NKHANI ZAKWAMBILIRA | KASI CIUTA WAKUMUGHANAGHANIRANI?
Kasi Ciuta Wakumughanaghanirani?
Davide wa mu Baibolo wakati: “Kweni ine nili waka, nili musauci [mukavu]; ndipouli Yehova wakunikumbuka [wakunighanaghanira.]”a
“Mitundu ya ŵanthu yikuŵa nga ni nthonyezi ya mu ciŵiya.”—YESAYA 40:15
Kasi cikaŵa camahara kuti Davide wagomezge kuti Ciuta wakumughanaghanira? Kasi Ciuta wakumughanaghanirani imwe? Ŵanthu ŵanandi ŵakukayika usange Ciuta wakuŵaghanaghanira. Cifukwa wuli?
Cifukwa cimoza nchakuti Ciuta ngwapacanya comene pakuyaniska na ŵanthu. Para Ciuta wakulaŵiska mitundu ya ŵanthu pa caru capasi, ‘yikuŵa nga ni nthonyezi ya mu ciŵiya, na fuvu pa miyeso.’ (Yesaya 40:15) Munthu munyake wakati, “kungaŵa kujiŵikamo usange munthu wangayowoya kuti kuli Ciuta uyo wakumughanaghanira.”
Ŵanthu ŵanyake ŵakuwona kuti Ciuta wangaŵatemwa yayi cifukwa ca nkharo yawo yawakawaka. Doda linyake zina lake Jim, likati: “Kanandi nkhalombanga kwa Ciuta kuti wanovwire kuti niŵe wamtende na wakujikora, kweni nkhakwiyanga luŵiro. Ntheura nkhajiwonanga kuti ndine wakwananga comene, ndipo Ciuta wanganovwira yayi.”
Kasi Ciuta wali kutali comene mwakuti wakuleka na kutighanaghanira wuwo? Kasi wakutiwona wuli ise taŵanthu ŵakwananga? Palije uyo wangazgora mafumbo agha kwambura kuti Ciuta wavumbura. Ndipouli, Baibolo likutisimikizgira kuti Ciuta wali kutali cara ndipo wakutighanaghanira. Likuti: “Wali kutali cara na waliyose wa ise.” (Milimo 17:27) Mu nkhani zinayi zakulondezgapo, tiwonenge kuti Ciuta wakughanaghanira munthu waliyose payekha. Kweniso tiwonenge umo wakacitira na ŵanthu ŵanyake kale.
a Salmo 40:17; Yehova ni zina la Ciuta umo Baibolo likuyowoyera.