Tikulekapo Yayi Kupharazga
1. Kasi tikumanya wuli kuti Ŵakhristu ŵakwambilira ŵakalekapo yayi kupharazga?
1 Ŵakhristu ŵakwambilira ŵakapharazganga makani ghawemi “kwambura kuleka” kulikose uko ŵanthu ŵakasangikanga. (Mil. 5:42) Ntheura nchambura kupulikikwa kughanaghana kuti apo ŵakalutanga kukapharazga nyumba na nyumba, ŵakajumphanga waka ŵanthu mu nthowa kwambura kuŵapharazgira. Nakuti ŵakalekangapo yayi kupharazga mwamwaŵi nanga mphakugura vinthu mu misika kwali mpha nyengo yakuti ŵamara kupharazga. Nga ni Yesu, Ŵakhristu ŵakwambilira ŵakalekapo yayi kupharazgira ŵanthu nanga mpha nyengo yakupumura.—Mrk. 6:31-34.
2. Nchivici cikulongora kuti tikucita vinthu mwakuyana na zina lithu?
2 Kuŵa Ŵakunozgeka Nyengo Zose: Zina lithu, lakuti Ŵakaboni ŵa Yehova, likuphara waka ivyo tikucita yayi kweni likuphara vinandi vya ise. (Yes. 43:10-12) Lekani nyengo zose tikuŵa ŵakunozgeka kuvikilira cigomezgo cithu, nanga ni apo tikupharazga ku nyumba na nyumba yayi. (1 Pet. 3:15) Kasi mukuwonerathu vinthu ivyo vingamupani mpata wakuti mupharazge mwamwaŵi na kughanaghanira ivyo mungayowoya? Kasi mukuyeghako mabuku kuti mugaŵire ŵanthu ŵakunweka? (Zinth. 21:5) Kasi mukupharazga ku nyumba na nyumba pera, panji mukupharazga kulikose uko kukusangika ŵanthu?
3. Cifukwa wuli kupharazga mu misewu, mwakwimika magalimoto, mu malo ghakucezgera, ku misika, na malo ghanyake nkhwakuzirwa?
3 Kupharazga “Pakweru”: Tikupharazga mu misewu, mwakwimika magalimoto, mu malo ghakucezgera, ku misika, na mu malo ghanyake. Kasi maupharazgi agha ghali kumara nchito, ngacilendo, panji ngakuti munthu wacite kusankhapo? Mpositole Paulosi wakayowoya kuti wakapharazganga “pakweru” na ku nyumba na nyumba. (Mil. 20:20) Kupharazga nyumba na nyumba ni nthowa yakukhumbikwa kweniso yakovwira comene kuti tifikire ŵanthu na uthenga wa Ufumu. Ndipouli, Ŵakhristu ŵakwambilira ŵakapharazgiranga ŵanthu, nyumba yayi. Pa mpata uliwose ŵakayowoyanga unenesko ku ŵanthu; kwali mphakweru, mwamwaŵi, na ku nyumba na nyumba. Mphanyi nase tacita mwakuyana waka kuti tifiske uteŵeti withu mwakukwana.—2 Tim. 4:5.