Nchivici Cingamovwirani Kuti Mupulikiske Baibolo?

1. Lombani Ciuta Kuti Wamovwirani

Ninfa uyo wakukhala ku Italy wakati: “Yikaŵapo nyengo apo nkhaŵazganga Baibolo pambere nindagone. Nkhaliŵazganga cifukwa nkhamanyanga kuti ni Mazgu gha Ciuta. Nangauli nkhasangwanga yayi para nkhuŵazga, kweni nkhakhumbanga kumanya ivyo Ciuta wali kulemba mu Baibolo. Nkhakhumbanga kuŵazga Baibolo lose. Pakwamba cikaŵa cipusu waka, kweni nkhati namba kuŵazga vigaŵa vinyake ivyo nkhavipulikiskanga yayi, nkhaleka kuliŵazga.”

KASI namwe vili kumucitikiranipo? Ŵanandi vili kuŵacitikirapo. Ndipouli, nga umo tawonera mu nkhani yakwamba, Yehova Ciuta, wakukhumba kuti mupulikiske Mazgu ghake. Kasi mungaghapulikiska wuli? Cakwamba, lombani Ciuta kuti wamovwirani.

Ŵapositole ŵa Yesu ŵakawonekanga nga mbanthu “ŵambura kusambira ndiposo ŵanthu bweka” cifukwa ŵakasambirako yayi sukulu za ŵarabi. (Milimo 4:13) Ndipouli, Yesu wakaŵasimikizgira kuti ŵangapulikiska Mazgu gha Ciuta. Mwawuli? Yesu wakati: “Movwiri, mzimu utuŵa, uwo Ŵadada ŵazamutuma mu zina lane, iwo uwu, uzamumusambizgani vinthu vyose.” (Yohane 14:26) Pakulenga caru ndiposo vyamoyo vyose, Ciuta wakagwiliskira nchito mzimu utuŵa. (Genesis 1:2) Wakagwiliskiraso nchito mzimu utuŵa kuti wovwire ŵanthu 40 awo ŵakalemba Baibolo. (2 Petrosi 1:20, 21) Mzimu uwu ucalipo kuti wovwire awo ŵakukhumba kupulikiska Baibolo.

Kasi mungacitaci kuti mupokere mzimu utuŵa wa Ciuta? Mukwenera kulomba na cipulikano. Nakuti, mukwenera kufwilirapo kulomba. Yesu wakati: “Lutilirani kulomba, ndipo kupikenge kwa imwe. . . . Usange imwe . . . mukumanya kupeleka vyawanangwa viwemi ku ŵana ŵinu, ipo comene kwakuluska Ŵadada ŵakucanya ŵapelekenge mzimu utuŵa ku awo ŵakuŵalomba!” (Luka 11:9, 13) Yehova ngwakukhumbisiska kuŵapa mzimu utuŵa awo ŵakumulomba na mtima wose. Mzimu utuŵa ungamovwirani kuti mupulikiske ivyo vili kulembeka mu Baibolo nangauli vikalembeka ni kale comene. Mzimu wa Ciuta ungamovwiraniso kuti muŵe na vinjeru mwakuti mulondezgenge ivyo Baibolo likuyowoya.—Ŵahebere 4:12; Yakobe 1:5, 6.

Ntheura, nyengo yiliyose para mukuŵazga Baibolo, lombani Ciuta kuti wamupani mzimu utuŵa mwakuti umovwirani kupulikiska Mazgu ghake.