Kondwani Pakuzgora Ŵanthu Kuŵa Ŵasambiri
“Ntheura, lutaninge mukazgore ŵanthu . . . kuŵa ŵasambiri.”—MAT. 28:19.
1-3. (a) Kasi ŵanandi ŵakuwuwona wuli mwaŵi wa kusambizga ŵanthu Baibolo? (b) Kasi tidumbiskanenge mafumbo wuli?
MUDUMBU munyake uyo wakuteŵetera na kagulu ako kakuyowoya Cihindi ku United States wakalemba kuti: “Nasambira na mbumba yinyake iyo yili kufuma ku Pakistan kwa masabata khumi na yimoza.” Wakalutizga wakati: “Nchakuzizwiska yayi kuti naŵa paubwezi na mbumba iyi. Nili na citima cikuru comene cifukwa ca kupulika kuti sonosono apa mbumba iyi yiwelerenge kwawo ku Pakistan. Nili na citima cifukwa cakuti niŵenge nawo patali pera yayi, kweniso cifukwa ca cimwemwe ico naŵanga naco apo naŵawovwiranga kumanya Yehova.”
2 Kasi namwe muli kuŵapo na cimwemwe cifukwa ca kusambizga munthu Baibolo? Yesu na ŵasambiri ŵake ŵakaŵa na cimwemwe cikuru comene cifukwa ca mulimo wa kuzgora ŵanthu kuŵa ŵasambiri. Apo ŵasambiri 70 awo Yesu wakaŵatuma kukapharazga ŵakawera na cimwemwe uko wakaŵatuma, Yesu nayo “wakaŵa na cimwemwe cikuru mu mzimu utuŵa.” (Luka 10:17-21) Mwakuyana waka, ŵanandi mazuŵa ghano mbacimwemwe cifukwa ca kucita mulimo wa kuzgora ŵanthu kuŵa ŵasambiri. Uwu mbunenesko cifukwa mu 2007, ŵapharazgi ŵakukondwa aŵa ŵakasambizga Baibolo ŵanthu 6.5 miliyoni mwezi wuliwose.
3 Kweni ŵapharazgi ŵanyake ŵandasambizgepo munthu Baibolo. Ŵanyake ŵangaŵa kuti ŵandasambirepo na munthu mwasonosono. Kasi ni masuzgo wuli agho tingakumana nagho apo tikuyezgayezga kusambizga ŵanthu Baibolo? Kasi tingamazga wuli masuzgo agha? Kasi ni vitumbiko wuli ivyo tingasanga para tikucita vyose ivyo tingafiska kuti tilondezge dango la Yesu lakuti, ‘lutaninge mukazgore ŵanthu kuŵa ŵasambiri’?—Mat. 28:19.
Ivyo Vingacitiska Kuti Tileke Kukondwa
4, 5. (a) Mu vyaru vinyake, kasi ŵanandi ŵakucita wuli na makani ghawemi? (b) Ni masuzgo wuli agho ŵapharazgi ŵakukumana nagho mu vyaru vinyake?
4 Mu vyaru vinyake, ŵanthu ŵakupokera mabuku na magazini ghithu, ndipo ŵakukhumbisiska kuti tiŵasambizgenge Baibolo. Mbumba yinyake iyo yikateŵetera kwa nyengo yicoko waka ku Zambia yikalemba kuti: “Nkhani izi ni zaunenesko. Caru ca Zambia nchiwemi comene kupharazgako. Kupharazga mu misewu nkhwakukondweska comene. Ŵanyake ŵakwiza ŵekha kwa ise, ndipo ŵanji ŵakutipempha magazini mwakuti ŵakucita na kuzunura mwezi wa magazini agho ŵakukhumba.” Sonosono apa, ŵabali na ŵadumbu mu caru ca Zambia ŵakasambizga Baibolo ŵanthu 200,000. Ici cikulongora kuti waliyose wakasambizganga munthu yumoza panji kujumpha apa.
5 Kweni mu vyaru vinyake, nchakusuzga kuti mupharazgi wagaŵire magazini panji mabuku, ndiposo kusambizga munthu Baibolo. Cifukwa wuli? Kanandi ŵanthu ŵakusangika yayi pa nyumba, ndipo awo ŵakusangika ŵakukhumba yayi kudumbiskana nawo vya cisopa. Panyake ŵangaŵa kuti ŵali kulelekera mu mbumba yambura kusopa, panji ŵakutinkha cisopa cifukwa ca upusikizgi uwo wuli mu cisopa cautesi. Ŵanandi ŵali “kujowoleka” na ŵaliska ŵatesi. (Mat. 9:36) Nchakupulikikwa kuti ŵanthu ŵanthena ŵakukhumba yayi kudumbiskana nawo vya Baibolo.
6. Kasi ŵanji ŵali na masuzgo wuli?
6 Ŵapharazgi ŵanyake ŵakukumana na suzgo linyake, ilo lingacitiska kuti ŵaleke kukondwa. Nangauli ŵakaŵa na mwamphu pa mulimo wa kuzgora ŵanthu kuŵa ŵasambiri, kweni sono ŵakutondeka cifukwa ca ulwari panji masuzgo ghanyake agho ghakwiza cifukwa ca ucekuru. Ghanaghaniraniso masuzgo ghanyake agho ghangacitika cifukwa ca ise taŵene. Mwaciyelezgero, kasi mukuwona kuti mungafiska yayi kusambizga munthu Baibolo? Mungajipulika nga umo Mozesi ŵakajipulikira apo Yehova wakamutuma kwa Faro. Mozesi wakati: “Okwe, [Yehova] fumu yane, ine ndine munthu wambura kayowoyero kakunyoroska, nanga ndi kale.” (Ex. 4:10) Cinyake ico cikukozganako na kujiwona nga tili ŵambura kwenelera ni kopa kuti tingatondeka. Tingaghanaghana kuti munthu uyo tingamusambizga wangazgoka yayi Mkhristu cifukwa tilije luso. Ntheura tingamba kughanaghana kuti nchiwemi kukhala kwambura kusambizga munthu Baibolo. Kasi tingamazga wuli masuzgo agha?
Nozgani Mtima Winu
7. Nchivici cikatuma Yesu kuti walimbikire kucita uteŵeti?
7 Cinthu cakwamba ico tikwenera kucita nkhunozga mtima withu. Yesu wakati: “Ivyo vili kuzara mu mtima ndivyo mulomo . . . ukuyowoya.” (Luka 6:45) Yesu wakasambizganga ŵanthu cifukwa cakuti wakaŵafipiranga mtima. Mwaciyelezgero, wakati wawona kuti Ŵayuda ŵajipatura kwa Ciuta, ‘wakaŵalengera citima.’ Wakati ku ŵasambiri ŵake: “Vuna njinandi, . . . Lombani Mweneco wa vuna kuti watume ŵanchito ku vuna yake.”—Mat. 9:36-38.
8. (a) Kasi tingacita makora kughanaghanira vici? (b) Kasi tingasambirako vici ku vinthu ivyo munthu munyake wakusambira Baibolo wakayowoya?
8 Para tikucita mulimo wa kuzgora ŵanthu kuŵa ŵasambiri, tikwenera kughanaghanira comene vyandulo ivyo ise tili kusanga cifukwa cakuti munthu munyake wali kutisambizga Baibolo. Ghanaghaniraniso candulo ico ŵanthu awo tikukumana nawo para tikupharazga ŵangasanga cifukwa ca uthenga withu. Mu caru cinyake, mama munyake wakalembera kalata ofesi ya munthavi ya mu caru ico, wakati: “Nati nimuphalirani kuti nili wakuwonga comene cifukwa ca Ŵakaboni ŵa Yehova awo ŵakunisambizga Baibolo. Nkhumanya kuti nyengo zinyake nkhuŵasuzga cifukwa ca mafumbo agho nkhuŵafumba, na kuŵamalira nyengo yawo. Kweni ŵakunipulikiska, ndipo mbakukhumbisiska kunisambizga. Nkhuwonga comene Yehova na Yesu Khristu cifukwa cakuti ŵanthu aŵa ŵakunovwira.”
9. Kasi Yesu wakaŵa na maghanoghano wuli, ndipo tingamuyezga wuli?
9 Mbunenesko kuti ni wose yayi awo ŵakazomera ivyo Yesu wakasambizganga. (Mat. 23:37) Ŵanji ŵakendapo nayo nyengo yicoko, ndipo mukuluta kwa nyengo ŵakakana visambizgo vyake, ndipo “ŵakendangaso nayo cara.” (Yoh. 6:66) Nangauli ŵanji ŵakakana ivyo Yesu wakasambizganga, kweni iyo wakaviwonanga kuŵa vyakuzirwa nipera. Nangauli mbuto yinandi iyo wakaseŵa yikapambika yayi, kweni Yesu wakalutilira kucita viwemi. Wakawona kuti minda yaca, ndipo wakakondwa kucita mulimo wa vuna. (Ŵazgani Yohane 4:35, 36.) M’malo mwa kuwona nga ni para kulijirethu ŵanthu awo ŵangazomera unenesko, kasi cingaŵa ciwemi yayi kuti tiŵenge na maghanoghano ghakuti ŵanyake mu cigaŵa cithu ŵangazomera unenesko? Tiyeni tiwone ivyo tingacita kuti tilutilire kuŵa na maghanoghano agha.
Seŵani na Cilato Cakuti Muvune
10, 11. Kasi mungacita wuli kuti mulutilire kuŵa ŵakukondwa?
10 Mulimi wakuseŵa mbuto na cilato cakuti wazakavune. Mwakuyana na fundo iyi, nase tipharazgenge na cilato cakuti tambiske masambiro gha Baibolo. Kweni wuli usange kanandi mukunjira mu uteŵeti wa m’munda kweni panyumba mukusanga ŵanthu ŵacoko? Panji wuli usange mukuŵasanga yayi ŵanthu awo mukapangana kuti mukawereso? Cingaŵa cakugongoweska comene. Para vili nthena, kasi mukwenera kuleka kupharazga nyumba na nyumba? Yayi. Kwa nyengo yitali, ŵanthu ŵanandi ŵasangika cifukwa ca kupharazga nyumba na nyumba.
11 Kweni kasi mungacita yayi nthowa zinyake za kupharazgira mwakuti muŵe ŵacimwemwe? Mwaciyelezgero, kasi mwayezgapo kupharazgira ŵanthu mu msewu panji uko ŵakugwira nchito? Kasi cingaŵa camacitiko kuyowoyeskana na ŵanthu pa telefoni? Panji kasi cingaŵa camacitiko kuti mutore manambara gha foni ku ŵanthu awo mukaŵapharazgirapo kale, mwakuti mulutilire kuŵapharazgira? Usange mungaŵa na citatata ndiposo kusintha nthowa za kupharazgira, muzamuŵa ŵakukondwa cifukwa ca ŵanthu awo ŵazamuzomera uthenga wa Ufumu.
Usange Ŵanthu Mbambura Kunweka
12. Kasi tingacitaci usange ŵanthu ŵanandi mu cigaŵa cithu ŵakutemwa yayi kudumbiskana nawo vya cisopa?
12 Kweni wuli usange ŵanthu ŵanandi ŵa mu cigaŵa cinu mbambura kunweka na nkhani za cisopa. Kasi mungamba kudumbirana nawo mwa kuzunura vinthu ivyo ŵakunweka navyo? Mpositole Paulosi wakalembera Ŵakhristu ŵa ku Korinte kuti: “Ku Ŵayuda nkhazgoka nga ni Muyuda . . . Ku ŵambura dango nkhazgoka nga ngwambura dango, nangauli nili wambura dango cara kwa Ciuta.” Cifukwa wuli Paulosi wakacitanga nthena? Iyo wakati: “Nazgoka vinthu vyose ku ŵanthu ŵa mitundu yose, mwakuti mu nthowa yiliyose niponoske ŵanji.” (1 Kor. 9:20-22) Kasi nase tingasora nkhani iyo yingakondweska ŵanthu ŵa mu cigaŵa cithu? Ŵanandi awo ŵakusopa yayi ŵakudokera kuŵa na mbumba ziwemi. Ŵangaŵa kuti ŵakukhumba kumanya cilato ca umoyo. Kasi tingaŵapharazgira yayi uthenga wa Ufumu mu nthowa yakuŵakondweska?
13, 14. Kasi tingacita wuli kuti tisazgireko cimwemwe pakucita mulimo wa kuzgora ŵanthu kuŵa ŵasambiri?
13 Nanga kungaŵa uko ŵanandi mbambura kunweka na cisopa, ŵapharazgi ŵanandi ŵasanga cimwemwe cifukwa ca kucita mulimo wa kuzgora ŵanthu kuŵa ŵasambiri. Mwawuli? Mwa kusambira ciyowoyero cinyake. Mfumu munyake na muwoli wake awo ŵali na vilimika vya m’ma 60 ŵakasanga kuti mu cigaŵa ico ŵakapharazganga mukaŵa ŵana ŵa sukulu ŵanandi awo ŵakayowoyanga ciyowoyero ca Cichayinizi. Mfumu wakati: “Pakughanaghanira fundo iyi, tikakhuŵirizgika kusambira ciyowoyero ici. Nangauli tikakhumbikwiranga kuti zuŵa lililose tisambirenge Cichayinizi, kweni tikawovwirika kuti tiŵe na masambiro ghanandi gha Baibolo mu ciyowoyero ici.”
14 Nanga ni para mungasambira yayi ciyowoyero cinyake, kweni mungasanga candulo usange mungagwiliskira nchito kabuku ka Makani Ghawemi ku Ŵanthu ŵa Mitundu Yose, para mwakumana na ŵanthu awo ŵakuyowoya viyowoyero vinyake. Kweniso mungacita makora kuyeghako mabuku panji magazini gha mu ciyowoyero ico ŵanthu ŵa mu cigaŵa cinu ŵakuyowoya. Mbunenesko kuti kuyowoya na ŵanthu ŵa viyowoyero vinyake kukukhumba nyengo ndiposo kuŵikapo mtima. Kweni kumbukani fundo iyo yikusangika mu Mazgu gha Ciuta, yakuti: “Uyo wakuseŵa pakuru wazamuvunaso pakuru.”—2 Kor. 9:6.
Ni Mulimo wa Mpingo Wose
15, 16. (a) Cifukwa wuli kuzgora ŵanthu kuŵa ŵasambiri ni mulimo wa mpingo wose? (b) Kasi ŵacekuru ŵakucita mulimo wuli?
15 Ndipouli, kuzgora ŵanthu kuŵa ŵasambiri ni mulimo wa munthu yumoza pera yayi. Ni mulimo wa mpingo wose. Cifukwa wuli? Yesu wakati: “Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.” (Yoh. 13:35) Ndipo nadi, para ŵanthu awo tikusambira nawo Baibolo ŵakufika pa maungano ghithu ŵakuwona citemwa ico cikuŵa pakati pithu. Msambiri munyake wa Baibolo wakati: “Nkhukondwa comene para niza pa maungano. Nkhujipulika kuti nili wakupokelereka.” Yesu wakati awo ŵazgoka ŵalondezgi ŵake ŵangasuskika na ŵa mu mbumba yawo. (Ŵazgani Mateyu 10:35-37.) Kweni wakayowoyaso kuti mu mpingo ŵazamusangaso ‘ŵanung’una na ŵadumbu na ŵanyinawo na ŵana.’—Mrk. 10:30.
16 Ŵabali na ŵadumbu ŵacekuru ŵakovwira comene kuti ŵasambiri ŵa Baibolo ŵakure mwauzimu. Mu nthowa wuli? Nangauli ŵabali na ŵadumbu ŵacekuru ŵangaŵa kuti ŵakusambizga munthu Baibolo yayi, kweni ivyo ŵakuzgora pa maungano gha mpingo vikovwira wose awo ŵakutegherezga. Pakuti ŵali na lumbiri lwa “umoyo wa urunji,” mpingo wose ukuŵa wakukondwa, ndipo ici cikuguzira ŵanthu ŵa mitima yiwemi ku gulu la Ciuta.—Zinth. 16:31.
Kumazga Wofi
17. Kasi tingacita wuli kuti tileke kujiwona kuti tingafiska yayi kusambizga munthu Baibolo?
17 Wuli usange mukujiwona nga mungafiska yayi kusambizga munthu Baibolo? Kumbukani kuti Yehova wakawovwira Mozesi mwa kumupa mzimu utuŵa ndiposo mbali wake, Aroni, kuti wamovwirenge. (Ex. 4:10-17) Yesu wakalayizga kuti mzimu wa Ciuta uzamutovwira pakupharazga. (Mil. 1:8) Cinyake nchakuti pakutuma ŵasambiri ŵake kuti ŵakapharazge, Yesu wakaŵatuma ŵaŵiriŵaŵiri. (Luka 10:1) Ntheura usange mukuwona kuti muli na wofi kusambizga munthu Baibolo, lombani Ciuta kuti wamupani vinjeru, ndipo pamasinda sangani Mkhristu munyinu uyo wangamukhozgani ndiposo kumusambizgani maluso. Nchinthu cakukhozga comene kumanya kuti Yehova wali kusora ŵanthu bweka, awo ni “vinthu viteciteci vya caru” kuti ŵafiske mulimo wakuzirwa uwu.—1 Kor. 1:26-29.
18. Kasi tingacita wuli kuti tileke kujipulika kuti tingafiska yayi kusambizga munthu Baibolo?
18 Tingacita wuli kuti tileke kujiwona kuti tingafiska yayi kovwira msambiri wa Baibolo? Tingacita makora kukumbuka kuti kuzgora munthu kuŵa msambiri kukuyana yayi na umo munthu wakuphikira cakurya. Para cakurya cindaphye likuŵa suzgo la uyo waphikanga. Kweni vikupambanako na nkhani ya kuzgora munthu kuŵa msambiri, cifukwa pali vigaŵa vitatu ivyo vikukhwaskika pa nkhani iyi. Yehova ndiyo wakucita cigaŵa cikuru comene. Ndiyo wakuguzira msambiri kwa iyo. (Yoh. 6:44) Ise lumoza na ŵanji mu mpingo tikumusambizga mwaluso mwakuti wakure mwauzimu. (Ŵazgani 2 Timote 2:15.) Msambiri nayo wakwenera kucita ivyo wakusambira. (Mat. 7:24-27) Para munthu uyo tikasambiranga nayo Baibolo wakana kuti tilutilire kusambira nayo tingakhuŵara. Tili na cigomezgo cose kuti awo tikuŵasambizga ndiwo ŵakusankha ivyo ŵakukhumba, kweni “waliyose wa ise wazamujipatawulira iyomwene kwa Ciuta.”—Rom. 14:12.
Pali Vyandulo Wuli?
19-21. (a) Kasi tikusanga vyandulo wuli para tikusambizga ŵanthu Baibolo? (b) Kasi Yehova wakuŵawona wuli wose awo ŵakupharazga?
19 Kusambizga ŵanthu Baibolo kukutovwira kuti tiŵikenge Ufumu pakudankha. Kukovwiraso kuti unenesko uwo tili kusambira ukhazikike mu maghanoghano na mu mtima withu. Cifukwa wuli tingati kusambizga ŵanthu Baibolo kukovwira pa cigaŵa ici? Mupayiniya wa nyengo zose, zina lake Barak wakati: “Kusambizga ŵanthu Baibolo kukovwira kuti nawe ughamanyenge makora Mazgu gha Ciuta. Nkhuwona kuti pambere nindasambizge munthu fundo yinyake, nkhwenera kukhorwa nayo dankha namwene.”
20 Usange mulije sambiro la Baibolo, kasi ndikuti uteŵeti winu ngwambura kuzirwa kwa Ciuta? Yayi. Yehova wakuwonga vyose ivyo tikucita pakumusopa. Wose awo ŵakupharazga ‘mbanchito ŵanyake ŵa Ciuta.’ Kweni para tikusambizga munthu Baibolo cimwemwe cithu cikusazgikira apo tikuwona Ciuta wakukuzga mbuto iyo tapanda mwa uyo tikumusambizga. (1 Kor. 3:6, 9) Amy, uyo ni mupayiniya, wakati: “Para ukuwona uyo ukumusambizga wakukura mwauzimu, ukujipulika kuti uli na mwaŵi ukuru comene cifukwa cakuti Yehova watuma iwe kumusambizga na kumupa mwaŵi wa kumanya iyo ndiposo kuti wazakaŵe na umoyo wamuyirayira.”
21 Kuyezgayezga kwambiska ndiposo kusambizga munthu Baibolo kukutovwira kuti tiŵike maghanoghano ghithu ghose pa kuteŵetera Ciuta ndipo kukukhozga cilindizga cithu ca kuzakapona na kunjira mu caru ciphya. Na wovwiri wa Yehova, tingawovwiraso awo ŵakupulika uthenga withu kuti ŵazakapone. (Ŵazgani 1 Timote 4:16.) Tiŵenge na cifukwa ciwemi comene cakuŵira ŵakukondwa.
Kasi Mukukumbuka?
• Ni masuzgo wuli agho ghangatondeska ŵanji kusambizga ŵanthu Baibolo?
• Kasi tingacitaci para ŵanthu ŵanandi mu cigaŵa cithu mbambura kunweka na uthenga withu?
• Kasi tikusanga vyandulo wuli para tikusambizga ŵanthu Baibolo?
[Vithuzithuzi pa peji 9]
Kasi mukusazgirako nthowa za kupharazgira mwakuti musange ŵanthu ŵa mitima yiwemi?