Cifukwa Wuli Ŵanthu Ŵakulomba?

Kasi namwe mukutemwa kulomba? Ŵanthu ŵanandi ŵakutemwa kulomba, nanga ni awo ŵakuti Ciuta kulije. Kweni cifukwa wuli pera ŵanthu ŵakutemwa kulomba? Awo ŵakafumbika fumbo ili ku France, ŵanandi ŵakazgora kuti ŵakutemwa kulomba kuti “ŵajipulikeko makora.” Ŵanthu ŵanandi ku Europe, ŵakulomba kuti ŵasope Ciuta yayi. Kweni ŵakukhumba waka kuti “ŵajipulikengeko makora.” Kweniso ŵanandi ŵakukumbuka Ciuta para vyaŵasuzga. Ndipo ŵakukhumba kuti waŵazgore nyengo yeneyiyo.—Yesaya 26:16.

Imwe mukuwona wuli? Kasi namwe mukuwona kuti lurombo lukovwira waka kuti munthu waghanaghanenge makora? Para mukugomezga Ciuta, kasi namwe lurombo likumovwirani? Panji mukuwona kuti Ciuta wakuzgora yayi malurombo ghinu? Baibolo lingamovwirani kuti muwonenge lurombo kuŵa cawanangwa ico cingatovwira kuti tiŵe paubwezi na Ciuta, m’malo mwakuluwona nga ni ico cingatovwira kuti tijipulikeko waka makora.