Kasi Umo Ciuta Wakeruzgiranga Ŵanthu Vikulongora Kuti Ngwankhaza?

KUTI tizgore fumbo ili, tiyeni tiwone nkhani ziŵiri za mu Baibolo izo zikulongora umo Ciuta wakeruzgira ŵanthu. Tiwonenge nkhani ya Ciwowota ca mu nyengo ya Nowa, kweniso kuparanyika kwa Ŵakenani.

CIWOWOTA CA MU NYENGO YA NOWA

IVYO ŴANJI ŴAKUYOWOYA: “Ciuta wakacita nkhaza apo wakatuma ciwowota ico cikaphyera ŵanthu wose kupaturako Nowa na mbumba yake.”

IVYO BAIBOLO LIKUYOWOYA: Ciuta wakati: ‘Kuti nkhukondwera cara na nyifwa ya muheni, kweni kuti muheni wawereko ku nthowa yake wakhale na umoyo.’ (Ezekiel 33:11) Fundo iyi yikulongora kuti Ciuta wakakondwa yayi na kuparanyika kwa ŵanthu ŵaheni mu nyengo ya Nowa. Kweni cifukwa wuli pera wakaŵaparanya?

Baibolo likuti ivyo Ciuta wakacita kuparanya ŵanthu ŵaheni mu nyengo yakale, likaŵa cenjezgo la vinthu ivyo vizamucitikira ŵanthu “ŵambura kopa Ciuta.” (2 Petrosi 2:5, 6) Kasi apa tingasambirapo vici?

Cakwamba, nangauli Ciuta wakukondwa yayi kuparanya ŵanthu, kweni awo ŵakucita vinthu viheni Ciuta wakuŵawona kuti ŵali na mulandu. Pa nyengo yakwenelera wazamumazga masuzgo na vinthu vyose vyambura urunji.

Caciŵiri nchakuti, pambere Ciuta wandaparanye ŵanthu ŵaheni, wakuŵacenjezga dankha. Nowa wakaŵa mupharazgi waurunji, kweni ŵanthu ŵanandi ŵakaŵikako mahara yayi ku uthenga wake. Baibolo likuti: “Ŵakaŵikako mahara cara mpaka ciwowota cikiza na kuŵayora wose.”—Mateyu 24:39.

Kasi ndimo Ciuta wakacitira? Enya. Mwaciyelezgero, wakacenjezga Ŵaisrayeli kuti para ŵacitenge viheni nga mitundu yinyake, mbwenu wazomerezgenge ŵalwani kuparanya msumba wawo Yerusalemu, na kuŵatolera ku wuzga. Kweni Ŵaisrayeli ŵakacita nadi viheni, ŵakafika nanga mphakupeleka sembe ŵana ŵawo. Kasi Yehova wakacitapo kanthu? Enya. Kweni wakadankha kutuma zinchimi mwakuwerezgawerezga kuti zicenjezge ŵanthu ŵake kuti ŵasinthe nthowa zawo ziheni. Iyo wakati: “Yehova kuti wakucita kanthu cara, kwambura kuti wavumbulire cakuubende cake ku ŵateŵeti ŵake zinchimi.”—Amosi 3:7.

UMO IMWE MUKUKHWASKIKIRA: Umo Yehova wakeruzgira ŵanthu mu nyengo yakale vikutipa cigomezgo. Tili na cigomezgo cose kuti Yehova weruzgenge ŵanthu awo ŵakucitiska masuzgo. Baibolo likuti: “Pakuti ŵaheni tiŵadumulikenge . . . Kweni ŵakuzika ndiwo tiŵaharenge caru, tiŵakondwenge na kusakata comene.” (Salmo 37:9-11) Kasi mukuciwona wuli ceruzgo ico cizamumazga masuzgo gha ŵanthu? Kasi mungati ni nkhaza panji lusungu?

KUPARANYIKA KWA ŴAKENANI

IVYO ŴANJI ŴAKUYOWOYA: “Ŵakenani ŵakaparanyika mwankhaza comene nga umo ŵanji ŵakukomekera mazuŵa ghano.”

IVYO BAIBOLO LIKUYOWOYA: ‘Nthowa za Ciuta zose ni zaurunji. Iyo ni Ciuta waunenesko na wambura kwananga.’ (Duteronome 32:4) Kweruzga kwa urunji kwa Ciuta kungayana yayi na nkhondo za ŵanthu. Cifukwa wuli? Nchifukwa cakuti Ciuta wakusanda mtima panji kuti wunthu wamukati.

Mwaciyelezgero Ciuta wakati wasanda misumba ya Sodomu na Gomora na kuwona kuti njakwenelera kuparanyika, Abrahamu wakafipa mtima usange urunji ucitikenge. Wakaŵavye maghanoghano ghakuti Ciuta ‘wangaparanya ŵakunyoloka pamoza na ŵaheni.’ Ciuta wakamusimikizgira kuti nanga mu msumba wa Sodomu mungaŵa ŵanthu ŵarunji 10 mbwenu wawuparanyenge yayi. (Genesis 18:20-33) Nchakuwonekerathu kuti Ciuta wakasanda mitima ya ŵanthu aŵa ndipo wakawona kuti mitima yawo yikaŵa yiheni comene.—1 Midauko 28:9.

Ntheura ndimo wakacitiraso na Ŵakenani. Wakati wasanda, wakawona kuti mitima yawo yikaŵa yiheni comene mwakuti ŵakeneranga kuparanyika. Ŵakenani ŵakaŵa ŵankhaza comene ndipo ŵakafika na pakocha ŵana ŵawo kuŵa sembe.a (2 Mathemba 16:3) Ŵakenani ŵakamanyanga kuti Yehova wakalangura Ŵaisrayeli kupoka caru cose cira. Awo ŵakakana kufumamo na kwamba kurwa nkhondo ndikuti ŵakacitiranga dala kulimbana na Ŵaisrayeli kweniso Ciuta, cifukwa ŵakamanyanga kuti Ciuta wakalongozganga Ŵaisrayeli.

Kweniso Ciuta wakaŵacitira lusungu Ŵakenani awo ŵakaleka nthowa zawo ziheni na kwamba kulondezga fundo zapacanya za Yehova. Mwaciyelezgero, Rahabi mwanakazi muleŵi wa ku Kenani wakapona pamoza na mbumba yake. Kweniso apo Ŵakenani ŵa msumba wa Gibiyoni ŵakapempha kuti ŵaŵacitire lusungu, iwo na ŵana ŵawo ŵakaŵaleka ŵamoyo.—Joshua 6:25; 9:3, 24-26.

UMO IMWE MUKUKHWASKIKIRA: Tingasambirako kanthu pa umo Ciuta wakeruzgira Ŵakenani. Nase tili pafupi na “zuŵa la ceruzgo na la pharanyiko la ŵanthu ŵambura kopa Ciuta” ilo likayowoyekerathu.” (2 Petrosi 3:7) Para tikutemwa nadi Yehova tizamusanga candulo cikuru para Ciuta wazakamazga masuzgo mwa kuparanya awo ŵakukana muwuso wake.

Mwacitemwa Yehova wakutikumbuska kuti ivyo ŵapapi ŵangasankha kucita vingakhwaskaso ŵana ŵawo. Mazgu gha Ciuta ghakuti: ‘Sorani umoyo mwakuti mose, imwe na ŵana ŵinu, muŵe ŵamoyo kuti mutemwe Yehova Ciuta winu, na kuti mupulikire mazgu ghake na kudemelera kwa Iyo.’ (Duteronome 30:19, 20) Kasi mazgu agha, ngakufuma kwa Ciuta uyo ngwankhaza panji Ciuta wacitemwa uyo wakuŵakhumbira viwemi ŵanthu ŵake?