Nyifwa Yikuŵaŵa

Ŵanthu ŵanji ŵakufwatuka yayi kuyowoya vya nyifwa. Nakuti ŵanandi ŵakukhumba yayi na kuyizunura wuwo. Kweni nyifwa njakuti tingayigwentha yayi ndipo nyengo yiliyose yingatiwira. Nadi, nyifwa yikuŵaŵa.

Palije ico tingacita kuti ŵapapi, munyithu ŵa mu nthengwa panji ŵana ŵaleke kufwa. Nyifwa yingatiwira mwamabuci panji yingaŵa kuti yikutiwira nyengo zinandi. Mulimose umo vingaŵira, kweni nyifwa yikuŵinya ndipo ulwilwi wake ukumara luŵiro yayi.

Antonio, uyo adada ŵake ŵakafwa pa ngozi ya galimoto, wakati: “Vikuŵa nga kuti munthu munyake wakwibira nyumba pamoza na makiyi wuwo. Ntheura unganjiramoso yayi nanga kangaŵa kanyengo kacoko waka. Wamunthu ukuŵa ŵambura kalikose. Nchakusuzga kupulikiska cifukwa vikuŵa nga ni nkhaza, kweni palije ico wamunthu ungacita.”

Dorothy nayo wakasangana na suzgo la nthena ili. Ntheura, wakaŵa cokoro apo wakaŵa na vyaka 47, ndipo wakaŵikapo mtima kuti wasange mazgoro. Pakuti wakaŵa msambizgi wa Sande sukulu, wakagomezganga kuti para munthu wafwa wakulutilira kuŵa wamoyo. Kweni wakamanyanga makora yayi ico cikucitika para munthu wafwa. Ntheura wakafumba muliska wa ku chalichi kwawo kuti: “Kasi nchivici cikucitika para munthu wafwa?” Wakamuzgora kuti: “Palije uyo wakumanya. Tiyeni tilindilire waka.”

Kasi mbunenesko nadi kuti “tilindilire waka,” tizamumanya munthazi ico cikucitika para munthu wafwa? Kasi pasono palijirethu ico cingatovwira kumanya usange nyifwa mbumaliro wa vyose?