Kasi Walipo Uyo Wakupulika Malurombo?

“Nkhakayikanga usange Ciuta waliko nadi. Ndipouli, nyengo zinyake nkhalombanga. Nkhamanyanga makora yayi usange yunji wakategherezganga. Kweni nkhagomezganga nipera kuti yunji wakapulikanga ivyo nkhalombanga. Nkhakondwanga yayi ndipo nkhaŵavya cilato pa umoyo. Nkhawopanga kugomezga kuti kuli Ciuta cifukwa nkhaghanaghananga kuti ŵanthu ŵambura nkhongono ndiwo ŵangagomezga vyakuti kuli Ciuta.”—PATIRISHA,a IRELAND

KASI namwe muli kughanaghanapo nga ni Patirisha? Kasi mukulomba nanga mungaŵa kuti mukukayikira kuti Ciuta waliko nadi? Usange ni nthena, lekani kughanaghana kuti muli mwekha. Wonani ivyo ŵanthu ŵanyake ŵakayowoya.

◼ Pa ŵanthu 2,200 awo ŵakafumbika ku Britain, ŵanthu 22 pa ŵanthu handiredi ŵaliwose ŵakugomezga kuti kuli Ciuta. Ndipouli, kusanda uku kukalongora kuti ŵanthu 55 pa handiredi ŵaliwose ŵakulomba mwa apo na apo.

◼ Pa ŵanthu 10,000 awo ŵakafumbika mu vyaru vinyake, 30 pa ŵanthu handiredi ŵaliwose ŵakulomba nangauli ŵakuti kulije Ciuta.

Cifukwa Wuli Ŵakukayikira?

Munthu munyake wa ku England zina lake Allan wakati: “Nkhatemwanga kuyowoya kuti nkhumugomezga yayi Ciuta cifukwa nkhaghanaghananga kuti cilato ca visopa nkhuwovwira waka ŵanthu kuti ŵaleke viheni kweniso kusanga ndalama. Nakuti nkhaghanaghanangaso kuti usange Ciuta waliko ipo mphanyi vinthu vyambura urunji vyose kulije. Ndipouli, nyengo zinyake nkhakhalanga pasi na kuyowoya ku cinthu cinyake. Nkhajifumbangaso kuti, ‘kasi vikenda wuli kuti munthu waŵeko?’”

Waliyose wali na vifukwa vyake ivyo vikumupangiska kuti wakayikirenge usange Ciuta wakuzgora malurombo. Kanandi ŵanthu ŵakukayikira para ŵatondeka kusanga mazgoro gha mafumbo ghakulondezgapo agha:

◼ Kasi Mlengi waliko nadi?

◼ Cifukwa wuli kanandi visopa ndivyo vikupangiska vinthu viheni?

◼ Cifukwa wuli Ciuta wazomerezga masuzgo kuŵapo?

Usange mungamanya mazgoro gha mafumbo agha, asi mungalomba kwambura kukayika?

[Mazgu ghamusi]