Mafumbo Ghakufumira ku Ŵaŵazgi

Mpositole Paulosi wakati “Israyeli yose wati waponoskekenge.” (Rom. 11:26) Kasi wakang’anamuranga kuti pa nyengo yinyake Ŵayuda wose ŵazamuzgoka Ŵakhristu?

Ndivyo Paulosi wakang’anamuranga yayi. Mtundu wa Israyeli, panji kuti ŵana ŵa Abrahamu, ŵakakana kuti Yesu ni Mesiya. Ndipo vilimika vikati vyajumphapo kufuma apo Yesu wakafwira, vikawonekerathu kuti cingacitika yayi kuti Ŵayuda wose ŵazgoke Ŵakhristu. Ndipouli, mazgu gha Paulosi ghakuti “Israyeli yose wati waponoskekenge” ghakaŵa ghaunenesko. Mwauli?

Yesu wakaphalira ŵalongozgi ŵa cisopa ca Ciyuda ŵa mu nyengo yake kuti: “Ufumu wa Ciuta uti ukwapulikenge kwa imwe, ndipo uti upelekekenge ku mtundu wakupasa vipasi vyake.” (Mat. 21:43) Cifukwa cakuti mtundu wa Israyeli ukakana Yesu, Yehova wakawuleka na kuzgokera ku mtundu wuphya wauzimu. Paulosi wakathya mtundu uwu kuti “Ŵaisrayeli ŵa Ciuta.”—Gal. 6:16.

Mavesi ghanyake mu Malemba gha Cigiriki, ghakulongora kuti “Ŵaisrayeli ŵa Ciuta” Mbakhristu ŵakuphakazgika ŵakukwana 144, 000. (Rom. 8:15-17; Civ. 7:4) Lemba la Civumbuzi 5:9, 10 likukhozgera fundo yakuti mu gulu ili mukeneranga kuŵa ŵanji awo Mbayuda yayi. Likulongora kuti Ŵakhristu ŵakuphakazgika ŵakeneranga kufuma “mu fuko lose, na lulimi, na ŵanthu, na mtundu.” Ŵaisrayeli ŵauzimu ŵakasankhika kuti ŵakaŵe “ufumu na ŵasofi . . . ndipo ŵakuŵusa pa caru.” Nangauli Yehova wakakana mtundu wa Israyeli kuŵa mtundu wake wakusankhika, kweni Muisrayeli waliyose payekha ŵakate waŵenge paubwezi na iyo. Ndimo vikaŵira na ŵapostole ndiposo Ŵakhristu ŵanandi ŵakwambilira. Ndipouli, Ŵayuda aŵa, nga umo viliriso na ŵanthu wose, ŵakeneranga kugulika na ndopa za Yesu Khristu.—1 Tim. 2:5, 6; Heb. 2:9; 1 Pet. 1:17-19.

Nangauli Ŵayuda ŵanandi mu nyengo yakale ŵakataya mwaŵi wa kukawusira lumoza na Yesu kucanya, kweni cilato ca Ciuta cikatondeka yayi. Cilato ca Yehova cingatondeka yayi cifukwa kwizira mu nchimi yake, iyo wakati: “Ndimoso ghaŵirenge mazgu ghane agho ghakufuma mu mlomo wane; ntha ghawelerenge waka kwa Ine, kweni tighafiske ico nkhuca naco, na kusakata mu ico ndaghatumira.”—Yes. 55:11.

Cilato ca Ciuta cakuti wasankhe ŵanthu ŵakukwana 144,000 kuti ŵakawusire pamoza na Mwana wake kucanya cingatondeka yayi. Baibolo likuyowoyerathu kuti Ciuta waphakazgenge ŵanthu ŵakukwana 144,000. Nambara iyi yikwenera kukwana ndendende.—Civ. 14:1-5.

Antheura, apo Paulosi wakayowoya kuti “Israyeli yose wati waponoskekenge,” wakang’anamuranga kuti Ŵayuda wose ŵazamuzgoka Ŵakhristu yayi. Kweni wakang’anamuranga kuti cilato ca Ciuta cakuti wasore Ŵaisrayeli ŵauzimu ŵakukwana 144,000 kuti ŵakawusire pamoza na Mwana Wake Yesu Khristu, cizamufiskika. Mu nyengo iyo Ciuta wali kuŵika, nambara yose ya “Israyeli” wauzimu yizamukwana ndipo ŵazamwamba kuwusa nga ni mafumu na ŵasofi mu Ufumu wakuwusika na Mesiya.—Efe. 2:8.

[Cithuzithuzi pa peji 28]

Ŵakuphakazgika ŵakufuma “mu fuko lose, na lulimi, na ŵanthu, na mtundu”