Kasi Mukukumbuka?
Kasi muli kuŵazgapo magazini gha Gongwe la Mulinda ghasonosono apa? Yezgani kuzgora mafumbo agha:
• Kasi ni njani wakambiska cisambizgo cakuti Ciuta wali kulemberathu umaliro wa cinthu cilicose?
Calvin ndiyo wakambiska cisambizgo ici. Machalichi ghanyake nga ni Reformed, Presbyterian, Congregational, na Puritan, ghacali kulondezga visambizgo vya Jean Cauvin (John Calvin).—9/1-CN, peji 18-21.
• Kasi muwoli wa Kayini wakafuma nkhu?
Muwoli wa Kayini wakwenera kuti wakafuma mu mphapu ya Eva. Baibolo likuti Eva wakaŵaso na ŵana “ŵanalume na ŵanakazi.” (Gen. 5:4)—9/1-CN, peji 25.
• Apo Ciuta wakafumyanga Ŵaisrayeli mu Eguputo, kasi mungelo uyo wakaŵa panthazi pawo ni njani? (Ex. 23:20, 21)
Mungelo uyu wakwenera kuti wakaŵa Yesu, Mwana wakwamba wa Ciuta, uyo ‘zina la Yehova likaŵa mwa iyo.’—9/15, peji 21.
• Cifukwa wuli buku la 1 Ŵakorinte likulongosora za nyama iyo ŵakapelekanga sembe ku vikozgo?
Ŵagiriki na Ŵaroma ŵakapelekanga sembe za nyama pa tempele, kweni nyama iyo yikakhalangako ŵakayiguliskanga ku msika. Nangauli Ŵakhristu ŵakasopanga vikozgo yayi, kweni ŵakeneranga yayi kuwona nyama iyi kuŵa yakukazuzgika para yikuguliskika pa msika. Mpositole Paulosi wakalemba kuti: “Cilicose ico cikuguliskika pa msika wa nyama, muryenge kwambura kufumbilira cifukwa ca njuŵi yinu; pakuti ‘caru capasi ncha Yehova na vyose ivyo vili kuzura mwenemumo.’” (1 Kor. 10:25, 26)—10/1-CN, peji 12.
• Pa nkhani ya kusopa kwaunenesko, kasi ni vifukwa wuli vyakugwenthera ivyo Ciuta wakuviwona kuti ni vyambura kupulikikwa?
‘Ngunonono comene. Nkhukhumba yayi. Nkhutangwanika comene. Ndine wakwenelera yayi. Munyake wali kunikhuŵazga.’ Apa palije cifukwa cakupulikikwa ca kugwenthera kucita ivyo Ciuta wakukhumba.—10/15, peji 12-15.
• Kasi mungacitaci kuti maungano ghaŵenge ghakuzenga?
Nozgekeranithu. Muwunganenge nyengo zose. Mufikenge mwakutendekera. Muyeghenge mabuku. Lekani kutimbanizgika. Muzgorengepo. Zgorani mwakudumura. Yowoyani nkhani izo mwapika. Wongani. Mucezgenge, pambere maungano ghandambe ndiposo para ghamara.—10/15, peji 22.
• Nthenda ya vyoni, iyo sono yikusazgapo nthenda yakunyekeska thupi, yikusangika mu nkhani wuli ya mu Baibolo iyo yikukhwaska kasungwana?
Buku laciŵiri la Mathemba cipaturo 5, likutiphalira za kasungwana ka ku Israyeli ako kakateŵeteranga mu nyumba ya Namani mulongozgi wa nkhondo wa Asiriya. Mulongozgi uyu wati wakoleka na vyoni, kasungwana aka kakamuphalira za nchimi Elisha kuti yingamucizga.—11/1-CN, peji 22.
• Kasi tikusambirakoci ku ivyo Aroni wakacita wati wacicizgika?
Mozesi wakati wawukapo, Ŵaisrayeli ŵakacicizga Aroni kuti waŵapangire ciuta. Aroni wakathera ndipo wakaŵapangira. Nkhani iyi yikulongora kuti mbana pera yayi awo ŵakucicizgika na ŵanyawo. Nanga mbalara awo ŵakukhumba kucita ico nchiwemi nawo ŵangacicizgika. Tikwenera kukana para ŵanyithu ŵakuticicizga kucita viheni.—11/15, peji 8.
• Kasi vigomezgo ivi ni vyaunenesko panji vyautesi?
Satana waliko nadi: mbunenesko. (2 Kor. 11:14) Ŵakufwa wose ŵali ku malo gha mizimu: mbutesi. (Muph. 9:5) Ŵangelo ŵakugomezgeka ŵakutipwelelera: mbunenesko. (Sal. 34:7) Yesu wakuyana na Ciuta: mbutesi. (1 Kor. 11:3)—12/1-CN, peji 8-9.