NKHANI YA PA CHIKOPI | KASI PARA MUNTHU WAFWA WANGAŴASO WAMOYO?
Ntchivichi Chikuchitika Para Munthu Wafwa?
Lionel wakati: “Ine nkhaghanaghananga kuti para munthu wafwa wakuluta ku malo ghatatu. Nkhatenge wakuluta kuchanya, ku helo, panji ku puligatoriyo. Nkhamanyanga kuti nili muwemi viŵi yayi kuti nilute kuchanya kweniso kuti nili muheni chomene yayi kuti nilute ku helo. Nkhamanyanga makora yayi kuti puligatoriyo ni vichi. Mazgu agha nindaghasangemo mu Baibolo. Kweni ndivyo ŵanthu ŵakayowoyanga.”
Fernando wakati: “Tikasambira kuti ŵanthu wose ŵakuluta kuchanya para ŵafwa, kweni nkhagomezganga yayi. Ine nkhatenge para munthu wafwa chilichose chikumalira papo. Nkhatenge ŵakufwa mbwenu kwawo kuli kumara.”
Kasi muli kujifumbapo kuti: ‘Ntchivichi chikuchitika para munthu wafwa? Kasi ŵabali ŵithu awo ŵali kufwa ŵakusuzgika ku malo ghanyake? Kasi tizamuŵawonaso? Kasi tingasimikizga wuli kuti tizamuŵawonaso?’ Wonani ivyo Malemba ghakusambizga pa nkhani iyi. Chakwamba, tiyeni tiwone ivyo Baibolo likuyowoya pa nkhani ya nyifwa. Pamasinda tiwonenge ivyo Baibolo likulayizga ku awo ŵali kufwa.
Kasi ŵakufwa ŵakumanya kalikose?
IVYO BAIBOLO LIKUYOWOYA: ‘Ŵamoyo ŵakumanya kuti ŵafwenge, kweni ŵakufwa ŵakumanya kanthu chara, nanga nkhuŵa nayo njombe; kweni chikumbukiro chawo ntchakuluwika. Chose icho woko lako lasanga kuchita, chichita na nkhongono zako; chifukwa kulije mulimo, panji maghanoghano, panji mahara, panji vinjeru, mu malaro uko ukuya.’a—Mupharazgi 9:5, 10.
Mwakudumura, ŵanthu para ŵafwa ŵakuluta ku Dindi. Ku malo agha munthu wakumanya chilichose yayi, nesi kugwira ntchito. Kasi Yobu, munthu wakugomezgeka wakatenge Dindi ni vichi? Yobu wakataya vinthu vyake vyose pamoza na ŵana ŵake mu zuŵa limoza. Pamanyuma wakakomwa na mapumba ghakuŵinya agho ghakataka thupi lake lose. Wakalomba Chiuta kuti: “Okwe, mphanyi mwandibisa mu dindi, mundisunge mu ubende.” (Job 1:13-19; 2:7; 14:13) Apa vikulongora kuti Yobu wakamanyanga kuti Dindi ni ng’anjo yamoto yayi, chifukwa mphanyi ndiko wakasuzgikaso chomene. Kweni wakamanyanga kuti ni malo ghakupumulirako.
Paliso nthowa yinyake iyo tingamanyira ivyo vikuchitika para munthu wafwa. Mu Baibolo muli nkhani za ŵanthu 8 awo ŵakafwa, kweni ŵakawuka.—Wonani bokosi lakuti, “Ŵanthu 8 Awo Baibolo Likuti Ŵakawuka ku Ŵakufwa.”
Pa ŵanthu wose 8 ŵara, palije uyo wakayowoyapo kuti wakaŵa ku malo uko wakakhalanga mwakukondwa panji wakasuzgikanga. Ŵanthu ŵara ŵaŵenge kuti ŵakaluta ku malo ghanthena agha, asi mphanyi ŵakayowoya? Asi mphanyi vili kulembekaso mu Baibolo kuti waliyose wajiŵazgirenge yekha? Mu Baibolo, mundalembekemo nkhani zanthena izi. Vikuwoneka kuti ŵanthu wose 8 ŵara ŵakayowoyapo chilichose yayi pa nkhani iyi. Chifukwa wuli ŵakayowoyapo yayi? Chifukwa ntchakuti ŵakamanyanga kalikose yayi, ŵakaŵa nga ŵali mu tulo twakufwa nato. Nakuti nyengo zinyake, Baibolo likuyaniska nyifwa na tulo. Mwachiyelezgero, Baibolo likuti Davide na Stefano ‘ŵakagona tulo mu nyifwa.’—Milimo 7:60; 13:36.
Sono kasi awo ŵali kufwa mbwenu kuli kumara waka? Kasi ŵazamuwuka?
a Lizgu lakuti malaro panji kuti dindi lili kufuma ku lizgu Lachihebere lakuti “Sheole” na Lachigiriki lakuti “Hadesi.” Mu Mabaibolo ghanyake ŵali kulembamo kuti “helo.” Kweni chisambizgo chakuti ŵakufwa ŵakuphya mu helo chikukolerana yayi na ivyo Baibolo likuyowoya.