Mungateŵetera Ciuta Nanga Mungacekura
Pa Disembala 19, 2009 mama na mwana wake ŵakabapatizika ku Málaga mu caru ca Spain. Mama uyu na mwana wake wose zina lawo ni Ana. Ŵakaŵa pa gulu la ŵanthu 2,352 awo ŵakabapatizika ku Spain mu 2009. Cinthu capadera cakukhwaskana na mama uyu na mwana wake ni vilimika vyawo. Mama wakaŵa na vilimika 107 ndipo mwana 83.
Kasi cikaŵatuma nchivici kuti ŵabapatizike kulongora kuti ŵajipatulira kwa Yehova? Ca m’ma 1970, mzengezgani wawo munyake wakatemwanga kucemera Ana uyo ni mwana, ku Sambiro la Buku la Mpingo ilo likacitikiranga ku nyumba ya Kaboni munyake. Nyengo zinyake Ana wakalutanga ku sambiro ili. Kweni cifukwa ca nchito iyo wakagwiranga, wakatondeka kukura mwauzimu.
Pakati pajumpha vilimika pafupifupi khumi, ŵana ŵanyake ŵa Ana (mwana) ŵakamba kusambira Baibolo ndipo ŵakazgoka ŵateŵeti ŵa Yehova. Mwana wake munyake Mari Carmen wakamovwira kuti wambeso kutemwa unenesko uwo uli mu Baibolo ndipo wakazomera sambiro la Baibolo. Pamasinda ŵabuya (Ana mulara) ŵa Mari Carmen nawo ŵakamba kusambira Baibolo. Pa umaliro, ŵanthu ŵakukwana khumi ŵa mbumba iyi ŵakabapatizika.
Pa zuŵa ilo ŵakabapatizikiranga, ŵa Ana aŵa ŵakakondwa comene. Ana wa vilimika 107 wakati: “Yehova ni muwemi comene kwa ine, wanizomerezga kuti ni mumanye.” Mwana wake wakati: “Pambere Paradiso wandize, nkhukhumba kuteŵetera Yehova, kucita khumbo lake na kupharazga makani ghawemi na nkhongono zane zose.”
Ico cikovwira vyokoro viŵiri ivi kuti viŵe na cimwemwe capadera, nkhusangika pa maungano. Mulara munyake mu mpingo wawo wakati: “Ŵakupamba yayi pa maungano. Nyengo zose ŵakuzgorapo pa Sambiro la Gongwe la Mulinda.”
Ŵa Ana aŵa ŵakutikumbuska Ana “mweneuyo wakapambanga cara pa tempele, kucita uteŵeti wakupatulika usiku na muhanya pamoza na kuziŵizga kurya na maŵeyelero.” Ndipo ici cikawovwira kuti waŵe na mwaŵi wa kuwona Yesu apo wakaŵa bonda. (Luka 2:36-38) Apo wakaŵa na vilimika 84, Ana wakaŵa mucekuru comene, ndipouli, wakatondeka yayi kuteŵetera Yehova. Ndimo ŵacitira ŵa Ana ŵa ku Spain.
Kasi muli na ŵabali ŵinu awo mbakunweka kutegherezga uthenga wa mu Baibolo? Kasi muli kupharazgirapo mucekuru uyo wakalongora kunweka na uthenga wa Ufumu? Nawo ŵangaŵa nga mbene Ana ŵaŵiri awo ŵazunulika mu nkhani iyi. Nawo ŵangateŵetera Ciuta waunenesko, Yehova, nanga ŵangaŵa ŵacekuru.
[Mazgu Ghakukhozgera pa peji 25]
“Yehova ni muwemi comene kwa ine”
[Mazgu Ghakukhozgera pa peji 25]
“Pambere Paradiso wandize, nkhukhumba kuteŵetera Yehova”