Kasi Mukumugomezga Ciuta?

TIYELEZGERE kuti muli na mubwezi winu uyo mukumucindika comene, kweni wakucita vinthu vinyake ivyo mukuvipulikiska yayi. Ŵanji ŵakususka ivyo wakucita na kukayikira vilato vyake ndipo ŵakuti ngwankhaza. Kasi mungazomerezgana nawo nyengo yeneyiyo, panji mukhumbenge dankha kupulika kwa mubwezi winu? Usange iyo wakaŵako yayi kuti walongosore ivyo vikacitika, kasi mungazikira yayi kuti mumanye unenesko?

Pambere mundazgore, mukwenera kumanya vinandi. Mungajifumba kuti, ‘Kasi nkhumumanya makora mubwezi wane, ndipo pali cifukwa wuli ico nkhumutemwera?’ Ntheura, ndimo tikwenera kucitira pambere tindaghanaghanire vyakuti Ciuta ngwankhaza.

Nyengo zinyake mungapulikiska yayi cifukwa ico Ciuta wakacitira vinthu vinyake ndipo panji mungazizikika na vinthu vinyake ivyo wazomerezga kuti vicitike. Pali ŵanthu ŵanandi awo ŵakuti Ciuta ngwankhaza ndiposo ŵangamucicizgani kuti mukayikire vyakucita vyake nga umo iwo ŵakucitira. Kasi mungazikira yayi kuti mumanye vinandi? Vyose vithembenge pa umo imwe mukumumanyira Ciuta. Jifumbani kuti, ‘Kasi ni vinthu wuli viwemi ivyo Ciuta wanicitira?’

Usange mukukhalira waka masuzgo, nyengo zinyake mungaghanaghana kuti Ciuta wakumutemwani yayi. Kweni ghanaghaniranipo. Kasi Ciuta wakucitiska kuti imwe musuzgike, panji kuti mutumbikike? Nga umo tawonera, Satana ndiyo ni “muwusi wa caru ici,” Yehova yayi. (Yohane 12:31) Ntheura Satana ndiyo wakucitiska masuzgo ghose agho ghali mu caru. Kweniso mungazomerezga kuti masuzgo ghanandi ghakucitika cifukwa cakuti tili ŵakwananga kweniso cifukwa ca vinthu vyamabuci.

Kweni kasi ni vinthu wuli viwemi ivyo Ciuta wali kucita? Wonani ivyo Baibolo likuyowoya. Likuti Ciuta “wakalenga mtambo na caru capasi,” ndipo milimo yake yinyake ni mathupi ghithu agho ghali kulengeka ‘mwakuziziswa.’ Ndiposo likuti mu ‘mawoko gha Yehova ndimo muli mvuci withu.’ (Salmo 124:8; 139:14; Daniel 5:23) Kasi fundo izi zikung’anamuraci?

Zikung’anamura kuti Ciuta ndiyo wakutipa mvuci uwo tikuthuta, ndipo umoyo withu ukuthemba pa iyo. (Milimo 17:28) Ici cikung’anamura kuti iyo ndiyo wakutipa cawanangwa ca umoyo, kutowa kwa cilengiwa, ŵabwezi, kuti tikondwenge na cakurya, kupulika, kumanya kuti takhwaska cinthu, kweniso kunuska vinthu. (Yakobe 1:17) Kasi mungazomerezga yayi kuti vitumbiko vyose ivi vikulongora kuti Ciuta ni mubwezi uyo tikwenera kumucindika na kumugomezga?

Panji nyengo zinyake vingamusuzgani kumugomezga Ciuta. Mutepanji nchifukwa cakuti mukumumanya makora yayi. Para vili nthena kudandawura yayi. Nangauli, mu nkhani izi tilongosorenge vifukwa vyose yayi ivyo ŵanji ŵakuyowoyera kuti Ciuta ngwankhaza, kweni kasi nchakuzirwa yayi kuti mufwilirepo kumumanya makora?a Tili na cigomezgo cose kuti para mungacita nthena, mumumanyenge makora Ciuta. Kasi ngwankhaza? Yayi, “Ciuta nchitemwa.”—1 Yohane 4:8.