Kasi Baibolo Mungalipulikiska?

Steven wa ku Britain wakati: “Pa zuŵa la Sabata, mbumba yithu yikaŵazganga Baibolo. Nkhasangwanga nalo viŵi yayi. Nkhagomezganga kuti Baibolo ni Mazgu gha Ciuta, kweni vinandi ivyo nkhaŵazganga vikaŵa vyakusuzga kuvipulikiska.”

Valvanera wa ku Spain wakati: “Apo nkhaŵa na vilimika 17 nkhayezga kuŵazga Baibolo. Nkhalipulikiskanga yayi, ntheura nkhaleka kuŵazga.”

Jo-Anne wa ku Australia wakati: “Nili kuŵazgapo Baibolo lose cifukwa nkhawonanga kuti pakuŵa Mukatolika, nkhwenera kuliŵazga. Nkhatora vilimika vitatu kuti nimalizge kuŵazga. Kweni ni vicoko comene ivyo nkhapulikiskanga.”

BAIBOLO licali buku lakumanyikwa comene pa caru capasi. Ni buku ilo ŵanthu ŵakugura comene, likusangika na ŵanthu ŵanandi, mu viyowoyero vinandi, nakutiso likusangikaso pa matepi, ma CD, na ma DVD. Ndipouli, ŵanandi awo ŵali na Baibolo ŵakuwona kuti ndakusuzga kulipulikiska. Kasi ndimo namwe mukuliwonera?

Kasi Ciuta Wakukhumba Kuti Tipulikiske Mazgu Ghake?

Baibolo likuti: “Malemba ghose ngakupelekeka na Ciuta mwa mzimu.” (2 Timote 3:16) Yehova Ciuta ndiyo wali kutipa Baibolo. Kasi wakukhumba kuti tipulikiske Mazgu ghake? Panji, kasi wali kucitira dala kuti ŵanandi ŵatondekenge kulipulikiska kweni ŵanthu ŵacoko waka nga ni ŵaliska na awo ŵakusanda vya Baibolo ndiwo ŵalipulikiskenge?

Wonani mavesi gha mu Baibolo agha:

“Dango ili nkhumuwuzgani muhanya uno ntha ndinonono kwa imwe, panji lili kutali cara.”—Duteronome 30:11.

“Kubanulika kwa mazgu ghinu kukungweruska; kukupa vindere mahara.”—Salmo 119:130.

“Mu ora lenelira, [Yesu] wakaŵa na cimwemwe cikuru mu mzimu utuŵa ndipo wakati: ‘Nkhumulumbani pakweru Ŵadada, Fumu ya kucanya na caru capasi, cifukwa mwabisa vinthu ivi ku ŵavinjeru na ŵamahara ndipo mwavivumbura ku ŵanici.’”—Luka 10:21.

Ciuta pakupeleka Baibolo wakukhumba kuti mupulikiske Mazgu ghake. Ndipouli, ŵanthu ŵanandi ŵakuwona kuti buku ili ndakusuzga kulipulikiska. Kasi nchivici cingatovwira? Nkhani zakulondezgapo zikulongosora fundo zitatu izo zingamovwirani kuti mupulikiske Baibolo.