Chifukwa Wuli Tikwenera Kumanya Vinandi vya Ufumu wa Chiuta?

Ŵanthu mamiliyoni ghanandi pa charu chapasi ŵakugomezga kuti Ufumu wa Chiuta pera ndiwo unganozga vinthu. Ŵakuchita nga ni Yesu, uyo wakasambizga ŵalondezgi ŵake kulomba kuti: ‘Ufumu winu wize. Khumbo linu lichitike pano pasi.’—Mateyu 6:10, Tumbuka Bible.

Apo ŵanthu ŵanandi ŵakukhumbisiska kuti ŵamanye vinandi vya Ufumu wa Chiuta, matchalitchi ghanandi ghakuŵikako mahara yayi. Munthu munyake wakulemba mbiri wakati: “Ntchakuzizika chomene kuwona kuti Yesu wakatemwanga kusambizga vya . . . Ufumu wa Kuchanya” apo “matchalitchi agho ghakuti nga Chikhristu ghakuŵikako mahara yayi ku chisambizgo ichi.”

Mwakupambana na matchalitchi agha, Ŵakaboni ŵa Yehova ŵakusambizga chomene vya Ufumu wa Chiuta. Ukaboni ni magazini iyo mukuŵazga. Magazini iyi yikusindikizgika mu viyowoyero 220. Ndipo magazini pafupifupi 46 miliyoni ghakusindikizgika mwezi uliwose. Nakuti pa charu chose palijeso magazini iyo yikupangika chomene kuluska iyi. Kasi fundo yikuru mu magazini iyi njakuti wuli? Wonani kuti magazini iyi yikumanyikwa na mutu wakuti: Gongwe la Mulinda Likupharazga Ufumu wa Yehova.a

Chifukwa wuli Ŵakaboni ŵa Yehova ŵakuchita vyose ivi kuti ŵapharazge Ufumu wa Chiuta? Chifukwa ŵakumanya kuti Ufumu wa Chiuta ndiwo ni fundo yikuru mu Baibolo. Kweniso ŵakukhorwa kuti Ufumu wa Chiuta ndiwo uzamumazga masuzgo ghose agho tikusangana nagho.

Ŵakaboni ŵa Yehova ŵakuchita nga ni Yesu, chifukwa nawo ŵakuŵikapo mtima kupharazga vya Ufumu wa Chiuta. Apo Yesu wakaŵa pa charu chapasi, wakatemwanga kusambizga vya Ufumu wa Chiuta. (Luka 4:43) Chifukwa wuli Yesu wakatemwanga kuyowoya vya Ufumu wa Chiuta? Ndipo kasi Ufumu wa Chiuta uzamumuchitirani vichi imwe? Tikumupemphani kuti muwone mazgoro agho Baibolo likupeleka. Mazgoro agha tighasangenge mu nkhani zakulondezgapo.