhanya. Mwanalume munyake wakati wamanya ivyo Baibolo likusambizga pakuyowoya za ŵakufwa, wakafumba kuti: “Kumasinda uku mukaŵa nkhu?” Wakanweka comene, mwakuti apo tikafumanga mu muzi uwu wakatipelekezga mwakuti watifumbe mafumbo ghanyake. Mwanalume munyakeso wakaŵa kuti wandapulikepo za Ŵakaboni ŵa Yehova, ndipo wakanweka comene na mabuku ghithu. Wakatiwonga comene cifukwa cakuti tikaluta ku malo agha, ndipo wakatipa makiyi gha kanyumba kakhe kanyake kuti tigonemo.

Usiku unyake kukaŵa cisi comene, mwakuti mwambura kumanya tikajintha mahema ghithu pa sisinya. Zikamba kutiluma. Cifukwa cakuti vikalema comene, tikatondeka kuwukapo, kweni mwamwaŵi zikatileka.

Pakwamba, msana na mbambo vikaŵinyanga cifukwa ca malo agho tikagonapo, kweni tulo tukati twatitora, tikaleka kupulika vyakuŵinya. Kweni kukati kwaca, tikaluwako vyakuŵinya vyose cifukwa ca kuwona vidikha vyakutowa pamoza na maŵingo agho ghakendanga pacokopacoko, ndiposo ciwuvi cakukhoma ico cikawonekanga pacanya pa mapiri. Kukaŵa nkhanira yii, cekha ico tikapulikanga nkhupoma kwa maji gha mu mronga na kulira kwa tuyuni.

Namulenji, tikati tageza mu mronga, tikadumbiskana lemba la mu Baibolo, tikarya, na kwamba kukwera mapiri kuluta ku mizi yinyake yakutali. Kukwera mapiri agha kukakhumbanga citatata. Tikakumana na mwanakazi munyake mucekuru, uyo wakalira pakupulika kuti zina la Ciuta lakuti Yehova likusangika mu Baibolo. Wakakweŵeka comene. Kwamba pa zuŵa ilo, mu malurombo ghake wakuzunuramo zina la Ciuta.

Mwanalume munyake mucekuru wakayowoya kuti Ciuta wakwenera kuti wamukumbukira, ndipo wakamba kwimba sumu iyo yikaŵa na mazgu ghakuti tatumika na ŵangelo. Mwanalume munyake uyo wakatondekanga kwenda cifukwa cakuti wakaŵa murwali comene, wakatiphalira kuti pakaŵavya na yumoza wa mu muzi wake uyo wakalutapo kukamuwona. Wakazizikika pakupulika kuti tikafuma kutali comene, ku La Paz. Kweniso, mwanalume munyake wakakondwa comene cifukwa cakuti Ŵakaboni ŵa Yehova ŵakucita kulonda ŵanthu ku mizi yawo, apo visopa vinyake vikucita kulizga belu mwakuti ŵanthu ŵalutenge ku machalichi ghawo.

Ku cigaŵa ici kulije magesi, mwakuti ŵanthu ŵakugona para mdima wamba, ndipo ŵakuwuka namulenji para zuŵa lafuma. Mwantheura, kuti tisange ŵanthu panyumba, tikeneranga kwamba kupharazga nyengo ya 6 koloko namulenji. Para taziwulika tikasanganga kuti ŵanthu ŵanandi ŵaluta ku minda. Usange taŵasanga ku minda, ŵanji ŵakalekezganga dankha milimo yawo na kutegherezga Mazgu gha Ciuta agho tikapharazganga, ndipo uwu ukaŵa mpata wakuti ng’ombe zipumuleko kuguza jembe. Ŵanthu ŵanandi awo tikaŵasanganga pa nyumba ŵakatitandikiranga vikumba vya mberere kuti tikhalepo na kucemana kuti ŵategherezgere pamoza ivyo tiyowoyenge. Ŵalimi ŵanyake ŵakatipanga mathumba ghakuru gha ngoma, kulongora kuwonga cifukwa ca mabuku agho tikaŵapanga.

“Mucali Kunikumbuka”

Kuti ŵanthu ŵamanye vinandi vyakukhwaskana na Baibolo, ŵakukhumbikwira kusambizgika kamoza pera yayi. Ŵanandi ŵakatipempha kuti tikizeso mwakuti tizakaŵasambizge vinandi. Pa cifukwa ici, tikalutanga ku Bolivia mwakuwerezgawerezga.

Paulendo unyake wakuwelerako, mwanakazi munyake mucekuru wakakondwa comene, ndipo wakati: “Muli nga ni ŵana ŵane. Mucali kunikumbuka.” Mwanalume munyake wakatiwonga comene cifukwa ca mulimo withu, ndipo wakatilayizga kuti para tamwizaso, tizakafikire ku nyumba yake. Kweni njombe yikuru iyo tikasanga cifukwa ca citatata cithu, yikaŵa yakuti tikapulika kuti mwanakazi munyake uyo tikakumupharazgirapo pa ulendo wakwamba wasamira ku tawuni, ndipo nayo wamba kupharazga makani ghawemi.

Zuŵa laumaliro pa ulendo withu wakwamba, mafuta gha sitovu ghakatimalira, ndiposo cakurya naco cikaŵa pafupi kumara. Tikathenya nkhuni zinandi na kupemba moto, na kuphika cakurya cithu ico cikakhalako, ndipo tikati tarya, tikamba ulendo kuwelera kukwithu. Tikenda mtunda utali comene kuti tifike pakukwelera basi. Paumaliro, tikafika pamalo agha nausiku.

Kuwelera Kukwithu

Ulendo wa kuwelera kukwithu nawo ukaŵa na masuzgo ghake cifukwa cakuti basi yikanangika pa nthowa. Pakati pajumpha kanyengo tikakwera lore iyo mukaŵa ŵanthu ŵanandi. Ici cikatipa mwaŵi wa kupharazgira ŵanthu awo tikakwera nawo galimoto, awo ŵakakhumbanga kumanya cifukwa ico tikalutira ku malo agha. Nangauli ŵakuwoneka kuti mbasoni, kweni mbanthu ŵamasangulusko ndiposo ŵaubwezi.

Tikati tenda kwa maora ghankhondi na ghanayi, tikafika kukwithu, nangauli tikanyewa ndiposo kupima comene. Kweni ulendo uwu ukaŵa wacandulo. Apo tikaŵa mu nthowa tikaŵa na mwaŵi wa kupangana na mwanakazi munyake uyo wakukhala ku tawuni kuti tizakambe kusambira nayo Baibolo.

Ukaŵa nadi mwaŵi wapadera kukapharazga makani ghawemi ku ŵanthu awo ŵakukhala ku malo agha. Tikapharazga mu mizi yikuruyikuru yinayi ndiposo yinyake yicokoyicoko yambura kupendeka. Ivi vikatikumbuska waka mazgu ghakuti: “Nako nkhutowa pa mapiri malundi gha uyo wakwiza na makani ghawemi, uyo wakuthuwuska cimango, na kwiza na makani ghawemi gha vinthu viwemi, uyo wakupharazga, ciponosko.”—Yes. 52:7; Rom. 10:15.

[Cithuzithuzi pa peji 17]

Apo tikanozgekeranga kukapharazga makani ghawemi