MAFUMBO GHA BAIBOLO GHAZGOREKA

Kasi Vingacitika Kuti Tipulikiske Baibolo?

Baibolo ni Mazgu gha Ciuta. Lili nga ni kalata yakufuma kwa dada wacitemwa. (2 Timote 3:16) Mu Baibolo Ciuta wakutilongosolera ivyo tingacita kuti timukondweske, cifukwa ico wazomerezgera viheni, kweniso ivyo wazamucitira ŵanthu munthazi. Kweni ŵasambizgi ŵavisopa ŵabendezga ivyo Baibolo likusambizga, ntheura ŵanandi ŵakughanaghana kuti ŵangalipulikiska yayi.—Milimo 20:29, 30.

Kweni Yehova Ciuta wakukhumba kuti timanye unenesko wakukhwaskana na iyo. Lekani watipa buku ilo tingalipulikiska.—Ŵazgani 1 Timote 2:3, 4.

Kasi mungacita wuli kuti mupulikiske Baibolo?

Padera pakutipa Baibolo, Yehova wakutovwira kuti tilipulikiske. Wakatuma Yesu kuti watisambizge. (Luka 4:16-21) Yesu wakawovwira ŵategherezgi ŵake kuti ŵapulikiske Malemba, wakazunuranga vesi na kuliyaniska na ghanyake.—Ŵazgani Luka 24:27, 32, 45.

Yesu wakakhazikiska mpingo Wacikhristu kuti ulutizge mulimo uwo wakawuyamba. (Mateyu 28:19, 20) Mazuŵa ghano, ŵalondezgi wanadi ŵa Yesu ŵakovwira ŵanthu kuti ŵapulikiske ivyo Baibolo likusambizga vyakukhwaskana na Ciuta. Usange mukukhumba kupulikiska Baibolo, Ŵakaboni ŵa Yehova ŵazamuŵa ŵakukondwa kumovwirani.—Ŵazgani Milimo 8:30, 31.