“Lutaninge Mukazgore Ŵanthu . . . Kuŵa Ŵasambiri”

1-2. (a) Kuyana na ivyo Yesu wakayowoya pa Mateyu 28:18-20, kasi chilato chikuru cha mpingo waunenesko ntchakuti wuli? (b) Kasi tizgorenge mafumbo wuli mu nkhani iyi?

ŴAPOSITOLE ŵakwenera kuti ŵakakondwa chomene apo ŵakawungana musi mwa phiri. Yesu wati wawuskika, wakaphalira ŵasambiri ŵake kuti ŵakakumane ku malo agha. (Mat. 28:16) Nyengo iyi ndiyo Yesu wakwenera kuti “wakawonekera ku ŵabali ŵakujumpha 500 pa nyengo yimoza.” (1 Kor. 15:6) Chifukwa wuli Yesu wakaphalira ŵasambiri ŵake kuti ŵakakumane ku malo agha? Kuti waŵape mulimo wakuzirwa chomene wakuti: “Mukazgore ŵanthu ŵa mitundu yose kuŵa ŵasambiri.”—Ŵazgani Mateyu 28:18-20.

² Ŵasambiri awo ŵakapulika mazgu gha Yesu ndiwo ŵakaŵa mu mpingo wakwamba Wachikhristu. Chilato chikuru cha mpingo uwu chikaŵa kuzgora ŵanthu kuŵa ŵasambiri ŵa Khristu.b Mazuŵa ghano napo, pali mipingo yinandi ya Ŵakhristu ŵaunenesko pa charu chose, iyo chilato chawo ntchakuyana waka na cha Ŵakhristu ŵakwambilira. Mu nkhani iyi, tidumbiskanenge mafumbo ghanayi agha: Chifukwa wuli ntchito yakuzgora ŵanthu kuŵa ŵasambiri njakuzirwa chomene? Kasi tikwenera kuchita vichi kuti tizgore ŵanthu kuŵa ŵasambiri? Kasi Mkhristu waliyose wakwenera kuchitako ntchito iyi? Ndipo chifukwa wuli tikwenera kuŵa ŵakuzikira pakuchita ntchito iyi?

CHIFUKWA WULI MULIMO WAKUZGORA ŴANTHU KUŴA ŴASAMBIRI NGWAKUZIRWA?

3. Kuyana na Yohane 14:6 na 17:3, chifukwa wuli ntchito yakuzgora ŵanthu kuŵa ŵasambiri njakuzirwa chomene?

³ Chifukwa wuli mulimo wakuzgora ŵanthu kuŵa ŵasambiri ngwakuzirwa chomene? Chifukwa ntchakuti munthu wangaŵa paubwezi na Chiuta, pekha para ni msambiri wa Khristu. Chinyake ntchakuti awo ŵakulondezga Khristu, ŵakuŵa na umoyo uwemi sono, ndiposo ŵakulindilira umoyo wamuyirayira. (Ŵazgani Yohane 14:6; 17:3.) Yesu watipa ntchito yakuzirwa chomene, ndipouli tikugwira tekha yayi ntchito iyi. Mpositole Paulosi pakuyowoya vya iyo na ŵabwezi ŵake, wakalemba kuti: “Tili ŵantchito ŵanyake na Chiuta.” (1 Kor. 3:9) Ni mwaŵi ukuru chomene kuti Yehova na Khristu ŵapeleka ntchito iyi ku ŵanthu ŵambura kufikapo.

4. Kasi tikusambirako vichi ku ivyo vikachitikira Ivan na Matilde?

⁴ Ntchito yakuzgora ŵanthu kuŵa ŵasambiri yingatipa chimwemwe chomene. Wonani ivyo vikachitikira Ivan na muwoli wake, Matilde ku Colombia. Ŵakapharazgira munyamata munyake zina lake Davier. Munyamata uyu wakaŵaphalira kuti: “Nkhukhumba kusintha nkharo yane kweni nkhutondeka.” Davier wakachitanga maseŵero gha mafayiti, wakamwanga munkhwala wakuzweteska wongo, wakaŵa muloŵevu, ndipo wakakhalanga na chibwezi chake zina lake, Erika. Ivan wakuti: “Tikamba kusambira nayo Baibolo. Wakakhalanga kutali ndipo tikachitanga kwenda pa njinga maora ghanandi mu msewu wamathipa. Erika wati wawona kuti Davier wamba kusintha nkharo yake, nayo wakambapo kusambira Baibolo.” Nyengo yati yajumphapo, Davier wakaleka kumwa munkhwala wakuzweteska wongo, kuloŵera, na maseŵero gha mafayiti. Pamanyuma wakalembeska nthengwa yake na Erika. Matilde wakuti: “Apo Davier na Erika ŵakabatizikanga mu 2016, tikakumbukanga ivyo Davier wakatemwanga kuyowoya kuti, ‘Nkhukhumba kusintha nkharo yane kweni nkhutondeka.’ Tikakondwa chomene mwakuti tikathiska masozi.” Ntchakuwonekerathu kuti tikuŵa ŵakukondwa chomene para tawovwira ŵanthu kuŵa ŵasambiri ŵa Khristu.

KASI TIKWENERA KUCHITA VICHI KUTI TIZGORE ŴANTHU KUŴA ŴASAMBIRI?

5. Kasi chakwamba tikwenera kuchita vichi usange tikukhumba kuzgora ŵanthu kuŵa ŵasambiri?

⁵ Chinthu chakwamba icho tikwenera kuchita, ‘nkhupenja’ ŵanthu awo ŵakukhumba kumanya Yehova. (Mat. 10:11) Para tikuphalirako waliyose uyo tasangana nayo vya Yehova, tikulongora kuti ndise Ŵakaboni ŵa Yehova nadi. Kweniso tikulongora kuti ndise Ŵakhristu ŵaunenesko para tikupulikira ivyo Khristu wakayowoya kuti tikapharazgenge.

6. Kasi tingachita wuli kuti ŵanthu ŵatitegherezgenge para tikupharazga?

⁶ Ŵanthu ŵanyake ŵakukhumba nadi kusambira unenesko wa mu Baibolo, kweni ŵanandi mwa ŵanthu aŵa pakwamba ŵakuwoneka nga kuti ŵakuŵikako mahara viŵi yayi. Tikwenera kuŵawovwira kuti ŵanweke kuti ŵasambire vinandi. Kuti tovwire makora ŵanthu mu uteŵeti, tikwenera kunozgekera makora. Sankhani nkhani izo zingakopa ŵanthu awo mwamuŵapharazgira. Nozgekerani umo mwamwambira chidumbirano.

7. Kasi mungambiska wuli chidumbirano, ndipo mukughanaghana kuti chifukwa wuli ntchakuzirwa kuŵachindika na kuŵategherezga awo tikuŵapharazgira?

⁷ Mwachiyelezgero, mungamuphalira mweneko nyumba kuti: “Nkhukhumba kumanya maghanoghano ghinu pa nkhani yinyake. Masuzgo ghanandi agho tikukumana nagho ndighoso ŵanthu pa charu chose ŵakusangana nagho. Kasi mukughanaghana kuti pakukhumbikwira boma la pa charu chose kuti limazge masuzgo agha?” Kufuma apo mungadumbiskana Daniyeli 2:44. Kwa munthu munyake mungafumba kuti: “Kasi mukughanaghana kuti ntchivichi chingawovwira kuti mulere makora ŵana ŵinu? Ningatemwa kupulika maghanoghano ghinu.” Kufuma apo dumbiskanani nayo lemba la Dotoronome 6:6, 7. Mungasankha nkhani yiliyose, kweni mukwenera kughanaghanira awo mwamuŵapharazgira. Ghanaghanirani umo ŵamovwilikira para ŵamanya ivyo Baibolo likusambizga. Para mukuyowoya nawo, mukwenera kuŵategherezga na kuchindika maghanoghano ghawo. Usange muchitenge nthena muŵamanyenge makora, ndipo nawo ŵamutegherezganinge para mukuyowoya.

8. Chifukwa wuli tikwenera kulutilira kuchita maulendo ghakuwelerako?

⁸ Pambere mundambe kusambira Baibolo na munthu, mukwenera kulimbikira kuwelerako. Chifukwa wuli? Chifukwa ntchakuti nyengo zinyake para mwawelerako mungasanga kuti mweneko nyumba palije. Panyakeso mungakhumbikwira kuwelerako kanandi waka m’paka apo mweneko nyumba wazamulongolera kuti ngwakufwatuka kusambira Baibolo. Kumbukani kuti vyakumera ivyo ŵakuvithilira nyengo zose ndivyo vikukura makora. Mwakuyana waka, munthu wakunweka chitemwa chake pa Yehova na Khristu chingakura para nyengo zose tikudumbiskana nayo Mazgu gha Chiuta.

KASI MKHRISTU WALIYOSE WANGAWOVWIRAPO PA NTCHITO YAKUZGORA ŴANTHU KUŴA ŴASAMBIRI?

9-10. Chifukwa wuli tingati Mkhristu waliyose wakovwirapo pa ntchito yakupenja ŵanthu ŵamitima yiwemi?

⁹ Mkhristu waliyose wangawovwirapo pa ntchito yakupenja ŵanthu ŵamitima yiwemi. Tingayaniska ntchito yithu na kupenja mwana uyo wazgeŵa. Chifukwa wuli? Ghanaghanirani ivyo vikachitikira mwana munyake wa vyaka vitatu uyo wakazgeŵa. Ŵanthu pafupifupi 500 ŵakamupenjanga. Pakati pajumpha maora 20, munthu munyake wakamusanga mwana uyu mu munda unyake. Munthu uyo wakamusanga mwana uyu wakakana kulumbika. Iyo wakati: “Mwana uyu wasangika chifukwa ŵanthu wose ŵakagwilira lumoza ntchito yakupenja.”

¹⁰ Ŵanthu ŵanandi mazuŵa ghano ŵali nga ni mwana uyo wazgeŵa. Ŵalije chilindizga chilichose, kweni ŵakukhumbikwa wovwiri. (Efe. 2:12) Taŵanthu ŵakujumpha 8 miliyoni tikugwilira lumoza ntchito yakupenja ŵanthu ŵamitima yiwemi. Nyengo zinyake mungatondeka kusanga munthu uyo wakukhumba kusambira Baibolo. Ndipouli, ŵapharazgi ŵanyake mu chigaŵa icho mukupharazga ŵangasanga munthu uyo wakukhumba kusambira Mazgu gha Chiuta. Para mubali panji mudumbu wasanga munthu uyo wakukhumba kuŵa msambiri wa Khristu, waliyose uyo wakawovwirapo pa ntchito yakupenja wakuŵa wakukondwa.

11. Nanga mungaŵavya sambiro la Baibolo, kasi ni nthowa wuli izo mungawovwilirapo pa ntchito yakuzgora ŵanthu kuŵa ŵasambiri?

¹¹ Nanga vingaŵa kuti pasono mulije sambiro la Baibolo, kweni mungawovwirapo pa ntchito yakuzgora ŵanthu kuŵa ŵasambiri munthowa zinyake. Mwachiyelezgero, para munthu munyake wachilendo wiza pa Nyumba ya Ufumu mungamupokelera na kumovwira. Para mungachita nthena, mungamovwira kumanya kuti chitemwa ntchimanyikwiro cha Ŵakhristu ŵaunenesko. (Yoh. 13:34, 35) Para mukuzgora mwakudumura pa maungano, mukovwira awo ŵamba sono kuwungana kumanya umo ŵangalongosolera chigomezgo chawo kufumira pasi pamtima. Mungendera lumoza na mupharazgi muphya mu uteŵeti na kumovwira umo wangagwiliskira ntchito Baibolo para wakusambizga ŵanthu. Para muchitenge nthena, mumovwirenge kuti wayezge Khristu.—Luka 10:25-28.

12. Kasi tikukhumbikwira kuŵa na maluso ghapadera kuti tovwire ŵanthu kuŵa ŵasambiri? Longosorani.

¹² Palije uyo wakwenera kughanaghana kuti wakwenera kuŵa dankha na maluso ghapadera kuti wawovwire ŵanthu kuŵa ŵasambiri ŵa Yesu. Chifukwa wuli? Wonani ivyo vikachitikira Faustina, uyo wakukhala ku Bolivia. Apo wakakumana na Ŵakaboni ŵa Yehova kakwamba wakatondekanga kuŵazga. Sono wakuyezga kuŵazga. Wali kubatizika, ndipo wakutemwa kusambizga ŵanyake. Pasono wakusambizga Baibolo ŵanthu 5 sabata yiliyose. Nangauli Faustina wakuŵazga makora yayi, kweni wawovwira ŵanthu 6 awo ŵali kubatizika.—Luka 10:21.

13. Nangauli tingaŵa ŵakutangwanika, kasi tingasanga vitumbiko wuli para tikovwira ŵanthu kuŵa ŵasambiri?

¹³ Ŵakhristu ŵanandi mbakutangwanika na milimo yinyake. Ndipouli, ŵakusanga nyengo yakusambizgira ŵanthu Baibolo, ndipo ŵakukondwa chomene. Wonani ivyo vikachitikira Melanie uyo wakukhala ku Alaska. Mudumbu uyu wakaleranga yekha mwana wake mwanakazi wa vyaka 8. Kweniso wakaŵa pa ntchito, ndiposo wakawovwiranga mupapi wake uyo wakaŵa na matenda gha kansa. Mu tawuni iyo wakakhalanga wakaŵa yekha Kaboni. Kanandi mudumbu uyu wakalombanga kuti Chiuta wamupe nkhongono kuluta kukapharazga nangauli kukazizimanga. Wakakhumbanga chomene kuti wasange sambiro la Baibolo. Pamanyuma wakasangana na Sara, uyo wakakondwa chomene kumanya kuti Chiuta wali na zina. Pati pajumpha nyengo, Sara wakazomera kusambira Baibolo. Melanie wakuti: “Zuŵa la Chinkhondi lililose kumise, nkhaŵanga wakuvuka, kweni ine pamoza na mwana wane tikalutilira kusambira Baibolo na Sara, ndipo vikatovwiranga chomene. Tikakondwanga kupenja mazgoro gha mafumbo agho wakafumbanga, ndipo tikakondwa chomene kuti wakaŵa paubwezi na Yehova.” Sara wakazizipizga nangauli wakasuskikanga, ndipo paumaliro wakafuma tchalitchi lake na kubatizika.

CHIFUKWA WULI NTCHITO YAKUZGORA ŴANTHU KUŴA ŴASAMBIRI YIKUKHUMBIKWA KUZIKIRA?

14. (a) Kasi ntchito yakuzgora ŵanthu kuŵa ŵasambiri yikuyana wuli na ulovi? (b) Kasi mazgu gha Paulosi agho ghali pa 2 Timote 4:1, 2 ghakutichiska vichi?

¹⁴ Para mundasange munthu uyo wakukhumba nadi kuŵa msambiri, kugongowa yayi. Kumbukani kuti Yesu wakayelezgera ntchito yakuzgora ŵanthu kuŵa ŵasambiri na ulovi. Ŵalovi ŵangakhala maora ghanandi kwambura kukorapo somba nanga yingaŵa yimoza. Kanandi ŵakugwira ntchito usiku chomene, mulenjilenji, panji ŵakuluta kutali kuti ŵakasange somba. (Luka 5:5) Mwakuyana waka, ŵapharazgi ŵanyake, ŵakumalira maora ghanandi “kupenja mwakuzikira” ŵanthu awo ŵangazomera unenesko, panyengo na malo ghakupambanapambana. Chifukwa wuli? Kuti ŵasange ŵanthu ŵanandi. Awo ŵakulimbikira kuchita nthena, kanandi ŵakutumbikika chifukwa ŵakuŵasanga ŵanthu awo ŵakunweka na uthenga withu. Kasi mungayezga kupharazga panyengo na malo agho mungasanga ŵanthu ŵanandi?—Ŵazgani 2 Timote 4:1, 2.

15. Chifukwa wuli kusambizga ŵanthu Baibolo kukukhumbikwa kuzikira?

¹⁵ Chifukwa wuli kusambizga ŵanthu Baibolo kukukhumbikwa kuzikira? Chifukwa chimoza ntchakuti tikwenera kumovwira msambiri kumanya ivyo Baibolo likusambizga na kuvitemwa. Tikweneraso kumovwira msambiri kumanya na kumutemwa uyo wakalemba Baibolo, Yehova. Padera pa kumusambizga ivyo Yesu wakukhumba ku ŵasambiri ŵake, tikwenera kumovwira umo wangalondezgera ivyo Yesu wakasambizganga. Tikwenera kumovwira mwakuzikira msambiri apo wakuyezgayezga kulondezga fundo za mu Baibolo. Ŵanyake ŵakusintha nkharo yawo mu myezi yichoko waka. Apo ŵanyake vikuŵatolera nyengo.

16. Kasi mwasambirako vichi ku ivyo vikachitikira Raúl?

¹⁶ Ivyo vikachitikira mishonale munyake ku Peru vikulongora uwemi wa kuzikira. Mishonale uyu wakuti: “Nkhasambiranga na munthu munyake zina lake Raúl, ndipo nkhasambira nayo mabuku ghaŵiri. Kweni wakaŵa na masuzgo ghakuru. Mbumba yake yikaŵa na masuzgo, wakatukanga, ndipo ŵana ŵake ŵakamuchindikanga yayi chifukwa cha nkharo yake yiheni.” Kweni nyengo zose wakawungananga, ntheura nkhalutilira kumovwira iyo pamoza na mbumba yake. Pakati pajumpha vyaka vitatu, wakabatizika.”

17. Kasi mu nkhani yakulondezgapo tizamuwona vichi?

¹⁷ Yesu wakatiphalira kuti “lutaninge mukazgore ŵanthu ŵa mitundu yose kuŵa ŵasambiri.” Kuti tifiske mulimo uwu, tikwenera kupharazgira ŵanthu awo vigomezgo vyawo vikupambana na vithu. Kweniso tikwenera kupharazgira ŵanthu awo ŵakusopa yayi panji awo ŵakugomezga kuti Chiuta kulije. Mu nkhani yakulondezgapo tizamuwona umo tingapharazgira ŵanthu aŵa.