Para Mukuwona Kuti Mungalutilira Yayi Kukhala na Umoyo

Adriana uyo wakukhala ku Brazil, wakati: “Nkhasuzgika chomene maghanoghano, ntheura nkhawona kuti ntchiwemi kujikoma waka.”

KASI NAMWE muli kughanaghanapo kuti mujikome waka? Para ni nthena ipo mungapulikiska umo Adriana wakajipulikira. Iyo wakasuzgikanga chomene maghanoghano, wakaŵanga na chitima, kweniso wakaŵavya chigomezgo chakuti vinthu vingamwenderaso. Adriana ŵakamusanga na nthenda yakuti nyengo zose yikamupangiskanga kuŵa na chitima.

Wonani ivyo vikachitikira Kaoru wa ku Japan uyo wakapweleleranga ŵapapi ŵake ŵachekuru. Iyo wakati: “Nyengo zinyake nkhasuzgikanga chomene maghanoghano chifukwa ku ntchito nkhaŵa na vyakuchita vinandi. Nyengo yikati yajumphapo nkhamba kuŵavya khumbo la chakurya, kweniso nkhatondekanga kugona makora. Nkhamba kughanaghana kuti ningafwatuka ku masuzgo para ningafwa waka.”

Munthu munyake wa ku Nigeria zina lake Ojebode wakayowoya kuti: “Nyengo zose nkhaŵanga na chitima mwakuti nkhaliranga waka. Ntheura nkhapenjanga nthowa ya umo ningajikomera.” Kweni chakukondweska ntchakuti Ojebode, Kaoru, na Adriana ŵakajikoma yayi. Kweni chaka chilichose ŵanthu ŵanandi ŵakujikoma.

KASI WOVWIRI TINGAWUSANGA NKHU?

Kanandi ŵanthu awo ŵakujikoma ŵakuŵa ŵanalume, ndipo ŵanandi mwa iwo ŵakuchita soni kupempha wovwiri. Yesu wakati ŵanthu awo mbalwari ndiwo ŵakukhumbikwira dokotala. (Luka 5:31) Ntheura para namwe mukusuzgika chomene maghanoghano mwakuti mukughanaghana vya kujikoma, chonde, kuchita soni yayi kupempha wovwiri. Ŵanthu ŵanandi awo ŵakusuzgika maghanoghano ŵawona kuti ntchakovwira chomene kupempha wovwiri ku chipatala. Ojebode, Kaoru, na Adriana wose ŵakapokera wovwiri wa chipatala ndipo pasono ŵakujipulikako makora.

Nyengo zinyake ŵadokotala ŵangamupani munkhwala panji ŵangamuphalirani ivyo mungachita kuti muleke kusuzgika chomene maghanoghano. Kweniso ŵanthu awo ŵakusuzgika maghanoghano ŵakukhumba kuti ŵamubanja lawo na ŵabwezi ŵaŵapulikiskenge, kuŵalongora lusungu, na kuŵapwelelera. Mubwezi muwemi chomene uyo waliyose wangaŵa nayo ni Yehova Chiuta, uyo wakupeleka wovwiri ukuru kwizira mu Mazgu ghake Baibolo.

KASI YILIPO NTHOWA IYO YINGAMAZGIRATHU MASUZGO AGHA?

Kanandi ŵanthu awo ŵakusuzgika maghanoghano ŵangakhumbikwira wovwiri wachipatala kwa nyengo yitali na kumanya umo ŵangachitira kuti ŵasinthe vinthu vinyake. Usange namwe mukusuzgika maghanoghano, mungaŵa na chigomezgo kuti munthazi vinthu viŵenge makora nga umo Ojebode wakugomezgera. Iyo wakuti, “Nkhulindilira mwakunweka kuzakawona lemba la Yesaya 33:24 likufiskika. Lemba ili likuyowoyerathu kuti pa nyengo iyo pa charu chapasi pazamuŵavya uyo wazamuyowoya kuti, ‘Nalwara.’” (Yesaya 33:24) Nga ni Ojebode, namwe mungapembuzgika na ivyo Chiuta wali kulayizga. Iyo watilayizga “charu chapasi chiphya” umo muzamuŵavya “vyakuŵinya.” (Chivumbuzi 21:1, 4) Para ivi vyazakachitika, kuzamuŵavya kusuzgika maghanoghano kweniso vyakuŵinya. Vyakuŵinya ivyo mukukumana navyo vizamuŵakoso chara muyirayira. Ndipo ‘muzamuvikumbukaso chara, ndipo vizamunjiraso yayi mu mtima [winu].’—Yesaya 65:17.

Mavesi gha mu Baibolo Agho Ghangamovwirani

Chiuta Wakumanya Umo Mukujipulikira.

“Ine Yehova Chiuta wako nkhukukora pa woko lako lamalyero, . . . nkhuyowoya nawe kuti: ‘Ungawopanga chara, ine nikovwirenge.’”—Yesaya 41:13.

Yehova wakumanya makora umo tikujipulikira kuluska munthu munyake waliyose ndipo wakukhumba chomene kutovwira.

Mughanaghanirengepo Mazgu gha Chiuta.

“[Eliya] wakapempha kuti wafwe waka. Wakati: ‘ . . . A Yehova, uwuskanimo sono umoyo wane.’”—1 Mathemba 19:4.

Ojebode wakayowoya kuti: “Nkhawovwirika chomene chifukwa chakuti nkhaghanaghanirangapo Mazgu gha Chiuta. Nkhawona kuti ntchimi Eliya nyengo yinyake nayo yikajipulikanga nga ndine.”

Sambiraniko ku ŵanthu awo ŵakuzunulika mu Baibolo.

Yesu wakati: “Nakuŵeyelelera [Petrosi] kwa Chiuta kuti chipulikano chako chileke kulopwa.”—Luka 22:32.

Mpositole Petrosi wakati wakana Yesu katatu, wakasuzgika chomene maghanoghano ndipo wakalira chomene. Kaoru wakati: “Ivyo vikachitikira Petrosi vikunovwira kumanya kuti Yehova na Yesu ŵakamanyanga umo Petrosi wakajipulikiranga. Ichi chikunikhozga chomene.”

Vyakuŵinya ivyo mukukumana navyo vizamuŵakoso chara muyirayira. ‘Muzamuvikumbukaso chara, ndipo vizamunjiraso yayi mu mtima [winu].’—Yesaya 65:17