Mulimo Wakukondweska Comene
1. Kasi ni mulimo wuli wakucizga ŵanthu mwauzimu uwo ukucitika mazuŵa ghano?
1 Ŵanthu awo ŵakawona kuti Yesu wakucizga ŵalwari mu nyengo yakale ŵakakondwa comene. (Luka 5:24-26) Lero napo, tikusangwa comene na mulimo wakucizga ŵanthu mwauzimu. (Uvu. 22:1, 2, 17) Nchakukondweska comene kuŵazga vyakucitika vya ŵanthu awo ŵali kusintha umoyo wawo cifukwa ca Mazgu gha Yehova na mzimu wake utuŵa. Nangauli vili nthena, kweni tikuŵa ŵakukondwa comene para tikucitako mulimo uwu mwa kucitiska sambiro la Baibolo lakuluta panthazi.
2. Ni vinthu wuli vingatipa cimwemwe apo tikusambizga munthu unenesko?
2 Kasi Ciuta zina lake ni njani? Cifukwa wuli wakuzomerezga masuzgo kuŵako? Kasi Ufumu wa Ciuta uzamuŵacitira vici ŵanthu? Tikuŵa ŵakukondwa cifukwa ca kuzgora mafumbo agha pera yayi, kweniso para tikuwona msambiri withu wakusangwa cifukwa ca kusambira unenesko. (Zinth. 15:23; Luka 24:32) Apo msambiri wakuluta panthazi mwauzimu, wangamba kugwiliskira nchito zina la Yehova, kusintha kavwaliro ndiposo umo wakujitozgera, kuleka nkharo zaukazuzi, ndiposo kwamba kupharazgira ŵanji. Para wajipatulira na kubapatizika, waŵenge mbali withu ndiposo wanchito munyithu. Vyose ivi ni vifukwa vyakuŵira ŵakukondwa.—1 Tes. 2:19, 20.
3. Kasi tingacita wuli kuti tambiske sambiro la Baibolo?
3 Kasi Mungacitako Mulimo Uwu? Para namwe mukukhumba kuti muciteko mulimo wakukondweska uwu, mulombani Yehova kuti namwe mukukhumba kuŵa na sambiro la Baibolo, ndipo citani mwakukolerana na malurombo ghinu. (1 Yoh. 5:14) Pharazgani ku malo uko mungasanga ŵanthu ndiposo panyengo iyo ŵakusangika. Pa nyengo yiliyose iyo njakwenelera, pemphani ŵanthu kuti mwambe kusambira nawo Baibolo. (Muph. 11:6) Para mwasanga wakunweka ndipo mwapanda mbuto yaunenesko, weleraniko kuti mukathilire maji.—1 Kor. 3:6-9.
4. Cifukwa wuli pakupempha ŵanthu kuti tisambirenge nawo Baibolo tikwenera kuŵa na mtima wakuti mulimo uwu ukwenera kucitika mwaluŵiro?
4 Pacali ŵanthu ŵanandi comene awo ŵali na njara ndiposo nyota ya urunji. Ni njani waŵawovwirenge kusambira Baibolo mwakuti ŵamumanye Yehova? (Mat. 5:3, 6) Tiyeni tijipeleke na mtima wose kuti timalizge mulimo wa kupharazga na kupanga ŵasambiri pambere nyengo yavuna yindafike paumaliro.—Yes. 6:8.