Kasi Tikwenera Kulomba ku Ŵalongozgi ŵa Cisopa Awo Ŵali Kufwa?

WALIYOSE wa ise nyengo zinyake wakwenjerwa ndipo wakukhumba kuti yunji wamovwire. Mwakuyana na ivyo tikwenjerwa navyo, tingasankha munthu uyo wangaticitira citima kweniso uyo wali kukumanapo na masuzgo nga ghithu. Munthu walusungu kweniso uyo wali kukumanapo na masuzgo ghakuyana na ghithu wangaŵa wakwenelera.

Ndimo ŵanji ŵangaghanaghaniraso pa nkhani ya lurombo. Ciuta ŵangamuwona nga ngwapacanya comene na wakofya, ntheura m’malo mwa kulomba kwa iyo, ŵangawona kuti nchiwemi kulomba waka ku ŵalongozgi ŵa cisopa awo ŵali kufwa. Iwo ŵakuti, pakuti ŵanthu aŵa ŵali kukumanapo na viyezgo kweniso masuzgo, ŵangaŵapulikiska makora. Mwaciyelezgero, ŵanthu awo ŵataya cinthu cinyake cakuzirwa comene ŵangatemwa kulomba kwa Anthony wa ku Padua uyo wali kufwa uyo wakaŵa mulongozgi wa vinthu vyakuzgeŵa na vyakwibika. Usange ŵakukhumba kulombera cinyama cilwari, ŵangalomba kwa Francis wa ku Assisi panji Jude Thaddeus para vyaŵasuzga comene.

Kasi Malemba ghakuti wuli pa nkhani yakulomba ku ŵalongozgi ŵa cisopa awo ŵali kufwa? Pakuti para tikulomba tikukhumba kumuphalira vyakusingo Ciuta, ntheura tingakhumba kumanya usange wakupulika malurombo ghithu. Kweniso tingajifumba kuti, Kasi Ciuta wakujipulika wuli para tikulomba ku ŵakufwa?

KASI BAIBOLO LIKUTI WULI PA NKHANI YA KULOMBA KU ŴAKUFWA?

Kaluso kakulomba ku ŵakufwa aŵa nkhakujintha pa cisambizgo ca Chalichi la Katolika cakuti ŵakufwa ŵangatilombera kwa Ciuta. Buku linyake likuti: “Para ukukhumba kuti Ciuta wakucitire lusungu ukwenera kulomba kwizira mu ŵanthu awo mbakwenelera kwa Ciuta.” (New Catholic Encyclopedia) Ntheura, uyo wakulomba ku ŵakufwa aŵa wakuŵa na cigomezgo kuti Ciuta wamucitirenge lusungu cifukwa ŵanthu aŵa ŵali pafupi na Ciuta.

Kasi cisambizgo ici ncha mu Baibolo? Ŵanji ŵakuti mpositole Paulosi ndiyo wakambiska cisambizgo ici mu ivyo wakalemba. Mwaciyelezgero, ku Ŵakhristu ŵa ku Roma wakalemba kuti: “Nkhumuciskani, ŵabali, kwizira mu Fumu yithu Yesu Khristu ndiposo kwizira mu citemwa ca mzimu, kuti mulimbikire pamoza na ine mu malurombo kwa Ciuta cifukwa ca ine.” (Ŵaroma 15:30) Kasi apa Paulosi wakapemphanga Ŵakhristu ŵanyake kuti ŵamuŵeyelelere kwa Ciuta? Yayi. Paulosi wakalongora waka kuti nchakwenelera kupempha Ŵakhristu ŵanyithu kuti ŵatilombere kwa Ciuta. Kweni kulomba kwa munthu uyo tikughanaghana kuti wali kucanya kuti ndiyo watilombere kwa Ciuta, vikukolerana yayi na fundo iyi. Cifukwa wuli?

Mwakuyana na buku la Yohane, Yesu wakati: “Ine ndine nthowa na unenesko na umoyo. Palije uyo wakwiza ku Ŵadada kweni kwizira mwa ine.” (Yohane 14:6) Wakayowoyaso kuti: “Cilicose ico mulombenge ku Ŵadada mu zina lane ŵamupaninge.” (Yohane 15:16) Yesu wakayowoyapo yayi kuti tilombenge kwa iyo mwakuti watiyowoyerenge kwa Ciuta. M’malo mwake, kuti Ciuta wapulike malurombo ghithu, tikwenera kumulomba kwizira mwa Yesu pera.

Apo ŵasambiri ŵakapemphanga Yesu kuti waŵasambizge kulomba, Yesu wakati: “Para mukulomba, mutenge, ‘Ŵadada, zina linu lituŵiskike.’” (Luka 11:2) Enya, nyengo zose “para” tikulomba, tikwenera yayi kulomba kwa Yesu panji munyake waliyose, kweni kwa Ciuta pera. Pakuwona mazgu ghakupulikikwa makora agho Yesu wakayowoya, nchamahara kuti tilombenge kwa Ciuta kwizira mwa Yesu pera, mwa munyakeso yayi, nanga ŵaŵe ŵalongozgi ŵavisopa awo ŵali kufwa.

Lurombo nchigaŵa cakuzirwa comene pa kusopa kwithu. Ntheura kulomba kwa munthu munyake padera pa Ciuta, kukukolerana yayi na ivyo Baibolo likusambizga. (Yohane 4:23, 24; Uvumbuzi 19:9, 10) Lekani tikwenera kulomba kwa Ciuta pera.

KASI MUKWENERA KOPA KULOMBA KWA CIUTA?

Pa upharazgi wake wa pa Phiri, Yesu wakapeleka ciyelezgero ca mwana uyo wakupempha cakurya ku ŵawiske. Kasi dada wangamupa libwe m’malo mwa cingwa? Panji kumupa njoka m’malo mwa somba? (Mateyu 7:9, 10) Dada wacitemwa wangacita ivi yayi!

Tiyeni tiwoneso ciyelezgero cinyake ca umo mupapi wangajipulikira. Tiyelezgere kuti mwana winu wakukhumbisiska kumupemphani cinthu cinyake. Mwana winu uyu muli nayo paubwezi wakukhora ndipo nyengo zose mukumufwatukira. Ndipouli, cifukwa cakuti wakumopani mwambura kwenelera, wakupempha munthu munyake kuti ndiyo wamupemphere kwa imwe ico wakukhumba. Kasi mungajipulika wuli? Wuli usange wamba kuŵa na kaluso kakuti nyengo zose wayowoyenge namwe kwizira mwa munthu munyake? Kasi mungakondwa na kaluso aka? Yayi. Ŵapapi awo mbacitemwa ŵakukhumba kuti ŵana ŵawo ŵayowoyenge nawo maso na maso, ndipo ŵafwatukenge kulomba ivyo ŵakukhumba.

Pakuyowoyapo pa ciyelezgero ca mwana uyo wakupempha cakurya, Yesu wakayowoya ku wumba kuti: “Ntheura, usange imwe, nangauli muli ŵaheni, mukumanya kupeleka vyawanangwa viwemi ku ŵana ŵinu, ipo comene kwakuluska Ŵawiskemwe awo ŵali kucanya ŵapelekenge vinthu viwemi ku awo ŵakuŵalomba!” (Mateyu 7:11) Nchakuwonekerathu kuti mupapi wakukhumbisiska kupeleka vinthu viwemi ku mwana wake. Mwakuyana waka, Ŵadada ŵithu ŵakucanya nawo mbakukhumbisiska kupulika na kuzgora malurombo ghithu.

Ciuta wakukhumba kuti tilombenge kwa iyo, nanga ni para tikusuzgika maghanoghano cifukwa cakuti tamubudira. Iyo wakupempha ŵanji yayi kuti ndiwo ŵategherezge mwalurombo ghithu. Baibolo likuticiska kuti: “Katundu wako umuyeghiske Yehova ndipo Iye tiwakufighirire.” (Salmo 55:22) M’malo mwa kuthemba ŵanthu ŵanyake panji ŵalongozgi ŵavisopa awo ŵali kufwa, tikwenera kumuwona mwakwenelera Yehova Ciuta.

Ŵadada ŵithu ŵa kucanya ŵakupwelelera waliyose payekha. Ŵakukhumba kuti ŵatovwire pa masuzgo agho tikukumana nagho, kweniso ŵakutipempha kuti tisendelere kwa iwo. (Yakobe 4:8) Ici nchakukondweska comene kuti tili na mwaŵi kulomba kwa Ciuta withu uyo ‘Wakupulika malurombo.’—Salmo 65:2.