Nchivici Cingamovwirani Kuti Mupulikiske Baibolo?
3. Zomerani Kuti Ŵanji Ŵamovwirani
Apo wakusanda vinthu, Edward John Eyre, wakendanga mwakusuzgikira mu vidikha vya Nullarbor, ŵanthu ŵa ku Australia ŵakamusambizga umo wangatolera maji mu mcenga ndiposo mu makuni gha mtundu wa bulugamu. Cifukwa ca kuzomera wovwiri wa ŵenecaru, Eyre wakazakaponoska umoyo wake.
NGA UMO ciyelezgero ici cikulongolera, kuti timalizge makora mulimo wakusuzga, tikwenera kovwirika na munthu uyo wakumanya makora mulimo uwo. Ndivyo mukwenera kucita para mwamba kuŵazga Baibolo.
Yesu wakamanyanga kuti ŵalondezgi ŵake ŵangalipulikiska yayi Baibolo kwambura kovwirika na ŵanji. Nyengo yinyake, “wakajura maghanoghano ghawo kuti ŵapulikiske ng’anamuro la Malemba.” (Luka 24:45) Yesu wakamanya kuti awo ŵakuŵazga Baibolo ŵakukhumbikwira wovwiri kuti ŵapulikiske ivyo Malemba ghakusambizga.
Ninjani Wangamovwirani?
Yesu wakapa ŵalondezgi ŵake mulimo wa kovwira ŵanji kuti ŵapulikiske Baibolo. Pambere Yesu wandalute kucanya, wakati: “Ntheura, lutaninge mukazgore ŵanthu ŵa mitundu yose kuŵa ŵasambiri, . . . kuŵasambizga kusungilira vinthu vyose ivyo namulangulirani.” (Mateyu 28:19, 20) Mulimo ukuru wa Ŵakhristu ngwa kusambizga. Kusambizga kukusazgapo kulongosora umo munthu wangalondezgera fundo za mu Baibolo. Ŵakhristu ŵaunenesko ŵakovwira ŵanji kuti ŵapulikiske Baibolo.
Nyengo yicoko waka Yesu wakati waŵapa ŵalondezgi ŵake mulimo uwu, cinthu cinyake cakukondweska cikacitika. Baibolo likutiphalira za munthu wakucindikika wa ku Etiyopiya uyo wakaŵazganga ucimi unyake wa Yesaya. Wakapulikiskanga yayi ivyo wakaŵazganga. Baibolo likulongora kuti mazgu agho wakatondeka kupulikiska ni agha: “Nga ni mberere wakatolekera ku kukomeka, ndipo nga ni mwanamberere wambura mazgu panthazi pa wakumeta wake, ntheura pera iyo wakubanura mulomo wake cara. Mu nyengo ya kukhizgika kwake, weruzgi ukawuskikako kwa iyo. Ni njani wayowoyenge vya muwiro wake? Cifukwa umoyo wake wawuskikapo pa caru capasi.”—Milimo 8:32, 33; Yesaya 53:7, 8.
Munthu uyu wakafumba Filipu, uyo wakaŵa Mkhristu wakumanya makora Malemba, kuti: “Kasi nchimi yikuyowoya vya njani apa? Vya iyomwene panji vya munthu munyake?” (Milimo 8:34) Munthu wa ku Etiyopiya uyu wakafumanga ku Yerusalemu kukasopa ndipo wakwenera kuti wakalomba Ciuta kuti wamulongozge. Nchakuwonekerathu kuti wakaŵazganga na mtima wakuti wamanye. Kweni wakapulikiskanga yayi cigaŵa ico wakaŵazganga. Mwakujiyuyura wakafumba Filipu kuti wamovwire. Ivyo Filipu wakalongosora vikamukondweska comene mwakuti nayo wakazgoka Mkhristu.—Milimo 8:35-39.
Ŵakaboni ŵa Yehova ŵakulutilira kucita mulimo uwo Filipu na Ŵakhristu ŵakwambilira ŵakacitanga. Ŵakovwira ŵanthu kupulikiska ivyo Baibolo likusambizga mu vyaru vyakujumpha 235. Ŵakusambizga nkhani izo zili mu Malemba. Pakusambizga, ŵakusanda ivyo Baibolo likuyowoya.a—Wonani bokosi lakuti “Mazgoro Ghakukhorweska gha Mafumbo gha mu Baibolo.”
“Mafumbo Ghane Ghose Ghakazgoreka”
Steven, Valvanera, na Jo-Anne awo ŵazunulika mu nkhani yakwamba, ŵakamba kusambira Baibolo na Ŵakaboni ŵa Yehova. Steven wakuti: “Nkhazizwa comene kuti mazgoro ghakasangikanga mu Baibolo mwenemumu mwa kuyaniska waka Malemba panji fundo za mu Malemba. Pambere nindambe kusambira Baibolo, palije munthu wakanilongorapo umo ningacitira nthena. Nkhakondwa comene kumanya kuti Baibolo ndakusuzga yayi kupulikiska ndipo lili na fundo zakususkana yayi nga umo nkhaghanaghaniranga.”
Valvanera nayo wakuzomerezga. Wakuti: “Cilicose ico nkhasambiranga cikaŵa cakupulikikwa makora ndiposo caunenesko. Nkhamanya kuti vinthu vikuŵa vyaunenesko cifukwa cakuti ndivyo vikusambizgika ku chalichi yayi, kweni cifukwa cakuti vyalongosoleka makora.” Jo-Anne wakuti: “Pakuti mafumbo ghane ghose ghakazgoleka kufuma mu Baibolo, nkhamba kucindika comene Ciuta, cifukwa wakamanyirathu kuti ŵanthu ŵaŵenge na mafumbo ndipo wakawoneseska kuti mazgoro ghakukhorweska ghalembeka mu Baibolo.”
Kasi mukumanyapo yumoza wa Ŵakaboni ŵa Yehova? Mupemphani kuti wamulongorani umo mungasambilira Baibolo. Usange mukumanya waliyose yayi uyo ni Kaboni wa Yehova, lembani kalata mwakugwiliskira nchito yimoza mwa maadiresi agho ghali pa peji 2. Mazgu gha Ciuta ghaŵenge ghanonono yayi usange mukulomba mzimu utuŵa wa Ciuta, kuŵazga na mtima wakuti mumanye, ndiposo kuzomera kuti ŵanji ŵamovwirani. Namwe mungapulikiska Baibolo.
[Mazgu ghamusi]
a Buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova likovwira ŵanandi kusambira nkhani za mu Baibolo.
[Bokosi/Cithuzithuzi pa peji 7]
Mazgoro Ghakukhorweska gha Mafumbo gha mu Baibolo
Nkhani zinyake izo Ŵakaboni ŵa Yehova ŵakudumbiskana na ŵanthu:
• Kasi khumbo la Ciuta kulazga ku caru capasi ndakuti wuli?
• Kasi ŵakufwa ŵali nkhu?
• Kasi tili mu “mazuŵa gha kuumaliro”?
• Cifukwa wuli Ciuta wazomerezga masuzgo?
• Kasi ningacita wuli kuti mbumba yane yiŵe yakukondwa?