Kasi Ivyo Ŵakhristu Ŵakusambizga Vikukhwaska Wuli Ŵanthu mu Vikaya?
NKHANI izo zajumpha zalongosora vifukwa ivyo Ŵakhristu ŵaunenesko ŵakulekera kunjilirapo pa ndyali. Ipo kasi Ŵakhristu ŵangalongora wuli kuti ŵakukhumba kuti vinthu viŵe makora mu vikaya vyawo? Nthowa yimoza nkhupulikira languro la Yesu lakuti: “Ntheura, lutaninge mukazgore ŵanthu ŵa mitundu yose kuŵa ŵasambiri, kuŵabapatiza mu zina la Ŵadada na la Mwana na la mzimu utuŵa, kuŵasambizga kusungilira vinthu vyose ivyo namulangulirani.”—Mateyu 28:19, 20.
Pali kukolerana pakati pa kupulikira languro la Yesu la ‘kuzgora ŵanthu’ kuŵa ŵasambiri, na kulondezga ulongozgi wakuti Ŵakhristu ŵaŵe nga ni mcere na ungweru wa caru. (Mateyu 5:13, 14) Kasi kukolerana kwake kuli mpha? Ndipo kasi ŵanthu ŵangakhwaskika wuli na mulimo uwu?
Uthenga wa Khristu Ukuvikilira na Kungweluska
Mcere ukovwira kuti cinthu cileke kuvunda. Mwakuyana waka, uthenga uwo Yesu wakaphalira ŵasambiri ŵake kuti ŵakapharazge ku ŵanthu ŵa mitundu yose, nawoso ukuvikilira. Awo ŵakuzomera na kulondezga ivyo Yesu wakasambizganga ŵakujivikilira ku nkharo zakuvunda izo zazara mazuŵa ghano. Mwawuli? Ŵakusambira umo ŵangagegera vinthu viheni ivyo vingananga umoyo wawo, nga nkhukhweŵa, ndipo ŵakwamba kuŵa na mikhaliro yiwemi nga nchitemwa, mtende, kukhomezga, lusungu, na uwemi. (Ŵagalatiya 5:22, 23) Mikhaliro iyi yikovwira kuti ŵaŵe ŵakukhumbikwa comene mu caru. Ŵakhristu awo ŵakuphalirako ŵazengezgani ŵawo uthenga wakuvikilira uwu, ŵakovwira comene kuti vinthu viŵe makora mu vikaya vyawo.
Wuli pa fundo yakuti Ŵakhristu ŵali nga mbungweru wa caru? Nga umo mwezi ukuŵaliskira “ungweru” wakufuma ku dazi, ŵalondezgi ŵa Khristu nawo ŵakuŵaliska “ungweru” wakufuma kwa Yehova Ciuta. Ŵali nga mbungweru cifukwa ca makani ghakungweluska agho ŵakupharazga kweniso milimo yiwemi iyo ŵakucita.—1 Petrosi 2:12.
Yesu wakadidimizgaso kukolerana uko kulipo pakati pakuŵa nga mbungweru na kuŵa msambiri, apo wakati: “Ŵanthu ŵakukozga nyali na kuyiŵika kusi ku cidunga cakupimira cara, kweni pa cakuŵikapo nyali, ndipo yikuŵala pa wose awo ŵali mu nyumba. Mwakuyana waka, ungweru winu uŵale panthazi pa ŵanthu.” Para nyali iyo yakozgeka yaŵikika pakweru, ŵanthu wose ŵakuyiwona makora. Mwakuyana waka, mulimo wa kupharazga na milimo yinyake yiwemi iyo Ŵakhristu waunenesko ŵakucita yikwenera kuwoneka makora ku ŵanthu. Cifukwa wuli? Yesu wakati awo ŵakuwona milimo yiwemi iyi ŵapelekenge ucindami kwa Ciuta, m’malo mwa kupeleka ku Ŵakhristu.—Mateyu 5:14-16.
Mulimo wa Ŵanandi
Apo Yesu wakati, “Ndimwe ungweru wa caru” kweniso “ungweru winu uŵale,” wakaphaliranga ŵasambiri ŵake wose. Mulimo uwo Yesu wakapeleka ungafiskika na ŵanthu ŵacoko waka ŵakufumira mu mipingo yakupambanapambana yayi. M’malo mwake, Ŵakhristu ŵaunenesko wose ŵali nga ‘mbungweru.’ Ŵakaboni ŵa Yehova 7 miliyoni awo ŵali mu vyaru vyakujumpha 235, ŵakumanya kuti ni mulimo wawo kupharazgira ŵazengezgani ŵawo uthenga uwo Khristu wakukhumba kuti ŵalondezgi ŵake ŵapharazgenge.
Kasi mutu wa uthenga uwo Ŵakaboni ŵa Yehova ŵakupharazga ngwakuti wuli? Apo Yesu wakatumanga ŵalondezgi ŵake kuti ŵakapharazge, wakaŵaphalirapo yayi kuti ŵapharazgenge vya kusintha vinthu mu ndyali, kuti machalichi na Boma vicitirenge vinthu pamoza, panji kukolerana na maghanoghano gha caru. M’malo mwake Yesu wakati: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose.” (Mateyu 24:14) Lekani mazuŵa ghano, Ŵakhristu ŵaunenesko ŵakulutilira kupulikira ulongozgi wa Yesu. Ŵakupharazga vyakukhwaskana na Ufumu wa Ciuta, boma lekha ilo lizamumazga mgonezi wa Satana na kukhazikiska caru ciphya ca urunji.
Ndipouli, mu mabuku gha Mateyu, Mariko, Luka, na Yohane, muli vinthu viŵiri vyakukhwaskana na uteŵeti wa Yesu ivyo vikukhwaska milimo iyo Ŵakhristu ŵaunenesko ŵakucita mazuŵa ghano. Vinthu ivi vyalongosoreka mu nkhani yakulondezgapo.
[Mazgu Ghakukhozgera pa peji 8]
Kasi uthenga uwo Ŵakhristu ŵakupharazga uli nga ni mcere mu nthowa wuli?
[Mazgu Ghakukhozgera pa peji 9]
Kasi uthenga uwo Ŵakhristu ŵakupharazga uli nga mbungweru mu malo gha cisi mu nthowa wuli?