Ponyani Mwamahara
1. Kasi tingalondezga wuli fundo iyo yili pa 1 Ŵakorinte 9:26 pa mulimo wa kupharazga?
1 Mpositole Paulosi wakalemba kuti: “Umo nkhucimbilira kuti nkhuwulawula waka cara; umo nkhuponyera mafayiti ghane nkhuponya kuti nileke kutimba mu mphepo.” (1 Kor. 9:26) Paulosi wakang’anamuranga kuti wakaŵika mahara pa cinthu cimoza ndipo wakakhumbanga kuteŵetera Yehova na mtima wose. Ndipouli, fundo iyi yikovwiraso pa mulimo wa kupharazga. Kuti ticite makora mulimo uwu, tikukhumbikwira kuponya “mafayiti” panji kugwiliskira nchito nkhongono zithu mwamahara. Tingacita wuli?
2. Pakuyezga Paulosi na ŵapharazgi ŵanyake ŵakale, tingacita wuli pa nkhani ya nyengo na malo agho tamupharazgako?
2 Lutani Uko Kuli Ŵanthu: Paulosi na ŵapharazgi ŵanyake ŵakale ŵakapharazganga uko kukasangikanga ŵanthu. (Mil. 5:42; 16:13; 17:17) Mu cigaŵa cithu, usange ŵanthu ŵanandi ŵakusangika pa nyumba kumise, ipo yingaŵa nyengo yiwemi comene yakupharazgira nyumba na nyumba. Kasi pa siteji pakusangika ŵanthu ŵanandi nyengo ya mulenji panji mise para ŵanthu ŵakuluta ku nchito na para ŵakuwerako? Kasi ni nyengo wuli iyo mu misika na masitoro mukuzura ŵanthu? Upharazgi wa mu msewu ungaŵa wacandulo comene pa nyengo izi.
3. Kasi tingaponya wuli mafayiti mwamahara para tikupharazga mu cigaŵa cithu?
3 Pharazgani Mwamahara mu Cigaŵa Cinu: Tikwenera kucita mwamahara pakupharazga mu cigaŵa cithu kuti tileke kuponya mafayiti mu mphepo. Mwaciyelezgero, m’malo mwakuti muŵe na gulu likuru la ŵapharazgi pa malo ghamoza, ico cingakhumbikwira nyengo pakulongozga kuti wose ŵaŵe na vyakucita, ipo cingaŵa ciwemi kuligaŵa mu magulu ghacokoghacoko. Mwakuyana waka, para tikupharazga mu vigaŵa vya ku mizi, tingakwaniska luŵiro kupharazga mu cigaŵa ico tapika para tikupharazga mu magulu ghacokoghacoko, ndipo tingaŵaso na nyengo yakuti tikapharazge ku vigaŵa vinyake. Kasi tingapempha yayi cigaŵa cakupharazgako kufupi na uko tikukhala kuti nyengo yileke kumalira kwenda?
4. Nchivici cingatovwira kuti tisange candulo pakuŵa “ŵalovi ŵa ŵanthu”?
4 Yesu wakayaniska ŵapharazgi na “ŵalovi ŵa ŵanthu.” (Mrk. 1:17) Cilato cikuru ca mulovi nkhuponya mukwawu mu maji yayi, kweni kukora somba. Ntheura, ŵalovi ŵakuluta uko ŵakumanya kuti ŵamusanga somba, ndipo nyengo yeneyiyo ŵakwamba kuloŵa. Enya, ŵakuponya mafayiti mwamahara. Mphanyi nase tatokatoka mwamahara mu uteŵeti.—Heb. 6:11.