Kasi Mukukumbuka?
Kasi mwaŵazgapo magazini gha Gongwe la Mulinda gha sonosono apa? Para ni nthena, yezgani kuzgora mafumbo agha:
• Kasi tingacita wuli kuti tiyowoyenge makora ‘kayowoyero katuŵa’ panji kuti unenesko wakuyowoya za Ciuta ndiposo khumbo lake? (Zef. 3:9)
Nga ni umo vikuŵira para munthu wakusambira ciyowoyero, kuti tisambire ‘kayowoyero katuŵa’ tikukhumbikwira kupulikizga mwakupwelelera, kuyezga awo ŵakuciyowoya makora, kusunga pamtima mazina gha mabuku gha mu Baibolo ndiposo mavesi ghanyake, kuwerezga kuzunura ivyo tikusambira, kuŵazga mwakukwezga, kusanda malango gha kayowoyero, kulutilira kumanya vinandi, kuŵa na nyengo yakusambilira ndiposo kuyezgayezga kuyowoya kayowoyero katuŵa.—8/15, mapeji 21-25.
• Ni vinthu wuli ivyo vikukhumbikwa kuti munthu wamanye Ciuta?
“Yehova ndilo zina lake” ndipo wakukhumba kuti timumanyenge na zina lenelili. (Ex. 15:3) Ni “Ciuta wa kutemwa na mtende.” (2 Kor. 13:11) Ni “Ciuta wa mahara” ndiposo “wa ciponosko.” (1 Sam. 2:3; Sal. 25:5) Ndipo wakusendelera kwa awo ŵakumumanya.—9/1, mapeji 4-7.
• Kasi Mazgu ghakuti “mphamikizgo zitatu” ghangagwira wuli nchito mu mbumba?
Mazgu ghakuti “mkusa wa mphamikizgo zitatu” ngakuyelezgera waka. (Muph. 4:12) Para mazgu agha taghayowoya pa nkhani ya nthengwa, ghakung’anamura mfumu na muwoli, awo ni mikusa yiŵiri, ndipo ŵakuposeka pamoza na cingwe cikuru, ico ni Ciuta. Kuŵa paubwezi na Ciuta kukovwira ŵakutorana kuŵa na nkhongono zakuzizipizgira masuzgo, ndiposo kuti ŵaŵe ŵacimwemwe mu nthengwa.—9/15, peji 16.
• Kasi “kaŵikiro ka mawoko” ako kakuyowoyeka pa Ŵahebere 6:2 kakung’anamuraci?
Kaŵikiro ka mawoko aka kuti kakang’anamuranga kwimika ŵalara yayi, kweni kakwenera kuti kakimiranga kuŵika mawoko kuti munthu wapokere vyawanangwa vya mzimu. (Mil. 8:14-17; 19:6)—9/15, peji 32.
• Kasi dada wakwenera kuwoneseska kuti ŵana ŵake ŵali na vici?
Vinyake mwa ivyo ŵana ŵakukhumbikwira ni (1) citemwa, (2) ciyelezgero ciwemi, (3) kukondwa, (4) kusambizgika vinthu vyauzimu, (5) kuŵalanga na (6) kuŵavikilira.—10/1, mapeji 18-21.
• Kasi awo ŵakulongozga ŵangacindika wuli ŵanji?
Nthowa yimoza iyo mulara wangacindikira ŵanji nkhuleka kuŵapempha kucita vinthu ivyo iyo mweneko wangacita yayi. Nthowa yinyake iyo wangacindikira ŵanji nkhuŵaphalira vifukwa ivyo ŵakwenera kucitira ivyo waŵaphalira.—10/15, peji 22.
• Kasi tingacita wuli kuti tisungilire nthengwa?
Vinthu viŵiri ivyo vingawovwira ni: (1) kupwelelera mbumba. (2) Kugomezgeka mu nthengwa. Kwali muli na masuzgo mu mbumba, kwali yayi, munyinu wakwenera kumanya kuti mukumutemwa nadi. Kulondezga fundo ziŵiri izi kovwirenge kuti nthengwa yendenge makora.—11/1, mapeji 18-21.
• Kasi mulara Wacikhristu wangacita wuli nga ni umo muliska wakacitiranga na nthonga?
Kale, muliska wakagwiliskiranga nchito nthonga pakuliska mskambo. Para mberere zikunjira panji kufuma mu ciŵaya, zikajumphanga “pasi pa nthonga” ndipo muliska wakazipendanga. (Lev. 27:32) Muliska Wacikhristu nayo wakwenera kuwumanya makora mskambo wa Ciuta na kumanya umoyo wa mberere yiliyose.—11/15, peji 9.
• Kasi mama wangalongora wuli kuti ni mutozgi?
Vyakurya vinganangika mu nthowa zinandi comene, mwantheura wakugeza mu mawoko pambere wandakore cakurya ndipo nyengo zose wakuwoneseska kuti nchakubenekelera. Nyengo zose wakutozga mu nyumba kuti muleke kuŵa mbeŵa, majancha na suce. Nthowa yinyake nkhucapa vyakuvwara na kugeza nyengo zose. Nthowa izi zikukolerana na fundo za mu Baibolo.—12/1, mapeji 9-11.