Para Mfumu Panji Muwoli Winu Ngwambura Kugomezgeka

NTCHAKUŴINYA chomene para yumoza mu nthengwa waleka kugomezgeka kwa munyake. Ndipouli ŵanyake ŵangasankha kumugowokera uyo wabuda na kunozgaso nthengwa yawo.a Mulimose umo vingaŵira, kwali nthengwa yilutilirenge panji yayi kweni uyo wabudilika vikumuŵinya chomene. Kasi uyo wabudilika wangachita wuli kuti wazizipizge vyakuŵinya ivi?

MAVESI GHA MU BAIBOLO AGHO GHANGAMOVWIRANI

Nangauli mungaŵa na chitima, kweni ŵanandi awo ŵabudilika ŵakupembuzgika na fundo za mu Baibolo. Ŵakumanya kuti Chiuta wakuwona para ŵakulira ndipo nayo vikumukhwaska.—Malaki 2:13-16.

“Para vyenjezgo vyaninyekezga, imwe mukunisanguluska na kunizikiska mtima.”—Salimo 94:19.

Bill wakukumbuka kuti: “Apo nkhaŵazganga vesi ili, nkhawonanga kuti Yehova wakunipembuzga nga umo dada wachitemwa wakuchitira.”

“Uyo ngwakugomezgeka mukuchita nayo mwakugomezgeka.”—Salimo 18:25.

Carmen uyo mfumu wake wakaŵa wambura kugomezgeka kwa myezi yinandiko wakati: “Mfumu wane wakaŵa wakugomezgeka yayi, kweni nkhagomezganga Yehova kuti waŵenge nane ndipo wanikhuŵazgengepo yayi.”

“Lekani kwenjerwa na chinthu chilichose, kweni mu vinthu vyose, mu lurombo na maŵeyelero . . . madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu kwizira mwa Khristu Yesu.”—Ŵafilipi 4:6, 7.

Sasha wakuti: “Nkhaŵazganga vesi ili mwakuwerezgawerezga. Apo nkhalombanga mwakuwerezgawerezga, nkhawonanga kuti Chiuta wakanovwiranga kuti niŵe na mtende wa m’mtima.”

Ŵanthu wose awo ŵazunulika mu nkhani iyi ŵakawonanga nga kuti ŵangakwaniska yayi kuzizipizga. Kweni ŵakagomezga Yehova ndipo ŵakasanga nkhongono apo ŵakaŵazganga Baibolo. Bill wakuyowoya kuti: “Chipulikano chikanovwira kuwona umoyo kuŵa wakuzirwa apo vyose vikawonekanga kuti vikwenda yayi. Nangauli nkhenda nyengo yitali ‘mu chinkhwawu cha mdima bii,’ kweni Chiuta wakaŵa nane.”—Salimo 23:4.